ཤིན་ཧྭ་གསར་འགྱུར་ཁང་པེ་ཅིང་ནས་ཟླ་11ཚེས་26ཉིན་གློག་འཕྲིན་འབྱོར་གསལ། ཀྲུང་དབྱང་དམག་ཨུད་ཀྱི་ཆོག་མཆན་ཐོབ་པ་བརྒྱུད། སང་ལོའི་ཟླ་3ཚེས་1ཉིན་ནས་བཟུང་། དམག་ཡོངས་ལ《ཀྲུང་གོ་མི་དམངས་བཅིངས་འགྲོལ་དམག་གི་གྲ་སྒྲིག་དམག་ཞབས་མི་སྣའི་ལག་ཁྱེར》སྤྲོད་འགོ་འཛུགས་རྒྱུ་ཡིན་ཞིང་། ཀྲུང་དབྱང་དམག་ཨུད་གཞུང་དོན་ཐིང་གིས་བརྡ་ཐོ་བཏང་སྟེ། རིམ་པ་ཁག་གིས་ལག་ཁྱེར་སྤྲོད་པའི་ལས་དོན་ལ་ཚད་མཐོའི་མཐོང་ཆེན་བྱས་ཏེ། སྒྲིག་འཛུགས་ལག་བསྟར་ནན་པོ་བྱེད་པ་དང་གཏན་འབེབས་ལྟར་ལག་ཁྱེར་གཉེར་དགོས་པའི་བླང་བྱ་བཏོན་པ་རེད།

《གྲ་སྒྲིག་དམག་ཞབས་མི་སྣའི་ལག་ཁྱེར》ནི་ཉིང་ལྷེབ་ལག་ཁྱེར་བཟོ་ལྟ་ཡིན་ཞིང་། དེར་རྫུན་འགོག་རང་བཞིན་དང་ཀུན་ཤེས་ཐུབ་ཚད་ཅུང་མཐོ་པོ་ཡོད་པ་དང་། དེ་ནི་གྲ་སྒྲིག་དམག་ཞབས་མི་སྣའི་ཐོབ་ཐང་བདེན་དཔང་བྱེད་པའི་གོ་ཆོད་ལག་ཁྱེར་ཞིག་ཡིན། ལག་ཁྱེར་ཨང་གྲངས་ནི་མ་ལག་ལས་གྲུབ་པའི་ཐོབ་ཐང་ཨང་གྲངས་འབའ་ཞིག་ཡིན་པ་དང་། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་གྲ་སྒྲིག་དམག་ཞབས་མི་སྣའི་བཅའ་ཁྲིམས》ཁྱབ་བསྒྲགས་དང་ལག་བསྟར་བྱས་རྗེས། ཀྲུང་གོ་མི་དམངས་བཅིངས་འགྲོལ་དམག་ཁོངས་སུ་ཁྲིམས་ལྟར་གྲ་སྒྲིག་དམག་ཞབས་སྒྲུབ་མཁན་གྱི་གྲ་སྒྲིག་དམག་ཞབས་དམག་དཔོན་དང་། གྲ་སྒྲིག་དམག་ཞབས་ཅུན་ཧྲི། གྲ་སྒྲིག་དམག་ཞབས་དམག་མི་བཅས་ལ་སྤྲོད་རྒྱུ་ཡིན་ཞིང་། 《ཀྲུང་གོ་མི་དམངས་བཅིངས་འགྲོལ་དམག་གི་གྲ་སྒྲིག་དམག་ཞབས་དམག་དཔོན་གྱི་ལག་ཁྱེར》དེ་མ་ཐག་སྤྱོད་མཚམས་འཇོག་རྒྱུ་རེད།