ཀྲུང་གོ་དང་ཨ་རི་ནི་འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་ཐོབ་པར་བློས་གཏོང་ཆེན་པོ་བྱས་པའི་རྒྱལ་ཁབ་ཅིག་དང་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་རྒྱུན་ལས་ལས་འཛིན་རྒྱལ་ཁབ་ཅིག་ཡིན་པས། དམག་འཁྲུག་རྗེས་ཀྱི་རྒྱལ་སྤྱིའི་སྒྲིག་སྲོལ་ལ་མཉམ་དུ་སྲུང་སྐྱོང་བྱས་ཏེ་དམག་རྒྱལ་རིང་ལུགས་རོ་ལངས་རྒྱག་པ་དང་དེ་བཞིན་ས་ཁུལ་དང་འཛམ་གླིང་གི་ཞི་བདེ་དང་བརྟན་ལྷིང་ལ་གཏོར་བཤིག་གཏོང་བའི་ལྐོག་ཇུས་དང་བྱེད་སྤྱོད་གང་རུང་ལ་མཐའ་གཅིག་ཏུ་འགོག་རྒོལ་བྱེད་པ་ནི་ཕྱོགས་གཉིས་ཀྱི་ཐུན་མོང་གི་འགན་འཁྲི་ཡིན།

ཟླ་11ཚེས་24ཉིན་གྱི་དགོང་མོར། ཀྲུའུ་ཞི་ཞི་ཅིན་ཕིང་གིས་ཨ་རིའི་ཙུང་ཐུང་ཐེ་རོན་ཕུའུ་དང་ཞལ་པར་ནས་བཀའ་མོལ་གནང་བ་རེད། དེ་ནི་ཀྲུང་གོ་དང་ཨ་རིའི་གཙོ་བདག་གིས་ཧྥུའུ་ཧྲན་དུ་མཇལ་འཛོམས་བྱུང་རྗེས་ཀྱི་མཉམ་འགུལ་ཐོག་མ་ཡིན་ལ། ཕྱོགས་གཉིས་ཀྱིས་ཧྥུའུ་ཧྲན་མཇལ་འཛོམས་ཀྱི་ཐུན་མོང་ངོས་འཛིན་སྔར་བས་དོན་འཁྱོལ་དང་དེ་བཞིན་ཀྲུང་གོ་དང་ཨ་རིའི་འབྲེལ་བ་སྤྱིའི་ཆ་ནས་བརྟན་ཐོག་ཡར་འཕེལ་གྱི་རྣམ་པ་རྒྱུན་འཁྱོངས་བྱེད་པར་འཐབ་ཇུས་ཀྱི་སྣེ་འདྲེན་བྱས་ཡོད། དེ་དང་ཆབས་ཅིག་ད་རེས་ཀྱི་ཞལ་པར་ནས་བཀའ་མོལ་གནང་བ་ལས་འཛམ་གླིང་ལ་དམག་འཁྲུག་རྗེས་ཀྱི་རྒྱལ་སྤྱིའི་སྒྲིག་སྲོལ་དང་གོ་ལ་ཧྲིལ་པོའི་ཞི་བདེ་དང་བརྟན་ལྷིང་སྲུང་སྐྱོང་བྱེད་པའི་དགེ་མཚན་ལྡན་པའི་རྟགས་མཚན་བསྟན་ཡོད།

