འགག་རྩའི་ལྷུ་ཚིགས་ལ་དམ་འཛིན་བྱས་ནས་གཙོ་གནད་ལས་འགན་མངོན་གསལ་དོད་པོ་ཡོང་བར་བྱེད་དགོས།
——རང་སྐྱོང་ལྗོངས་ཏང་ཨུད་ཀྱི་དཔལ་འབྱོར་ལས་དོན་ཚོགས་འདུའི་དགོངས་དོན་སློབ་སྦྱོང་དང་ལག་བསྟར་བྱེད་པའི་སྐོར་གྱི་གླེང་ཐེངས་གཉིས་པ།
བོད་ལྗོངས་ཉིན་རེའི་ཚགས་པར་གྱི་དཔྱད་གཏམ་མཁན་གྱིས།
“སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བོད་ཀྱི་ལས་དོན་སྐོར་གྱི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལ་བརྟེན་ནས་བོད་ཀྱི་ལས་དོན་གྱི་སྤྱི་ཡོངས་ལ་གཅིག་འདོམས་མཐའ་འཁྱོངས་ཀྱིས་འགག་རྩའི་ལྷུ་ཚིགས་ལ་དམ་འཛིན་དང་གཙོ་གནད་ལས་འགན་མངོན་གསལ་དོད་པོ་ཡོང་བར་བྱས་ཏེ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཧུར་ཐག་གཏོང་དགོས” རང་སྐྱོང་ལྗོངས་ཏང་ཨུད་ཀྱི་དཔལ་འབྱོར་ལས་དོན་ཚོགས་འདུའི་ཐོག་ཀྲུང་དབྱང་གི་དཔལ་འབྱོར་ལས་དོན་ཚོགས་འདུ་དང་ལྷག་པར་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་ལག་བསྟར་གཏིང་ཟབ་བྱས་ནས། ཕྱོགས་ཡོངས་ནས་ཚད་གཞི་དང་ཡང་ཡང་བསྡུར་བ་དང་། དོན་ཚན་རེ་རེ་བཞིན་དོན་ཐོག་ཏུ་འཁྱོལ་བ་དང་ཞིབ་ཚགས་སུ་གཏོང་བ། ཕྱོགས་བདུན་ཐད་ཀྱི་གཙོ་གནད་ལས་འགན་བཀོད་སྒྲིག་བཅས་བྱས་ཏེ། ང་ཚོར་ཁ་ཕྱོགས་གཙོ་བོ་དང་ལག་ལེན་གྱི་ཐབས་ལམ་གསལ་སྟོན་བྱས་ཡོད།
གཙོ་གནད་མངོན་གསལ་དོད་པོ་ཡོང་བ་དང་འགག་རྩའི་ལྷུ་ཚིགས་ལ་དམ་འཛིན་བྱེད་པར་ངེས་པར་དུ་ཕྱོགས་གཉིས་སྨྲ་བ་དང་གཙོ་གནད་སྨྲ་བ་གཉིས་ཀར་མཐོང་ཆེན་བྱེད་དགོས། དཔལ་འབྱོར་ལས་དོན་སྣེ་མང་རྙོག་འཛིང་ཆེ་བས་འགག་རྩར་དམ་འཛིན་བྱས་ཚེ་གཞི་ནས་གཙོ་བོ་བཟུང་ན་ཡན་ལག་ངང་གིས་ཐོན་ཐུབ། རང་སྐྱོང་ལྗོངས་ཏང་ཨུད་ཀྱི་དཔལ་འབྱོར་ལས་དོན་ཚོགས་འདུའི་ཐོག“མ་འཇོག་འཛད་སྤྱོད”དང་། “ཁྱད་ལྡན་ལེགས་ཆའི་ཐོན་ལས” “སྒྱུར་བཅོས་འགག་སྒྲོལ”“དམངས་འཚོ་འགན་ལེན་དང་ལེགས་གཏོང”“མཐུན་སྦྱོར་འཕེལ་རྒྱས”“མཛེས་པའི་བོད་ལྗོངས་འཛུགས་སྐྲུན”“དུས་བདེའི་བོད་ལྗོངས་འཛུགས་སྐྲུན”བཅས་ཕྱོགས་བདུན་གྱི་ཐད་ནས་སང་ལོའི་དཔལ་འབྱོར་ལས་དོན་གྱི་འཆར་གཞི་བཀོད་ཡོད། ལས་འགན་གལ་ཆེན་རབ་དང་རིམ་པའི་མཛུབ་ཁྲིད་བསམ་བློ་དང་སྐུལ་འདེད་གཏོང་ཐབས་ཁ་གསལ་ཞིང་། གཞི་ཆེ་དང་གཞི་ཆུང་ལ་སྟངས་འཛིན་ཐུབ་པ་དང་གོ་སྐབས་དང་འགྲན་སློང་ལ་དམིགས་པ་མ་ཟད། ལེགས་ཆ་དང་ཞན་ཆར་གཞིགས་པ་དང་། མིག་སྔ་དང་ཕུགས་ལ་ལྟ་རྟོག