སི་ཕེན་ཀྲུང་གོའི་ཚོང་ཚོགས་ཀྱིས་གཙོ་གཉེར་དང་ལྗང་མདོག་ནུས་རྒྱུ་ཨུ་ལྷན་གྱིས་སྣེ་ཁྲིད་ནས་སྒྲིག་འཛུགས་བྱས་པའི་ཀྲུང་སིའི་ལྗང་མདོག་ནུས་རྒྱུའི་གླེང་སྟེགས་སྐབས་དང་པོ་ཚེས་25ཉིན་མ་ཏེ་རི་རུ་འཚོགས་པ་རེད། ད་ཐེངས་ཀྱི་གླེང་སྟེགས་ཐོག་རྒྱལ་ཁབ་གཉིས་པོའི་སྲིད་གཞུང་སྒྲིག་གཞི་དང་། ལས་རིགས་རྩ་འཛུགས། དེ་བཞིན་ནུས་རྒྱུའི་ཁྱབ་ཁོངས་ཀྱི་ཁེ་ལས་བཅས་ནས་ཡོང་བའི་སྐུ་མགྲོན་300མཉམ་དུ་འཛོམས་ཏེ། ལྗང་མདོག་ནུས་རྒྱུ་འཕེལ་རྒྱས་ཀྱི་འབྱུང་འགྱུར་གྱི་ཁ་ཕྱོགས་དང་མཉམ་ལས་གོ་སྐབས་སྐོར་ལ་ཐུན་མོང་ཐོག་གྲོས་བསྡུར་བྱས་པ་རེད།

སི་ཕེན་དུ་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཡའོ་ཅིན་གྱིས། ནུས་གསོག་དང་། གློག་སྒུལ་རླངས་འཁོར། ཆིང་ནུས་རྒྱུ་གཞན་སྒྱུར། འབྲེལ་ཡོད་རྨང་གཞིའི་སྒྲིག་བཀོད་འཛུགས་སྐྲུན་སོགས་ཁྱབ་ཁོངས་ཀྱི་ཀྲུང་གོ་དང་སི་ཕེན་གྱི་སྤེལ་རེས་དང་མཉམ་ལས་ལ་འཕེལ་རྒྱས་ཆེན་པོ་བྱུང་ཡོད། ཀྲུང་གོའི་ཁེ་ལས་དེ་བས་མང་བས་སི་ཕེན་དུ་མ་འཇོག་མཉམ་ལས་བྱེད་པའི་རེ་བ་ཡོད་ལ་སི་ཕེན་གྱི་ཁེ་ལས་ཀྲུང་གོར་ཚོང་ལས་ཀྱི་གོ་སྐབས་འཚོལ་བར་ཡོང་རྒྱུར་ཡང་དགའ་བསུ་ཞུ་གི་ཡིན་ཞེས་བརྗོད་པ་རེད།

སི་ཕེན་གྱི་བཟོ་ལས་དང་ཡུལ་སྐོར་པུའི་ཆེད་མངགས་འཐུས་མི་ཧ་དབྱི་མེ·ཕེ་ལི་སི་ཡིས་ནུས་རྒྱུ་གཙང་མའི་ཁྱབ་ཁོངས་སུ་སི་ཕེན་དང་ཀྲུང་གོར་ཐུན་མོང་གི་འཕེལ་རྒྱས་འདུ་ཤེས་ཡོད་པ་དང་། ད་ཐེངས་ཀྱི་གླེང་སྟེགས་འཚོགས་པ་ལས་གོ་ལ་ཧྲིལ་པོའི་དཔལ་འབྱོར་གྱི་འགག་རྩའི་དུས་སུ་རྒྱལ་ཁབ་གཉིས་པོས་དངོས་སྒྲུབ་མཉམ་ལས་ལ་སྔར་བས་ཤུགས་སྣོན་རྒྱག་པ་དང་། ཕན་ཚུན་གསབ་རེས་ཀྱི་ལེགས་ཆ་གང་ལེགས་སྤྱོད་པ། མཉམ་ལས་ཀྱི་མི་མངོན་པའི་སྟོབས་ཤུགས་སྔོག་འདོན་གཏིང་ཟབ་བཅས་བྱས་ནས། འབྱུང་འགྱུར་གྱི་གོ་ལ་ཧྲིལ་པོའི་ནུས་རྒྱུ་ཕྱོགས་སྒྱུར་ཐད་ལ་བློ་རྩ་བརྟན་པོའི་ཁས་ལེན་མཚོན་པར་བྱས་ཡོད་ཅེས་བརྗོད་པ་རེད།