གཙོ་བདག་གི་ཕྱི་འབྲེལ་ནི་ཐོག་མཐའ་བར་གསུམ་དུ་ཀྲུང་གོ་དང་ཨ་རིའི་འབྲེལ་བ་འཕེལ་རྒྱས་འགྲོ་བར་སྣེ་འདྲེན་བྱེད་པའི་ཚད་འཛིན་ས་ཡིན། ཀྲུང་གོ་དང་ཨ་རིའི་གཙོ་བདག་གི་ཧྥུའུ་ཧྲན་མཇལ་འཛོམས་ནི་རྒྱལ་ཁབ་གཉིས་ཀྱི་འབྲེལ་བའི་ལོ་རྒྱུས་རང་བཞིན་གྱི་དུས་སྐབས་ཤིག་ཡིན་པ་མ་ཟད། རྒྱལ་སྤྱིའི་འབྲེལ་བའི་ཁྲོད་ཀྱི་མཚོན་རྟགས་རང་བཞིན་གྱི་དོན་ཆེན་ཞིག་ཀྱང་ཡིན། མཇལ་འཛོམས་གནང་ཚུན་ཕྱོགས་གཉིས་ཀྱིས་གཙོ་བདག་གི་ཐུན་མོང་ངོས་འཛིན་དོན་འཁྱོལ་ཧུར་ཐག་བྱས་ནས་ཕྱོགས་གཉིས་ཀྱི་འབྲེལ་བ་སྤྱིའི་ཆ་ནས་བརྟན་ཐོག་ཡར་འཕེལ་འགྲོ་བར་སྐུལ་འདེད་བཏང་ཡོད། རྒྱལ་ཁབ་གཉིས་ཀྱི་ལས་རིགས་ཁག་དང་རྒྱལ་སྤྱིའི་སྤྱི་ཚོགས་ལ་དོ་སྣང་བྱུང་བ་ནི། ཨ་རི་ཕྱོགས་ཀྱིས་ཀྲུང་གོའི་ཚོང་ཟོག་ལ་དམིགས་ནས་འཐོལ་པ་བསྡུས་པའི10%ཡི“ཧྥེན་ཐའེ་ཉི་སྒོ་ཁྲལ”མེད་པར་བཟོས་པ་དང་། ཀྲུང་གོའི་ཚོང་ཟོག་ལ་འཐོལ་པ་བསྡུས་པའི“སྒོ་ཁྲལ་འདྲ་མཚུངས”24%མུ་མཐུད་གནས་སྐབས་མཚམས་འཇོག་བྱས་པ་དང་དུས་མཚུངས་སུ་ཕྱིར་གཏོང་གཅུན་སྡོམ་གྱི་མཐིལ་རྟོགས་རང་བཞིན་གྱི་སྒྲིག་སྲོལ་གནས་སྐབས་ལག་བསྟར་བྱེད་མཚམས་བཞག་པ་དང་ཀྲུང་གོའི་གྲུ་གཟིངས་བཟོ་སྐྲུན་སོགས་ལས་རིགས་ལ་བརྟག་དཔྱད་བྱེད་ཐབས་301བཟོས་པ་དག་གནས་སྐབས་མཚམས་འཇོག་བྱས་ཡོད། ཀྲུང་གོ་ཕྱོགས་ཀྱིས་ཀྱང་འབྲེལ་ཡོད་ཀྱི་ཟློག་ལན་སློག་ཐབས་བབ་བསྟུན་ངང་གནས་སྐབས་མཚམས་འཇོག་བྱས་ཡོད། གྲུབ་འབྲས་དེ་དག་ལས་ལག་ལེན་གྱིས་ཡང་ཡང་ར་སྤྲོད་བྱས་པའི་གནས་ལུགས་ཤིག་སླར་ཡང་ར་འཕྲོད་བྱུང་བ་སྟེ། ཀྲུང་གོ་དང་ཨ་རི“མཐུན་ན་གཉིས་ཕན་དང་འཐབ་ན་གཉིས་ཕམ”ཡིན་པ་དང“ཕན་ཚུན་གྲུབ་འབྲས་ཐོབ་པར་བྱེད་པ་དང་ཐུན་མོང་ཐོག་དར་རྒྱས་གཏོང་བ”དེ་ནི་མཐོང་ཐོས་དྲན་རེག་ཏུ་འགྱུར་བའི་དོན་དངོས་ཤིག་རེད།

