འདི་ནི་2024ལོའི་ཟླ་10ཚེས་10ཉིན་གཟི་ཚ་སྡེ་དགུ་རྫོང་ནས་པར་བླངས་པའི་ཧྭ་མེ་གནས་མཆོག་སྤྲོ་གསེང་ཁུལ་ཡིན་པ། (མི་མེད་གནམ་གྲུས་པར་བླངས)

འདི་ནི་གཟི་ཚ་སྡེ་དགུའི་མཛེས་ལྗོངས་ཡིན་པ།

འདི་ནི་སི་ཁྲོན་ཞིང་ཆེན་རྔ་པ་བོད་རིགས་ཆའང་རིགས་རང་སྐྱོང་ཀྲོའུ་གཟི་ཚ་སྡེ་དགུ་རྫོང་དུ་ཡུལ་སྐོར་བ་ཚོས་གཟི་ཚ་སྡེ་དགུའི་མཛེས་ལྗོངས་ཁུལ་དུ་སྤྲོ་གསེང་ལྟ་སྐོར་བྱེད་བཞིན་པ།

གཟི་ཚ་སྡེ་དགུ་ནི་རྒྱལ་ཁབ་ཕྱི་ནང་དུ་སྐད་གྲགས་ཆོད་པའི་འཛམ་གླིང་གི་རང་བྱུང་ཤུལ་བཞག་ཅིག་ཡིན། ཀུན་གྱིས་ཤེས་གསལ་ལྟར། ཡུལ་དེ་ནི་མི་འབོར་ཁྲི་6.7ལས་མེད་པའི་ས་མཐོའི་རྫོང་ཆུང་ངུ་ཞིག་གི་ཁོངས་སུ་གཏོགས།

ས་བཀྲའི་ཐོག་ནས་བལྟས་ན། གཟི་ཚ་སྡེ་དགུ་རྫོང་ནི་ལྗོན་ཤིང་གི་ལོ་མ་དང་འདྲ་བར་མཚོ་བོད་ས་མཐོ་དང་སི་ཁྲོན་གཤོང་ས་འབྲེལ་མཚམས་སུ་གནས་ཤིང་། སི་ཁྲོན་ཞིང་ཆེན་རྔ་པ་བོད་རིགས་ཆའང་རིགས་རང་སྐྱོང་ཀྲོའུ་ཡི་ཁོངས་སུ་གཏོགས། 2025ལོར། “ཀྲུང་གོའི་ཡུལ་སྐོར་རྫོང་སྟོབས་ཆེན”འདིས་ཡུལ་སྐོར་བ་མི་ཐེངས་ཁྲི་1000གི་ཡིད་དབང་བཀུག་ནས་ཡུལ་སྐོར་ཡོང་འབབ་སྒོར་དུང་ཕྱུར་100ཟིན་ཡོད་པ་རེད།

རིག་གནས་ཡུལ་སྐོར་ཐོན་ལས་ཀྱི་འགྲན་རྩོད་ཉིན་རེ་བཞིན་ཛ་དྲག་ཏུ་འགྲོ་བའི་དེང་གི་དུས་འདིར། གཟི་ཚ་སྡེ་དགུས་སྤུས་རྟགས་ཀྱི་ལེགས་ཆ་རྒྱུན་འཁྱོངས་ཇི་ལྟར་བྱས་ཡོད་དམ།

དུས་བཞིའི་མཛེས་ལྗོངས་རྣམ་པར་བཀྲ་བས། གང་ས་གང་དུ་ཡུལ་སྐོར་བྱེད་རིན་ཡོད་པ།

དགུན་གྱི་ཁ་བ་ཐོག་མ་གཟི་ཚ་སྡེ་དགུ་མཛེས་ལྗོངས་ཁུལ་དུ་བབས་པས་མཛེས་སྡུག་རྣམ་པར་བཀྲ་བའི་ལྷ་ཡུལ་གྱི་ཞིང་ཁམས་ལྟར་སྣང་། “ཁ་བ་བབས་རྗེས་ཀྱི་གཟི་ཚ་སྡེ་དགུ་ནི‘བྱིས་སྒྲུང་གི་འཇིག་རྟེན’ཞིག་དང་གཉིས་སུ་མ་མཆིས། “90ནང་སྐྱེས”ཀྱི་བོད་རིགས་ཡུལ་སྐོར་སྣེ་ཤན་པ་བཀྲ་ཤིས་ཀྱི་ཐད་གཏོང་དུ་མོས་བསྟོད་བྱེད་མཁན་ཧ་ཅང་མང་།

