འདི་ནི་ཚལ་གུང་ཐང་ཁྲོམ་གཞུང་གུང་ཐང་སྡེ་ཁུལ་གྱིས་སྤེལ་བའི“ཉི་མ་ཆུང་ངུའི”ཟུར་ཁྲིད་འཛིན་གྲྭར་དང་བླངས་པ་དང་ཕྲུ་གུ་ཚོ་མིག་མངས་རྒྱག་བཞིན་པ།

འདི་ནི་ཚལ་གུང་ཐང་ཁྲོམ་གཞུང་གི་གྲོང་སྡོད་གནས་སྐབས་ཏང་ཀྲི་པུའུ་ཡིས་གྲོང་ཚོ(གྲོང་ལྷན)ལ་ཕྱུགས་རིགས་ཉུང་གཏོང་ལས་དོན་སྤེལ་རོགས་བྱེད་བཞིན་པ།

འདི་ནི་ཚལ་གུང་ཐང་ཁྲོམ་གཞུང་དཔལ་སྡིངས་གྲོང་ཚོའི་ཏང་ཨུད་ཀྱི་ཕྲུ་གུ་བཅོལ་ཉར་འཛིན་གྲྭའི་ཕྲུ་གུ་ཚོ་སྦྱོང་ཚན་འབྲི་བཞིན་པ།

“གྲོང་ཚོ་དང་དུད་ཚང་དུ་སྐྱོད་པའི་ཉིན་བརྒྱའི་བརྟག་ཞིབ་ཆེན་པོ”སྤེལ་འགོ་ཚུགས་པ་ནས་བཟུང་། ལྷ་ས་གྲོང་ཁྱེར་ཁྲེང་ཀོན་ཆུས་ཚལ་གུང་ཐང་ཁྲོམ་གཞུང་གི་གྲོང་ཚོར་བཅའ་སྡོད་གནས་སྐབས་ཏང་ཀྲི་པུའུ་ཡིས་གྲོང་སྡོད་ལས་བྱེད་པ་ཡོངས་སྒྲིག་འཛུགས་བྱས་ནས། གཞི་རིམ་དུ་བསྐྱོད་དེ་དམངས་འདོད་ཉན་པ་དང་རེ་འདུན་ཤེས་རྟོགས་ཀྱིས་བརྟག་ཞིབ་བྱེད་སྐབས་ཤེས་རྟོགས་བྱུང་བའི་གནད་དོན་དག་དམངས་ཀྱི་སེམས་ཁྲལ་སེལ་བ་དང་དམངས་སེམས་ལ་དྲོ་སྐྱིད་སྦྱིན་པའི་བྱ་སྤྱོད་དངོས་རེ་རེར་བསྒྱུར་ཡོད།

སྒྲིག་འཛུགས་དང་བཀོད་སྒྲིག་ཞིབ་ཚགས་བྱས་ནས་དམངས་ཀྱི་གནས་ཚུལ་དང་དམངས་འདོད་གསལ་པོར་ཤེས་པར་བྱས།

