ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་ཐོག་གྲོས་ཞིབ་བྱས་ནས་གྲོས་འཆམ་བྱུང་བའི“ལོ་ལྔ་ཚན་བཅོ་ལྔ་པའི”འཆར་འགོད་གྲོས་འགོའི་མཛུབ་ཁྲིད་དགོངས་པའི་ནང་། “དམངས་ཡོངས་ཐུན་མོང་ཐོག་འབྱོར་ཕྱུག་ཡོང་ཆེད་གོམ་སྟབས་བརྟན་པོ་སྤོ་དགོས”ཞེས་པར་མངོན་གསལ་དོད་པོས་ནན་བཤད་བྱས་ཡོད།

“འདི་ནི‘ལོ་ལྔ་ཚན་བཅོ་ལྔ་པའི’རིང་གི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་མཛུབ་ཁྲིད་བྱེད་པའི་སྤྱིའི་བླང་བྱ་ཞིག་རེད”ཅེས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་འཆར་འགོད་གྲོས་འགོ་གསལ་བཤད་གནང་སྐབས་ནན་བཤད་གནང་ཡོད།

མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་བྱས་ནས་དམངས་འཚོ་འགན་སྲུང་དང་ལེགས་སུ་ཤུགས་ཆེན་བཏང་ན། འཕེལ་རྒྱས་ཀྱི་གྲུབ་འབྲས་ཀྱིས་མི་དམངས་ཡོངས་ལ་དེ་བས་མང་བ་དང་དེ་བས་དྲང་གཞག་གི་ཕན་པ་ཐོབ་ཐུབ་པ་དང་མི་སེར་གྱི་བདེ་སྐྱིད་འཚོ་བའི་གཞི་མདངས་དེ་བས་བཀྲག་མདངས་རྒྱས་པོ་ཡོང་ཐུབ།

མི་དམངས་ལ་བདེ་སྐྱིད་བསྐྲུན་རྒྱུ་དེ་རྩ་བའི་རིན་ཐང་གི་ལྟ་བ་འཛིན་ཕྱོགས་སུ་བརྩི་བ།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“ང་ཚོས་མི་དམངས་གོང་དུ་བཀུར་བའི་འདུ་ཤེས་བརྟན་སྲུང་བྱས་ཏེ། དེང་རབས་ཅན་ཁ་ཕྱོགས་ཀྱི་མི་དམངས་རང་བཞིན་འབུར་དུ་ཐོན་པར་བྱེད་དགོས”ཞེས་དང“དེང་རབས་ཅན་གྱིས་མི་དམངས་ཀྱི་ཕྱོགས་ཁག་གི་རེ་འདུན་དང་སྣ་མང་གི་དགོས་མཁོར་དེ་བས་ལེགས་པའི་སྒོ་ནས་ལན་འདེབས་དགོས”ཞེས་ཁ་གསལ་བསྟན་ཡོད།

རང་རྒྱལ་གྱིས་གོ་ལ་ཧྲིལ་པོའི་གཞི་ཁྱོན་ཆེ་ཤོས་ཀྱི་སློབ་གསོའི་མ་ལག་དང་། སྤྱི་ཚོགས་འགན་སྲུང་མ་ལག སྨན་བཅོས་འཕྲོད་བསྟེན་མ་ལག་བཅས་བསྐྲུན་ཟིན་ཞིང་། “ལོ་ལྔ་ཚན་བཅུ་བཞི་པའི”རིང་། གྲོང་ཁྱེར་དང་གྲོང་རྡལ་དུ་ལོ་ལྟར་ལས་ཞུགས་མི་ཁྲི་1200ཡན་གསར་འཕར་བྱུང་བ་དང་། མི་རེའི་ཆ་སྙོམས་སྔོན་དཔག་ཚེ་ཚད་ལོ་79ལ་སླེབས་པ། རྒྱལ་ཡོངས་ཀྱི་ཞིང་ཆེན་བསྒྲལ་ནས་ཡུལ་གཞན་དུ་སྨན་བཅོས་བྱེད་མཁན་གྱིས་སྨན་རིན་ཐད་ཀར་རྩིས་ཞུ་བྱེད་ཆོག་པ་དེས་མི་ཐེངས་དུང་ཕྱུར་5.6ལ་ཕན་པ་ཐོབ་པ་སོགས། འཕེལ་རྒྱས་གཏོང་རིང་དམངས་འཚོ་འགན་སྲུང་དང་ལེགས་སུ་གཏོང་རྒྱུ་རྒྱུན་འཁྱོངས་བྱས་ཏེ། “ངོ་མཚར་ཆེན་པོ་གཉིས”མི་སེར་གྱི་འཚོ་བའི་ཁྲོད་མངོན་འགྱུར་བྱུང་ཡོད།

དམངས་འཚོ་འགན་སྲུང་དང་ལེགས་སུ་གཏོང་བའི་ལས་དོན་ལ་ནམ་ཡང་མཐའ་མེད་པས། རྒྱུན་ཆད་མེད་པར་འགོ་འཛུགས་ས་གསར་པ་འཚོལ་དགོས། “ལོ་ལྔ་ཚན་བཅོ་ལྔ་པའི”རིང་ནི་སྤྱི་ཚོགས་རིང་ལུགས་དེང་རབས་ཅན་གཞི་རྩའི་ཐོག་མངོན་འགྱུར་བྱེད་པར་རྨང་གཞི་བརྟན་དུ་གཏོང་བ་དང་ཕྱོགས་ཡོངས་ནས་སྟོབས་ཤུགས་འདོན་པའི་འགག་རྩའི་དུས་སྐབས་ཤིག་ཡིན། མཛེས་སྡུག་ལྡན་པའི་འཚོ་བར་བཅངས་པའི་མི་དམངས་ཀྱི་རེ་འདོད་དེ་སྤྱིའི་ཆ་ནས“ཡོད་མ་ཡོད”ནས“བཟང་མ་བཟང”གི་ཕྱོགས་སུ་སྒྱུར་ཟིན་སྐབས། མཛེས་སྡུག་ལྡན་པའི་འཚོ་བར་བཅངས་པའི་མི་དམངས་ཀྱི་རེ་སྒུག་གསར་པ་ཇི་ལྟར་བྱས་ནས་ཧུར་ཐག་སྐོང་བའི་ཐད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཐུགས་ཁྲལ་ཡང་ཡང་གནང་བ་དང་ཕུགས་ལ་དགོངས་པ་གཏིང་ཟབ་བཞེས་ཀྱི་ཡོད།

“ལོ་ལྔ་ཚན་བཅོ་ལྔ་པའི”འཆར་འགོད་ཀྱི་གྲོས་འགོ་ཞིབ་ཏུ་ཀློག་སྐབས།“མི་དམངས”ཞེས་པའི་ཡིག་འབྲུ་གཉིས་པོ་ཐོག་མཐའ་བར་གསུམ་དུ་ཁྱབ་ཡོད།

“ལོ་ལྔ་ཚན་བཅོ་ལྔ་པའི”རིང་གི་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་མཛུབ་ཁྲིད་དགོངས་པའི་ནང“མི་དམངས་ཀྱི་ཉིན་རེ་བཞིན་ཆེ་རུ་འགྲོ་བའི་མཛེས་སྡུག་ལྡན་པའི་འཚོ་བའི་དགོས་མཁོ་སྐོང་རྒྱུ་དེ་རྩ་བའི་དམིགས་ཡུལ་དུ་འཛིན་དགོས”ཞེས་པ་དེའང་ཚུད་ཡོད།

“མི་དམངས་གོང་དུ་བཀུར་རྒྱུ་མཐའ་འཁྱོངས་བྱེད་པ”ནི“ལོ་ལྔ་ཚན་བཅོ་ལྔ་པའི”རིང་གི་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བར་ངེས་པར་དུ་བརྩི་སྲུང་ཞུ་དགོས་པའི་རྩ་དོན་གྱི་གྲས་ཤིག་ཡིན།

“མི་དམངས་ཀྱི་འཚོ་བའི་སྤུས་ཚད་རྒྱུན་ཆད་མེད་པར་མཐོ་རུ་གཏོང་བ”ནི“ལོ་ལྔ་ཚན་བཅོ་ལྔ་པའི”རིང་གི་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་དམིགས་ཚད་གཙོ་བོའི་གྲས་ཤིག་ཡིན།

