ཉེ་ཆར། རང་སྐྱོང་ལྗོངས་གནམ་གཤིས་ཅུས་ཀྱིས་རང་ལྗོངས་ཀྱི་ཞིང་ལས་དང་གྲོང་གསེབ་སྡེ་ཚན་དང་དེ་བཞིན་མཐོ་གསར་ཚན་རྩལ་ཁེ་ལས་དང་མཉམ་དུ་རྒྱལ་ཡོངས་ཀྱི་གནམ་གཤིས་ཁོངས་གཏོགས་ཀྱི་ནས་སྐྱེ་འཚར་གྱི་འགག་རྩའི་དུས་མཚམས་ཀྱི་སྐྱེ་ཚུལ་ལ་རིག་ནུས་དབྱེ་འབྱེད་སྟེ“སྙེ་རིག”ཉིང་ལྷེབ་ཞིབ་འཇུག་ཐེངས་དང་པོ་བྱས་པ་དང་། གྲུབ་འབྲས་དེས་གནམ་གཤིས་ཞབས་ཞུ་དང་མི་ཐབས་རིག་ནུས་མཉམ་འདྲེས་གཏིང་ཟབ་བྱས་ཏེ། ནས་ལ་གནམ་གཤིས་ལྟ་ཞིབ་བྱེད་པར“རིག་ལྡན་ཀླད་པ”སྒྲིག་སྦྱོར་བྱས་ནས་ས་མཐོའི་ཞིང་ལས་སྤུས་འབྲས་ལེགས་གཉེར་ཡོང་བར་སྐུལ་འདེད་བཏང་ཡོད།

ཤེས་རྟོགས་བྱུང་བར་གཞིགས་ན། ད་ལོའི་དབྱར་ཁར། རང་སྐྱོང་ལྗོངས་གནམ་གཤིས་ཅུས་ཀྱིས་ལྷ་ས་གྲོང་ཁྱེར་ལྷུན་གྲུབ་རྫོང་དང་སྟག་རྩེ་ཆུས་སུ་ཚད་གཞི་མཐོ་བའི་ཞིང་ཁའི་རིག་ནུས་གནམ་གཤིས་ལྟ་ཞིབ་ས་ཚིགས་དང་ནས་སྐྱེ་འཚར་གྱི་རང་འགུལ་ལྟ་ཞིབ་ས་ཚིགས་སོ་སོར་བཙུགས་པས། བོད་དུ་ཚད་གཞི་མཐོ་བའི་ཞིང་ཁའི་གནམ་གཤིས་རིག་ནུས་ལྟ་ཞིབ་ཚད་ལེན་ཁྱབ་ཁོངས་ཀྱི་སྟོང་ཆ་གསབ་ཡོད།