གཟི་ཚ་སྡེ་དགུ་རྫོང་གི་ཕུན་སུམ་ཚོགས་པའི་རང་བྱུང་མཛེས་ལྗོངས་ནི་མི་རྣམས་ཀྱི་བསམ་ཡུལ་ལས་འདས་པ་ཞིག་ཡོད།

གཟི་ཚ་སྡེ་དགུའི་ལྟེ་བའི་མཛེས་ལྗོངས་ཁུལ་ནས་རྒྱལ་ལམ་བརྒྱུད་ལྷོ་ཕྱོགས་སུ་སྤྱི་ལེ་26ཙམ་རླངས་འཁོར་བཏང་ནས་སྐར་མ་30བསྐྱོད་ཚེ། ལྷིང་འཇགས་སུ་གནས་པའི་བརྩེ་དུང་རྒྱ་མཚོའི་འདམ་ར་མཐོང་ཐུབ། དེ་ནས་བྱང་ཤར་ཕྱོགས་སུ“གུག་ཆ་28”ཡོད་པའི་རི་ལམ་བརྒྱུད་ཆུ་ཚོད་1.5ཙམ་བསྐྱོད་ན་ཀླུ་གཉན་གསེར་མཚོའི་ངོ་མཚར་མཛེས་ལྗོངས་མིག་ལམ་དུ་ཤར།

གཟི་ཚ་སྡེ་དགུ་རྫོང་ལ་རང་བྱུང་མཛེས་ལྗོངས་ཕུད། ད་དུང་ཐུན་མོང་མ་ཡིན་པའི་མི་ཆོས་རིག་གནས་ཀྱི་མཛེས་ལྗོངས་ཀྱང་ཡོད།

གཟི་ཚ་སྡེ་དགུ་ཞེས་པ་ནི་ལུང་པ་དེར་བོད་རིགས་ཀྱི་སྡེ་པ་དགུ་ཡོད་པས་དེ་ལྟར་མིང་ཐོགས། དེ་ག་ནི་བོད་རིགས་དང་། རྒྱ་རིགས། ཆའང་རིགས། ཧུད་རིགས་སོགས་མི་རིགས་མང་པོའི་རིག་གནས་མཉམ་འདྲེས་ཁུལ་ཞིག་ཡིན་པས། བྲོ་དང་ནན་ཕིང་རོལ་དབྱངས་སོགས་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་ཁག་བཞི་དང་བོད་བཟོའི་སྒྱུ་རྩལ་གྱི་དཔེ་མཚོན་ཁྱད་ཆོས་ལྡན་པའི་སྟག་ལུང་སྡེ་པ་སོགས་ཡོད་ལ་ས་ཆ་སོ་སོར་ལོ་རྒྱུས་དང་རིག་གནས་ཀྱི་ནང་དོན་ཕུན་སུམ་ཚོགས་པོ་ལྡན་ཡོད།

དཔྱིད་ཀ་མེ་ཏོག་རབ་ཏུ་བཞད། དབྱར་ཁ་རྦ་རླབས་སྔོན་མོ་འཕྱུར། སྟོན་ཁ་ནགས་ཚལ་ཁ་དོག་བཀྲ དགུན་ཁ་འཁྱགས་རྦབ་ཡིད་དུ་འོང་བ་སོགས་གཟི་ཚ་སྡེ་དགུ་རྫོང་དུ་དུས་ཚིགས་བཞི་པོའི་མཛེས་ལྗོངས་རྣམ་པར་བཀྲ་བས་ག་ས་གང་དུ་ཡུལ་སྐོར་བྱེད་རིན་ཡོད།