ཐུན་མོང་འབྱོར་ཕྱུག་གི་དམིགས་ཚད་བླང་བྱར་སྟངས་འཛིན་ནན་པོ་བྱེད་པ་དང་། དམངས་འཚོ་འགན་སྲུང་དང་ལེགས་སུ་གཏོང་བར་དམིགས་ནས། སྤུས་ཚད་མཐོ་བའི་ལས་ཞུགས་གང་མང་ཐུབ་པར་སྐུལ་འདེད་གཏོང་བ་དང་ཡོང་འབབ་བགོ་བཤའི་ལམ་ལུགས་འཐུས་སྒོ་ཚང་དུ་གཏོང་བ་སོགས་ལ་དོ་སྙོམས་རང་བཞིན་དང་ཁྱབ་ནུས་རང་བཞིན་ཆེ་བའི་སྲིད་ཇུས་ཀྱི་བྱ་ཐབས་ཁག་གཅིག་བཀོད་སྒྲིག་བྱས་ཡོད།

དམངས་ཡོངས་ཀྱི་བློ་གྲོས་དང་སྟོབས་ཤུགས་གཅིག་སྡུད་བྱེད་པ།

“རིམ་པ་དང་ཐབས་ལམ་མང་བའི་སྒྲོག་འགྲེལ་གསོ་སྦྱོང་བྱས་ནས། རྒྱ་ཆེའི་ལས་བྱེད་མང་ཚོགས་ལ་བསམ་བློ་དང་བྱ་སྤྱོད་ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་གཅིག་གྱུར་ཡོང་བ་བྱས་ཏེ། ཐུན་མོང་གི་ངོས་འཛིན་སྔར་བས་ཟབ་ཏུ་གཏོང་བ་དང་། ཡིད་ཆེས་སྔར་བས་ཆེ་རུ་གཏོང་བ། ལས་དོན་སྒྲུབ་ཤུགས་སྔར་བས་ཆེ་རུ་གཏོང་བ་བཅས་བྱ་རྒྱུའི་ཁྲིད་སྟོན་བྱེད་དགོས” སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཉེ་ཆར་ཀོང་ཏུང་དུ་རྟོག་ཞིབ་གནང་སྐབས། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་སློབ་སྦྱོང་དང་། དྲིལ་བསྒྲགས། ལག་བསྟར་བཅས་བྱ་རྒྱུའི་ཐད་བླང་བྱ་ཁ་གསལ་བཏོན་གནང་ཡོད།

ཀྲུང་གོའི་ལུགས་ཀྱི་དེང་རབས་ཅན་ནི་མི་དམངས་དུང་ཕྱུར་མང་པོའི་རང་ཉིད་ཀྱི་བྱ་གཞག་ཅིག་རེད། མི་དམངས་ལ་དམ་པོར་བརྟེན་པ་དང་། མི་དམངས་ཀྱི་གསར་གཏོད་སྙིང་སྟོབས་ལ་བརྩི་འཇོག མི་དམངས་ཡོངས་ཀྱི་བློ་གྲོས་དང་སྟོབས་ཤུགས་གཅིག་སྡུད་བྱས་ན། གཞི་ནས་ཀྲུང་གོའི་ལུགས་ཀྱི་དེང་རབས་ཅན་རྒྱུན་ཆད་མེད་པར་གོང་དུ་འཕེལ་བར་སྐུལ་འདེད་གཏོང་ཐུབ།

དམངས་ཀྱི་རེ་སྒུག་བྱེད་ས་ནི་སྲིད་འཛིན་གྱི་ཁ་ཕྱོགས་ས་ཡིན།“ལོ་ལྔ་ཚན་བཅོ་ལྔ་པའི”འཆར་འགོད་ཀྱི་གྲོས་འགོ་འཆར་ཟིན་འགོད་པའི་ལས་དོན་ནི་ཏང་ནང་ཁུལ་གྱི་དམངས་གཙོ་དང་བརྒྱུད་རིམ་ཧྲིལ་པོའི་མི་དམངས་དམངས་གཙོ་དར་སྤེལ་གཏོང་བའི་གསོན་ཉམས་ལྡན་པའི་ལག་ལེན་གཞན་ཞིག་རེད།

ཟླ་4ཚེས་30ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཧྲང་ཧའེ་རུ་ཞིང་ཆེན་དང་། རང་སྐྱོང་ལྗོངས། གྲོང་ཁྱེར་བཅས་ཁ་ཤས་ཀྱི“ལོ་ལྔ་ཚན་བཅོ་ལྔ་པའི”དུས་སྐབས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་བཞུགས་མོལ་ཚོགས་འདུ་གཙོ་སྐྱོང་གནང་ནས་ཞིང་ཆེན་དང་། རང་སྐྱོང་ལྗོངས། གྲོང་ཁྱེར་བཅས་ཁག་གི་འགན་འཁུར་བློ་མཐུན་གཙོ་བོ་7གྱི་བསམ་འཆར་དང་གྲོས་འགོ་གསན་པ་རེད།

