རང་སྐྱོང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དགུ་པའི་དགོངས་དོན་ལ་ཚུར་སྣང་ལན་ཆ་ཆེན་པོ་བྱུང་བ།
དངོས་སྒྲུབ་འགན་འཁུར་གྱིས་དོན་འཁྱོལ་ལ་དམ་འཛིན་བྱེད། གསར་འབྱེད་འབད་འབུངས་ཀྱིས་འཕེལ་རྒྱས་ལ་སྐུལ་འདེད་གཏོང་།
རང་སྐྱོང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དགུ་པས་མིག་སྔ་དང་སླད་ཕྱིན་དུས་སྐབས་ཤིག་རིང་གི་བོད་ལྗོངས་འཕེལ་རྒྱས་གཏོང་བའི་བརྗིད་ཆེའི་འཆར་གཞི་ཇུས་འགོད་ཞིབ་ཚགས་བྱས་པ་དང་། གཙོ་གནད་ལས་འགན་དང་མདུན་སྐྱོད་ཁ་ཕྱོགས་གསལ་སྟོན་བྱས་པས་གངས་ལྗོངས་ས་མཐོའི་རྒྱ་ཆེའི་ཏང་ཡོན་ལས་བྱེད་པ་དང་མི་རིགས་ཁག་གི་མང་ཚོགས་ཁྲོད་ཚུར་སྣང་ལན་ཆ་ཆེན་པོ་བྱུང་ཡོད། ཚང་མས་བསམ་བློ་དང་བྱ་སྤྱོད་ཚང་འཛོམས་གྲོས་ཚོགས་ཀྱི་དགོངས་དོན་ཐོག་གཅིག་གྱུར་བྱས་ནས་དམིགས་ཚད་གཏན་འཁེལ་དང་མཐུན་སྒྲིལ་འབད་འཐབ་ཀྱིས་ཚང་འཛོམས་གྲོས་ཚོགས་ཐོག་གཏན་འཁེལ་བྱས་པའི་ཐབས་ཇུས་བཀོད་སྒྲིག་ཁག་ལག་ལེན་བསྟར་ནས་ཕན་འབྲས་ཐོན་པར་བྱས་ཏེ་ཀྲུང་གོའི་ལུགས་ཀྱི་དེང་རབས་ཅན་གྱི་བོད་ཀྱི་ལེའུ་གསར་པ་ཧུར་ཐག་རྩོམ་ཆེད་བློ་གྲོས་དང་སྟོབས་ཤུགས་ལེགས་སྐྱེས་འབུལ་གྱི་ཡིན་ཞེས་གཅིག་རྗེས་གཉིས་མཐུད་ངང་བཤད་པ་རེད།
“རང་སྐྱོང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དགུ་པར‘ལོ་ལྔ་ཚན་བཅོ་ལྔ་པའི’འཆར་འགོད་གྲོས་འགོར་གྲོས་ཞིབ་བྱས་ནས་གྲོས་འཆམ་བྱུང་བ་དང་། མ་འོངས་ལོ་ལྔའི་རིང་བོད་འཕེལ་རྒྱས་གཏོང་བའི་བརྗིད་ཆེའི་འཆར་འགོད་ཚན་རིག་དང་མཐུན་པའི་སྒོ་ནས་ཇུས་འགོད་བྱས་ཏེ། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་བོད་དུ་དོན་འཁྱོལ་བྱེད་པར་བྱ་སྤྱོད་ཀྱི་མཛུབ་ཁྲིད་བྱས་པ་མ་ཟད། ང་ཚོར་ཀྲུང་གོའི་ལུགས་ཀྱི་དེང་རབས་ཅན་གྱི་བོད་ལྗོངས་གསར་པ་སྐྲུན་པར་བབ་བསྟུན་འཕྲལ་སྒྲུབ་དང་མུ་མཐུད་སྐུལ་འདེད་གཏོང་བའི་ཁ་ཕྱོགས་དང་ཐབས་ལམ་གསལ་སྟོན་བྱས་པས་མི་རྣམས་ལ་སྐུལ་མ་ཐེབས་པ་དང་སེམས་ཤུགས་འཕེལ་ཡོད། གོམ་སྟབས་རྗེས་མར། ང་ཚོས་ཚང་འཛོམས་གྲོས་ཚོགས་ཀྱི་དགོངས་དོན་སློབ་སྦྱོང་དང་ལག་བསྟར་ནན་ཏན་བྱས་ནས་རྒྱལ་ཁབ་ཀྱི་འཐབ་ཇུས་བཀོད་སྒྲིག་དང་ལྗོངས་ཏང་ཨུད་དང་སྲིད་གཞུང་གི་ལས་ཀའི་བླང་བྱ་གནད་ལ་འཁེལ་བའི་སྒོ་ནས་ཁོང