བསམ་བློ་དང་བྱ་སྤྱོད་གཅིག་གྱུར་ཡོང་བར་བྱས་ཏེ་འབད་འབུངས་ཀྱི་སྟོབས་ཤུགས་གཅིག་ཏུ་སྒྲིལ་དགོས།
རང་སྐྱོང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དགུ་པའི་དགོངས་དོན་སློབ་སྦྱོང་དང་ལག་བསྟར་བྱེད་པའི་སྐོར་གྱི་གླེང་ཐེངས་དང་པོ།
རང་སྐྱོང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དགུ་པ་ནི་བོད་ལྗོངས་འདི་ཉིད“ལོ་ལྔ་ཚན་བཅོ་ལྔ་པའི”འཕེལ་རྒྱས་ཀྱི་རྒྱང་ལམ་གསར་པར་སྐྱོད་པའི་འགག་རྩའི་དུས་སྐབས་སུ་འཚོགས་ནས། མི་སེམས་ལ་སྐུལ་མ་ཐེབས་པའི་དུས་རབས་ཀྱི་གསུང་སྒྲ་ཆེན་པོ་བསྒྲགས་ཡོད། ཚང་འཛོམས་གྲོས་ཚོགས་ཐོག་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ནས། ལྗོངས་ཡོངས་ཀྱི“ལོ་ལྔ་ཚན་བཅོ་ལྔ་པའི”རིང་གི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ལས་དོན་ལ་ཞིབ་འཇུག་དང་བཀོད་སྒྲིག་བྱས་པར་དོན་སྙིང་ཧ་ཅང་ཆེན་པོ་ལྡན་ཡོད། མིག་སྔར། ང་ཚོའི་མདུན་དུ་ཡོད་པའི་ཆབ་སྲིད་ཀྱི་ལས་འགན་གལ་ཆེན་ཞིག་ནི། ཚང་འཛོམས་གྲོས་ཚོགས་ཀྱི་དགོངས་དོན་ནང་སེམས་རྒྱུད་ལ་འཇགས་པ་དང་ཕྱིའི་ལག་ལེན་དུ་འཁྱོལ་བར་བྱས་ནས། བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་སྟོབས་ཤུགས་ཆེན་པོ་གཅིག་ཏུ་བསྒྲིལ་ཏེ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བོད་ཀྱི་ལས་དོན་སྐོར་གྱི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལ་གངས་ལྗོངས་ས་མཐོར་དེ་བས་གཡུར་དུ་ཟ་བའི་གྲུབ་འབྲས་ཐོབ་པར་འགན་ལེན་བྱ་རྒྱུ་དེ་རེད།
“ལོ་ལྔ་ཚན་བཅོ་ལྔ་པའི”རིང་གི་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དོན་སྙིང་གལ་ཆེན་ལ་ངོས་འཛིན་གང་ལེགས་བྱས་ན། གཞི་ནས་དུས་རབས་ལ་ངོ་གནོང་མི་དགོས་པར་འགན་འཁྲི་འཁུར་ཐུབ། འབྱུང་འགྱུར་གྱི་ལོ་ལྔ་ནི་རང་རྒྱལ་གྱིས་སྤྱི་ཚོགས་རིང་ལུགས་དེང་རབས་ཅན་གཞི་རྩའི་ཆ་ནས་མངོན་འགྱུར་བྱེད་པར་རྨང་གཞི་བརྟན་དུ་གཏོང་བ་དང་ཕྱོགས་ཡོངས་ནས་ཤུགས་རྒྱག་པའི་འགག་རྩའི་དུས་སྐབས་ཤིག་ཡིན་ལ། བོད་ཀྱིས་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏིང་ཟབ་གཏོང་བ་དང་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་མགྱོགས་མྱུར་འཛུགས་སྐྲུན་བྱེད་པའི་འགག་རྩའི་དུས་སྐབས་ཤིག་ཀྱང་རེད། ངེས་པར་དུ“རྟག་ཏུ་བློ་བཟོད་མི་བདེ་བའི”འགན་འཁྲི་འཁུར་སེམས་དང“བྱས་རྗེས་འཇོག་པར་ང་ཡིས་འབད་པའི”ལོ་རྒྱུས་ཀྱི་འགན་འཁྲི་འཁུར་སེམས་ལ་བརྟེན་ནས། དམིགས་ཚད་དམ་སྲུང་དང་དཔའ་ངར་ཆེན་པོས་འགན་འཁྲི་འཁུར་བ་དང་། སྤྱོད་ཚུལ་ལེགས་གཏོང་དང་དོན་འཁྱོལ་ལ་དམ་འཛིན་ནན་པོ་བྱས་ཏེ་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་བྱེད་པར་ཐག་གཅོད་རང་བཞིན་གྱི་འཕེལ་རྒྱས་ཡོང་བར་སྐུལ་འདེད་ཧུར་ཐག་གཏོང་དགོས།