ཟླ་ལྔ་པ་ནས་དྲུག་པའི་བར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་ལྟར། ཀྲུང་དབྱང་གི་འགོ་ཁྲིད་བློ་མཐུན་ཚོས་སྔ་རྗེས་སུ་བཞུགས་མོལ་ཚོགས་འདུ་ཐེངས་3གཙོ་སྐྱོང་གནང་ནས། དཔལ་འབྱོར་ལས་རིགས་དང་། ཚན་རྩལ་ལས་རིགས། གཞི་རིམ་བཅས་ཀྱི་འཐུས་མིའི་བསམ་འཆར་གསན་པ་རེད།

འབྲེལ་ཡོད་སྡེ་ཚན་དང་། ཚན་པ། རིག་མཛོད་བཅས་ལ་མངགས་བཅོལ་བྱས་ནས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གནད་དོན་གལ་ཆེན་ཐད་གཙོ་གནད་གྲོས་བསྡུར་བྱ་གཞི་ཁག་35ལ་ཞིབ་འཇུག་བྱས་པ་དང་། ས་གནས་ཁག་དང་སྡེ་ཚན་ཁག་གི་བསམ་འཆར་དང་གྲོས་འགོ་བསྡུ་ལེན་དང་ཏང་ཕྱིའི་མི་སྣའི་བསམ་འཆར་དང་གྲོས་འགོ་གསན་པ་ལ་སོགས་བྱས་པ་རེད།

“མཉམ་སྤོས་བུ་ཕྲུག་ཉེ་འགྲམ་དུ་སློབ་ཞུགས་བྱེད་པའི་སྲིད་ཇུས་ལེགས་སུ་གཏོང་བ”དང་། “ལས་ཞུགས་ཚོགས་སྤྱི་གསར་པའི་ལས་རིགས་གནོད་སྐྱོན་འགན་སྲུང་ཡོངས་སུ་ཁྱབ་པར་སྐུལ་འདེད་གཏོང་བ” “སྲོལ་རྒྱུན་རིག་གནས་སློབ་གྲྭར་ཁྱབ་སྤེལ་ཡོང་བར་སྐུལ་འདེད་གཏོང་བ”ལ་སོགས་ཟླ་5ཚེས་20ཉིན་ནས་ཟླ་6ཚེས་20ཉིན་བར། “ལོ་ལྔ་ཚན་བཅོ་ལྔ་པའི”འཆར་འགོད་བཟོ་འགོད་ལས་དོན་གྱི་དྲ་རྒྱའི་བསམ་འཆར་བསྡུ་ལེན་བྱེད་སྒོའི་ཁྲོད་རྒྱ་ཆེའི་དྲ་དམངས་དེའི་ནང་ཧུར་ཐག་ཞུགས་ནས་ཐབས་ཇུས་ཁྲི་311.3ལྷག་ཙམ་བཏོན་ཡོད། དེ་དག་ལེགས་སྒྲིག་དང་བཤུས་སྒྲིག་བྱས་པ་བརྒྱུད། ཕྱོགས་27ལ་དགེ་མཚན་ལྡན་པ་དང་འཐུས་ཚབ་རང་བཞིན་གྱི་བསམ་འཆར་དང་གྲོས་འགོ་1500ལྷག་ཙམ་གྲུབ་ཡོད།

གཞི་རིམ་དུ་བརྟག་ཞིབ་གཏིང་ཟབ་བྱེད་ཐེངས་རེ་དང་། ལྷག་བསམ་ཟོལ་མེད་ཀྱི་བཞུགས་མོལ་བྱེད་ཐེངས་རེ། དམངས་ཀྱི་བློ་གྲོས་གཅིག་སྡུད་ཀྱི་གྲོས་འགོ་རེ་རེ་བཅས་ལས་གྲུབ་པའི་དམངས་འདུན་མང་པོ་རྒྱལ་ཁབ་འཕེལ་རྒྱས་ཀྱི་བརྗིད་ཆེའི་འཆར་གཞིའི་ནང་འདུས་ཐུབ་པ་བྱུང་ཡོད།