གྲངས་གཞི་ལས་མངོན་པར། ཟླ་བ་དང་པོ་ནས་ཟླ་བ་བཅུ་པའི་ཟླ་མཇུག་བར། གཟི་ཚ་སྡེ་དགུ་རྫོང་གིས་2025ལོར་ཡུལ་སྐོར་བ་མི་ཐེངས་ཁྲི་921.29ལ་སྣེ་ལེན་ཞུས་པར་ཡུལ་སྐོར་ཡོང་འབབ་སྒོར་དུང་ཕྱུར་92.93ཟིན་པ་དེ་དུས་མཚུངས་ལས་14.54%དང་12.73%སོ་སོར་འཕར་ཡོད་པ་དང་། དེའི་ཁྲོད་གཟི་ཚ་སྡེ་དགུ་མཛེས་ལྗོངས་ཁུལ་གྱིས་སྣེ་ལེན་ཞུས་པའི་ཡུལ་སྐོར་བའི་གྲངས་འབོར་གྱིས་1984ལོ་ནས་ཕྱི་ཕྱོགས་ལ་སྒོ་ཕྱེ་ཚུན་ལོ་རྒྱུས་ཀྱི་ཟིན་ཐོ་མཐོ་ཤོས་བཏོད་ཡོད་པ་རེད།

ད་ཆ་རྫོང་དེ་ཡོངས་ཀྱི་ཡུལ་མི་70%ཡིས་ཐད་ཀར་ཡུལ་སྐོར་ཞབས་ཞུའི་ལས་རིགས་གཉེར་གྱི་ཡོད། ཡུལ་མིའི་ཡུལ་སྐོར་ཞབས་ཞུའི་ཡོང་འབབ་ཀྱིས་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་ཀྱི་60%བཟུང་གི་ཡོད།

“གྲོང་རྡལ་ཡོངས་སུ་ཐེམ་ཁོངས་མི་འབོར་7000ལྷག་ལས་མེད་ཀྱང་རྒྱུན་སྡོད་མི་འབོར་ཁྲི་2ལྷག་ཟིན་གྱི་ཡོད”གཟི་ཚ་སྡེ་དགུ་མཛེས་ལྗོངས་ཁུལ་གནས་སའི་གཙང་རྩ་གྲོང་རྡལ་གྱི་ཀྲེན་ཀྲང་ཨའོ་ཞའོ་ཡུང་གིས། གྲོང་རྡལ་གྱིས་ཡུལ་སྐོར་དང་འབྲེལ་བའི་ཁེ་ལས་རྩེ་གྲ་ནང་འདྲེན་ཤུགས་ཆེན་བྱས་ནས་ལོ་ཁོར་མོར་ལས་གནས་ཁྲི་1ལྷག་མཁོ་འདོན་བྱེད་ཀྱི་ཡོད་ཅེས་བཤད།

པའོ་ཧྭ་ཤང་ལིང་པའོ་གྲོང་ཚོའི་ལིའུ་ཧྲུན་ལིས་གཙང་རྩ་གྲོང་རྡལ་གྱི་ཉི་འོད་གསོལ་མགྲོན་ཁང་དུ་ཞབས་ཞུ་བ་བྱས་ནས་ལོ་དགུ་སོང་བ་དང་ཟླ་ཕོགས་སྒོར་5000ལྷག་ཡོད། ཁོང་གིས། གྲོང་ཚོའི་གཞོན་ནུ་མང་ཆེ་བ་གཟི་ཚ་སྡེ་དགུ་མཛེས་ལྗོངས་ཁུལ་གྱི་ཉེ་འགྲམ་དུ་ལས་ཀ་བྱེད་ཀྱི་ཡོད། ཁ་ཤས་སྲོལ་རྒྱུན་གྱི་བཟའ་བཏུང་མགྲོན་ཁང་ལས་རིགས་སུ་ཡོད་པ་དང་། ཁ་ཤས་འཁྲབ་སྟོན་དང་མངོན་མིན་རིག་གནས་ཤུལ་བཞག་ལག་རྩལ་འགྲེམས་སྟོན་སོགས་ནང་ཞུགས་ཀྱི་ཡོད་ཅེས་བཤད།

