མངགས་བཅོལ་བློ་ལ་བརྟན་པོར་ངེས་ནས་འགན་འཁྲི་ཏན་ཏིག་སྒྲུབ། དངོས་སྒྲུབ་ལག་བསྟར་དོན་འཁྱོལ་བྱས་ནས་རྣམ་པ་གསར་པ་གཏོད།
——རང་སྐྱོང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དགུ་པའི་དགོངས་དོན་ལ་ཚུར་སྣང་ལན་ཆ་ཆེན་པོ་བྱུང་བ།
ཚེས་25དང་26ཉིན། ཀྲུང་གོ་གུང་ཁྲན་ཏང་བོད་རང་སྐྱོང་ལྗོངས་ཨུ་ཡོན་ལྷན་ཁང་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དགུ་པ་ལྷ་སར་འཚོགས་ཤིང་། མི་རིགས་ཁག་གི་ལས་བྱེད་པ་དང་མང་ཚོགས་ཁྲོད་སློབ་སྦྱོང་གི་ཚ་རླབས་མྱུར་པོ་འཕྱུར་བར་བྱས་ཏེ་བསམ་བློ་དང་བྱ་སྤྱོད་རང་སྐྱོང་ལྗོངས་ཏང་ཨུད་ཀྱི་ཐབས་ཇུས་བཀོད་སྒྲིག་ཐོག་གཅིག་གྱུར་ཡོང་བར་བྱེད་པ་དང་། དེ་བས་ཕྱུག་པའི་སྤྲོ་སེམས་དང་། དེ་བས་དངོས་སྒྲུབ་ཀྱི་སྤྱོད་ཚུལ། དེ་བས་ནུས་ལྡན་གྱི་བྱེད་ཐབས་བཅས་ཀྱི་ཐོག་ནས་ལས་དོན་ཁག་དོན་ཐོག་ཏུ་འཁྱོལ་རྒྱུར་སྐུལ་འདེད་བཏང་ནས། ཀྲུང་གོའི་ལུགས་ཀྱི་དེང་རབས་ཅན་གྱི་བོད་ཀྱི་ལག་ལེན་གྱི་ལེའུ་གསར་པ་ཧུར་ཐག་རྩོམ་གྱི་ཡིན་ཞེས་གཅིག་རྗེས་གཉིས་མཐུད་ངང་བརྗོད་པ་རེད།
“ཧྲུའུ་ཅི་ཝང་ཅུན་ཀྲེང་གིས་གནང་བའི་ཚང་འཛོམས་གྲོས་ཚོགས་ཀྱི་སྙན་ཞུའི་བརྗོད་དོན་གཙོ་བོ་ཁ་གསལ་བ་དང་། བསམ་ཕྱོགས་གསལ་བ། གཙོ་གནད་འབུར་དུ་ཐོན་པ། བྱེད་ཐབས་ནུས་ལྡན་བཅས་ཡོད་པ་མ་ཟད། མིག་སྔའི་གནད་དོན་དངོས་ཐག་གཅོད་བྱ་རྒྱུར་གཞི་ཚུགས་ཡོད་ལ་ཕུགས་ཀྱི་ཇུས་འགོད་དང་འབྱུང་འགྱུར་གྱི་འཕེལ་རྒྱས་ལ་ཡང་དམིགས་ཡོད། སྙན་ཞུའི་ནང་ས་མཐོའི་ཁྱད་ལྡན་ལེགས་ཆའི་ཐོན་ལས་གཙོ་གནད་ཐོག་འཕེལ་རྒྱས་གཏོང་བ་དང་ཐོན་སྐྱེད་ནུས་ཤུགས་གསར་མ་འཕེལ་རྒྱས་ཧུར་ཐག་བཏང་ནས་སླད་ཕྱིན་ང་ཚོས་ལས་དོན་སྤེལ་རྒྱུར་རྩ་བའི་གཞི་འཛིན་ས་མཁོ་འདོན་གནང་ཡོད”ཅེས་རང་སྐྱོང་ལྗོངས་ཞིང་ལས་གྲོང་གསེབ་ཐིང་གི་ཏང་ཙུའི་ཁོངས་མི