འདི་ནི་མལ་གྲོ་གུང་དཀར་རྫོང་རྨམ་པ་ཤང་རི་མདོ་སྒང་གྲོང་ཚོའི་ཡུལ་མི་ཆོས་དབྱིངས་ཀྱིས་རང་ཁྱིམ་གྱི་སྒོ་རའི་ནང་ཁྲིད་པའི་ཆུ་ཀ་ལར་ཐབ་ཆས་འཁྲུ་བཞིན་པ།

ད་ཕན་ལོ་ཤས་རིང་། ལྷ་ས་གྲོང་ཁྱེར་མལ་གྲོ་གུང་དཀར་རྫོང་གིས་གྲོང་གསེབ་ཀྱི་ཆུ་མཁོ་འདོན་གྱི་འགན་སྲུང་ལས་དོན་དེ་དམངས་འཚོ་ལེགས་གཏོང་གི་མངོན་གསལ་དོད་པོའི་གནས་བབ་ཐོག་བཞག་ནས། ཀྲུང་དབྱང་གྲོང་གསེབ་དར་རྒྱས་འཐབ་ཇུས་ཀྱི་བཀོད་སྒྲིག་དང་དེ་བཞིན་རང་སྐྱོང་ལྗོངས་དང་ལྷ་ས་གྲོང་ཁྱེར་གྱི་འབྲེལ་ཡོད་ལས་དོན་གྱི་བླང་བྱ་དང་བསྡུར་བ་ནན་པོ་བྱེད་པ་དང་། གྲོང་གསེབ་ཀྱི་འཐུང་ཆུའི་བདེ་འཇགས་སྒྱུར་བཀོད་ལས་གྲྭར་སེམས་ནུས་གཅིག་སྒྲིལ་གྱིས་སྐུལ་འདེད་གཏོང་བ། “ཆུ་འཐུང་རྒྱུ་ཡོད་པ”ནས“ཆུ་གཙང་མ་འཐུང་རྒྱུ་ཡོད་པའི”བར་གྱི་མཆོང་སྐྱོད་ལྟ་བུའི་མཐོར་གཏོང་མངོན་འགྱུར་ཐུབ་པ། ཆུ་ཀ་ལ་གྲོང་གསེབ་ཁག་ཏུ་ཁྲིད་ནས། ཏང་དང་སྲིད་གཞུང་གི་དྲོ་སྐྱིད་མང་ཚོགས་ཚོས་གཏིང་ཟབ་ཚོར་ཐུབ་པ་བྱས་ཡོད།

“ད་ཆ། ཁྱིམ་དུ་ཁྲིད་པའི་ཆུ་ཀ་ལ་དྭངས་གཙང་ཡོད་པ་མ་ཟད། ཆུ་ཤུགས་ཀྱང་ཆེན་པོ་འདུག་པས་ཆུ་ཆད་པའི་སེམས་ཁྲལ་བྱེད་དགོས་མི་འདུག”ཞེས་བཀྲ་ཤིས་སྒང་ཤང་བཀྲ་ཤིས་སྒང་གྲོང་ཚོའི་གྲོང་མི་བཀྲ་ཤིས་དོན་གྲུབ་ཀྱིས་ཆུ་ཀ་ལ་ནས་ཆུ་གློད་ཀྱིན་ངོ་གདོང་ནས་དགའ་བའི་འཛུམ་མདངས་འཕྱུར་བཞིན་ཁོང་གིས་བཤད་པའི་སྟབས་བདེ་ཞེས་པ་དེ་གཙོ་བོ་མལ་གྲོ་གུང་དཀར་རྫོང་ཆུ་བེད་ཅུས་ཀྱིས་ལག་བསྟར་ཞིབ་ཚགས་བྱས་པའི་གྲོང་གསེབ་ཀྱི་འཐུང་ཆུའི་བདེ་འཇགས་ཀྱི་སྒྱུར་བཀོད་ལས་གྲྭ་ལས་བྱུང་བ་ཞིག་རེད། ལས་གྲྭ་དེ་2025ལོའི་ཟླ་བ་གསུམ་པར་དངོས་སུ་ལས་འགོ་ཚུགས་པ་དང་ཟླ་བ་བཅུ་པར་ཞིབ་བཤེར་བདེ་བླག་བྱས་ཡོད། ཁྱོན་མ་དངུལ་སྒོར་ཁྲི་2000བཏང་བའི་ལས་གྲྭ་དེ་བཀྲ་ཤིས་སྒང་གྲོང་ཚོའི་གྲོང་མིའི་ཚོགས་ཆུང་5ལ་ཁྱབ་པ་མ་ཟད། ད་དུང་ཉེ་འཁོར་གྱི་ཏང་སྲིད་ལས་ཁུངས་དང་། ཚོང་དུད། སློབ་གྲྭ་སོགས་ལ་ཕན་པ་ཐོབ་ནས་དུད་ཚང་403གྱི་མང་ཚོགས་2794ཡི་བདེ་འཇགས་འཐུང་ཆུའི་གནད་དོན་ཐག་གཅོད་ཐུབ་ཁར། ཕྱུགས་རིགས་མགོ་གྲངས་4866གི་འཐུང་ཆུའི་དགོས་མཁོ་ཡང་བསྐངས་ཡོད།