གཟི་ཚ་སྡེ་དགུ་རྫོང་ཨུད་ཀྱི་ཧྲུའུ་ཅི་གཞོན་པ་དང་རྫོང་དཔོན་ཞུས་ཅན་གོ་ཡིས། གཟི་ཚ་སྡེ་དགུའི་ཡུལ་སྐོར་ལས་རིགས་ཀྱིས་གཙོ་ཁྲིད་བྱེད་པའི་ཐོན་ལས་གསུམ་པ་ཉེ་བའི་ལོ་གསུམ་རིང་ལོ་རེར་ཆ་སྙོམས་7.1%རེ་འཕར་ནས་རྫོང་ཁོངས་དཔལ་འབྱོར་འཕར་བར་སྐུལ་ཁྲིད་བྱེད་པའི་ཀ་རྟེན་གཙོ་བོར་གྱུར་ཡོད་ཅེས་བཤད།

དམིགས་བསལ་སྤུས་རྟགས་ཀྱི་ལྟེ་བའི་རིན་ཐང་།

དམིགས་བསལ་སྐྱེ་ཁམས་ཐོན་ཁུངས་སྲུང་སྐྱོང་ཡག་པོ་བྱས་ཚེ་གཟི་ཚ་སྡེ་དགུའི་རིག་གནས་ཡུལ་སྐོར་ཐོན་ལས་ཀྱི“རྩ་བ”གཞི་ནས་སྲུང་ཐུབ།

གཟི་ཚ་སྡེ་དགུ་བར་ཐུན་མོང་གི་ངོས་འཛིན་འདི་འདྲ་ཡོད་པའི་རྒྱུ་རྐྱེན་གལ་ཆེན་ཞིག་ནི་ཁོང་ཚོ་སོ་སོའི་མྱོང་བ་ལས་བྱུང་བ་རེད། 2017ལོའི་ཟླ་8ཚེས་8ཉིན་གཟི་ཚ་སྡེ་དགུ་རྫོང་དུ་ས་ཡོམ་རིམ་པ་7.0བརྒྱབ་ནས་དེ་གའི་མཛེས་ལྗོངས་གྲགས་ཅན་མེ་སྟག་རྒྱ་མཚོའི་རགས་ཁ་ཤོར་ནས་མཚེའུ་མཛེས་ལྗོངས་མེད་པར་གྱུར། ཕྱིས་སུ་བསྐྱར་སྐྲུན་བྱས་པ་བརྒྱུད། གཟི་ཚ་སྡེ་དགུའི་སྐྱེ་ཁམས་མ་ལག་སླར་གསོ་ཡག་པོ་བྱུང་ཡོད།

“གེགས་རྗེས་སྐྱེ་ཁམས་སླར་གསོ་དང་ས་ཡོམ་གནོད་འཚེ་བཅོས་སྒྲིག་ཐད་མ་དངུལ་སྒོར་དུང་ཕྱུར་11.49བཏང་བ་དེས་གེགས་རྗེས་བསྐྱར་སྐྲུན་གྱི་མ་དངུལ་བསྡོམས་འབོར་གྱི་31.88%བཟུང་ཡོད”ཅེས་གཟི་ཚ་སྡེ་དགུ་དོ་དམ་ཅུས་ཀྱི་ཅུས་ཀྲང་ཀྲའོ་ཏེ་མེང་གིས་བརྗོད། ཁོང་གིས། མིག་སྔར་སྔོ་ཁེབས་ཁྱབ་ཚད་ས་ཡོམ་རྗེས་ཀྱི་79.64%ནས་82.12%བར་མཐོ་རུ་ཕྱིན་པ་དང་སྲོག་ཆགས་ཁྱུ་ཚོགས་ཀྱི་གྲངས་འབོར་བརྟན་པོའི་ངང་འཕར་བ་མ་ཟད། བྱེ་ཐང་ཞི་ལ་དང་བྱ་རྒོད་སོགས་རྩ་ཆེའི་སྲོག་ཆགས་ཐོན་ཡོད་ཅེས་བརྗོད།

