“ལོ་ལྔ་ཚན་བཅོ་ལྔ་པའི”ནང་དོན་གཙོ་བོ་ཁོང་དུ་ཆུད་པར་བྱེད།
གནས་འཕྲོད་ལས་འཚམ་མཛེས་མཐུན་གསུམ་ལྡན་གྱི་གྲོང་གསེབ་འཛུགས་སྐྲུན་ལ་སྐུལ་འདེད་གཏོང་དགོས།
“ཁྲི་སྟོང་ལས་གྲྭའི”ཉམས་མྱོང་སློབ་སྦྱོང་དང་བེད་སྤྱོད་བྱེད་པ་དང་། ཡུལ་བབ་དང་བསྟུན་ནས་གྲོང་གསེབ་འཛུགས་སྐྲུན་ལག་བསྟར་ལམ་སྲོལ་འཐུས་ཚང་དུ་གཏོང་བ། རིགས་དབྱེ་རིམ་ལྡན་དང་ཡུག་ཁུལ་ཅན་གྱིས་གྲོང་གསེབ་དར་རྒྱས་ལ་སྐུལ་འདེད་གཏོང་བ་བཅས་བྱས་ཏེ། གྲོང་གསེབ་ཀྱི་རྨང་གཞིའི་སྒྲིག་བཀོད་འཐུས་ཚང་ཡོང་ཚད་དང་། སྤྱི་པའི་ཞབས་ཞུ་སྟབས་བདེ་ཡོང་ཚད། མི་སྡོད་ཁོར་ཡུག་སྐྱིད་སྣང་ལྡན་ཚད་བཅས་རིམ་བཞིན་མཐོ་རུ་གཏོང་དགོས། གྲོང་ཚོ་དང་གྲོང་རྡལ་གྱི་བཀོད་པ་གཅིག་འདོམས་ཀྱིས་ལེགས་སྒྱུར་བྱས་ཏེ། རྫོང་ཁོངས་ཀྱི་རྨང་གཞིའི་སྒྲིག་བཀོད་ལ་གཞི་གཅིག་ཅན་གྱི་འཆར་འགོད་དང་། འཛུགས་སྐྲུན། དོ་དམ་བདག་སྐྱོང་བཅས་བྱེད་པར་སྐུལ་འདེད་གཏོང་དགོས། རྫོང་ཁོངས་ཀྱི་རྒྱལ་ཁབ་མངའ་ཁོངས་བར་མཐོངས་བཅོས་སྐྱོང་ལ་མཐུན་སྦྱོར་ངང་སྐུལ་འདེད་གཏོང་བ་དང་། ཁོངས་ཡོངས་ཀྱི་ས་ཞིང་ཕྱོགས་བསྡུས་བཅོས་སྒྲིག་བརྟན་པོ་སྤེལ་བ། གྲོང་གསེབ་ཀྱི་མི་སྡོད་ཁོར་ཡུག་མུ་མཐུད་བཅོས་སྒྲིག་དང་མཐོར་འདེགས་གཏོང་བ། གཟེར་འདེབས་སྙིང་སྟོབས་བཅངས་ནས་གྲོང་གསེབ་ཀྱི་གསང་སྤྱོད་སྒྱུར་བཀོད་དང་གད་སྙིགས་ཀྱིས་གྲོང་ཚོ་བསྐོར་བ་སོགས་ཀྱི་གནད་དོན་ཐག་གཅོད་ཡག་པོ་བྱེད་པ། གྲོང་གསེབ་ཀྱི་དེང་རབས་འཚོ་བའི་ཆ་རྐྱེན་གྱི་ཞན་ཆ་གང་མགྱོགས་གསབ་པ་བཅས་བྱས་ཏེ། གྲོང་གསེབ་ཀྱི་སྤུས་ལེགས་འཚོ་བའི་བར་མཐོངས་གསར་དུ་སྐྲུན་དགོས། རང་རང་གི་ཁྱད་ཆོས་ལྡན་པའི་རྫོང་ཁོངས་དཔལ་འབྱོར་འཕེལ་རྒྱས་གཏོང་བ་དང་། ཞིང་ལས་ཀྱི་བྱེད་ནུས་སྣ་མང་གསར་སྤེལ། གྲོང་གསེབ་ཀྱི་ཐོན་ལས་དང་པོ་དང་། གཉིས་པ། གསུམ་པ་བཅས་མཉམ་འདྲེས་གཏིང་ཟབ་ཡོང་བར་སྐུལ་འདེད་གཏོང་བ། གྲོང་གསེབ་ཀྱི་ཁྱད་ལྡན་ཐོན་ལས་སྐྱེད་སྲིང་དང་སྟོབས་ཆེར་གཏོང་བ། ཞིང་འབྲེལ་ཞིང་ཁྲིད་ཀྱི་ལམ་སྲོལ་འཐུས་ཚང་དུ་གཏོང་བ་བཅས་བྱས་ཏེ་ཞིང་པའི་ཡོང་འབབ་བརྟན་པོ་འཕར་བར་སྐུལ་སྤེལ་གཏོང་དགོས།