“ལོ་ལྔ་ཚན་བཅོ་ལྔ་པའི”རིང་གི་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དུས་བབ་ཀྱི་ལེགས་ཆར་སྟངས་འཛིན་ནན་པོ་བྱས་ན། གཞི་ནས་གདེང་ཚོད་བརྟན་དུ་གཏོང་བ་དང་འབྱུང་འགྱུར་ཐོབ་ཐུབ། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་བོད་ཀྱི་ལས་དོན་ལ་ཚད་མཐོའི་མཐོང་ཆེན་དང་བོད་ཀྱི་མི་དམངས་ལ་བྱམས་བརྩེའི་ཐུགས་ཁུར་གནང་ནས། སྤྱི་ཁྱབ་ཧྲུའུ་ཅི་ཞི་ཅིན་ཕིང་སྐུ་ངོ་མས་བོད་ཀྱི་ལས་དོན་ལ་ཁ་སྒྱུར་ཕྱོགས་སྟོན་དང་འཐབ་འགོད་ཇུས་འདོན་གནང་བ་ནི་ང་ཚོའི་ཆབ་སྲིད་ཀྱི་ལེགས་ཆ་ཆེ་ཤོས་དེ་ཡིན་པ་དང་། རྒྱལ་ཁབ་ཀྱིས་ནུབ་རྒྱུད་ཐོན་འབྱེད་ཆེ་མོ་སོགས་འཐབ་ཇུས་གལ་ཆེན་ལག་བསྟར་ཤུགས་ཆེན་བྱས་ནས། ཁྲོན་བོད་ལྕགས་ལམ་སོགས་རྣམ་གྲངས་གལ་ཆེན་ཁག་གཅིག་སྐྲུན་པར་སྐུལ་འདེད་གཏིང་ཟབ་བཏང་བ་ནི་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་འཕྲད་པའི་གོ་སྐབས་ཆེ་ཤོས་དེ་ཡིན་པ། ཏང་ཀྲུང་དབྱང་གིས་དམིགས་བསལ་ཐུགས་ཁུར་གནང་བ་དང་རྒྱལ་ཡོངས་མི་དམངས་ཀྱིས་རོགས་སྐྱོར་ཤུགས་ཆེན་བྱེད་པ་ནི་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་བྱེད་པའི་ལམ་ལུགས་ཀྱི་ལེགས་ཆ་ཆེ་ཤོས་དེ་ཡིན་པ། ལྗོངས་ཡོངས་ཀྱི་མི་རིགས་ཁག་གི་མི་དམངས་ཀྱིས་མཐུན་སྒྲིལ་རྡོག་རྩ་གཅིག་སྒྲིལ་དང་དཀའ་སྤྱད་འབད་འཐབ་བྱེད་པ་ནི་ང་ཚོས་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་གདིང་ཤུགས་ཆེ་ཤོས་དང་་རྒྱབ་རྟེན་ཆེ་ཤོས་དེ་ཡིན་པ། རང་ལྗོངས་ལ་ད་དུང་སྣ་མང་ཕུན་སུམ་ཚོགས་པའི་རང་བྱུང་དང་མི་ཆོས་རིག་གནས་ཐོན་ཁུངས་ཀྱི་ལེགས་ཆ་དང་། སྐྱེ་ཁམས་ཁོར་ཡུག་བཟང་པོའི་ལྗང་མདོག་འཕེལ་རྒྱས་ཀྱི་ལེགས་ཆ། ཨེ་ཤེ་ཡ་ལྷོ་མར་ཕྱོགས་པའི་སྒོ་དབྱེའི་ས་བབ་ཀྱི་ལེགས་ཆ་བཅས་ལྡན་ཡོད། དེ་དང་ཆབས་ཅིག་མདུན་སྐྱོད་ཀྱི་ལམ་བུར་ཉེན་ཁ་དང་འགྲན་སློང་ཁ་ཤས་ཀྱང་གནས་པ་རིག་པ་དྭངས་གསལ་གྱི་སྒོ་ནས་མཐོང་བ་བྱེད་དགོས། འགོ་འཛུགས་ས་གསར་པར་ང་ཚོས་ཆབ་སྲིད་ཀྱི་འགན་འཁྲི་འཁུར་སེམས་དང་ལོ་རྒྱུས་ཀྱི་ལས་འགན་སྒྲུབ་སེམས་ཆེ་རུ་བཏང་ནས། འཐབ་ཇུས་ཀྱི་ངེས་གནས་རྒྱུན་འཁྱོངས་དང་ལོ་རྒྱུས་ཀྱི་གོ་སྐབས་དམ་འཛིན་དང་། ཁྱད་དུ་འཕགས་པའི་བློ་གྲོས་ལ་བརྟེན་པ། འཐབ་ཇུས་ཀྱི་རང་འགུལ་སྟངས་འཛིན་ནན་པོ། ཁྱད་ལྡན་ལེགས་ཆ་འཕེལ་རྒྱས་ཀྱི་ལེགས་ཆར་འགྱུར་བ། ལོ་རྒྱུས་ཀྱི་རང་འགུལ་སྙིང་སྟོབས་ལ་བརྟེན་ནས་འགྱུར་ལྡོག་ལ་ངོས་འཛིན་དང་། འགྱུར་ལྡོག་ལ་བསྟུན་པ། འགྱུར་ལྡོག་ཡོང་ཐབས་བཅས་བྱས་ཏེ་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཀྱི་རྣམ་པ་གསར་པ་རྒྱུན་ཆད་མེད་པར་གཏོད་དགོས།
“ལོ་ལྔ་ཚན་བཅོ་ལྔ་པའི”རིང་གི་བོད་ཀྱི་འཕེལ་རྒྱས་ཀྱི་གཙོ་གནད་ལས་འགན་དོན་འཁྱོལ་གནད་སྨིན་བྱས་ན། གཞི་ནས་འཆར་གཞི་དང་འདུན་པ་མངོན་འགྱུར་ཡོང་ཐུབ། ཚང་འཛོམས་གྲོས་ཚོགས་ཐོག་གཏན་འཁེལ་བྱས་པའི“ལོ་ལྔ་ཚན་བཅོ་ལྔ་པའི”རིང་གི་རང་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གཙོ་གནད་ལས་འགན་ཁག་ནི་འབྱུང་འགྱུར་ལོ་ལྔའི་འཕེལ་རྒྱས་ཀྱི་ཁ་ཕྱོགས་དང་ཤུགས་རྒྱག་ས་གཙོ་བོ་ཡིན་པ་དང་། ངེས་པར་དུ་གཏུགས་དགོས་པའི“མཁྲེགས་ས”ཞིག་ཀྱང་རེད། ལྗོངས་ཡོངས་ཀྱི་གོང་འོག་ཚང་མས་གཟེར་འདེབས་ཀྱི་སྙིང་སྟོབས་དང“བྱས་པའི་རྗེས་དང་འདྲུད་པའི་ཤུལ”གྱི་ངར་ཤུགས་ལ་བརྟེན་ནས། ལས་འགན་རྣམ་གྲངས་ཅན་དང་། རྣམ་གྲངས་གསལ་ཐོ་ཅན། གསལ་ཐོ་འགན་འཁྲི་ཅན་བཅས་སུ་འགྱུར་བ་དང་། འགན་འཁྲི་ལྕི་ཤོས་འཁུར་ཕོད་པ། མཁྲེགས་སར་གཏུགས་ཕོད་པ། གཙོ་གནད་ལས་འགན་ཁག་མཐུན་སྦྱོར་མཉམ་སྒྲུབ་དང་དོན་ཐོག་ཏུ་འཁྱོལ་ནས་ཕན་འབྲས་ཐོན་པ་བཅས་བྱས་ཏེ། ཚང་འཛོམས་གྲོས་ཚོགས་ཐོག་བཀོད་པའི་བརྗིད་ཆེའི་འཆར་གཞི་གངས་ལྗོངས་ས་མཐོའི་སྐྱེ་སྟོབས་ཀྱི་དཔལ་འབར་བའི་དར་རྒྱས་ཀྱི་རྣམ་པར་རིམ་བཞིན་འགྱུར་བར་བྱེད་དགོས།
རྒྱང་སྐྱོད་ལམ་གསར་ཐོག་དམག་རྔ་རྡུང་བཞིན་མདུན་དུ་སྐྱོད། འགན་འཁྲི་གསར་པ་དང་ལས་འགན་ལྕི་པོ་ཕྲག་ཏུ་འཁུར། ང་ཚོས་རང་སྐྱོང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དགུ་པའི་དགོངས་དོན་སློབ་སྦྱོང་དང་ལག་བསྟར་བྱེད་པའི་སྤྲོ་སེམས་བསམ་བློ་གཅིག་གྱུར་དང་། འདུན་པ་གཅིག་གྱུར། བྱ་སྤྱོད་གཅིག་གྱུར་བཅས་ཀྱི་མཉམ་ཤུགས་ཆེན་པོར་འགྱུར་བ་དང་། དམངས་སེམས་གཅིག་མཐུན་དང་འབད་འབུངས་མདུན་སྐྱོད་ཀྱི་འབད་འཐབ་ཀྱི་སྟོབས་ཤུགས་སུ་གཅིག་སྒྲིལ་བྱས་ཏེ། སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་མགྱོགས་མྱུར་འཛུགས་སྐྲུན་དང་ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་ཀྲུང་གོའི་ཕུགས་འདུན་མངོན་འགྱུར་བྱ་ཆེད་ལེགས་སྐྱེས་གསར་པ་དེ་བས་ཆེ་བ་འབུལ་དགོས།
འབྲེལ་ཡོད་གསར་འགྱུར།