ད་ལྟ་དང་སྔོན་མ་བསྡུར་ཐབས་བྲལ་ཞིང་། ཉེ་བའི་ལོ་གཉིས་རིང་རྒྱལ་ཁབ་ཀྱི་ཤུགས་ཆེའི་རྒྱབ་སྐྱོར་འོག སི་ཁྲོན་དང་མཚོ་སྔོན་ལྕགས་ལམ་གྱི་ཀྲེན་ཅང་ཀོན་ནས་ཧོང་ཧྲེང་ཀོན་བར་གྱི་དུམ་བུ་དང་གཟི་ཚ་སྡེ་དགུ་ནས་མེན་དབྱང་བར་གྱི་མྱུར་བགྲོད་གཞུང་ལམ་དུ་སྔ་རྗེས་སུ་རླངས་འཁོར་ཤར་གཏོང་ཐུབ་པས། ཁྲེང་ཏུའུ་ནས་གཟི་ཚ་སྡེ་དགུ་བར་གྱི་མྱུར་བགྲོད་ལྕགས་ལམ་ལམ་ཡང་ན་མྱུར་བགྲོད་རླངས་འཁོར་ལ་བསྡད་ཚེ་ཆུ་ཚོད་4ཙམ་ལས་འགོར་གྱི་མེད། དེ་དང་ཆབས་ཅིག་གཟི་ཚ་སྡེ་དགུའི་ཧོང་ལུང་གནམ་ཐང་ཡང་རྒྱལ་ནང་གི་གྲོང་ཁྱེར་མང་པོ་ཞིག་ལ་ཤར་གཏོང་ཐུབ་ཡོད་པ་རེད།

གཟི་ཚ་སྡེ་དགུས་བསྒྲུབ་དགོས་པ་ནི་ལྟེ་བའི་བཀོད་པ་ལེགས་སུ་བཏང་སྟེ“སྲུབས་མེད་ལམ་བརྗེ”མངོན་འགྱུར་ཐུབ་ནས“མཐའ་མའི་འགག་གནད”ཤར་གཏོང་ཐུབ་པ་བྱ་རྒྱུ་དེ་རེད།

ཤེས་རྟོགས་བྱུང་བར་གཞིགས་ན། མིག་སྔར་གཟི་ཚ་སྡེ་དགུ་ནས་ཟུང་ཆུའི་ས་ཚིགས་དང་གཟི་ཚ་སྡེ་དགུའི་ཧོང་ལུང་གནམ་ཐང་སོགས་ལམ་ཐིག་4སྦྲེལ་མཐུད་བྱས་པ་དང་དེ་བཞིན་ལུང་མདོ་དང་རྫོང་གྲོང་ནས་མེན་དབྱང་དང་ཁྲེང་ཏུའུ་བར་འགྲོ་འོང་བྱེད་པའི་དུས་གཏན་འགྲུལ་སྐྱེལ་རླངས་འཁོར་ཤར་གཏོང་ཐུབ་སྟེ་ཉིན་རེར་ཆ་སྙོམས་ཡུལ་སྐོར་བ་མི་ཐེངས་ཁྲི་2ལྷག་ཙམ་ལ་སྣེ་ལེན་ཞུས་ཡོད་པ་རེད།