བརྟག་ཞིབ་ལ་ཕན་འབྲས་དངོས་ཐོན་པའི་འགན་ལེན་བྱ་ཆེད། ཚལ་གུང་ཐང་ཁྲོམ་གཞུང་དུ་བཅའ་སྡོད་གནས་སྐབས་ཏང་ཀྲི་པུས་ཁོངས་གཏོགས་ཁུལ་གྱི་དོན་དངོས་ལ་གཞིགས་ནས་ཚན་རིག་དང་མཐུན་པའི་ལས་ཀའི་མ་ལག་བཙུགས་ཡོད། དྲ་མིག་མང་བ་དང་མི་སྣ་རྙོག་འཛིང་ཆེ་ནའང་། ཀྲི་པུའུ་ཡིས“ཙུའུ་ཀྲང་གཅིག་གིས་སྤྱི་ཡོངས་ལ་དམ་འཛིན་དང་ཚོགས་ཆུང་གི་ཁོངས་མི་མང་པོར་འགན་འཁྲི་བགོ་བའི”རྣམ་པ་གསར་གཏོད་བྱས་ཏེ། ལས་འགན་རིམ་པ་བཞིན་དབྱེ་ནས་འགན་འཁྲི་མི་ཐོག་ཏུ་འཁྱོལ་བར་བྱས་ཡོད། ཡང་སྒོས་སུ་ད་ཡོད་ཀྱི་ཆེད་ལས་དྲ་མིག་པ་64དང་དྲ་མིག་པ་29ལས་གྲུབ་པའི་ཞིབ་ཚགས་ཅན་གྱི་ཞབས་ཞུའི་དྲ་མིག་ལ་བརྟེན་ནས་བརྟག་ཞིབ་དང་གཞི་རིམ་བཅོས་སྐྱོང་མཉམ་འདྲེས་གཏིང་ཟབ་ཐུབ་པ་བྱུང་ཡོད།

དཔུང་ཁག་གི་ནུས་པ་འཛུགས་སྐྱོང་བྱེད་སྐབས་ཀྲི་པུའུ་ཡིས“སྔོན་ལ་གསོ་སྦྱོང་བྱ་རྒྱུ”མཐའ་འཁྱོངས་བྱས་ནས་ཆེད་དོན་གསོ་སྦྱོང་ཐེངས་4སྒྲིག་འཛུགས་ཞིབ་ཚགས་བྱས་ཤིང་། གསོ་སྐྱོང་གི་ནང་དོན་ལ་ཏང་གི་དམངས་ཕན་སྲིད་ཇུས་དང་མི་རིགས་ཆོས་ལུགས་སྲིད་ཇུས་ཀྱི་རྒྱ་བོད་སྐད་གཉིས་ཀྱི་གསལ་འགྲེལ་ཚུད་ཡོད།

བརྟག་ཞིབ་བྱེད་སྐབས་ཚལ་གུང་ཐང་ཁྲོམ་གཞུང་དུ་བཅའ་སྡོད་གནས་སྐབས་ཏང་ཀྲི་པུས“བརྟག་ཞིབ་བྱེད་སྟངས་གསུམ”གྱི་ལས་ཀའི་བྱ་ཐབས་གསར་གཏོད་བྱས་པ་སྟེ། དབུལ་སྒྲོལ་དུད་ཚང་དང་། ལྟ་ཞིབ་ཚད་ལེན་དུད་ཚང་། དབང་པོ་སྐྱོན་ཅན་ཁྱིམ་ཚང་། མི་ཧྲེང་རྒན་རྒོན་སོགས་ཀྱི་ཁྱིམ་དུ་གཙོ་གནད་འདྲི་རྟོག་བྱེད་པ་དང་། རྒྱུན་སྡོད་གྲོང་མིར་ཡོངས་ཁྱབ་འདྲི་རྟོག་བྱེད་པ། གླ་པ་དང་ཚོང་པ་སོགས་སྐོར་སྐྱོད་མི་སྣར་ཁ་པར་ནས་འདྲི་རྟོག་དང་བརྙན་ལམ་ནས་འདྲི་རྟོག་ཟུང་འབྲེལ་གྱི་རྒྱང་རིང་འབྲེལ་མཐུད་བརྟག་ཞིབ་བྱེད་སྟངས་སྤྱད་ཡོད། བྱེད་སྟངས་དེས་ལས་ཕྱོད་ཆེ་རུ་ཕྱིན་པ་མ་ཟད། དམངས་ཀྱི་གནས་ཚུལ་དང་དམངས་འདོད་ཀྱི་དོན་དངོས་རང་བཞིན་དང་ཆ་ཚང་རང་བཞིན་ཡང་འགན་ལེན་བྱས་ཡོད། མིག་སྔའི་བར་མང་ཚོགས་ཀྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་13མཐུན་སྦྱོར་ཐག་གཅོད་བྱས་པ་དང་། ཐག་གཅོད་བྱ་རྒྱུར་ལུས་པའི་གནད་དོན་4བསལ་བ། འགལ་བ་དང་རྩོད་གཞི་20འདུམ་འགྲིག་བཅས་བྱས་ནས་ཕན་འབྲས་མངོན་གསལ་དོད་པོ་ཐོན་ཡོད།

འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ལ་དམིགས་ནས་གནད་དོན་དངོས་ཐག་གཅོད་བྱས་པ།

གྲོང་སྡོད་ལས་དོན་རུ་ཁག་གིས་གནད་དོན་ཕྱོགས་སྟོན་དུ་འཛིན་རྒྱུ་མཐའ་འཁྱོངས་བྱས་ནས་བསྡུ་རུབ་བྱས་པའི་གནད་དོན་ལ་བརྒྱུད་རིམ་ལྡན་པའི་གསེད་བཀྲོལ་བྱས་པ་དང་ཐོན་ལས་འཕེལ་རྒྱས་དང་། དམངས་འཚོ་ལེགས་གཏོང་། གཞི་རིམ་བཅོས་སྐྱོང་བཅས་ཀྱི“ཁྱབ་ཁོངས་ཆེན་པོ་གསུམ”ལ་དམིགས་ནས་ཤུགས་གང་ཡོད་བཏོན་ཡོད།

ཐོན་ལས་འཕེལ་རྒྱས་གཏོང་སྐབས་ཚལ་གུང་ཐང་ཁྲོམ་གཞུང་དྲིན་ཚོར་གླིང་ཁུལ་ཆུང་གི་དབུལ་སྐྱོར་འཁོར་ཁང་དུས་ཡུན་རིང་པོར་བེད་མེད་དུ་ལུས་པའི་གནད་དོན་ལ་དམིགས་ཏེ། གྲོང་སྡོད་ལས་དོན་རུ་ཁག་གིས་ཁྲེང་ཀོན་ཆུས་ཞིང་ལས་གྲོང་གསེབ་དང་ཆུ་བེད་ཅུས་སོགས་ཚན་པ་དང་མཐུན་སྦྱོར་ཧུར་ཐག་བྱས་ཏེ་དབུལ་སྐྱོར་མ་དངུལ་སྒོར་ཁྲི་35རེ་བ་ཞུས་པ་དང་ཆབས་ཅིག་ལྷོ་ཁ་གྲོང་ཁྱེར་སྣ་དཀར་རྩེ་རྫོང་ཡར་འབྲོག་དམངས་ཕན་དབང་པོ་སྐྱོན་ཅན་ཆེད་ལས་འཚེམ་བཟོ་ཚད་ཡོད་ཀུང་སི་ནང་འདྲེན་བྱས་ནས་མི་རིགས་ལག་ཤེས་བཟོ་རྩལ་རྣམ་གྲངས་མཉམ་ལས་བྱེད་འགོ་བཙུགས་ཡོད།

