ལོ་མེ་ནས་གནས་ཚུལ་སྤེལ་བར་གཞིགས་ན། ཚེས་24ཉིན། ཀྲུང་གོ་དང་ཨ་ཧྥེ་རི་ཁའི་རྒྱལ་སྲིད་སྐྱོང་ལུགས་ཀྱི་སྤེལ་རེས་གླེང་མོལ་ཚོགས་འདུ་ཐོ་ཀོའི་རྒྱལ་ས་ལོ་མེ་རུ་འཚོགས་པ་རེད། གླེང་མོལ་ཚོགས་འདུ་ནི་ཐོ་ཀོ་རུ་བཅའ་སྡོད་ཀྲུང་གོའི་གཞུང་ཚབ་ཆེ་མོ་ཁང་དང་ལོ་མེ་སློབ་ཆེན་གྱིས་མཉམ་དུ་འཚོགས་པ་ཞིག་རེད། ཐོ་ཀོ་རུ་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཝང་མིན་དང་། ཐོ་ཀོ་སློབ་གསོ་པུའུ་ཡི་པུའུ་ཀྲང་རིམ་པའི་འཐུས་མི་ཧྲང་པེ་ཅི། དེ་བཞིན་ཀྲུང་གོ་དང་ཐོ་ཀོ་རྒྱལ་ཁབ་གཉིས་ཀྱི་མཁས་དབང་སོགས་ཞུགས་པ་རེད།

ཝང་མིན་གྱིས་བརྗོད་དོན། ཀྲུང་གོ་དང་ཨ་ཧྥེ་རི་ཁའི་མི་འབོར་ཁྱོན་དུང་ཕྱུར་28ཡོད་པ་དེས་འཛམ་གླིང་གི་མི་འབོར་གྱི་གསུམ་ཆ་གཅིག་བཟུང་ཡོད། ཀྲུང་གོ་དང་ཨ་ཧྥེ་རི་ཁའི་དེང་རབས་ཅན་མེད་ན་འཛམ་གླིང་གི་དེང་རབས་ཅན་ཡོང་མི་སྲིད། ཚན་རིག་དང་མཐུན་པའི་སྒོ་ནས་ལོ་ལྔའི་འཆར་གཞི་འགོད་པ་ནི“ཀྲུང་གོ་སྐྱོང་ལུགས”ལ་གྲུབ་འབྲས་ཐོབ་པའི་ཐབས་མཆོག་གི་གྲས་ཤིག་ཡིན། ཀྲུང་གོ་གུང་ཁྲན་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པར“ལོ་ལྔ་ཚན་བཅོ་ལྔ་པའི”འཆར་འགོད་གྲོས་འགོར་གྲོས་ཞིབ་བྱས་ནས་གྲོས་འཆམ་བྱུང་བ་དང་། འབྱུང་འགྱུར་ལོ་ལྔའི་ནང་ཀྲུང་གོ་འཕེལ་རྒྱས་གཏོང་བར་བརྗིད་ཆེའི་འཆར་གཞི་བཀོད་ཡོད། ཐོ་ཀོའི《2020ལོ་ནས་2025ལོ་བར་གྱི་སྲིད་གཞུང་འཆར་འགོད》ལམ་ལྷོངས་ཡོང་ཉེར་ཡོད་པས་ཀྲུང་གོ་ཕྱོགས་ཀྱིས་ཐོ་ཀོའི་འཆར་གཞི་གསར་པ་འགོད་པ་དང་འབྲེལ་མཐུད་བྱས་ཏེ་ཀྲུང་གོ་དང་ཐོ་ཀོའི་མཉམ་ལས་དེ་བས་ཆུ་ཚད་མཐོ་བ་དང་། དེ་བས་གཏིང་ཟབ་པ། དེ་བས་ཁྱབ་རྒྱ་ཆེ་བ་བཅས་སུ་འགྱུར་བར་སྐུལ་འདེད་གཏོང་འདོད་ཡོད།

ཧྲང་པེ་ཅིས་བརྗོད་དོན། ཀྲུང་གུང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པ་དང“ལོ་ལྔ་ཚན་བཅོ་ལྔ་པའི”འཆར་འགོད་ཀྱི་གྲོས་འགོ་དེས་ཐོ་ཀོའི་འཆར་གཞི་གསར་པ་འགོད་པར་དཔྱད་གཞིར་འཛིན་པའི་དོན་སྙིང་གལ་ཆེན་ལྡན་པས་ཐོ་ཀོ་ཕྱོགས་ཀྱིས་ཀྲུང་གོར་སློབ་སྦྱོང་བྱས་ཏེ་ཐོ་ཀོ་དང་ཀྲུང་གོའི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་སྔར་བས་སྲ་བརྟན་དུ་གཏོང་རྒྱུ་རེད།

ཚོགས་ཞུགས་མི་སྣས་ཀྲུང་གུང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་དང་། གོ་ལ་ཧྲིལ་པོའི་བཅོས་སྐྱོང་གི་གྲོས་འགོ ཀྲུང་གོ་དང་ཨ་ཧྥེ་རི་ཁའི་མཉམ་ལས་ཀྱི་མདུན་ལམ་གསར་པ་སོགས་ལ་དམིགས་ནས་སྤེལ་རེས་དང་གྲོས་བསྡུར་འཁྲུག་པོ་བྱས་པ་རེད།