ཡུལ་སྐོར་བ་ཕྱིར་སྐྱོད་ཀྱི་གདམ་ག་ཕུན་སུམ་ཚོགས་སུ་བཏང་ནས“དགོས་མཁོ་སྣ་ཚོགས”སྐོང་ཆེད། དྲ་འབོད་གླ་འཁོར་གྱི་ཞབས་ཞུ་ཡང་ཚད་ལྡན་དུ་གཏོང་རྒྱུར་སྐུལ་འདེད་བཏང་སྟེ། ཁག་དང་པོའི་གཏན་འབེབས་དང་མཐུན་པའི་དྲ་འབོད་གླ་འཁོར་100གཅིག་རྗེས་གཉིས་མཐུད་ངང་གཉེར་སྐྱོང་བྱེད་འགོ་ཚུགས་ཡོད་པ་རེད།

འགྲིམ་འགྲུལ་ཤར་གཏོང་ཐུབ་པ་དང་སྦྲགས། མི་སྔར་བས་མང་བར“གཟི་ཚ་སྡེ་དགུའི”སྐྱེ་ཁམས་ལས་ཕན་པ་ཐོབ་པ།

གཟི་ཚ་སྡེ་དགུ་རྫོང་གི་རྒུན་འབྲུམ་དེང་རབས་ཞིང་ལས་གླིང་ཁུལ་གྱི་འགན་འཁུར་བ་ཁྲེན་ཁའེ་པིན་གྱིས་ད་ཆ་འགྲིམ་འགྲུལ་ཤར་གཏོང་ཐུབ་ནས་རྒུན་འབྲུམ་སྨིན་ཚེ་མྱུར་དུ་ཆང་བསྙལ་བཟོ་གྲྭར་སྐྱེལ་གྱི་ཡོད། གླིང་ཁུལ་དུ་གཡང་གཟར་ཨར་ཁང་དང་ཅིལ་བུའི་སྤྲོ་ཁང་སོགས་བསྐྲུན་ནས། ད་ལོ་ཚུན་ཡུལ་སྐོར་བ་མི་ཐེངས་ཁྲི་8.9ལ་སྣེ་ལེན་བྱས་པར་ཡུལ་སྐོར་ཚོང་གཉེར་ཡོང་འབབ་སྒོར་ཁྲི་560ཟིན་ཡོད་ཅེས་བཤད།

ཇི་ལྟར་བྱས་ནས་རྒྱུགས་འབོར་ཆེན་པོ་ཡག་པོ་སྤྱོད་དགོས་སམ།

ད་ལོ་ཚུན། རྒྱལ་ཁབ་ཀྱི་ཐོངས་མཆན་མི་དགོས་པའི་སྲིད་ཇུས་ལག་ལེན་བསྟར་བ་དང་སྦྲགས། གཟི་ཚ་སྡེ་དགུའི་མཛེས་ལྗོངས་ཁུལ་གྱིས་རྫོང་ཁོངས་སུ་འཛུལ་བའི་ཡུལ་སྐོར་བར་སྣེ་ལེན་བྱེད་ཚད་དུས་མཚུངས་ལས་50%ཙམ་འཕར་ཡོད། དེ་དང་ཆབས་ཅིག་སྤ་སེ་ཉོ་དཀའ་བ་དང་། གླིང་ཁུལ་དུ་འཛུལ་དཀའ་བ། དངུལ་སྤྲོད་དཀའ་བ་སོགས་གནད་དོན་རབ་དང་རིམ་པ་གཅིག་རྗེས་གཉིས་མཐུད་ངང་ཐོན་ཡོད།

