གསར་སྤེལ་ཁུལ(གླིང་ཁུལ)ནི་དངོས་ཚན་དཔལ་འབྱོར་གྱི་འདེགས་སྐྱོར་བརྟན་པོ་ཞིག་ཡིན། ཉེ་བའི་ལོ་ཤས་རིང་། རང་ལྗོངས་ཀྱིས་གླིང་ཁུལ་དཔལ་འབྱོར་དེ་དེང་རབས་ཅན་གྱི་ཐོན་ལས་མ་ལག་འཛུགས་པའི་སྒུལ་ཤུགས་གཙོ་བོ་དང་། སྒྱུར་བཅོས་སྒོ་དབྱེ་གཏིང་ཟབ་ཏུ་གཏོང་བའི་གཡུལ་ས་གཙོ་བོ། མི་རིགས་ཁག་དབར་འགྲོ་འོང་སྤེལ་རེས་དང་མཉམ་འདྲེས་ལ་སྐུལ་འདེད་གཏོང་བའི་ལས་སྟེགས་གཙོ་བོ་བཅས་ལ་བརྩིས་ཏེ་བརྒྱུད་རིམ་ལྡན་པའི་འཆར་འགོད་དང་གསར་གཏོད་ཀྱི་ལག་ལེན་བྱས་པ་བརྒྱུད། ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྒུལ་ཤུགས་རྒྱུན་མཐུད་བསྣན་ཡོད། “ལོ་ལྔ་ཚན་བཅུ་བཞི་པའི”དུས་མཇུག་བར། རང་ལྗོངས་ཀྱིས་རྒྱལ་ཁབ་རིམ་པའི་གསར་སྤེལ་ཁུལ་4དང་རང་སྐྱོང་ལྗོངས་རིམ་པའི་གསར་སྤེལ་ཁུལ(གླིང་ཁུལ)10བཙུགས་པ་དེ་དག་གིས་ལྗོངས་ཡོངས་ཀྱི་རྒྱལ་ཁབ་ས་ཆའི་རྒྱ་ཁྱོན་གྱི་ཁྲི་ཆ་གཅིག་ཙམ་ཟིན་པ་དང་ཐོན་སྐྱེད་རིན་ཐང་བསྡོམས་འབོར་གྱི་10%ཙམ་དང་། ཁྲལ་བསྡུ་དང་ཕྱིར་གཏོང་ནང་འདྲེན་དངུལ་འབོར་གྱི་80%ལྷག་བཟུང་བ་དང་ཆབས་ཅིག ལྗོངས་ཡོངས་ཀྱི་མཐོ་གསར་ལག་རྩལ་ཁེ་ལས་ཀྱི་90%ལྷག་འདུས་ནས། རང་ལྗོངས་ཀྱི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་སྒུལ་ཤུགས་གཙོ་བོར་གྱུར་ཡོད་པ་རེད།

ཚན་རིག་དང་མཐུན་པའི་འཆར་འགོད་བྱས་པས་གླིང་ཁུལ་གྱི་གཡུལ་ས་གཙོ་བོའི་གནས་བབ་ཉིན་རེ་བཞིན་བརྟན་དུ་ཕྱིན་པ།

གླིང་ཁུལ་གཅིག་གིས་ཐོན་ལས་འཁོར་འབྲེལ་གཅིག་ལ་སྐུལ་ཁྲིད་བྱེད་ཐུབ། ཇོ་མོ་གླང་མ་རིག་གནས་ཡུལ་སྐོར་བསམ་བཀོད་གླིང་དང་། ལྷ་ས་དཔལ་འབྱོར་ལག་རྩལ་གསར་སྤེལ་ཁུལ། ལྷ་ས་ཕྱོགས་བསྡུས་སྒོ་ཁྲལ་མེད་ཁུལ་སོགས་མཚོན་བྱེད་རང་བཞིན་གྱི་གླིང་ཁུལ་མགྱོགས་མྱུར་དར་རྒྱས་བྱུང་བས་ཐོན་ཁུངས་དང་། འགག་སྒོ། རིག་གནས་ཡུལ་སྐོར་བཅས་དཔལ་འབྱོར་ཁྱབ་ཁོངས་ཆེན་པོ་གསུམ་སྦྲེལ་མཐུད་ནུས་ལྡན་ཐུབ་ནས། ས་མཐོའི་དེང་རབས་ཐོན་ལས་འཕེལ་རྒྱས་ཀྱི་སྒུལ་ཤུགས་ཆེས་ཆེར་འཕེལ་ཡོད།