་དང་ཐིང་ཀྲང་གཞོན་པ་ཕུའུ་ཀྲེང་ཞུའེ་ཡིས་བརྗོད་པ་དང་། ཁོང་གིས་གོམ་སྟབས་རྗེས་མར་རང་སྐྱོང་ལྗོངས་ཞིང་ལས་གྲོང་གསེབ་ཐིང་གིས་འབྲུ་རིགས་བརྟན་གཏོང་དང་འབྲོག་ལས་སྟོབས་ཆེར་གཏོང་བའི་ཁྱད་ཆོས་མཐའ་འཁྱོངས་བྱེད་པ་དང་། ཡུལ་བབ་དང་བསྟུན་ནས་ས་མཐོའི་ཁྱད་ལྡན་ཞིང་འབྲོག་ཐོན་ལས་འཕེལ་རྒྱས་གཏོང་བ། ཞིང་ལས་ཀྱི་ཕྱོགས་བསྡུས་ཐོན་སྐྱེད་ནུས་པ་དང་སྤུས་འབྲས་ཆེ་རུ་གཏོང་བ་བཅས་བྱས་ཏེ། རྒྱུན་མཐུད་དང་། མྱུར་པོ། བརྟན་པོ་བཅས་ཀྱི་སྒོ་ནས་ཞིང་འབྲོག་པའི་ཡོང་འབབ་འཕར་ཐུབ་པ་བྱེད་ཀྱི་ཡིན་ཞེས་བརྗོད་པ་རེད།
རང་སྐྱོང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དགུ་པའི་ཐོག་ཀྲུང་ཧྭ་མི་རིགས་གཅིག་མཐུན་ཚོགས་པ་འཛུགས་རྒྱུར་སྐུལ་འདེད་ཏན་ཏིག་གཏོང་བ་དང་མཐུན་སྒྲིལ་བརྟན་ལྷིང་གི་ཆབ་སྲིད་དང་སྤྱི་ཚོགས་རྣམ་པ་སྲ་བརྟན་དུ་གཏོང་རྒྱུར་ཤུགས་སྣོན་རྒྱག་དགོས་ཞེས་བཏོན་ཡོད། གཞི་རིམ་གྱི་ལས་དོན་པ་ཞིག་ཡིན་པའི་ལྷ་ས་གྲོང་ཁྱེར་ཁྲེང་ཀོན་ཆུས་བརྒྱད་གཅིག་སྡེ་ཁུལ་གྱི་ལས་དོན་པ་པད་དབྱངས་ལ་མྱོང་ཚོར་ཟབ་མོ་བྱུང་ཞིང་། ཁོང་གིས“སླད་ཕྱིན་གྱི་ལས་དོན་ཁྲོད་བརྒྱད་གཅིག་སྡེ་ཁུལ་གྱིས་ཚོགས་འདུའི་དགོངས་དོན་སློབ་སྦྱོང་ལག་བསྟར་གཏིང་ཟབ་བྱས་ཏེ། ཁྱིམ་ཚང་ལོ་རྒྱུས་ཁང་གི་མི་རིགས་མཐུན་སྒྲིལ་སློབ་གསོའི་ནུས་པ་མུ་མཐུད་ཆེ་རུ་གཏོང་བ་དང་། བསྒར་བརྒྱན་རྣམ་པའི་དམངས་ཕན་ཞབས་ཞུའི་མ་ལག་ལེགས་སུ་གཏོང་བ། དམངས་འཚོའི་ཞབས་ཞུ་དང་མི་རིགས་མཐུན་སྒྲིལ་ལས་དོན་མཉམ་འདྲེས་གཏིང་ཟབ་བྱ་རྒྱུར་སྐུལ་འདེད་གཏོང་བ། མི་རིགས་ཁག་གི་མང་ཚོགས་མཉམ་དུ་སྡེ་ཁུལ་འཛུགས་སྐྱོང་ཁྲོད་ཞུགས་པ་དང་མཉམ་དུ་སྡེ་ཁུལ་གྱི་ཞི་མཐུན་སྲུང་བར་ཁྲིད་སྟོན་བཅས་བྱས་ནས། བརྩེ་སེམས་ཟབ་མོས་མི་རིགས་མཐུན་སྒྲིལ་ལས་མངོན་པའི་རྣམ་པ་ཡག་ཤོས་གཏོད་རྒྱུ་ཡིན”ཞེས་བརྗོད་པ་རེད།