དམངས་ཡོངས་ཐུན་མོང་འབྱོར་ཕྱུག་ལ་སྐུལ་འདེད་ཏན་ཏིག་གཏོང་བ།

“ལོ་ལྔ་ཚན་བཅོ་ལྔ་པའི”འཆར་འགོད་ཀྱི་གྲོས་འགོ་ཞིབ་ཀློག་བྱེད་སྐབས། “རྩེ་རིམ་ལས་དོན”སྐོར་གླེང་བ་དང“གཞི་རིམ་གྱི་ལས་དོན”ལ་ཐུགས་ཁུར་ཆེན་པོ་གནང་འདུག དམངས་ཡོངས་ཐུན་མོང་འབྱོར་ཕྱུག་ལ་སྐུལ་འདེད་ཏན་ཏིག་གཏོང་དོན་ནི་མི་ཚང་མར་བདེ་སྐྱིད་ལྡན་པའི་འཚོ་བ་སྐྱེལ་ཐུབ་ཆེད་ཡིན།

དམངས་འཚོ་འགན་སྲུང་དང་ལེགས་སུ་ཤུགས་ཆེན་གཏོང་བ།

2022ལོ་ནས་བཟུང་ཞིང་ཆེན་7དང་ལས་སྟེགས་ཁེ་ལས་7གྱིས་ལས་རིགས་གནོད་སྐྱོན་འགན་སྲུང་ཚོད་ལྟ་བྱས་ཤིང་། ད་ཆ་ཚོད་ལྟའི་ཁྱབ་ཁོངས་ཞིང་ཆེན་17བར་རྒྱ་སྐྱེད་ཐུབ་ནས་མི་ཁྲི་2000ལྷག་ཙམ་ལ་ཁྱབ་ཡོད། རྒྱུན་བསྲིང་ལྷོད་མེད་ངང་བྱ་བཟང་ལེགས་པར་བསྒྲུབས་ནས་ལས་ཞུགས་ཚོགས་སྤྱི་གསར་པའི་བདེ་སྐྱིད་བརྟན་པོར་བསྲུང་དགོས།

གྲོང་ཁྱེར་དང་གྲོང་གསེབ་ཀྱི་གྲོང་མིའི་འབབ་འཕར་གྱི་འཆར་གཞི་ལག་བསྟར་བྱེད་པ་དང་། རིན་མེད་སློབ་གསོའི་ཁྱབ་ཁོངས་བརྟན་པོའི་ངང་ཆེ་རུ་གཏོང་བ། བདེ་འཇགས་དང་། བག་ཕེབས། ལྗང་མདོག རིག་ལྡན་བཅས་ཀྱི“ཁང་པ་ཡག་པོ”སྐྲུན་པ་སོགས་ཀྱི་བཀོད་སྒྲིག་རེ་རེས་མི་དམངས་མང་ཚོགས་ཀྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་ཐག་གཅོད་བྱ་རྒྱུར་དམིགས་ནས་མི་དམངས་ཀྱི་བདེ་རྩ་ཆེ་རུ་གཏོང་བ་དང་མི་དམངས་ཀྱི་འཚོ་བའི་སྤུས་ཚད་མཐོ་རུ་གཏོང་བར་སྐུལ་འདེད་བཏང་ཡོད།

ས་ཁོངས་ཀྱི་ཧེ་བག་དང་གྲོང་ཁྱེར་དང་གྲོང་གསེབ་ཀྱི་ཁྱད་པར་ཆུང་དུ་གཏོང་བར་དམིགས་པ།

“ལོ་ལྔ་ཚན་བཅོ་ལྔ་པའི”དུས་སྐབས་ནི་དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་རྒྱུ་དེ་གྲོང་གསེབ་དར་རྒྱས་དང་སྦྲེལ་མཐུད་ནུས་ལྡན་བྱེད་པའི་བར་བརྒལ་དུས་སྐབས་རྗེས་ཀྱི་ལོ་ལྔ་ཚན་དང་པོ་དེ་ཡིན། བར་བརྒལ་དུས་སྐབས་ཡོལ་རྗེས་ཇི་ལྟར་བྱས་ནས་རྒྱུན་རྣམ་ཅན་གྱི་རོགས་སྐྱོར་ལ་སྐུལ་འདེད་གཏོང་དགོས་པའི་ཐད། “ལོ་ལྔ་ཚན་བཅོ་ལྔ་པའི”འཆར་འགོད་གྲོས་འགོའི་ནང“རྒྱུན་རྣམ་ཅན་གྱི་སྒོ་ནས་དབུལ་ལོག་དབུལ་ཆགས་སྔོན་འགོག་བྱེད་པའི་ལམ་སྲོལ་སྤྱི་འདོམས་ངང་འཛུགས་དགོས”ཞེས་ཁ་གསལ་བཏོན་ཡོད།

དབུལ་ལོག་དབུལ་ཆགས་སྔོན་འགོག་གི་ལྟ་འདོམས་མ་ལག་གི་ནུས་ཕྱོད་ཆེ་རུ་གཏོང་བ་དང་། གནད་སྨིན་རིགས་དབྱེའི་རོགས་སྐྱོར་བྱེད་པ། དར་རྒྱས་འགྲོ་འགོར་བའི་ས་ཁུལ་གྱི་འཕེལ་རྒྱས་མགྱོགས་སུ་གཏོང་བར་རྒྱབ་སྐྱོར་བྱེད་པ། རོགས་སྐྱོར་གྱི་སྒྲིག་སྲོལ་ལམ་སྲོལ་དང་སྲིད་ཇུས་མ་ལག་བརྟན་དུ་གཏོང་བ་དང་ཆབས་ཅིག་ལེགས་སུ་དང་འཐུས་སྒོ་ཚང་དུ་གཏོང་བ་ལ་སོགས། གཙོ་གནད་ལས་དོན་རེ་རེ་སྤྱི་འདོམས་ཇུས་འགོད་དང་བཀོད་སྒྲིག་ཞིབ་ཚགས་བྱེད་པའི་དམིགས་ཡུལ་ནི་རྒྱ་ཆེའི་མང་ཚོགས་ཀྱི་འཚོ་བ་དེ་བས་ཡག་ཐོག་ཡག་བརྩེགས་བྱུང་ནས་ཐུན་མོང་ཐོག་ཀྲུང་གོའི་ལུགས་ཀྱི་དེང་རབས་ཅན་གྱི་མཛེས་སྡུག་ལྡན་པའི་འབྱུང་འགྱུར་ཕྱོགས་སུ་བསྐྱོད་ཐུབ་པ་བྱ་རྒྱུ་དེ་རེད།

མི་དམངས་ཀྱི་བསམ་པའི་འཚོ་བ་ཐུན་མོང་ཐོག་ཕུན་སུམ་ཚོགས་སུ་འགྲོ་བར་སྐུལ་འདེད་གཏོང་བ།

“ལོ་ལྔ་ཚན་བཅོ་ལྔ་པའི”འཆར་འགོད་གྲོས་འགོའི་ནང་། “དྲ་སྦྲེལ་ཆ་རྐྱེན་འོག་གི་དམངས་ཚོགས་ཀྱི་རིག་རྩལ་གསར་པ་དར་རྒྱས་གོང་འཕེལ་གཏོང་བ”ཞེས་པ་བཏོན་ཡོད། མང་ཚོགས་དཀྱུས་མས་རིག་གནས་གསར་རྩོམ་ནང་རྒྱ་ཁྱབ་ངང་ཞུགས་ཚེ། དམངས་ཚོགས་ཀྱི་རིག་རྩལ་གསར་པ་དེ་བས་སྣ་མང་འཕེལ་རྒྱས་ཀྱི་རྣམ་པ་གཏོད་ཐུབ་ནས་སྤྱི་ཚོགས་རིང་ལུགས་ཀྱི་རིག་རྩལ་དར་རྒྱས་གོང་འཕེལ་གཏོང་བའི་སྟོབས་ཤུགས་ནུས་ལྡན་ཞིག་ཏུ་འགྱུར་ངེས་རེད།

དེང་རབས་ཅན་གྱི་ངོ་བོ་ནི་མིའི་དེང་རབས་ཅན་ཡིན་པ་དང་། དེའི་མཐར་ཐུག་གི་དམིགས་ཡུལ་ནི་མིའི་རང་དབང་མངོན་འགྱུར་ཐུབ་ནས་ཕྱོགས་ཡོངས་འཕེལ་རྒྱས་ཡོང་རྒྱུ་དེ་རེད། མི་དམངས་ཀྱི་འཛུམ་མདངས་ནི་འཕེལ་རྒྱས་ཀྱི་ཡིད་དབང་འཕྲོག་ཤོས་ཀྱི་བདེན་དཔང་ཞིག་རེད་ལ། མི་དམངས་ཀྱི་བདེ་སྐྱིད་ནི་དེང་རབས་ཅན་གྱི་དྲོ་སྐྱིད་ཆེ་ཤོས་ཀྱི་མཆན་འགྲེལ་ཞིག་ཀྱང་རེད།