ཞིང་དར་ཞིང་ཕན་ཞིང་ཕྱུག་སྲིད་ཇུས་ཀྱི་ཕན་ནུས་ཆེ་རུ་གཏོང་དགོས།
ནོར་སྲིད་ཀྱིས་སྔོན་ལ་འགན་སྲུང་དང་། དངུལ་རྩ་གཙོ་གནད་དུ་ཕྱོགས་པ། སྤྱི་ཚོགས་ཧུར་ཐག་གིས་ཞུགས་པ་བཅས་ཀྱི་སྣ་མང་གཏོང་འཇོག་རྣམ་པ་ལེགས་སུ་བཏང་ནས་གྲོང་གསེབ་དར་རྒྱས་ལ་མ་དངུལ་གཏོང་ཤུགས་རྒྱུན་ཆད་མེད་པར་ཆེ་རུ་གཏོང་བའི་འགན་ལེན་ཏན་ཏིག་བྱེད་དགོས། ཞིང་པའི་ཞིང་གཉེར་འབྲུ་འདེབས་ཀྱི་ཧུར་སེམས་མ་ཉམས་སྐུལ་སློང་བྱས་ཏེ། རིན་གོང་དང་། ཁ་གསབ། འགན་བཅོལ་སོགས་སྲིད་ཇུས་ཀྱི་རྒྱབ་སྐྱོར་དང་མཐུན་སྦྱོར་བྱེད་ཤུགས་ཆེ་རུ་གཏོང་དགོས། འབྲུ་རིགས་ཐོན་ཁུལ་གཙོ་བོའི་ཁེ་ཕན་ཁ་གསབ་བྱེད་ཤུགས་ཆེ་རུ་བཏང་ནས་འབྲུ་རིགས་ཐོན་ཚོང་ཁུལ་གྱི་ཞིང་ཆེན་དབར་འཕྲེད་ཕྱོགས་ཁེ་ཕན་ཁ་གསབ་ལག་བསྟར་བྱེད་དགོས། འབྲུ་རིགས་ཚུར་ཉོ་ཕར་འཚོང་དང་གསོག་འཇོག་དོ་དམ་བྱེད་ཤུགས་ཆེ་རུ་གཏོང་དགོས། ཞིང་ལས་ཐོན་རྫས་ནང་འདྲེན་སྣ་མང་ཅན་དུ་འགྱུར་བར་སྐུལ་འདེད་གཏོང་བ་དང་། ཉོ་ཚོང་དང་ཐོན་སྐྱེད་ཕན་ཚུན་མཐུན་སྦྱོར་ཡོང་བར་སྐུལ་སྤེལ་གཏོང་དགོས། གྲོང་ཁྱེར་དང་གྲོང་གསེབ་ཀྱི་བདག་རྐྱེན་ཕྱོགས་གཉིས་འཁོར་རྒྱུག་བྱེད་པར་སྐུལ་འདེད་གཏོང་བ་དང་། རིགས་ཁག་གི་ཤེས་ལྡན་མི་སྣ་གྲོང་གསེབ་ཏུ་ཞབས་ཞུ་དང་ལས་གཏོད་ལས་ཞུགས་བྱེད་པར་བསྔགས་སྐུལ་བྱེད་དགོས། གྲོང་གསེབ་ཀྱི་ཐུན་མོང་གཉེར་སྐྱོང་རང་བཞིན་གྱི་འཛུགས་སྐྲུན་ལ་མཁོ་བའི་ས་ཆ་གྲོན་ཆུང་དང་ལེགས་བསྡུས་ཞིབ་གཉེར་ངང་བེད་སྤྱོད་དང་། བེད་མེད་དུ་བསྐྱུར་བའི་ས་ཞིང་དང་ཁང་པ་ཁྲིམས་ལྟར་ཕན་སྒྱུར་དང་བེད་སྤྱོད་ཡག་པོ་བྱེད་པ། གྲོང་གསེབ་འཕེལ་རྒྱས་ལ་མཁོ་བའི་ས་ཆ་རིགས་དབྱེ་འགན་སྲུང་བཅས་བྱེད་དགོས། གྲོང་གསེབ་ཀྱི་ཐུན་མོང་དཔལ་འབྱོར་དཔེ་གསར་གོང་དུ་སྤེལ་བར་རྒྱབ་སྐྱོར་བྱེད་དགོས།
