འདི་ནི་མ་ལུང་དགུ་ཐང་བདག་སྐྱོང་ས་ཚིགས་ཀྱི་ལས་དོན་པས་སྐོར་སྲུང་བྱེད་སྐབས་འབྲི་ཆུའི་ཆུ་ཐིགས་ཐོག་མའི་རྡོ་རིང་གི་མདུན་དུ་བརྒྱབ་པའི་མཉམ་པར་ཡིན་པ། (རིན་ཆེན་རྒྱ་མཚོས་པར་མཁོ་འདོན་བྱས)

བྱང་ཐང་སྐོར་སྲུང་ཉིན་ཐོ།

དེ་རིང་གི་གཏམ་རྒྱུད་ནི་ཨ་མདོ་རྫོང་གདང་ལ་སྒྲིག་གཤོམ་ཁང་ནས་འགོ་འཛུགས།

འགྲེམས་སྟོན་ཚོམས་ཁང་དུ་སྐྱོད་སྐབས་ཤེས་རིག་གི་འཕེལ་རྒྱུན་དང་། འབྱུང་ཁུངས་གཅིག་མཐུན། འབྲོག་གླུ་སོགས་འགྲེམས་སྟོན་རིགས་ཁག་དྲུག་རིམ་པ་བཞིན་བཟོས་ཡོད་པ་དང་། འདྲ་པར་540དང་། ཅ་དངོས་211 བསྐྱར་བཟོའི་ཡུལ་ལྗོངས་4བཅས་ལས་མང་ཆེ་བ་སྤྱི་དམངས་ཀྱིས་མཐོང་ཐེངས་དང་པོ་རེད།

ལྟ་སྐོར་མཇུག་འགྲིལ་རྗེས། མ་ལུང་དགུ་ཐང་བདག་སྐྱོང་ས་ཚིགས་ཀྱི་ཀྲན་ཀྲང་རིན་ཆེན་རྒྱ་མཚོ་སླར་ཡང་གསའ་ཞིག་གི་དངོས་དཔེའི་མདུན་དུ་བསྐྱོད་ནས་ཡུན་རིང་བསྡད།

“གསའ་འདི་ནི་ང་ཚོ་བདག་སྐྱོང་ས་ཚིགས་ཀྱིས་སྤྲད་པ་དེ་འདྲ་པོ་འདུག”ཁོང་ཤེལ་སྒོའི་ཐག་ཉེ་སར་བཅར་ནས་གསའི་སྐེ་ལ་མཛུབ་མོ་བཙུགས་ཏེ“རྨ་ཤུལ་འདིར་བལྟས་ན་འདོགས་ཁྱིས་རྨུགས་པ་འདྲ། ད་ཆ་འདི་ནི་གདང་ལ་བྱང་རྒྱུད་ས་ཁོངས་ཀྱི་རི་སྐྱེས་སྲོག་ཆགས་ཀྱི་སྣ་མང་རང་བཞིན་མངོན་པའི་མཚོན་བྱེད་དུ་གྱུར་ཡོད”ཅེས་ཁོང་གིས་བརྗོད།

སྐད་ཅིག་མ་དེའི་དབང་གིས་ངས་རིན་ཆེན་རྒྱ་མཚོ་དང་མཉམ་དུ་དེ་རིང་ཆུ་ཚོད་དགུའི་རིང་གི་སྐོར་སྲུང་ལམ་དུ་སྐྱོད་རྒྱུའི་སེམས་ཐག་བཅད་པ་ཡིན། གསའ་དེའི་སྐོར་གླེང་ན་2019ལོའི་ཉིན་ཞིག་ནས་བཤད་དགོས། དེ་དུས་འབྲོག་པ་ཞིག་གིས་རང་ཁྱིམ་གྱི་ལུག་རའི་ནང་གསའ་ཞིག་འཛུལ་ནས་ལུག་གཉིས་ལ་རྨུགས་ཏེ་བསད་པ་དང་། གསའ་དེའང་རང་ཁྱིམ་གྱི་འདོགས་ཁྱི་གསུམ་གྱིས་རྨུགས་ནས་བསད་འདུག་ཅེས་སྙན་སེང་ཞུས་པ་རེད།