ཐའེ་དབན་གྱི་གནད་དོན་ནི་ཀྲུང་གོའི་ལྟེ་བའི་ཁེ་ཕན་ཁྲོད་ཀྱི་ལྟེ་བ་ཡིན་ལ། རེག་མི་རུང་བའི་དམར་ཐིག་དང་མཐའ་ཚད་ཀྱང་ཡིན། ཀྲུའུ་ཞི་ཞི་ཅིན་ཕིང་གིས་ཞལ་པར་ནས་བཀལ་མོལ་གནང་སྐབས་ཐའེ་དབན་གྱི་གནད་དོན་ཐད་ཀྱི་ཀྲུང་གོ་ཕྱོགས་ཀྱི་རྩ་དོན་དང་ལངས་ཕྱོགས་གཟབ་ནན་ངང་གསལ་འགྲེལ་གནང་སྟེ། ཐའེ་དབན་ཀྲུང་གོའི་པང་དུ་ལོག་པ་ནི་དམག་འཁྲུག་རྗེས་ཀྱི་རྒྱལ་སྤྱིའི་སྒྲིག་སྲོལ་གྱི་གྲུབ་ཆ་གལ་ཆེན་ཞིག་རེད། ཀྲུང་གོ་དང་ཨ་རིས་དེ་སྔ་དཔུང་པ་མཉམ་གཤིབ་ཀྱིས་ཧྥ་ཤི་སི་དང་དམག་རྒྱལ་རིང་ལུགས་ལ་འགོག་རྒོལ་བྱས་ཡོད་པས། མིག་སྔའི་དུས་སུ་འཛམ་གླིང་དམག་ཆེན་གཉིས་པར་རྒྱལ་ཁ་ཐོབ་པའི་གྲུབ་འབྲས་ལ་མཉམ་དུ་སྲུང་སྐྱོང་དེ་བས་ཡག་པོ་བྱེད་དགོས་ཞེས་ནན་བཤད་གནང་ཞིང་། ཙུང་ཐུང་ཐེ་རོན་ཕུའུ་ཡིས། ཀྲུང་གོས་འཛམ་གླིང་དམག་ཆེན་གཉིས་པའི་སྐབས་སུ་རྒྱལ་ཁ་ཐོབ་ཆེད་ནུས་པ་གལ་ཆེན་བཏོན་ཡོད་པས། ཐའེ་དབན་གྱི་གནད་དོན་དེ་ཀྲུང་གོར་མཚོན་ན་གལ་ཆེན་པོ་ཡིན་པ་ཨ་རི་ཕྱོགས་ནས་བསམ་ཤེས་བྱེད་ཀྱི་ཡོད་ཅེས་བརྗོད་པ་རེད།

ཀྲུང་གོ་དང་ཨ་རིའི་གཙོ་བདག་གི་འབྲེལ་ཐུག་ལ་དངོས་ཡོད་ཀྱི་དོན་སྙིང་གལ་ཆེན་ལྡན། ཉེ་ཆར། རི་པིན་གྱི་དབུ་བཞུགས་བློན་ཆེན་ཀའོ་ཧྲི་ཙའོ་མེའོ་ཡིས་ཐའེ་དབན་གྱི་གནད་དོན་ཐད་མཐའ་ཚད་ལས་བརྒལ་ནས་བསྙད་ཚབས་ཆེན་བརྐོས་ཏེ“ཐའེ་དབན་ལ་གནས་ཚུལ་ཐོན་ན”རི་པིན་གྱིས་ཐུན་མོང་གི་རང་སྲུང་དབང་ཆ་སྤྱོད་ཆོག་པའི“ཆགས་འཇིག་ཉམས་ཉེན་གྱི་གནས་སྟངས”ཆགས་སྲིད་ཅེས་མངོན་སུམ་འཛེམ་མེད་དུ་བརྗོད་པ་ལས་ཐའེ་དབན་གྱི་གནད་དོན་ཐད་དྲག་ཤུགས་ལ་བརྟེན་ནས་ཐེ་ཇུས་