གནད་དོན་དེ་དག་ཐག་གཅོད་ཇི་ལྟར་བྱེད་དགོས་སམ།

གཟི་ཚ་སྡེ་དགུ་དོ་དམ་ཅུས་ཀྱི་ཅུས་ཀྲང་གཞོན་པ་ཀུའོ་ཞའོ་མིན་གྱིས། མཛེས་ལྗོངས་ཁུལ་གྱིས་རིག་ལྡན་སྤ་སེའི་ལས་དོན་གསར་སྒྱུར་ལ་སྐུལ་འདེད་བཏང་ནས་རྒྱལ་གྲོལ་ལམ་ཡིག་གི་ཆ་འཕྲིན་ལ་བརྟེན་ནས་དྲ་ཐོག་ནས་སྤ་སེ་ཉོ་ཐུབ་པ་དང་། བགེགས་མེད་གཏོང་སྤྲོད་བྱེད་སྟངས་བསྐྲུན་ནས་གོ་ལ་ཧྲིལ་པོའི་གཙོ་རྒྱུགས་ཡིད་རྟོན་གཱ་དང་དངུལ་སྤྲོད་འབོ་རྒྱལ་སྤྱིའི་པར་གཞི། ཨེ་ཤེ་ཡ་ཤར་ལྷོའི་ས་གནས་དེ་གའི་Appཨང་རྟགས་བཤེར་འབེབས་གཏོང་སྤྲོད་བཅས་ལ་རྒྱབ་སྐྱོར་བྱས་པ། ལམ་སྟོན་དཔེ་རིས་དང་། ངོ་རྟགས། བློ་འདྲི་བཅས་ཚུད་པའི་སྐད་ཡིག་མང་བའི་ཞབས་ཞུའི་མ་ལག་བཙུགས་ཡོད་ཅེས་ངོ་སྤྲོད་བྱས།

གཟི་ཚ་སྡེ་དགུ་རྫོང་དངུལ་རྩའི་ལས་དོན་ཞབས་ཞུ་ལྟེ་གནས་ཀྱི་ཀྲུའུ་རེན་ལིའུ་ལི་ཡིས། “ང་ཚོས་མཛེས་ལྗོངས་ཁུལ་གྱི་འཛུལ་སྒོ་དང་། ཐག་རིང་རླངས་འཁོར་འབབ་ཚུགས། གྲོང་ཚོའི་ཚོང་ལས་ཁྲོམ་གཞུང་བཅས་སུ་ཕྱི་རྒྱལ་གྱི་བྱང་བུ་སྤྱད་ནས་དངུལ་སྨར་ལེན་པར་རྒྱབ་སྐྱོར་བྱེད་པའི་ATMའཕྲུལ་ཆས་གསར་དུ་བཙུགས་ནས་གཙོ་རྒྱུན་ཕྱི་དངུལ་རིགས་15ཡན་འཕྲལ་མར་བརྗེ་རེས་བྱེད་པར་རྒྱབ་སྐྱོར་བྱ་རྒྱུ་ཡིན་ཞེས་བཤད།

“རྫོང་དུ་གསོལ་མགྲོན་ཁང་འཚོལ་བ་དང་། ནམ་ལངས་རྗེས་སྤྱི་སྤྱོད་རླངས་འཁོར་བསྡད་ནས་ལྟ་སྐོར་བྱེད་པ། གྲོག་རོང་ནས་ཐོན་མ་ཐག་ཁང་སློག་ཕྱིར་སྐྱོད”བཅས་ཀྱི“མགྱོགས་མྱུར་ཡུལ་སྐོར”བྱེད་སྟངས་ནི་དེ་སྔ་གཟི་ཚ་སྡེ་དགུའི་རིག་གནས་ཡུལ་སྐོར་ཐོན་ལས་ཀྱི་དཀའ་གནད་ཅིག་ཡིན།

དཀའ་གནད་འདི་ཇི་ལྟར་སེལ་དགོས་སམ།

ས་གནས་དེ་གས“རིག་གནས་ལ་བརྟེན་ནས་མཐུན་རྐྱེན་སྦྱོར་བར”ཤུགས་སྣོན་བརྒྱབ་སྟེ་ཡུལ་སྐོར་འཛད་སྤྱོད་དེ་ལྟ་སྐོར་ནས་སྤྲོ་གསེང་དང་ཉམས་ལེན་བར་རིམ་སྤོར་ཡོང་བར་སྐུལ་འདེད་བཏང་ཡོད།

