དབུ་ཤོག>གསར་འགྱུར།>སྐབས་དོན་ཆབ་སྲིད།
  • 2025ལོའི་ལྗོངས་ཡོངས་ཀྱི་གླ་ཆ་འགྱངས་ཆད་རྩ་བཅོས་ཀྱི་དགུན་དུས་བྱ་སྤྱོད་སྐུལ་སློང་བཀོད་སྒྲིག་གི་བརྙན་ལམ་ཚོགས་འདུ་འཚོགས་པ།

  • ཡོང་ཁུངས།  ཀྲུང་གོའི་བོད་ཀྱི་གསར་འགྱུར་དྲ་བ།   |     སྤེལ་དུས།  2025-11-29

    ཉེ་ཆར། ལྗོངས་ཏང་ཨུད་ཀྱི་རྒྱུན་ཨུ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་བསྟན་པས་2025ལོའི་ལྗོངས་ཡོངས་ཀྱི་གླ་ཆ་འགྱངས་ཆད་རྩ་བཅོས་ཀྱི་དགུན་དུས་བྱ་སྤྱོད་སྐུལ་སློང་བཀོད་སྒྲིག་གི་བརྙན་ལམ་ཚོགས་འདུ་འཚོཌ་ཏེ། 2025ལོའི་གླ་ཆ་འགྱངས་ཆད་རྩ་བཅོས་ཀྱི་དགུན་དུས་བྱ་སྤྱོད་སྐུལ་སློང་བཀོད་སྒྲིག་གི་བརྙན་ལམ་ཚོགས་འདུའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་པ་མ་ཟད། ད་དུང་གོམ་སྟབས་རྗེས་མའི་ལས་དོན་བཀོད་སྒྲིག་ཀྱང་བྱས་པ་རེད།

    བསྟན་པས་གླ་ཆ་འགྱངས་ཆད་རྩ་བཅོས་བྱ་རྒྱུ་ནི་ཆབ་སྲིད་ཀྱི་ལས་འགན་ཞིག་རེད་ལ་དམངས་འཚོའི་འདུ་འགོད་ཅིག་ཀྱང་རེད། རིམ་པ་ཁག་དང་སྡེ་ཚན་ཁག་གིས་བསམ་བློ་དང་བྱ་སྤྱོད་དེ་ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་ལྗོངས་ཏང་ཨུད་དང་སྲིད་གཞུང་གི་ལས་དོན་བླང་བྱའི་ཐོག་གཅིག་གྱུར་ཡོང་བ་བྱེད་དགོས་ཤིང་། གླ་ཆ་འགྱངས་ཆད་རྩ་བཅོས་ཀྱི་དགུན་དུས་བྱ་སྤྱོད་གཏིང་ཟབ་སྤེལ་ནས་གླ་ཆ་འགྱངས་ཆད་གྱོད་དོན་ཚང་མ་སྐབས་བསྟུན་གཙང་སེལ་ཐུབ་པའི་འགན་ལེན་བྱས་ཏེ། ཞིང་པ་ལས་མིར་དཀའ་ལས་བརྒྱབ་པའི་དངུལ་དུས་ཐོག་ཏུ་རག་ཐུབ་པར་བྱས་ནས་བློ་བདེ་པོའི་ངང་ཁྱིམ་དུ་ལོ་གསར་གཏོང་བར་ལོག་རྒྱུ་ཡོང་བ་བྱེད་དགོས་ཞེས་གསུངས་པ་རེད།

    བསྟན་པས་ནན་བཤད་གནང་དོན། མི་མངོན་པའི་རྐྱེན་ངན་གྲལ་བཤེར་དང་འབྱུང་རྩ་ནས་བཅོས་སྒྲིག་བྱེད་དགོས་ཤིང་། གླ་ཆ་འགྱངས་ཆད་ཀྱི་ཉེན་ཁ་དང་མངོན་མེད་རྐྱེན་ངན་གྲལ་བཤེར་གཏིང་ཟབ་བྱེད་པ་དང་། ཁེ་དབང་སྲུང་སྐྱོང་གི་ཐབས་ལམ་ཤར་གཏོང་ཐུབ་པར་བྱེད་པ། གླ་སྤྲོད་ལམ་ལུགས་ལག་ལེན་བསྟར་ཚུལ་ལ་ལྟ་སྐུལ་ཞིབ་བཤེར་བྱ་རྒྱུར་ཤུགས་སྣོན་རྒྱག་པ་བཅས་བྱས་ནས་གླ་ཆ་འགྱངས་ཆད་ཀྱི་གནད་དོན་སྔོན་འགོག་དང་། ཤེས་རྟོགས། ཆད་གཅོད་བསླབ་འདོམས་བཅས་བྱེད་པའི་ལམ་སྲོལ་འཛུགས་པ་དང་འཐུས་སྒོ་ཚང་དུ་གཏོང་དགོས་པ་དང་། འགལ་བ་འདུམ་སེལ་དང་ཉེན་ཁར་དོགས་ཟོན་བྱེད་དགོས་ཤིང་། མང་ཚོགས་ལ་ཁྲིམས་ལྟར་ཁེ་དབང་སྲུང་སྐྱོང་བྱ་རྒྱུར་ཁྲིད་སྟོན་བྱེད་པ་དང་། འགན་འཁྲི་གཙང་སྒྲུབ་དང་འགན་འཁྲི་འཁུར་ཤུགས་ཆེ་རུ་གཏོང་བ། འགན་འཁྲི་གཞིར་བཟུང་ལས་བགོས་རྒྱག་པ། མཐུན་སྦྱོར་གཞོགས་འདེགས་བྱེད་ཤུགས་ཆེ་རུ་གཏོང་བ། ལས་དོན་དོན་འཁྱོལ་ལ་དམ་འཛིན་ནན་པོ་བཅས་བྱས་ཏེ། གླ་ཆ་འགྱངས་ཆད་རྩ་བཅོས་ཀྱི་ལོ་མཇུག་གི་འགག་སྒྲོལ་ལས་དོན་ལེགས་པར་བསྒྲུབས་ནས། རང་ལྗོངས་ཀྱི་ངལ་རྩོལ་པ་དང་མི་སྤྱོད་ཚན་པའི་འབྲེལ་བ་ཞི་མཐུན་བརྟན་ལྷིང་ཡོང་བའི་འགན་ལེན་བྱེད་དགོས།

    འགན་འཁུར་རྩོམ་སྒྲིག་པ། ཚེ་བརྟན་རྡོ་རྗེ།

འབྲེལ་ཡོད་གསར་འགྱུར།