བྱེད་སྲིད་པ་བསྟན་ཡོད། དེ་ནི་ཀྲུང་གོ་གཅིག་གི་རྩ་དོན་དང་ཚབས་ཆེན་འགལ་བ་མ་ཟད། དམག་འཁྲུག་རྗེས་ཀྱི་རྒྱལ་སྤྱིའི་སྒྲིག་ལམ་ལ་མངོན་སུམ་འཛེམ་མེད་ཀྱིས་བསྙད་བརྐོས་པ་ཞིག་ཀྱང་ཡིན་པས། རྒྱལ་སྤྱིའི་སྤྱི་ཚོགས་ཀྱིས་རི་པིན་གྱི་ཉེན་ཁ་ཆེ་བའི་འཐབ་ཇུས་ཀྱི་འཕེལ་ཕྱོགས་ལ་སེམས་ཁྲལ་དང་དོགས་ཟོན་བྱེད་ཀྱི་ཡོད། ཀྲུང་གོ་དང་ཨ་རི་ནི་འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་ཐོབ་པར་བློས་གཏོང་ཆེན་པོ་བྱས་པའི་རྒྱལ་ཁབ་ཅིག་དང་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་རྒྱུན་ལས་ལས་འཛིན་རྒྱལ་ཁབ་ཅིག་ཡིན་པས། དམག་འཁྲུག་རྗེས་ཀྱི་རྒྱལ་སྤྱིའི་སྒྲིག་སྲོལ་ལ་མཉམ་དུ་སྲུང་སྐྱོང་བྱས་ཏེ་དམག་རྒྱལ་རིང་ལུགས་རོ་ལངས་རྒྱག་པ་དང་དེ་བཞིན་ས་ཁུལ་དང་འཛམ་གླིང་གི་ཞི་བདེ་དང་བརྟན་ལྷིང་ལ་གཏོར་བཤིག་གཏོང་བའི་ལྐོག་ཇུས་དང་བྱེད་སྤྱོད་གང་རུང་ལ་མཐའ་གཅིག་ཏུ་འགོག་རྒོལ་བྱེད་པ་ནི་ཕྱོགས་གཉིས་ཀྱི་ཐུན་མོང་གི་འགན་འཁྲི་ཡིན།

དུས་རབས་ཀྱི་དཀའ་གནད་རྒྱུན་ཆད་མེད་པར་ཐོན་པའི་མདུན་དུ་ཀྲུང་གོ་དང་ཨ་རིས་མཉམ་དུ་རྒྱལ་ཁབ་ཆེན་པོའི་ཐེག་པ་འཁུར་བ་དང་། ཕན་ཚུན་བརྩི་འཇོག་དང་། ཞི་བདེ་མཉམ་གནས། མཉམ་ལས་གཉིས་ཕན་བཅས་མཐའ་འཁྱོངས་བྱས་ཚེ། ཕན་ཚུན་གྲུབ་འབྲས་ཐོབ་པ་དང་ཐུན་མོང་ཐོག་དར་རྒྱས་ཡོང་བ་རྦད་དེ་མངོན་འགྱུར་ཐུབ་པ་དང་། ལག་གདང་སྦྲེལ་ནས་རྒྱལ་ཁབ་གཉིས་དང་འཛམ་གླིང་ལ་ཕན་པའི་དོན་ཆེན་དང་། བྱ་བ་དངོས། བྱ་བ་བཟང་པོ་བཅས་མང་ཙམ་བསྒྲུབས་ན་རྒྱལ་ཁབ་གཉིས་ལ་ཕན་བདེ་སྔར་བས་ཆེ་བ་དང་འཛམ་གླིང་ལ་ཕན་ཐོགས་ཡོང་ཐུབ།