མིག་སྔར། གཟི་ཚ་སྡེ་དགུ་རྫོང་གིས《གནམ་འོག་གི་གཟི་ཚ་སྡེ་དགུ》དང་། 《གཟི་ཚ་སྡེ་དགུའི་གནའ་བོའི་ཉམས་འགྱུར》《བོད་ཀྱི་གསང་བ》སོགས་སྤུས་ཚད་མཐོ་བའི་འཁྲབ་སྟོན་ལེ་ཚན་རབ་དང་རིམ་པ་བཟོས་ནས་འཁྲབ་སྟོན་ཚོགས་པ་དང་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྒྱུན་འཛིན་པ་མཛེས་ལྗོངས་དང་ཁྲོམ་གཞུང་དུ་བསྐྱོད་དེ་རྒྱུན་རྣམ་ཅན་གྱི“བཅའ་སྡོད་འཁྲབ་སྟོན”ཆགས་པར་སྐུལ་མ་བཏང་ནས། ཡུལ་སྐོར་བས་མཛེས་ལྗོངས་ལ་མྱོང་རོལ་བྱས་རྗེས་མི་རིགས་ཀྱི་ཡུལ་སྲོལ་གོམས་གཤིས་དང་རིག་གནས་ཀྱི་ཡིད་དབང་འཕྲོག་ཤུགས་མུ་མཐུད་ཉམས་ལེན་བྱེད་དུ་འཇུག་གི་ཡོད།

དེ་དང་ཆབས་ཅིག གཟི་ཚ་སྡེ་དགུ་རྫོང་གིས་ཀྱང་ལུས་རྩལ་འགྲན་བསྡུར་དང་ཕྱི་རོལ་ལུས་རྩལ་སོགས་ཐད་ནུས་ཤུགས་ཧུར་ཐག་བཏོན་ནས“ཡུལ་སྐོར+”བྱེད་སྟངས་རྒྱུན་ཆད་མེད་པར་རྒྱ་སྐྱེད་བཏང་ཡོད།

“ན་ནིང་དགུན་ཁར་གངས་ཤུད་ར་བ་ཚོད་ལྟ་བྱས་ནས་གཉེར་སྐྱོང་བྱས་མ་ཐག ཡུལ་སྐོར་བ་ཁྲི་ཕྲག་ཁ་ཤས་ཀྱི་ཡིད་དབང་བཀུག་ཡོད”ཅེས་གཟི་ཚ་སྡེ་དགུའི་ཧྭ་མེ་གནས་མཆོག་ཡུལ་སྐོར་སྤྲོ་གསེང་ཁུལ་གྱི་སྤྱི་ཁྱབ་ཅིང་ལི་གཞོན་པ་ཙུའོ་ཧོན་གྱིས་བཤད་པ་དང་། ཁོང་གིས། ད་ལོ་གཟི་ཚ་སྡེ་དགུའི་གངས་ཤུད་འཇིག་རྟེན་ཆེན་པོས་སྤ་སེ་ཉོ་སྒྲུབ་དང་། གྱོན་ཆས་བརྗེ་བ། ཅ་དངོས་ཉར་བ། བཟའ་བཏུང་སོགས་ཀྱི་ཞབས་ཞུ་སྔར་བས་ལེགས་སུ་བཏང་བ་དང་། གངས་ཤུད་སློབ་ཁྲིད་མང་དུ་བཏང་བ། སྤུས་ཚད་མཐོ་བའི་གངས་ཤུད་སློབ་གྲྭ་དང་མཉམ་ལས་བྱས་ནས་གངས་ཤུད་འཛད་སྤྱོད་ཁྲོམ་རའི་ཡིད་དབང་འཕྲོག་ཤུགས་ཆེ་རུ་བཏང་ཡོད་ཅེས་བཤད།

རིག་གནས་དང་ཡུལ་སྐོར་མཉམ་འདྲེས་ཀྱི་ལམ་བུ་གསར་པའི་ཐོག གཟི་ཚ་སྡེ་དགུའི་འབྱུང་འགྱུར་ལ་མདུན་ལམ་གྱིས་ཁེངས་ནས། སི་ཁྲོན་ནུབ་བྱང་ས་མཐོའི་མུ་ཏིག་འདིར་སྔར་བས་འོད་མདངས་འཕྲོ་ངེས་རེད།