མཚོ་སྔོན་ཉིན་རེའི་ཚགས་པར་ཐོག་གནས་ཚུལ་སྤེལ་བ་གཞིར་བཟུང་། ཟླ་12ཚེས་15ཉིན། གསར་འགོད་པར་མཚོ་ལྷོ་བོད་རིགས་རང་སྐྱོང་ཀྲོའུ་འཕེལ་རྒྱས་དང་སྒྱུར་བཅོས་ཨུ་ལྷན་ནས་ཤེས་རྟོགས་བྱུང་བར། “ལོ་ལྔ་ཚན་བཅུ་བཞི་པའི”ཚུན་དུ། མཚོ་ལྷོ་ཀྲོའུ་ཡིས་ཕན་ཡོད་མ་འཇོག་རྒྱ་ཆེར་གཏོང་རྒྱུ་འགག་རྩའི་འདེགས་སྐྱོར་དུ་བྱས་པས། རྣམ་གྲངས་མ་འཇོག་གི་ཕན་འབྲས་ཧ་ཅང་ཡག་པོ་ཐོབ་ཡོད་པ་རེད། ད་ལོའི་ཟླ་བཅུ་གཅིག་པའི་བར། ཀྲོའུ་ཡོངས་ཀྱིས“ལོ་ལྔ་ཚན་བཅུ་བཞི་པའི”རིང་གཏན་འཇགས་རྒྱུ་ནོར་ལ་མ་དངུལ་གཏོང་ཚད་སྒོར་དུང་ཕྱུར་1027ཟིན་པ་དང་། དེའི་ནང་ནུས་རྒྱུ་གཙང་མར་མ་དངུལ་སྒོར་དུང་ཕྱུར་749བཏང་བ་དེ“ལོ་ལྔ་ཚན་བཅུ་གསུམ་པ”དང་བསྡུར་ན་12%དང་91%སོ་སོར་འཕར་ཡོད་པ་རེད།

རྣམ་གྲངས་བརྩོན་ལེན་ཐད། ཀྲོའུ་འཕེལ་སྒྱུར་ཨུ་ལྷན་གྱིས་རྒྱལ་ཁབ་དང་ཞིང་ཆེན་རིམ་པའི་འཐབ་ཇུས་སྟོན་ཕྱོགས་དང་རང་འགུལ་ངང་སྦྲེལ་མཐུད་བྱས་ཐོག་སྲིད་ཇུས་ཀྱི་གོ་སྐབས་གལ་ཆེན་དང་དེ་བཞིན་སྐྱེ་ཁམས་སྲུང་སྐྱོང་དང་། ཆུ་བེད། གྲོང་ཁྱེར་གྱི་ཆུ་ལོག་སྔོན་འགོག་དང་འཁྱིལ་ཆུ་ཕྱིར་འབུད། སྤྱི་ཚོགས་བྱ་གཞག་སོགས་ཀྱི་ཞན་ཆར་དམིགས་ནས། དུས་འགོའི་འཆར་འགོད་དང་ཞུ་འབུལ་དོ་དམ་ལ་ཤུགས་སྣོན་བརྒྱབ་པ་དང་། འཕེལ་སྒྱུར་ཨུ་ལྷན་གྱི་ཐབས་ལམ་བརྒྱུད་རྣམ་གྲངས་ཁག་598དོན་འཁྱོལ་བྱས་པར་ཁྱོན་མ་དངུལ་སྒོར་དུང་ཕྱུར་188.58བཏང་བ་དང་། དེའི་ཁྲོད་དུ་ཀྲུང་དབྱང་དང་ཞིང་ཆེན་རིམ་པས་མ་དངུལ་སྒོར་དུང་ཕྱུར་100.93བཏང་བ་དེ“ལོ་ལྔ་ཚན་བཅུ་གསུམ་པ”དང་བསྡུར་ན་25%འཕར་བ་དང་། རྨང་གཞིའི་སྒྲིག་བཀོད་ཁྱབ་ཁོངས་ཀྱི་རྣམ་གྲངས་ཀྱིས་50%ལྷག་ཙམ་ཟིན་ནས་ཆུ་བེད་དང་། འགྲིམ་འགྲུལ། ནུས་རྒྱུ་བཅས་དང་དེ་བཞིན་སྤྱི་པའི་ཞབས་ཞུའི་སྒྲིག་བཀོད་རིམ་སྤོར་ལ་སྐུལ་འདེད་ཐེབས་ཡོད་པ་རེད།