“གསའ་འདོགས་ཁྱི་ལས་ཕམ་འདུག”ང་རང་དབང་མེད་དུ་ཧང་སངས་པར་གྱུར།

རིན་ཆེན་རྒྱ་མཚོས་གསའ་གྲོད་པ་འགྲངས་ནས་འགུལ་སྐྱོད་དལ་བ་དང་འཐབ་འཛིང་ནུས་པ་ཆེས་ཞན་པས་ཡིན་ཤས་ཆེ་ཞེས་འཛུམ་བཞིན་བཤད་ཅིང་། ཁོང་ཚོས་གསའ་དེ་རྫོང་ནགས་ལས་དང་རྩྭ་ཐང་ཅུས་ལ་རྩིས་སྤྲད་པ་དང་། ད་ཆ་རྒྱུས་མངའ་ཆེ་བའི་རྨུགས་ཤུལ་དེ་སླར་ཡང་མཐོང་སྐབས་གཞི་ནས་དེ་ཚན་རིག་ཁྱབ་གདལ་གྱི་དངོས་དཔེར་གྱུར་པ་ཤེས།

རིན་ཆེན་རྒྱ་མཚོ་ནི་དམར་ཆུ་ཤང་རུབ་ལྷས་གྲོང་ཚོ་ནས་ཡིན། 2016ལོར་བདག་སྐྱོང་ས་ཚིགས་སུ་ཞུགས་རྗེས། ཁོང་གིས་གྲོང་ཚོའི་ནང་ཏང་ཡོན་དང་བླངས་སྐྱེ་ཁམས་ཞབས་ཞུ་རུ་ཁག་འཛུགས་པའི་གྲོས་འགོ་བཏོན་པ་དང་གྲོང་ཚོ་དེའི་ཏང་ཡོན་25ཡིས་གྲོས་འགོ་དེ་ཐོས་རྗེས་ཚང་མ་རང་མོས་ངང་ཞུགས་པ་རེད།

“བདག་སྐྱོང་པ་བྱས་ནས་ལོ་10སོང་རིང་། རི་སྐྱེས་སྲོག་ཆགས་ཀྱི་གྲངས་འབོར་ནི་མིག་མཐོང་ལག་ཟིན་གྱིས་མང་དུ་ཕྱིན་པ་མ་ཟད། ཉེ་འཁོར་གྱི་སྲུང་སྐྱོབ་སྟོབས་ཤུགས་ཀྱང་ཇེ་ཆེར་འགྲོ་བཞིན་ཡོད”ཅེས་རིན་ཆེན་རྒྱ་མཚོས་སྒེའུ་ཁུང་ཕྱི་རོལ་གྱི་རི་རྒྱུད་ལ་ལྟ་བཞིན་བཤད་པ་དང་། ཁོང་ན་རེ། “སྐབས་རེར་ང་ཚོ་ཡང་གདང་ལའི་ཆ་ཤས་ཡིན་པའི་སྣང་བ་སྦྱིན་པ་དང་། ང་ཚོ་ནི་རི་ཆུ་སྲོག་ཆགས་དེ་དག་དང་འདྲ་བར་རྣམ་པ་མི་འདྲ་བའི་སྒོ་ནས་ཡུལ་ལུང་འདིར་འཚོ་གནས་བྱེད་པ་ཙམ་ཡིན”ཞེས་ཞི་དུལ་ངང་བརྗོད།

ས་གཞི་མུན་པའི་ཡོལ་བས་བསྒྲིབས་དུས། ང་ཚོ་དེ་རིང་གི་དམིགས་ས་སྟེ་ས་བབ་སྨི་5000ཙམ་ཟིན་པའི་ཨ་མདོ་རྫོང་སེའུ་ཤང་མ་མོ་བཞུས་ནག་བདག་སྐྱོང་ས་ཚིགས་སུ་འབྱོར།