“ལོ་ལྔ་ཚན་བཅུ་བཞི་པའི”ཚུན་དུ། ལྗོངས་ཡོངས་ཀྱི་གླིང་ཁུལ་གྱི་བཟོ་ལས་ཐོན་སྐྱེད་རིན་ཐང་བསྡོམས་འབོར་ཆ་སྙོམས་ལོ་རེའི་འཕར་ཚད་20%ཙམ་རྒྱུན་འཁྱོངས་ཐུབ་ཡོད། 2024ལོར། གཙོ་གནད་གླིང་ཁུལ་གྱི་བཟོ་ལས་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་བརྒྱ་ལས་ཐེངས་དང་པོར་བརྒལ་བ་དང་། ལྗོངས་ཡོངས་ཀྱི་གསར་སྤེལ་ཁུལ་གྱི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་327.47ཟིན་ཡོད། སྔོན་དཔག་བྱས་ན་2025ལོར་གཙོ་གནད་གླིང་ཁུལ་གྱི་བཟོ་ལས་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་105ཟིན་རྒྱུ་ཡིན་པ་རེད།

ལྷ་ས་དཔལ་འབྱོར་ལག་རྩལ་གསར་སྤེལ་ཁུལ་གྱིས་བཟའ་བཏུང་དང་། སྨན་རྫས། ལྗང་མདོག་བཟོ་ལས་སོགས་ཀྱི་ཁྱབ་ཁོངས་ལ་དམིགས་པ་དང་། རིམ་རྩིས་བརྒྱབ་ན་ཁེ་ལས་ཆིག་ཁྲི་ཙམ་ཐོ་འགོད་བྱས་ཏེ། བདུད་རྩི་རྟགས་ཅན་གྱི་བོད་སྨན་གྱིས་མཚོན་པའི་སྐྱེ་དངོས་སྨན་རྫས་དང་ས་མཐོའི་གཅེས་ནོར་གྱིས་ཚད་ཤིང་དུ་བྱས་པའི་ས་གཙང་བདེ་ཐང་སོགས་ཁྱད་ལྡན་ཐོན་ལས་ཚོ་འདུས་ཆེན་པོ་6གྲུབ་ཡོད་པ་རེད། སྐྱིད་གྲོང་མཐའ་མཚམས་དཔལ་འབྱོར་མཉམ་ལས་ཁུལ་གྱིས་ཞིང་འབྲོག་ཐོན་རྫས་ལས་སྣོན་དང་། ཨེ་ཤེ་ཡ་ལྷོ་མའི་ཟོག་འགྲུལ་དང་དེ་བཞིན་འཕྲུལ་གློག་ཕྱིར་གཏོང་བཅས་གཙོ་གནད་ཐོག་འཕེལ་རྒྱས་བཏང་བ་རེད།

ལྷ་ས་མཐོ་གསར་ཁུལ་གྱིས་གྲངས་འཛིན་དཔལ་འབྱོར་གཙོ་གནད་ཐོག་འཕེལ་རྒྱས་གཏོང་གི་ཡོད་པ་དང་། ལྷ་ས་མཐོ་གསར་ཁུལ་གྱི་གཞི་ཁྱོན་ཡན་གྱི་གྲངས་འཛིན་དཔལ་འབྱོར་ཁེ་ལས་ཀྱིས་གྲོང་ཁྱེར་ཡོངས་ཀྱི་55%བཟུང་ནས་ས་མཐོའི“གྲངས་འཛིན་རོང”དུ་འགྱུར་བཞིན་ཡོད་པ་རེད།

མིག་སྔར། ལྗོངས་ཡོངས་ཀྱི་གླིང་ཁུལ་དུ་ཐོ་འགོད་བྱས་པའི་ཁེ་ལས་ཁྲི་3.8ལྷག་ཙམ་ཟིན་པ་དེའི་ཁྲོད་དུ་གཏེར་རྫས་དང་། བཟའ་བཅའ། ཚོང་དོན། ལག་ཤེས་བཟོ་ལས། སྐྱེ་དངོས་ཚན་རྩལ། སྒྲིག་ཆས་བཟོ་སྐྲུན་སོགས་ལས་རིགས་མང་པོ་ཚུད་ཡོད་པ་དང་། རྒྱལ་ཁབ་རིམ་པའི་གླིང་ཁུལ་གྱི་ཐོན་སྐྱེད་རིན་ཐང་གིས་ལྗོངས་ཡོངས་ཀྱི་གླིང་ཁུལ་གྱི་ཐོན་སྐྱེད་རིན་ཐང་བསྡོམས་འབོར་གྱི་40%ཙམ་བཟུང་ཡོད།

