ཤིན་ཧྭ་གསར་འགྱུར་ཁང་གྲོང་ཁྱེར་རི་ནེ་ཝ་ནས་ཟླ་11ཚེས་26ཉིན་གློག་འཕྲིན་འབྱོར་གསལ། ཚེས་25ཉིན། རི་ནེ་ཝར་རྒྱུན་སྡོད་ཀྲུང་གོའི་འཐུས་མི་ཚོགས་པས་སུའེ་ཙེར་གྱི་རི་ནེ་ཝའི་དབན་གོ་ཕོ་བྲང་དུ“མི་ཐབས་རིག་ནུས། མཐུན་སྒྲིལ་མཉམ་བཅོས”ཀྱི་མཐོ་རིམ་གླེང་མོལ་ཚོགས་འདུ་འཚོགས་ཤིང་། མཉམ་འབྲེལ་རྒྱལ་ཚོགས་རི་ནེ་ཝར་རྒྱུན་སྡོད་ཀྲུང་གོའི་དོན་གཅོད་ཁྲུའུ་དང་སུའེ་ཙེར་གྱི་རྒྱལ་སྤྱིའི་རྩ་འཛུགས་གཞན་དག་གི་འཐུས་མི་ཁྲེན་ཤུས་དང་། མཉམ་འབྲེལ་རྒྱལ་ཚོགས་རི་ནེ་ཝའི་དོན་གཅོད་ཁྲུའུ་ཡི་སྤྱི་ཁྱབ་ཀན་ཧྲི་ཝ་ལུའོ་ཝ་ཡ། མཉམ་འབྲེལ་རྒྱལ་ཚོགས་ཀྱི་དྲུང་ཆེ་གཞོན་པ་དང་མཉམ་འབྲེལ་རྒྱལ་ཚོགས་ཀྱི་དྲུང་ཆེའི་གྲངས་གཞི་དང་གསར་དར་ལག་རྩལ་གྱི་དམིགས་བསལ་ཕོ་ཉ་ཨ་མན་ཏི་ཕུའུ·ཅིར་སོགས་དཔོན་རིགས་ཀྱིས་འགོ་ཚུགས་མཛད་སྒོར་ཤིས་ཚིག་བསྒྲོན་པ་རེད། རི་ནེ་ཝར་རྒྱུན་སྡོད་རྒྱལ་ཁབ་ཁག་གི་འཐུས་མི་དང་དེ་བཞིན་མཐོ་རིམ་ཕྱི་འབྲེལ་དཔོན་དང་། རྒྱལ་སྤྱིའི་རྩ་འཛུགས་ཀྱི་འགན་འཁུར་བ། རིག་མཛོད་ཀྱི་མཁས་པ་སོགས་མི་150ལྷག་ཙམ་ས་གནས་ས་ཐོག་ཏུ་ཚོགས་འདུར་ཞུགས་པ་རེད།

ཚོགས་ཞུགས་ཕྱོགས་ཁག་གིས་མི་ཐབས་རིག་ནུས་བཅོས་སྐྱོང་ཁྱབ་ཁོངས་སུ་མཉམ་དུ་ཞུགས་པ་དང་། དྲང་གཞག་ཡིན་ལ་གོ་རིམ་ལྡན་པ། མཐུན་སྒྲིལ་དང་མཉམ་ལས། ཀུན་ཕན་བསྟུན་མཁས། བྱ་སྤྱོད་ཕྱོགས་སྟོན་བཅས་མངོན་འགྱུར་བྱེད་དགོས་ཞེས་ཡོངས་ཁྱབ་ཏུ་ནན་བཤད་བྱས་པ་དང་། ད་ཐེངས་ཀྱི་གླེང་མོལ་ཚོགས་འདུ་དེས་མཉམ་འབྲེལ་རྒྱལ་ཚོགས་ཀྱི་སྒྲོམ་གཞིའི་འོག་གི་མི་ཐབས་རིག་ནུས་ལས་གོ་ལ་ཧྲིལ་པོའི་བཅོས་སྐྱོང་འཕེལ་རིམ་ལ་སྐུལ་འདེད་གཏོང་བར་ཕན་ཐོགས་ཡོད་པའི་ངོས་འཛིན་བྱེད་ཀྱི་ཡོད།