དོ་ཁུར་དང་རེ་སྒུག་ལ་ལན་སློག་པ་བཅས་བྱས་པས། བོད་ཀྱིས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཧུར་ཐག་གཏོང་བའི་མངོན་གསལ་ཆེ་བའི་བརྗོད་དོན་གཙོ་བོ་མངོན་ཡོད། ལྗོངས་ཏང་ཨུད་ཀྱི་བཀོད་སྒྲིག་བླང་བྱ་སྟངས་འཛིན་ནན་པོ་བྱས་ནས་ཕྱོགས་བདུན་ཐད་ཀྱི་གཙོ་གནད་ལས་འགན་ལ་དམ་འཛིན་གནད་འཁེལ་དང་། ནན་པོ། ཡག་པོ་བཅས་བྱས་ཚེ། བོད་ཀྱི་སྤུས་ཚད་མཐོ་བའི་འཕེལ་རྒྱས་ཀྱི“གནད་འགག”ལ་དམ་འཛིན་ཐུབ་ནས། གཙོ་བོ་བཟུང་ན་ཡན་ལག་ངང་གིས་ཐོན་པ་དང་དམིགས་སར་ཤུགས་རྒྱག་ཐུབ་པ་དང་། གཙོ་གནད་ཚད་བརྒལ་ལ་བརྟེན་ནས་སྤྱི་ཡོངས་ཀྱི་འཕེལ་རྒྱས་ལ་སྣེ་ཁྲིད་དང་སྐུལ་ཁྲིད་ཐུབ་སྟེ། སྤུས་ཚད་མཐོ་བའི་འཕེལ་རྒྱས་ཀྱི་རྒྱང་ལམ་གསར་པར་མགྱོགས་པོ་སྐྱོད་ཐུབ་པ་དང་རྣམ་པ་གསར་པ་གཏོད་ཐུབ་ངེས་རེད།
གཙོ་གནད་མངོན་གསལ་དོད་པོ་ཡོང་བ་དང་འགག་རྩའི་ལྷུ་ཚིགས་ལ་དམ་འཛིན་བྱེད་པར་ངེས་པར་དུ་ཡུལ་བབ་དང་བསྟུན་པའི་དཔལ་འབྱོར་ལས་དོན་གྱི་བརྟག་ཐབས་སྨྲ་བ་འདི་ཡག་པོ་སྤྱོད་དགོས། བོད་ཀྱི་འཕེལ་རྒྱས་ལ་རང་ངོས་ཀྱི་ཁྱད་ཆོས་ལྡན་པས། གཙོ་གནད་ལས་འགན་ལ་དམིགས་པ་དང་དེར་ཤུགས་བརྒྱབ་ནས་བོད་ཀྱི་དོན་དངོས་དང་མཐུན་པའི་སྤུས་ཚད་མཐོ་བའི་འཕེལ་རྒྱས་ཀྱི་ལམ་བུར་སྐྱོད་སྐབས་ངེས་པར་དུ་ས་མཐོའི་ཁྱད་ལྡན་ལེགས་ཆའི་ཐོན་ལས་གཙོ་གནད་འཕེལ་རྒྱས་བཏང་ནས། ས་མཐོའི་ཁྱད་ལྡན་ཞིང་འབྲོག་དང་། ནུས་རྒྱུ་གཙང་མ། དེང་རབས་ཞབས་ཞུ། རིག་གནས་ཡུལ་སྐོར། ལྗང་མདོག་བཟོ་ལས། བོད་ལུགས་གསོ་རིག