ས་གནས་དེ་གའི་དུས་ཚོད་ཟླ་11ཚེས་25ཉིན། “ལོ་རྒྱུས་ཀྱི་བྲག་ཅ”ཞེས་པ་བརྗོད་དོན་གཙོ་བོར་བྱས་པའི་2025ལོའི་ཀུའུ་ལིང་གླེང་སྟེགས་ཨ་རིའི་ཉིའུ་གཡོད་དུ་གཉེར་བ་རེད། མི་དམངས་ཉིན་རེའི་ཚགས་པར་ཁང་གི་ཧྲེ་ཀྲང་ཡུས་ཧྲའོ་ལེང་དང་ཨ་རིར་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཤེ་ཧྥུང་གིས་བརྙན་ལམ་ཐོག་ནས་ཤིས་ཚིག་བརྗོད་ཅིང་། ཀྲུང་གོ་དངུལ་ཁང་གི་ཏུང་ཧྲི་ཀྲང་ཀེ་ཧའེ་ཅའོ་ཡིས་ཤིས་ཚིག་བརྗོད་པ་དང་། ཀྲུང་གོ་དང་ཨ་རི་རྒྱལ་ཁབ་གཉིས་ཀྱི་ལས་རིགས་ཁག་གི་སྐུ་མགྲོན་150ལྷག་ཙམ་ཞུགས་ཡོད་པ་རེད།

གླེང་སྟེགས་དེ་ནི་མི་དམངས་ཉིན་རེའི་ཚགས་པར་ཁང་གིས་མཛུབ་ཁྲིད་བྱས་པ་དང་མི་དམངས་ཉིན་རེའི་ཚགས་པར་གྲངས་འཛིན་ཁྱབ་སྤེལ་ཚད་ཡོད་ཀུང་སིས་གཙོ་གཉེར་བྱས་པ་ཞིག་རེད། གླེང་སྟེགས་གཉེར་རིང་། སྐུ་མགྲོན་གྱིས“ལོ་རྒྱུས་བློ་ལ་བརྟན་པོར་ངེས་ནས་ལོ་ཟླའི་མཛའ་གྲོགས་ཀྱི་འབྲེལ་ཐག་ལ་ཐུན་མོང་ཐོག་གཅེས་སྤྲས་བྱེད”དང“ཕན་ཚུན་གྲུབ་འབྲས་ཐོབ་པར་བྱས་ནས་མཉམ་ལས་ཀྱི་སྟོབས་ཤུགས་ཐུན་མོང་ཐོག་གཅིག་སྡུད་ཀྱིས་འབྱུང་འགྱུར་ལ་ཕྱོགས”ཞེས་པ་སོགས་ཀྱི་གྲོས་དོན་ལ་དམིགས་ནས་བརྗོད་དོན་གཙོ་བོའི་གཏམ་བཤད་སྤེལ་ཏེ་གྲལ་སྒོར་གླེང་མོལ་བྱས་པ་རེད། ས་གནས་ས་ཐོག་ཏུ“ཀུའུ་ལིང་གི་གཏམ་རྒྱུད་ནས་འགོ་ཚུགས”ཞེས་པའི་ཀྲུང་གོ་དང་ཨ་རིའི་མཛའ་མཐུན་མཉམ་ལས་ཀྱི་གཏམ་རྒྱུད་འགྲེམས་སྟོན་དང་། “ལོ་རྒྱུས་ཀྱི་བྲག་ཅ”ཞེས་པའི་བརྗོད་དོན་གཙོ་བོའི་འགྲེམས་སྟོན། དེ་བཞིན་མངག་སྒྲིག་པར་གཞིའི་མི་དམངས་ཉིན་རེའི་ཚགས་པར་གྱི་གློག་རྡུལ་ཚགས་པར་ལྟ་ཀློག་སྒྲོམ་སྟེགས་བཅས་བཀོད་སྒྲིག་བྱས་པ་མ་ཟད། ཀྲུང་གོ་དང་ཨ་རིའི་མཛའ་གྲོགས་ཀྱི་སྐད་ཅིག་མའི་བརྙན་པར་བསྡུ་ལེན་བྱེད་སྒོའང་སྤེལ་བ་རེད།