རྨམ་པ་ཤང་རི་མདོ་སྒང་གྲོང་ཚོའི་ཆུ་མཁོ་འདོན་ལས་གྲྭའི་ཁུལ་དུ་ཆུ་གཙང་བཟོའི་བཟོ་གྲྭའི་གཞི་གཅིག་ཅན་གྱི་སྒྲིག་ཆས་བརྟན་པོའི་ངང་འཁོར་སྐྱོད་བྱེད་བཞིན་ཡོད། “དེ་སྔོན་ཆུ་ཧ་ཅང་དཀོན་པ་མ་ཟད། ཆུ་ཡང་སེ་ཆད་ཀྱི་ཡོད། སྐབས་འགར་ཆར་པ་བབས་རྗེས་ཆུ་ལོག་བྱུང་བས་ཆུའི་ནང་བྱེ་མས་ཁེངས་ཏེ་ཆུ་འཐུང་ཐབས་བྲལ་ཡོད”གྲོང་མི་ཆོས་དབྱིངས་ཀྱིས་ཐབ་ཚང་ནང་ཁྲིད་པའི་ཆུ་ཀ་ལའི་འོག་ཏུ་ཕོར་པ་འཁྲུད་ཀྱིན་འཛུམ་དམུལ་དམུལ་ངང“ད་ཆ་ཁ་ལག་བཟོ་བའམ་ཡང་ན་བ་ཕྱུགས་ལ་ཆུ་སྟེར་བ་སོགས་གང་ཞིག་བྱས་རུང་ཆུ་གཙང་མ་སྤྱོད་རྒྱུ་ཡོད་པས་སྔོན་ཆད་ཆུ་དཀོན་པའི་སེམས་ཁྲལ་རྦད་དེ་བསལ་སོང”ཞེས་བཤད། ངོ་སྤྲོད་བྱས་པར་གཞིགས་ན། ལས་གྲྭ་དེ་རི་མདོ་སྒང་གྲོང་ཚོའི་གྲོང་མིའི་ཚོགས་ཆུང་4ལ་ཁྱབ་པ་མ་ཟད། མང་ཚོགས་2878དང་ནོར་མགོ་གྲངས་3260ལ་ཕན་པ་ཐོབ་ནས་ཉིན་རེར་ཆུ་མཁོ་འདོན་བྱེད་ཚད་སྨི་རྒྱ་དཔངས་གྲུ་བཞི་532.46ཟིན་ཡོད།

ཤེས་རྟོགས་བྱུང་བར་གཞིགས་ན། 2025ལོར་མལ་གྲོ་གུང་དཀར་རྫོང་གིས་གནད་སྨིན་ཇུས་བསྟར་གྱིས་བདེ་འཇགས་འཐུང་ཆུའི་རིམ་སྤོར་སྒྱུར་བཀོད་དང་དེ་བཞིན་ཉམས་གསོ་བདག་སྐྱོང་ལས་གྲྭ་ཁག་15ལག་ལེན་བསྟར་བ་དང་དེ་ཤང་7དང་གྲོང་ཚོའི་ཚོགས་ཆུང་20རུ་ཁྱབ་སྟེ། མི་གྲངས་11700ལྷག་ཙམ་གྱི་འཐུང་ཆུའི་བདེ་འཇགས་སྔར་བས་འགན་ལེན་བྱས་ཡོད། དེ་དང་ཆབས་ཅིག་གཅིག་སྡུད་འཐུང་ཆུའི་ལས་གྲྭ་ཁག་2ལག་ལེན་བསྟར་ཏེ་མི་གྲངས་6000ལྷག་ཙམ་གྱི་ཆུ་དཀོན་པའི་དུས་ཚིགས་ཀྱི་ཆུའི་གནད་དོན་ཐག་གཅོད་ནུས་ལྡན་བྱས་ཡོད་པ་རེད།

འཐུང་ཆུའི་ལས་གྲྭ“སྐྲུན་ཐུབ་པ་དང་། ཡུན་རིང་དོ་དམ་བྱེད་ཐུབ་པ། བེད་སྤྱོད་ཡག་པོ་ཐུབ་པ”བཅས་འགན་ལེན་བྱ་ཆེད། མལ་གྲོ་གུང་དཀར་རྫོང་གིས་ཕུགས་ཕན་གྱི་དོ་དམ་བདག་སྐྱོང་ལམ་སྲོལ་རྒྱུན་ཆད་མེད་པར་འཐུས་སྒོ་ཚང་དུ་བཏང་ཡོད། མིག་སྔར་མལ་གྲོ་གུང་དཀར་རྫོང་གིས་རིགས་ཁག་གི་ཆུ་མཁོ་འདོན་ལས་གྲྭ་བཙུགས་ནས་ས་ཁོངས་ཧྲིལ་པོར་ཁྱབ་པའི་ཆུ་མཁོ་འདོན་དྲ་རྒྱ་ཆགས་ཡོད། གྲོང་གསེབ་ཏུ་ཆུ་ཀ་ལ་ཁྱབ་ཚད་98%ཟིན་ཏེ་མང་ཚོགས་ཀྱི་འཚོ་བ་དང་གྲོང་གསེབ་ཀྱི་འཕེལ་རྒྱས་ལ་བརྟན་ཞིང་བློས་འགེལ་ཆོག་པའི་ཆུ་མཁོ་འདོན་འགན་ལེན་བྱས་ཡོད།

གྲོང་གསེབ་ཀྱི་འཐུང་ཆུའི་བདེ་འཇགས་སྒྱུར་བཀོད་ལས་གྲྭར་སྐུལ་འདེད་ཏན་ཏིག་བཏང་བས་མང་ཚོགས་ཀྱི་འཚོ་བའི་ཆ་རྐྱེན་ལེགས་སུ་ཤུགས་ཆེན་ཕྱིན་པ་མ་ཟད། གྲོང་གསེབ་འཕེལ་རྒྱས་ཀྱི་ནང་སྐྱེས་སྒུལ་ཤུགས་ཀྱང་འཕེལ་ཡོད་པ་རེད།