མཐོ་གསར་གྲངས་འཛིན། མཐའ་མཚམས་ཚོང་དོན་ཟོག་འགྲེམས། ཀུན་སྤྱོད་མཁའ་འགྲུལ་སོགས་ཀྱི་ཐོན་ལས་རྒྱ་སྟོབས་ཆེ་རུ་བཏང་སྟེ། ཐོན་ཁུངས་ཀྱི་ལེགས་ཆ་དེ་ཉིད་འཕེལ་རྒྱས་ཀྱི་ལེགས་ཆར་དངོས་འབྲེལ་འགྱུར་བར་བྱེད་དགོས་པ་དང་། དེ་དང་ཆབས་ཅིག་ངེས་པར་དུ་དམངས་འཚོ་ལེགས་གཏོང་དང་མི་སེམས་གཅིག་ཏུ་སྒྲིལ་བ་དེ་འགོ་འཛུགས་ས་དང་དོན་ལ་བབས་སར་བརྩི་བ་དང་། མང་ཚོགས་ཉེ་འགྲམ་གྱི་དོན་ཆུང་དག་ཏང་ཨུད་དང་སྲིད་གཞུང་གི་དོན་ཆེན་ལ་བརྩིས་ནས་དམ་འཛིན་བྱེད་པ། “དམངས་འཚོའི་འདུ་འགོད་ཆེན་པོ་བཅུ”མུ་མཐུད་ལག་ལེན་གཏིང་ཟབ་བསྟར་བ། མི་དམངས་མང་ཚོགས་ལ་བྱ་བ་དངོས་མང་ཙམ་སྒྲུབ་པ་བཅས་བྱས་ཏེ། མང་ཚོགས་ཀྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་ཐག་གཅོད་བྱེད་དགོས་པའི་བླང་བྱ་བཏོན་ཡོད།
སང་ལོ་ནི“ལོ་ལྔ་ཚན་བཅོ་ལྔ་པ”འགོ་ཚུགས་པའི་ལོ་ཞིག་ཡིན་ལ། རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པའི་བཀོད་སྒྲིག་དོན་འཁྱོལ་བྱེད་པའི་འགག་རྩའི་ལོ་ཞིག་ཀྱང་ཡིན་པས། དཔལ་འབྱོར་ལས་དོན་ཡག་པོ་སྒྲུབ་པར་དོན་སྙིང་གལ་ཆེན་ལྡན་ཡོད། རང་ལྗོངས་ཀྱི་དཔལ་འབྱོར་ཡུན་རིང་ལེགས་ཕྱོགས་སུ་འཕེལ་བའི་གཞི་རྩའི་གནས་ཚུལ་ལ་འགྱུར་ལྡོག་བྱུང་མེད་ཅིང་། སྲིད་ཇུས་ཀྱི་ལེགས་ཆ་མངོན་གསལ་དོད་པ་དང་། འཕེལ་རྒྱས་ཀྱི་རྨང་གཞི་བརྟན་པ། འཕར་སྣོན་གྱི་མི་མངོན་པའི་སྟོབས་ཤུགས་ཆེ་བ་བཅས་ཡོད་པས། ང་ཚོས་ཀྲུང་དབྱང་གི་དཔལ་འབྱོར་ལས་དོན་ཚོགས་འདུ་དང་ལྷག་པར་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་ལ་བརྟེན་ནས་བོད་ཀྱི་ལས་དོན་གྱི་སྤྱི་ཡོངས་ལ་གཅིག་འདོམས་མཐའ་འཁྱོངས་ཀྱིས་གཙོ་གནད་མངོན་གསལ་དོད་པོ་ཡོང་བ་དང་འགག་རྩར་དམ་འཛིན་བྱས་ཏེ། བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཆབ་སྲིད་རང་བཞིན་དང་། ཚན་རིག་རང་བཞིན། མི་དམངས་རང་བཞིན། ཆོས་ཉིད་རང་བཞིན་བཅས་ལ་རྒྱུན་ཆད་མེད་པར་ངོས་འཛིན་ཟབ་ཏུ་གཏོང་བ་དང་། གཙོ་བོ་བཟུང་ན་ཡན་ལག་ངང་གིས་ཐོན་པའི་སྒོ་ནས་ལས་དོན་ཁག་ཡག་པོ་བསྒྲུབས་ཚེ། བོད་ཀྱི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་ནུས་ཤུགས་ཡོད་རྒུས་སྐུལ་འདེད་གཏོང་ཐུབ་ངེས་ཡིན་པ་དང་། སྤྱི་ཁྱབ་ཧྲུའུ་ཅིའི་མངགས་བཅོལ་ཟབ་མོ་དང་མི་དམངས་མང་ཚོགས་ཀྱི་རེ་སྒུག་ཆེན་པོ་ཆུད་ཟོས་སུ་འགྲོ་མི་སྲིད།
འབྲེལ་ཡོད་གསར་འགྱུར།