“ཏང་དང་སྲིད་གཞུང་གི་རོགས་རམ་འོག་གྲོང་མི་རྣམས་སྡོད་ཁང་གསར་པར་སྡོད་རྒྱུ་བྱུང་བ་དང་ད་ཆ་ཚང་འཛོམས་གྲོས་ཚོགས་ཀྱིས་ང་ཚོའི་བདེ་སྐྱིད་ལྡན་པའི་འཚོ་བར་འཆར་གཞི་གསར་པ་བཀོད་ཡོད”གཞིས་རྩེ་གྲོང་ཁྱེར་དིང་རི་རྫོང་གྲམ་མཚོ་ཤང་ཟིང་དཀར་གྲོང་ཚོའི་ལོ་རྒྱུས་ཁང་གི་མདུན་དུ་གྲོང་སྡོད་ལས་བྱེད་པ་བསོད་ནམས་དཔལ་འབྱོར་གྱིས་མིག་མདུན་གྱི་གྲལ་སྟར་འགྲིག་པའི་གྲོང་མིའི་སྡོད་ཁང་གསར་པར་ལྟ་བཞིན་དུ་བློ་རྩ་བརྟན་ལ་རེ་བས་ཁེངས་པའི་ངང“རང་སྐྱོང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དགུ་པའི་ཐོག‘ལོ་ལྔ་ཚན་བཅོ་ལྔ་པའི’འཆར་འགོད་ཀྱི་གྲོས་འགོར་གྲོས་ཞིབ་བྱས་ནས་གྲོས་འཆམ་བྱུང་ཞིང་། ཚན་རིག་དང་མཐུན་པའི་ངང་བོད་ཀྱི་འབྱུང་འགྱུར་ལོ་ལྔའི་འཕེལ་རྒྱས་ཀྱི་བརྗིད་ཆེའི་འཆར་གཞི་བཀོད་དེ་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་བོད་དུ་དོན་འཁྱོལ་ཏན་ཏིག་ཐུབ་རྒྱུར་བྱ་སྤྱོད་ཀྱི་ཁྲིད་སྟོན་བྱས་ཡོད། ང་ཚོས་བློ་བརྟན་འགྱུར་མེད་ངང་ཏང་ཀྲུང་དབྱང་གི་བསྟན་གནང་བའི་ཁ་ཕྱོགས་སུ་བསྐྱོད་དེ་མཐུན་སྒྲིལ་རྡོག་རྩ་གཅིག་སྒྲིལ་དང་མུ་མཐུད་འབད་འཐབ་བྱས་ཚེ། ང་ཚོའི་ཁྱིམ་གཞིས་དེ་བས་མཛེས་སྡུག་དང་འབྱོར་ཕྱུག་ལྡན་པར་སྐྲུན་ཐུབ་ངེས་དང་མི་རིགས་ཁག་གི་མང་ཚོགས་ཀྱི་འཚོ་བ་དེ་བས་བདེ་སྐྱིད་ལྡན་པ་ཡོང་ངེས་ཡིན་པའི་ཡིད་ཆེས་ཡོད”ཅེས་བརྗོད་པ་རེད།
“ས་མཐོར་གཞི་ཚུགས་པའི་ཨར་སྐྲུན་བྱེད་མཁན་གཙོ་བོ་ཡིན་པའི་ང་ཚོས་ཐོག་མཐའ་བར་གསུམ་དུ་བརྟན་ལྷིང་དང་། འཕེལ་རྒྱས། སྐྱེ་ཁམས། མཐའ་སྟོབས་བཅས་དོན་ཆེན་བཞིའི་ལྟེ་བའི་ལས་འགན་ལ་དམིགས་ཏེ‘གསོ་རླུང་ཉུང་ཡང་སྙིང་སྟོབས་མི་ཉམས་པ་དང་དཀའ་ཚེགས་ཆེ་ཡང་དཀའ་སྡུག་ལ་མི་སྐྲག་པའི’ས་མཐོའི་འབད་འཐབ་ཀྱི་སྙིང་སྟོབས་ལ་བརྟེན་ནས་བདེ་འཇགས་འཕེལ་རྒྱས་ཀྱི་འདུ་ཤེས་བརྟན་པོ་བཙུགས་ཏེ་འཕེལ་རྒྱས་དང་བདེ་འཇགས་ཀྱི་དོན་ཆེན་གཉིས་ལ་སྤྱི་འདོམས་ཡག་པོ་བྱེད་ཀྱི་ཡིན། ཕྱོགས་གཅིག་ནས་ང་ཚོས‘ལོ་ལྔ་ཚན་བཅུ་བཞི་པའི’མཇུག་བསྡུའི་ལས་དོན་ནུས་ཤུགས་ཡོད་རྒུས་ཡག་པོ་སྒྲུབ་པ་དང་རྣམ་གྲངས་འཛུགས་སྐྲུན་གྱི་འགག་རྩའི་ལྷུ་ཚིགས་ལ་དམ་པོར་དམིགས་ཏེ་ལས་འགན་ཁག་དོན་ཐོག་ཏུ་འཁྱོལ་ནས་ཕན་འབྲས་ཐོན་པ་དང་ཕུན་སུམ་ཚོགས་པོའི་ངང་རྩིས་སྤྲོད་བྱ་རྒྱུ་དང་། ཕྱོགས་གཞན་ཞིག་ནས་བོད་ཀྱི་འཕེལ་རྒྱས་ཀྱི་དོན་དངོས་དང་འབྱུང་འགྱུར་གྱི་དགོས་མཁོར་གཞི་ཚུགས་ཏེ་ཚད་གཞི་མཐོ་བ་དང་སྤུས་ཚད་མཐོ་པོས‘ལོ་ལྔ་ཚན་བཅོ་ལྔ་པའི’འཆར་འགོད་བཟོས་ནས་ས་མཐོའི་འཕེལ་རྒྱས་ཀྱི་འཕར་རྩ་དང་དེ་བས་འཚམ་ཐུབ་པ་བྱ་རྒྱུ་ཡིན”ཞེས་ཀྲུང་གོ་ལྕགས་ལམ་ཅུས་ཉེར་གཅིག་པའི་ཀུང་སི་བཞི་པའི་བོད་ལྗོངས་ཡུག་ཁུལ་གྱི་འགན་འཁུར་བ་ཝུའུ་ཅིན་གྱིས་བརྗོད་ཅིང་། ཁོང་གིས་རྗེས་མཐུད་ལས་དོན་ཁྲོད། རང་སྐྱོང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དགུ་པའི་དགོངས་དོན་སློབ་སྦྱོང་ལག་བསྟར་གཏིང་ཟབ་བྱས་ཏེ། ལག་རྩལ་འགག་སྒྲོལ་ཁྲོད་ས་མཐོའི་འཛུགས་སྐྲུན་གྱི་དཀའ་གནད་སྒྲོལ་བ་དང་། མྱུར་ཚད་དོ་དམ་འགན་ལེན་རྣམ་གྲངས་ཀྱི་ཁ་ཆད་ལག་བསྟར་བྱེད་པ། མ་གནས་ཚོད་འཛིན་ལ་བརྟེན་ནས་འཕེལ་རྒྱས་ཀྱི་ཕན་འབྲས་ཆེ་རུ་གཏོང་བ་བཅས་ཀྱི་ཐད་དཔའ་ངར་ཆེན་པོས་གདོང་ལེན་བྱས་ཏེ། ས་མཐོར་གཞི་ཚུགས་པའི་བརྟན་སྲུང་དང་དངོས་སྒྲུབ་ཀྱི་ཐོག་ནས་མཐུན་སྒྲིལ་དང་། འབྱོར་ཕྱུག ཤེས་དཔལ། ཞི་མཐུན། མཛེས་སྡུག་བཅས་ལྡན་པའི་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་བྱ་ཆེད་ལྕགས་ལམ་འཛུགས་སྐྲུན་གྱི་སྟོབས་ཤུགས་ལེགས་སྐྱེས་འབུལ་གྱི་ཡིན་ཞེས་བརྗོད་པ་རེད།
འབྲེལ་ཡོད་གསར་འགྱུར།