དམངས་འཚོ་ལེགས་སུ་གཏོང་སྐབས་གྲོང་སྡོད་ལས་དོན་རུ་ཁག་གིས“དཀའ་གནད་ཆེན་པོ་གསུམ”ལ་དམིགས་ཏེ་ཐབས་ཇུས་དངོས་བཏོན་ཞིང་། དྲིན་ཚོར་གླིང་གི་གནས་སྤོས་ས་ཚིགས་ཀྱི་སྡོད་ཁང་ཁ་ཤས་ལ་སེར་ཁ་གས་ཡོད་པས་ཁྲེང་ཀོན་ཆུས་སྡོད་ཁང་འཛུགས་སྐྲུན་ཅུས་དང་འཕྲལ་དུ་སྦྲེལ་མཐུད་ཀྱིས་ཆེད་ལས་སྒྲིག་གཞི་གདན་དྲངས་ཏེ་བདེ་འཇགས་དཔྱད་སྡོམ་བྱས་ནས་གྲོང་མི་བློ་བདེ་པོས་སྡོད་ཐུབ་པར་བྱས་པ་དང་། གཞིས་ལུས་བྱིས་པ་སློབ་ཚན་གྲོལ་རྗེས་ཟུར་ཁྲིད་དཀའ་བའི་གནད་དོན་ལ་དམིགས་ནས་དང་བླངས་པའི་སྟོབས་ཤུགས་བསྡུ་སྒྲིལ་གྱིས“ཉི་འོད་བཅོལ་གཉེར་ཞབས་ཞུ”དང“ཉི་མ་ཆུང་ངུའི་སློབ་ཁང”བཙུགས་ཏེ་སློབ་ཚན་གྲོལ་རྗེས་ཀྱི་སློབ་གསོ་དང་དེ་བཞིན་བདེ་འཇགས་ཀྱི་བྱེད་སྒོ་སྤེལ་ཡུལ་གྱི་གནད་དོན་ཐག་གཅོད་བྱས་པ། དཔལ་སྡིངས་གྲོང་ཚོའི་འཕྲུལ་ཆས་བོགས་མར་བཏང་བའི་གྲོན་དངུལ་དུས་ཡུན་རིང་པོར་འགྱངས་ཆད་བྱུང་བའི་གནད་དོན་ལ་དུས་ཐོག་ཏུ་ཐེ་ཞུགས་དང་མཐུན་སྦྱོར་བྱས་ནས་འགྱངས་ཆད་དངུལ་སྒོར་ཁྲི་320བདེ་བླག་ངང་འདེད་ལེན་བྱས་ཡོད།

ཕུགས་ཕན་ལམ་སྲོལ་འཐུས་སྒོ་ཚང་དུ་བཏང་ནས་བརྟག་ཞིབ་ཀྱི་གྲུབ་འབྲས་ཟབ་ཏུ་བཏང་བ།

“ཉིན་བརྒྱའི་བརྟག་ཞིབ”ལ་དུས་བཀག་ཡོད་རུང་དམངས་ལ་ཞབས་འདེགས་ཞུ་བར་ཚར་དུས་མེད། བརྟག་ཞིབ་ཀྱི་གྲུབ་འབྲས་སྲ་བརྟན་དང་གཏིང་ཟབ་ཏུ་བཏང་ནས“གནད་དོན་གཅིག་ཐག་གཅོད་བྱེད་པ”དེ“གནད་དོན་རིགས་གཅིག་ཐག་གཅོད”བྱེད་པར་སྐུལ་འདེད་གཏོང་ཆེད། ཁྲེན་ཀོན་ཆུས་དང་ཚལ་གུང་ཐང་ཁྲོམ་གཞུང་གིས་ལས་ཀའི་ཕུགས་ཕན་ལམ་སྲོལ་ཁག་གསུམ་འཛུགས་རྒྱུར་ཤུགས་སྣོན་བརྒྱབ་ཡོད།

