ཉེ་ཆར་བོད་རང་སྐྱོང་ལྗོངས་ཀྱི་སྤྱི་ཚོགས་འགན་སྲུང་གཱ“ཨང་ཀི་གཅིག་པ་དེ་མུར་བརྗེ་ཐུབ”པའི་ལས་སྒོ་ཀྲུང་གོ་ཞིང་ལས་དངུལ་ཁང་བོད་ཡན་ལག་དངུལ་ཁང་ལྷ་ས་ཁྲེང་ཀོན་ཆུས་ཉིང་ལག་དངུལ་ཁང་གི་སྤྱི་ཚོགས་དང་དངུལ་ཁང་གཞི་གཅིག་ཅན་གྱི་དྲ་ཚིགས་སུ་གཉེར་འགོ་ཚུགས་པ་དང་། དེ་ཐོག་ནས་བོད་ཀྱི་སྤྱི་ཚོགས་འགན་སྲུང་གཱ་ཡི་ཞབས་ཞུ“དུས་ཐོག་ཏུ་སྒྲུབ་པ་དང་དེ་སྔའི་ཨང་ཀི་རང་སོར་འཇོག་པའི”དུས་མཚམས་གསར་པར་སླེབས་པ་མཚོན་ཡོད་པ་རེད།

ད་ཐེངས་བཏོན་པའི“ཨང་ཀི་གཅིག་པ་དེ་མུར་བརྗེ་ཐུབ”པའི་ཞབས་ཞུའི་བཀྲག་མདངས་འཚེར་ཤོས་ནི“གཱ་བརྗེ་པོ་བརྒྱབ་ཀྱང་ཨང་ཀི་བརྗེ་མི་དགོས་པ”དེ་རེད། གཱ་ཡོད་མཁན་གྱིས་དེ་སྔའི་གཱ་ཡི་ཨང་ཀི་དང་མགོ་སྦྲེལ་བྱས་པའི་སྤྱི་ཚོགས་འགན་སྲུང་གི་ཐོབ་ཐང་སྣ་ཚོགས་གཏོང་སྤྲོད་དང་། ཁ་གསབ་ལེན་པའམ་གྲོན་དངུལ་འཐེན་འཇལ་བཀོད་སྒྲིག་བཅས་ལ་འགྱུར་ལྡོག་གཏོང་མི་དགོས་པར“སྲུབས་མེད་འབྲེལ་མཐུད”ཐུབ་ཡོད། དེ་དང་ཆབས་ཅིག འཁྱེར་བདེའི་འཕྲལ་གཅོད་གཱ་བཟོའི་སྒྲིག་ཆས་ལ་བརྟེན་ནས་བརྒྱུད་རིམ་ཧྲིལ་པོ་རེ་ཞུ་དང་གཱ་བཟོ་བ་ནས་ནུས་སློང་བར་སྐར་མ་ལྔ་ཙམ་ལས་འགོར་གྱི་མེད་པས། དུས་ཚོད་ཕྲན་ཙམ་སྒུག་ན་ལེན་ཐུབ་པ་དངོས་འབྲེལ་མངོན་འགྱུར་བྱུང་ནས་སྤྱི་ཚོགས་འགན་སྲུང་གཱ་བརྒྱུད་རྒན་གསོའི་དངུལ་དང་དམངས་ཕན་ཞིང་ཕན་ཁ་གསབ་ལེན་པ་དང་དེ་བཞིན་འབྲེལ་ཡོད་ལས་སྒོ་གཉེར་མཁན་གྱི་གྲོང་མིར་སྟབས་བདེ་ཆེན་པོ་བསྐྲུན་པ་མ་ཟད། སྔོན་ཆད་གཱ་བརྗེ་པོ་བརྒྱབ་པར་གཱ་ཡི་ཨང་གྲངས་སྒྱུར་དགོས་པའི་གནད་དོན་ཐག་གཅོད་ནུས་ལྡན་ཐུབ་སྟེ་སྤྱི་ཚོགས་འགན་སྲུང“གཱ་གཅིག་ཀུན་འཐུས”བཀོལ་སྤྱོད་ཀྱི་ཞབས་ཞུའི་རྨང་གཞི་སྔར་བས་བརྟན་དུ་ཕྱིན་ཡོད་པ་རེད།