ཉེ་ཆར་གསར་འགོད་པར“ལོ་ལྔ་ཚན་བཅུ་བཞི་པའི”འཕེལ་རྒྱས་གྲུབ་འབྲས་ཀྱི་རིམ་སྤེལ་གསར་འགྱུར་ཡོངས་བསྒྲགས་ཚོགས་འདུ་ཞིང་ལས་གྲོང་གསེབ་ཀྱི་ཆེད་དོན་ཚོགས་འདུ་ནས་ཤེས་རྟོགས་བྱུང་བར། “ལོ་ལྔ་ཚན་བཅུ་བཞི་པའི”ཚུན་དུ། མཚོ་སྔོན་གྱིས་ཞིང་ཆེན་ཡོངས་ཀྱི་ཁྱད་ལྡན་ཞིང་ལས་ཐོན་ཁུངས་ལ་བརྟེན་ནས་ཐོན་ལས་དང་པོ་དང་། གཉིས་པ། གསུམ་པ་བཅས་ཐོན་ལས་འཁོར་འབྲེལ་ཧྲིལ་པོ་མཉམ་འདྲེས་འཕེལ་རྒྱས་མངོན་གསལ་དོད་དུ་གཏོང་བ་དང་། ཐོན་ལས་རྣམ་གྲངས་ཀྱི་ཞིང་འབྲེལ་ཞིང་ཁྲིད་ལམ་སྲོལ་འཛུགས་པ་དང་འཐུས་སྒོ་ཚང་དུ་གཏོང་བ། ཁེ་ཕན་འབྲེལ་མཐུད་དམ་ཟབ་ཀྱི་ཐོན་ལས་མ་ལག་སྐྲུན་པ་བཅས་བྱས་ཏེ། ཞིང་འབྲོག་མང་ཚོགས་ཀྱི་ཡོང་འབབ་འཕར་བའི་ནང་སྐྱེས་སྒུལ་ཤུགས་རྒྱུན་ཆད་མེད་པར་ཆེ་རུ་བཏང་ཞིང་། མིག་སྔའི་བར། “སྣེ་འདྲེན་ཁེ་ལས་དང་། མཉམ་ལས་ཁང་། རྟེན་གཞི། ཞིང་དུད་བཅས་ཟུང་དུ་འབྲེལ་བའི”གཉེར་སྐྱོང་བྱེད་སྟངས་བརྒྱུད། རིམ་རྩིས་བརྒྱབ་ན་ཞིང་དུད་ཁྲི་10ཙམ་གྱི་འབབ་འཕར་ལ་སྐུལ་ཁྲིད་བྱས་པ་དང་། ལས་ཞུགས་ལས་གནས་ཁྲི་1.2ཙམ་མཁོ་འདོན་བྱས་པ། ཞིང་དུད་མི་རེའི་ཆ་སྙོམས་ཡོང་འབབ་སྒོར་ཁྲི་2ཙམ་འཕར་བ་རེད།

མིག་སྔར། མཚོ་སྔོན་གྱིས་རིམ་རྩིས་བརྒྱབ་ན་འབྲི་གཡག་དང་། བོད་ལུག པད་ཁ། ནས། འདྲེ་ཚེར་མ། གྲང་ཉར་སྔོ་ཚལ་བཅས་ཀྱི་ལེགས་ཆའི་ཁྱད་ལྡན་ཐོན་ལས་ཚོ་འདུས་6དང་ཞིང་ལས་ཐོན་ལས་སྟོབས་ཆེན་གྲོང་རྡལ་23བསྐྲུན་ཏེ། ཚད་ལྡན་ཅན་གྱི་འདེབས་གསོ་དང་། ཞིང་ལས་ཐོན་རྫས་ཞིབ་སྣོན། གྲང་ཕྲེང་མཛོད་ཉར་ཟོག་འགྲེམས། ཁྲོམ་རའི་གཉེར་ཚོང་། ཐོན་རྫས་ཞིབ་སྤེལ། སྤུས་རྟགས་གཏོད་པ་སོགས་ཀྱི་རྣམ་གྲངས་ལག་ལེན་བསྟར་བར་གྲོང་ཁྱེར་དང་ཀྲོའུ་8དང་རྫོང(གྲོང་ཁྱེར)35དང་འབྲེལ་བ་དང་། རིམ་རྩིས་བརྒྱབ་ན་བྱེད་པོ་265ཐོན་ལས་ཚོ་འདུས་དང་ཐོན་ལས་གྲོང་རྡལ་སྟོབས་ཆེན་གྱི་རྣམ་གྲངས་འཛུགས་སྐྲུན་ནང་ཞུགས་རྒྱུར་རྒྱབ་སྐྱོར་བྱས་ཡོད། དེའི་ནང་བྱ་གཞག་ཚན་པ་26དང་། ཁེ་ལས་180དང་མཉམ་ལས་ཁང་59བཅས་ཚུད་ཡོད་ཅིང་། སྣེ་འདྲེན་ཁེ་ལས་ཀྱིས་སྐུལ་ཁྲིད་དང་། ཞིང་པའི་མཉམ་ལས་ཁང་དང་ཁྱིམ་ཚང་ཞིང་རས་གཞོགས་འདེགས། ཞིང་དུད་སྤྱིར་ན་ཞུགས་པ་བཅས་ཀྱི་ཞིང་ལས་ཐོན་ལས་ཅན་གྱི་འཕེལ་རྒྱས་རྣམ་པ་ཧུར་ཐག་བཏོད་ཡོད་པ་རེད།

ཞིང་ཆེན་ཡོངས་ཀྱིས་སྤྲོ་གསེང་ཞིང་ལས་དང་གྲོང་གསེབ་ཀྱི་ཡུལ་སྐོར་འཛུགས་སྐྲུན་ལ་སྐུལ་འདེད་བརྟན་པོ་བཏང་བ་དང་། ས་གནས་ཁག་གིས་རང་ངོས་ཀྱི་ཐོན་ཁུངས་ཀྱི་ལེགས་ཆ་དང་། ས་བབ་ཀྱི་ལེགས་ཆ། དམངས་སྲོལ་རིག་གནས་བཅས་ལ་བརྟེན་ནས་སྤྲོ་གསེང་ཞིང་ལས་དང་གྲོང་གསེབ་ཀྱི་ཡུལ་སྐོར་དེ་ཉིད་ཞིང་ལས་ཀྱི་ནུས་པ་རྒྱ་སྐྱེད་དང་། གྲོང་གསེབ་ཀྱི་རིན་ཐང་སྔོག་འདོན། ཐོན་ལས་ལས་རྣམ་ཕུན་སུམ་ཚོགས་སུ་གཏོང་བ། ཞིང་འབྲོག་པའི་ཡོང་འབབ་འཕར་བར་སྐུལ་འདེད་གཏོང་བ་བཅས་ཀྱི་ཐབས་ལམ་གལ་ཆེན་ཞིག་ལ་བརྩིས་ཡོད། 2025ལོར་ཞིང་ཆེན་ཡོངས་སུ་སྤྲོ་གསེང་ཞིང་ལས་གཉེར་སྐྱོང་བྱེད་པོ་ཁག་ཁྱོན་2900དང་ལས་ཞུགས་མི་གྲངས་ཁྲི་7.1ཡོད་པ་དང་། དེའི་ནང་ཞིང་འབྲོག་པའི་ལས་ཞུགས་མི་གྲངས་ཁྲི་3.6ཡོད། སྔོན་དཔག་བྱས་ན་ཡུལ་སྐོར་བ་མི་ཐེངས་ཁྲི་2600ལ་སྣེ་ལེན་ཞུས་པར་ལས་གཉེར་ཡོང་འབབ་སྒོར་དུང་ཕྱུར་14.72བྱུང་བ་དང་། དེའི་ནང་ཞིང་ཞོར་ཐོན་རྫས་ཕྱིར་ཚོང་ཡོང་འབབ་སྒོར་དུང་ཕྱུར་3.9ཟིན་པ་དང་། ལས་གཉེར་མི་སྣར་ལོ་རེར་ཆ་སྙོམས་གླ་ཆ་སྒོར་ཁྲི་2.5བྱུང་ཡོད་པ་རེད།