་དུ་ཆུད་པར་བྱས་ནས། རང་སྐྱོང་ལྗོངས་ཏང་ཨུད་ཀྱི‘ལོ་ལྔ་ཚན་བཅོ་ལྔ་པའི’འཆར་འགོད་གྲོས་འགོའི་ལྟེ་བའི་དོན་སྙིང་དང་། དམིགས་ཚད་བླང་བྱ། ལག་ལེན་གྱི་ཐབས་ལམ་བཅས་ལ་གོ་བ་གཏིང་ཟབ་བླངས་ཏེ། ཀྲུང་གོའི་ལུགས་ཀྱི་དེང་རབས་ཅན་གྱི་མངའ་རིས་ཀྱི་ལེའུ་གསར་རྩོམ་ཆེད་འཕེལ་སྒྱུར་གྱི་སྟོབས་ཤུགས་དེ་བས་མང་བ་ལེགས་སྐྱེས་འབུལ་གྱི་ཡིན”ཞེས་མངའ་རིས་ས་ཁུལ་འཕེལ་སྒྱུར་ཨུ་ལྷན་ཏང་ཙུའི་ཧྲུའུ་ཅི་གཞོན་པ་དང་ཀྲུའུ་རེན་ཀུང་ཁྲང་ཕིང་གིས་བཤད།
བོད་རང་སྐྱོང་ལྗོངས་ཚན་རྩལ་མཐུན་ཚོགས་ཀྱི་ཀྲུའུ་ཞི་གཞོན་པ་ཀྲང་ཧུང་ཝུའེ་ཡིས“རང་སྐྱོང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དགུ་པས་བོད་ཀྱི‘ལོ་ལྔ་ཚན་བཅོ་ལྔ་པའི’འཕེལ་རྒྱས་ལ་ཁ་ཕྱོགས་གསལ་སྟོན་དང་འཆར་གཞི་བཀོད་ཡོད། ཚན་རྩལ་མཐུན་ཚོགས་ཁོངས་གཏོགས་ཀྱིས་ཚང་འཛོམས་གྲོས་ཚོགས་ཀྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་ཏེ་བསམ་བློ་དང་བྱ་སྤྱོད་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཐབས་ཇུས་བཀོད་སྒྲིག་ཐོག་གཅིག་གྱུར་ཏན་ཏིག་ཡོང་བ་བྱེད་པ་དང་། “དོན་ཆེན་བཞིར”དམིགས་པ་དང“འཛུགས་གཏོད་བཞིར”ཤུགས་བརྒྱབ་ནས་ལོ་ཧྲིལ་པོའི་དམིགས་ཚད་དང་ལས་འགན་ཕུན་སུམ་ཚོགས་པོའི་ངང་ལེགས་འགྲུབ་ཡོང་བའི་འགན་ལེན་བྱེད་ཀྱི་ཡིན་ཞེས་བཤད།
ལྷོ་ཁ་གྲོང་ཁྱེར་སློབ་གསོ་ཅུས་ཀྱི་ཏང་ཙུའི་ཧྲུའུ་ཅི་དང་ཅུས་ཀྲང་གཞོན་པ་པའེ་ཅང་ཧྲན་གྱིས། དུས་རབས་གསར་པའི་སློབ་གསོའི་འཐབ་ཕྱོགས་ལས་དོན་པའི་འགན་འཁྲི་གཟི་བརྗིད་ལྡན་པ་དང་འགན་འཁྲི་ལྕི་པོ་ཡོད་པས། ང་ཚོས་ད་ཐེངས་ཀྱི་ཚོགས་འདུའི་དགོངས་དོན་མཛུབ་ཁྲིད་དུ་བྱས་ཏེ་སྤྱོད་བཟང་མི་སྐྱོང་གི་རྩ་བའི་ལས་འགན་བརྟན་སྲུང་གིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་རྒྱུ་དེ་སློབ་གསོ་དང་སློབ་ཁྲིད་ཀྱི་བརྒྱུད་རིམ་ཧྲིལ་པོར་ཁྱབ་པར་བྱས་ནས་སློབ་མའི“མོས་སེམས་ལྔ”ཟབ་ཏུ་གཏོང་གི་ཡིན། སློབ་གསོ་འཕེལ་རྒྱས་ཀྱི་ཞན་ཆ་སེལ་བ་དང་སློབ་གྲྭ་ཚད་ལྡན་ཅན་འཛུགས་སྐྲུན་སྔར་བས་བྱེད་མགྱོགས་སུ་གཏོང་བ་དང་སློབ་གསོའི་ཐོན་ཁུངས་ལེགས་སུ་བཏང་ནས་སློབ་མ་ཚང་མར་སྤུས་ལེགས་སློབ་གསོ་མཉམ་སྤྱོད་ཐུབ་པ་བྱེད་ཀྱི་ཡིན་ཞེས་བཤད།
འབྲེལ་ཡོད་གསར་འགྱུར།