ངས་ཁང་པའི་ནང་འཛུལ་ནས་ཐབ་ཀའི་འགྲམ་དུ་མེ་སྲོ་བཞིན་དུ་རྩོམ་ཡིག་བྲིས། རྩོམ་ཡིག་བྲིས་ཚར་རྗེས་ཕྱི་རོལ་ཏུ་སོང་ནས་ཅུང་ཙམ་འགུལ་སྐྱོད་བྱེད་སྐབས། བདག་སྐྱོང་པ་ཁ་ཤས་ཉལ་ཟིན་པ་དང་ཁོང་ཚོས་ལུས་པོ་ཡོངས་མལ་གཟན་མཐུག་པོའི་ནང་བཅུག་ནས་སྐྲ་ཙམ་མ་གཏོགས་མི་མངོན་ཞིང་ཁོང་ཚོ་ཉལ་སར་ཐབ་མི་འདུག

ང་རང་ཧང་སངས་བཞིན་པའི་སྐབས་དེར་མི་གཅིག་གིས་མལ་གཟན་ནང་ནས་མགོ་བོ་བཏོན་ཏེ་ང་ལ་བལྟས་ནས་འཛུམ་ཙམ་བྱས།

“འཁྱག་གི་མི་འདུག་གམ”

“མལ་གཟན་མཐུག་པོ་ཡིན་པས་འཁྱག་གི་མི་འདུག”ཅེས་ཁོང་གིས་འཛུམ་དམུལ་དམུལ་ངང་ལན་བཏབ།

སྐབས་དེར། ངའི་སེམས་ལ་རང་དབང་མེད་པར་སྐྱོ་སྣང་ཞིག་སྐྱེས་ནས་མགྲིན་པའང་བརྣངས། ང་མགྱོགས་མྱུར་སྒོ་རའི་ནང་བསྐྱོད་པ་ན་གྲང་རླུང་ནི་ཆུ་གྲང་མོ་གདོང་ལ་བཤོས་པ་དང་གཉིས་སུ་མེད་པས་ལུས་པོའི་དྲོད་ཀྱང་སྐད་ཅིག་ཙམ་ལ་ཡལ་སོང་། ཁང་པའི་ནང་དུ་ལོག་སྐབས། མིག་ཤེལ་གྱི་ངོས་སུ་རླངས་པས་ཁེབས་ནས་མིག་མདུན་གྱི་ཡོད་ཚད་རབ་རིབ་ཏུ་གྱུར་ནའང་། བདག་སྐྱོང་པ་རྣམས་ཀྱི་ལྷད་མེད་ཀྱི་འཛུམ་མདངས་ལྷག་པར་གསལ།

ཁོང་ཚོས་འབྲི་ཆུའི་ཆུ་འགོ་ཉིན་མཚན་བལྟོས་མེད་དུ་སྲུང་ཞིང་། ས་མཐོའི་གྲང་ངར་ཆེ་ཞིང་གསོ་རླུང་དཀོན་པའི་གནམ་གཤིས་ལ་ཁ་གཏད་བཅག་ནས་ཉིན་གཅིག་ལ་དཔེ་བླངས་པ་བཞིན་སུས་ཀྱང་དོ་སྣང་མི་བྱེད་པའི་ཐང་སྟོང་དུ་སྐོར་སྲུང་བྱེད་ཀྱི་ཡོད། ཡུལ་ལུང་དེ་གར་དཀའ་སྡུག་ཇི་ཙམ་ཡོད་མེད་ནི་མ་བཤད་ཀྱང་གསལ་པོར་རྟོགས་ཐུབ། གདང་ལའི་ལྷགས་རླུང་དང་འབྲི་ཆུའི་ཆུ་འགོས་ཡུལ་དེའི་དཀའ་ཚེགས་རྟོགས་ལ་ཇེ་མང་དུ་འགྱུར་བའི་རི་སྐྱེས་སྲོག་ཆགས་ཀྱིས་ཀྱང་ཤེས་ཀྱི་ཡོད། འོན་ཀྱང་སྐོར་སྲུང་པ་ཁོང་ཚོའི་མིག་མདངས་ལས་མངོན་པའི་སྤྲོ་སྣང་ཆེན་པོ་དང་བློ་བརྟན་འགྱུར་མེད་ནི་སྔ་མོ་ནས་གངས་རི་དང་ངོ་བོ་གཅིག་ཏུ་འདྲེས་ནས་གདང་ལའི་ཡུལ་ལུང་གི་མཛེས་ཤིང་བརྗིད་ཆགས་པའི་ཉམས་བཟང་དུ་གྱུར་ཡོད།