ལམ་སྲོལ་གསར་གཏོད་བྱས་ནས་གླིང་ཁུལ་འཕེལ་རྒྱས་ཀྱི་བར་མཐོངས་གསར་པ་རྒྱ་སྐྱེད་བཏང་བ།

བོད་མཚོ་བཟོ་ལས་གླིང་དུ་བོད་ལྗོངས་ལིའུ་ཧོ་རྫས་འགྱུར་བཟོ་ལས་འཕེལ་རྒྱས་ཚད་ཡོད་ཀུང་སིའི་ཐོན་སྐྱེད་ཀྱི་འཐབ་ས་དང་པོར་ལས་བྲེལ་ཆེ་བའི་རྣམ་པ་མཐོང་ཐུབ། ཀུང་སིའི་སྤྱི་ཁྱབ་ཅིང་ལི་གཞོན་པ་ཁྲིན་ཕིང་པུའོ་ཡིས། “2014ལོར་དེ་གར་ད་དུང་བྱེ་མས་ཁེངས་ཡོད”ཅེས་བཤད། ལོ་བཅུ་ལྷག་ཙམ་རིང་། བྱེ་ཐང་སྔོ་ལྗང་དུ་གྱུར་ནས་ཀུང་སིའི་ཐོན་སྐྱེད་རིན་ཐང་ཐོག་མའི་དུས་ཀྱི་སྒོར་ཁྲི་5000ནས་ད་ཆའི་སྒོར་དུང་ཕྱུར་2ལྷག་ཙམ་བར་འཕར་བ་དང་ཆབས་ཅིག གླིང་ཁུལ་དུ་མདོག་ལྡན་ལྕགས་རིགས་དང་། ཚྭ་མཚོ། ནུས་རྒྱུ་གསར་པ་སོགས་ཐོན་ལས་སྣ་མང་འདུས་ཡོད་པ་རེད།

ས་གྲོལ་དཔལ་འབྱོར་ཇི་ལྟར་བྱས་ན་འཕེལ་རྒྱས་དེ་ལས་ཡག་པ་འགྲོ་ཐུབ་བམ་ཞེ་ན། རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པ་འཚོགས་ཚུན་དུ། རང་ལྗོངས་ཀྱིས་གླིང་ཁུལ་སྒྲོལ་བ་དང་། རྫོང(གྲོང་ཁྱེར་དང་ཆུས)སྒྲོལ་བ། གྲོང་ཁྱེར་དང་ས་ཁུལ་སྒྲོལ་བ་བཅས་ཀྱི་མཉམ་ལས་མཉམ་སྐྲུན་ལ་སྐུལ་ལྕག་ཧུར་ཐག་བཏང་ནས་ས་ཁོངས་ཀྱི་བཀག་རྒྱ་གཏོར་བ་དང་ཆབས་ཅིག ཐོན་ལས་གཅིག་སྡུད་དང་མཉམ་ལས་འཕེལ་རྒྱས་ལ་སྐུལ་འདེད་བཏང་ནས་ས་ཁོངས་སྒྲོལ་བའི་ཁེ་ཕན་མཉམ་སྤྱོད་བྱེད་སྟངས་གསར་པ་བཏོད་པས། གླིང་ཁུལ་འཕེལ་རྒྱས་ལ་སྣ་མང་མཉམ་འདྲེས་ཀྱི་རྣམ་པ་མངོན་ཡོད།

རང་སྐྱོང་ལྗོངས་ཚོང་དོན་ཐིང་ཕྱི་རྒྱལ་མ་དངུལ་དང་ཕྱི་ཕྱོགས་དཔལ་འབྱོར་ཁྲུའུ་ཡི་ཁྲུའུ་ཀྲང་གཞོན་པ་ཏུའུ་ཀང་གིས། “ལྷ་ས་ཕྱོགས་བསྡུས་སྒོ་ཁྲལ་མེད་ཁུལ་ཁོ་ནས་ས་གྲོལ་དཔལ་འབྱོར་འཕེལ་རྒྱས་བཏང་བ་བརྒྱུད། པེ་ཅིང་དང་ནན་ཅིང་སོགས་ལྗོངས་ཕྱིའི་ཐོན་ལས་ལྟེ་གནས་4ལ་བརྟེན་ནས‘བོད་ཟོག་བོད་ཐོན’ལ་སྐུལ་ཁྲིད་བྱེད་ཀྱི་ཡོད”ཅེས་བཤད།

སྒོ་དབྱེ་མཉམ་འདྲེས་བྱས་ནས་ཨེ་ཤེ་ཡ་ལྷོ་མར་ཕྱོགས་པའི་སྒོ་དབྱེའི་བགྲོད་ལམ་གསར་པ་བཏོད་པ།

2025ལོའི་ཟླ་བ་དྲུག་པར། སྐྱིད་གྲོང་འགག་སྒོ་ནས་རླངས་འཁོར་རིག་ནུས་གཱ་སྒོ་བརྒྱུད་མགྱོགས་མྱུར་སྒྲོལ་ཐུབ་ཀྱི་ཡོད། གཞིས་རྩེ་གྲོང་ཁྱེར་སྐྱིད་གྲོང་མཐའ་མཚམས་དཔལ་འབྱོར་མཉམ་ལས་ཁུལ་གྱི་ཏང་གི་ལས་དོན་ཨུ་ལྷན་གྱི་ཨུ་ཡོན་དང་དོ་དམ་ཨུ་ལྷན་གྱི་ཀྲུའུ་རེན་གཞོན་པ་ལིའུ་ཧོན་ཧྥུང་གིས། “ང་ཚོས་གཞིས་རྩེ་དེ་ཉིད་རྒྱལ་སྤྱིའི་སྐམ་སའི་འགག་སྒོ་འཛུགས་སྐྲུན་བྱེད་པར་གཞོགས་འདེགས་ཧུར་ཐག་བྱེད་ཀྱི་ཡོད། གཞུང་ལམ་དང་ལྕགས་ལམ་གཉིས་ཀས་མཉམ་འདྲེན་བྱས་པ་བརྒྱུད་ཟོག་འགྲུལ་མ་གནས་དམའ་རུ་བཏང་ཡོད། ཞིབ་བཤེར་ལྷུ་ཚིགས་ཁག་གཅིག་གཞིས་རྩེར་བཀོད་སྒྲིག་བྱས་ནས་བརྒྱུད་རིམ་ཧྲིལ་པོར་ལྟ་འདོམས་ཀྱིས་འགག་སྒྲོལ་ལས་ཕྱོད་ཆེ་རུ་ནུས་ལྡན་བཏང་ཡོད”ཅེས་ངོ་སྤྲོད་བྱས།

“ལོ་ལྔ་ཚན་བཅུ་བཞི་པའི”རིང་། རང་སྐྱོང་ལྗོངས་ཀྱིས་དམིགས་བསལ་གྱི་ས་བབ་ལེགས་ཆར་བརྟེན་ནས་མཐའ་རྒྱུད་སྒོ་དབྱེ་གླིང་ཁུལ་གྱི་རྣམ་པ་གསར་པ་ཧུར་ཐག་བཏོད་དེ་སྐྱིད་གྲོང་མཐའ་མཚམས་དཔལ་འབྱོར་མཉམ་ལས་ཁུལ་དང་ལྷ་ས་ཕྱོགས་བསྡུས་སྒོ་ཁྲལ་མེད་ཁུལ་ཏེ་རྒྱལ་ཁབ་རིམ་པའི་གླིང་ཁུལ་གཉིས་སྔ་རྗེས་སུ་བཙུགས་པ་དང་ཆབས་ཅིག ལྗོངས་ཡོངས་ཀྱི་རྒྱལ་སྒྲོལ་དྲ་ཐོག་ཚོང་དོན་ཐོན་ལས་གླིང་ཐོག་མ་བཙུགས་པ་ལྷ་ས་དང་། གཞིས་རྩེ། ལྷོ་ཁ། ཉིང་ཁྲི། ཆབ་མདོ་སོགས་ལ་ཁྱབ་ནས། ས་ཁོངས་འཕེལ་རྒྱས་དང་སྒོ་དབྱེ་ཟབ་གཏོང་ལ་འདེགས་སྐྱོར་ནུས་ལྡན་ཐུབ་ཡོད།

ཚོང་དོན་གླིང་ཁུལ་ཁག་གིས་རིམ་རྩིས་བརྒྱབ་ན། ཕྱི་དངུལ་ཁེ་ལས་200ལྷག་ནང་འདྲེན་བྱས་ཤིང་དོན་དངོས་ཐོག་ཕྱི་དངུལ་བེད་སྤྱོད་བྱེད་ཚད་ཨ་སྒོར་དུང་ཕྱུར་4.62ལྷག་ཟིན་ཡོད། 2025ལོའི་ཟླ་བ་དང་པོ་ནས་བཅུ་པའི་བར། ལྷ་ས་དཔལ་འབྱོར་ལག་རྩལ་གསར་སྤེལ་ཁུལ་དང་ལྷ་ས་ཕྱོགས་བསྡུས་སྒོ་ཁྲལ་མེད་ཁུལ་གྱི་ཕྱིར་གཏོང་ནང་འདྲེན་བསྡོམས་འབོར་སྒོར་དུང་ཕྱུར་35.31ཟིན་པ་དེས་ལྗོངས་ཡོངས་ཀྱི་ཉོ་ཚོང་བསྡོམས་འབོར་གྱི་58.34%བཟུང་ནས། གླིང་ཁུལ་དེ་དག་རང་ལྗོངས་ཀྱི་ཕྱི་ཕྱོགས་སྒོ་དབྱེའི་སྐར་ཁུང་གལ་ཆེན་དུ་གྱུར་ཡོད་པ་རེད།