གསར་འགོད་པར་རང་སྐྱོང་ལྗོངས་དཔལ་འབྱོར་དང་ཆ་འཕྲིན་ཐིང་ནས་ཤེས་རྟོགས་བྱུང་བར། “ལོ་ལྔ་ཚན་བཅུ་བཞི་པའི”རིང་། རང་ལྗོངས་ཀྱིས་གྲངས་འཛིན་ཁེ་ལས་ལྡབ་འཕར་འདུ་འགོད་ལག་བསྟར་ཤུགས་ཆེན་བྱས་ཏེ་གྲངས་འཛིན་ཁེ་ལས་རྩེ་གྲས་རྒྱུན་མཐུད་འཕེལ་རྒྱས་འགྲོ་བར་སྐུལ་འདེད་བཏང་ཞིང་། 2025ལོའི་ཟླ་11པའི་བར། ལྗོངས་ཡོངས་སུ་གྲངས་འཛིན་དཔལ་འབྱོར་གྱི་གཞི་ཁྱོན་ཡན་གྱི་ཁེ་ལས་62ཟིན་པ་དེ་2020ལོ་ལས་37%འཕར་ཡོད། ལྷ་ས་མཐོ་གསར་ཁུལ་དུ་གྲངས་འཛིན་དཔལ་འབྱོར་གྱི་གཅིག་སྡུད་ཁུལ་བསྐྲུན་པ་ལས། རིམ་རྩིས་བརྒྱབ་ན། གྲངས་འཛིན་དཔལ་འབྱོར་རིགས་ཀྱི་ཁེ་ལས་ཐོ་བཀོད་བྱེད་མཁན་2800ལྷག་ཙམ་ཟིན་ནས། ལོ་རེར་ཆ་སྙོམས་གཉེར་སྐྱོང་ཡོང་འབབ་སྒོར་དུང་ཕྱུར་70ཙམ་བྱུང་ཡོད།

ཤེས་རྟོགས་བྱུང་བར་གཞིགས་ན། “ལོ་ལྔ་ཚན་བཅུ་བཞི་པའི”རིང་། རང་ལྗོངས་ཀྱིས་འཆར་འགོད་སྔོན་དང་ཇུས་འགོད་རྗེས་ཀྱི་སྣེ་ཁྲིད་མཐའ་འཁྱོངས་བྱས་ཏེ། རྩེ་རིམ་ཇུས་འགོད་ལ་རྒྱུན་ཆད་མེད་པར་ཤུགས་སྣོན་བརྒྱབ་ནས《བོད་རང་སྐྱོང་ལྗོངས་ཀྱི་གྲངས་འཛིན་དཔལ་འབྱོར་འཕེལ་རྒྱས་འཆར་འགོད(2020ལོ་ནས་2025ལོ་བར)》དང《བོད་རང་སྐྱོང་ལྗོངས་ཀྱི་གྲངས་འཛིན་དཔལ་འབྱོར་འཕེལ་རྒྱས་ཀྱི་ལག་བསྟར་ཇུས་གཞི(2022ལོ་ནས་2025ལོ་བར)》 《གྲངས་འཛིན་བོད་ལྗོངས་འཛུགས་སྐྲུན་གྱི་བྱ་སྤྱོད་འཆར་གཞི(2022ལོ་ནས་2025ལོ་བར)》སོགས་ཡིག་ཆ་རབ་དང་རིམ་པ་སྔ་རྗེས་སུ་བཏོན་ཏེ། “ལོ་ལྔ་ཚན་བཅུ་བཞི་པའི”རིང་གི་གྲངས་འཛིན་བོད་ལྗོངས་འཛུགས་སྐྲུན་དང་གྲངས་འཛིན་དཔལ་འབྱོར་འཕེལ་རྒྱས་ཀྱི་དམིགས་ཚད་ལས་འགན་ཁ་གསལ་བཟོས་པ་མ་ཟད། “ལོ་ལྔ་ཚན་བཅོ་ལྔ་པའི”རིང་གི་གྲངས་འཛིན་བོད་ལྗོངས་འཛུགས་སྐྲུན་དང་གྲངས་འཛིན་དཔལ་འབྱོར་འཕེལ་རྒྱས་ཀྱི་འཆར་འགོད་བཟོ་བའི་ལས་དོན་སྤེལ་ནས། གྲངས་འཛིན་དཔལ་འབྱོར་འཕེལ་རྒྱས་ཆེད་ལམ་ལུགས་ཀྱི་རྨང་གཞི་བརྟན་དུ་བཏང་ཡོད།

གཞན་ཡང་། རང་ལྗོངས་ཀྱིས་གྲངས་འཛིན་ཅན་གྱི་ཉེར་སྤྱོད་ཚད་གཞི་མུ་མཐུད་བཏོད་པས། རྣམ་གྲངས་ཁག་20ལྷག་ཙམ་རྒྱལ་ཁབ་པུའུ་ཨུད་ཀྱི་གྲངས་འཛིན་ལག་རྩལ་ཐད་ཀྱི་ཉེར་སྤྱོད་དཔེ་མཚོན་ནམ་ཡང་ན་དཔེ་སྟོན་འདུ་འགོད་དུ་བདམས་ཡོད། ས་གནས་དེ་གའི་གྲངས་འཛིན་དཔལ་འབྱོར་ཁེ་ལས་ཀྱི་འདེགས་སྐྱོར་ནུས་པ་ཟམ་མི་ཆད་པར་ཆེ་རུ་ཕྱིན་ནས། ཐོན་ལས་གཅིག་སྡུད་དང་མཐུན་སྦྱོར་འཕེལ་རྒྱས་ཀྱི་རྣམ་པ་བཟང་པོ་ཞིག་རིམ་བཞིན་ཆགས་ཡོད་པ་རེད།