སྲོལ་རྒྱུན་ཐོན་ལས་ལེགས་སྒྱུར་མཐོར་འདེགས་གཏོང་དགོས།
གཙོ་གནད་ཐོན་ལས་ཀྱི་སྤུས་ཚད་རིམ་སྤོར་ལ་སྐུལ་འདེད་བཏང་སྟེ། གཏེར་ལས་དང་། ལྕགས་བཞུ། རྫས་འགྱུར་བཟོ་ལས། ཡང་བའི་བཟོ་ལས། འཁེལ་འཐག འཕྲུལ་ཆས། གྲུ་གཟིངས། ཨར་ལས་སོགས་ཐོན་ལས་ཀྱི་གོ་ལ་ཧྲིལ་པོའི་ཐོན་ལས་ལས་བགོས་ཁྲོད་ཀྱི་གནས་བབ་དང་འགྲན་རྩོད་ནུས་པ་སྲ་བརྟན་དང་མཐོར་འདེགས་གཏོང་དགོས། ཐོན་ལས་མུ་ཕྲེང་གི་རང་བརྟེན་ཚོད་འཛིན་ཆུ་ཚད་མཐོར་འདེགས་གཏོང་བ་དང་། ཐོན་ལས་ཀྱི་རྨང་གཞི་བསྐྱར་སྐྲུན་དང་ལག་རྩལ་སྒྲིག་ཆས་གནད་ཆེན་འགག་སྒྲོལ་བྱེད་ཤུགས་ཆེ་རུ་གཏོང་དགོས། བཟོ་སྐྲུན་ལས་རིགས་ཀྱི་གཙོ་གནད་ཐོན་ལས་མུ་ཕྲེང་སྤུས་ཚད་མཐོ་བའི་འཕེལ་རྒྱས་གཏོང་བའི་བྱ་སྤྱོད་རིམ་འགྲིལ་ལག་བསྟར་བྱེད་པ་དང་། སྔོན་ཐོན་གྱི་བཟོ་སྐྲུན་ལས་རིགས་ཁྱུ་ཚོགས་འཕེལ་རྒྱས་གཏོང་དགོས། ལག་རྩལ་སྒྱུར་བཀོད་རིམ་སྤོར་ལ་སྐུལ་འདེད་གཏོང་བ་དང་། བཟོ་སྐྲུན་ལས་རིགས་གྲངས་རིག་ཅན་དུ་སྒྱུར་བར་སྐུལ་སྤེལ་གཏོང་དགོས། རིག་ནུས་བཟོ་སྐྲུན་དང་། ལྗང་མདོག་བཟོ་སྐྲུན། ཞབས་ཞུ་ཅན་གྱི་བཟོ་སྐྲུན་བཅས་འཕེལ་རྒྱས་གཏོང་བ་དང་། ཐོན་ལས་ཀྱི་དཔེ་དབྱིབས་དང་ཁེ་ལས་ཀྱི་རྩ་འཛུགས་རྣམ་པར་འཕོ་འགྱུར་མགྱོགས་སུ་གཏོང་དགོས། སྤུས་ཚད་དང་ལག་རྩལ་གྱི་རྨང་གཞིའི་ནུས་པ་ཆེ་རུ་གཏོང་བ་དང་། ཚད་གཞིའི་སྣེ་ཁྲིད་ལ་ཤུགས་རྒྱག་པ། རྒྱལ་སྤྱི་ཅན་གྱི་ཆུ་ཚད་མཐོར་འདེགས་གཏོང་བ་བཅས་བྱས་ནས། སྤུས་རྟགས་འཛུགས་སྐྲུན་བྱེད་ཤུགས་ཆེ་རུ་གཏོང་དགོས། ཐོན་ལས་ཀྱི་བཀོད་པ་ལེགས་སུ་གཏོང་བ་དང་། གཙོ་གནད་ཐོན་ལས་རྒྱལ་ནང་དུ་གོ་རིམ་ལྡན་པའི་ངང་སྤོ་སྒྱུར་བྱེད་པར་སྐུལ་སྤེལ་གཏོང་དགོས།
འབྲེལ་ཡོད་གསར་འགྱུར།