སྲིད་ཇུས་ལག་བསྟར་གནད་སྨིན་བྱེད་སྐབས་དྲིལ་བསྒྲགས་སློབ་གསོའི་ཁྲིད་སྟོན་རྒྱུན་མཐུད་ཟབ་ཏུ་བཏང་ནས་མང་ཚོགས་ཀྱིས་ཏང་གི་ལམ་ཕྱོགས་དང་། མཛད་ཕྱོགས། སྲིད་ཇུས་བཅས་ལ་གོ་བ་ལོན་ཚད་དང་ཁས་ལེན་བྱེད་ཚད་ཆེ་རུ་བཏང་བ་དང་ཆབས་ཅིག་བདེ་འཇགས་བརྟན་ལྷིང་གི་འགོག་སྲུང་འཛིང་རགས་བརྟན་དུ་བཏང་ནས་སྡེ་ཁུལ་གྱི་སྤྱི་ཚོགས་རྩ་འཛུགས་དང་། “གཉིས་ལྡན་དུད་སྦྲེལ”གྱི་སྤྱི་མི། དུས་བདེའི་དང་བླངས་པ་སོགས་ལས་གྲུབ་པའི་དཔུང་ཁག་བཙུགས་པ་དང“མངོན་མེད་རྐྱེན་ངན་གྲལ་བཤེར་དང་། རྩིས་ཐོ་བཟོ་བ། དག་ཐེར་ཐོ་སུབ། ཕྱིར་ལྡོག་བསྐྱར་བཤེར”བཅས་ཀྱི་གདུབ་ཟུམ་དོ་དམ་ལམ་སྲོལ་བཙུགས་ཏེ་བདེ་འཇགས་ཀྱི་མངོན་མེད་རྐྱེན་ངན་56གྲལ་བཤེར་དང་དག་ཐེར་བྱས་ནས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་འགན་ལེན་ནུས་ལྡན་བྱས་ཡོད།

ཞབས་འདེགས་ཞུ་སྟངས་ལེགས་སུ་གཏོང་སྐབས“གྲོང་ཚོ་དང་དུད་ཚང་དུ་སྐྱོད་པ”རྒྱུན་རྣམ་ཅན་དང་ལམ་ལུགས་ཅན་ལ་སྐུལ་འདེད་གཏོང་བ་དང་། དུས་བཀག་ནང“ཕྱིར་མིག་ལྟ་བའི”ལམ་སྲོལ་འཛུགས་པ། ཞབས་འདེགས་ཞུ་ཡུལ་ཁྱིམ་ཚང་ལ་གཙོ་གནད་བསྐྱར་འདྲི་བྱེད་པ། རྗེས་མཐུད་ཀྱི་གནས་ཚུལ་ཤེས་རྟོགས་བྱེད་པ་བཅས་བྱས་ནས། ཕན་འབྲས་སྲ་བརྟན་དུ་བཏང་ཡོད།

“ཉིན་བརྒྱའི་བརྟག་ཞིབ”ནི་དམངས་ཀྱི་གནས་ཚུལ་དང་མི་དམངས་ཀྱི་འདོད་བློ་བསྡུ་ལེན་གཏིང་ཟབ་བྱེད་པ་ཞིག་ཡིན་པ་དང་། སྙིང་རུས་གཏན་འཁྱོངས་ནི་དམངས་ལ་ཞབས་འདེགས་ཞུ་བའི་རྟག་བརྟན་གྱི་ཞིབ་འཇུག་བྱ་གཞི་ཞིག་རེད། འབྲེལ་ཡོད་འགན་འཁུར་བས“ཡུལ་དངོས་ལ་བསྐྱོད་ནས་དམངས་ཀྱི་གནས་ཚུལ་རྟོགས་པའི”དམ་པ་དོན་གཉེར་གྱི་སྤྱོད་ཚུལ་མུ་མཐུད་རྒྱུན་འཁྱོངས་བྱས་ཏེ“དངོས་སྒྲུབ་ལ་བརྟེན་ནས་དམངས་སེམས་ལ་དྲོ་སྐྱིད་སྦྱིན་པའི”དམངས་ཞེན་བརྩེ་བ་ཟབ་ཏུ་བཏང་ནས་བརྟག་ཞིབ་ཀྱི་གྲུབ་འབྲས་དེ་མང་ཚོགས་ཀྱི་ཁ་ཡོད་ལག་ཡོད་ཀྱི་བདེ་སྐྱིད་ལ་འགྱུར་བ་བྱེད་ཀྱི་ཡིན་ཞེས་བརྗོད་པ་རེད།