ཉེ་ཆར། འཛད་སྤྱོད་པ་ཞིག་གིས“དམངས་ཆེད་ཁེ་དབང་སྲུང་སྐྱོང་ལས་འགན་སྒྲུབ། དཀའ་ངལ་སེལ་རོགས་བརྩེ་སེམས་ངོ་མ་མཚོན”ཞེས་བྲིས་པའི་གོས་དར་ཞིག་མངའ་རིས་ས་ཁུལ་ཁྲོམ་ར་ལྟ་འདོམས་ཅུས་ལ་བསྐྱལ་བ་དང་འབྲེལ། དྲིན་ཚོར་ཆེན་པོས“ཁྱེད་ཚོས་ངང་རྒྱུད་རིང་པོས་ངའི་རྩོད་གཞི་འདུམ་འགྲིག་བྱེད་རོགས་བྱས་ནས་གྱོང་གུན་མི་ཕོག་པ་གནང་བར་ཐུགས་རྗེ་ཆེ་ཞུ་རྒྱུ་ཡིན། ཁྱེད་ཚོའི་ལྷག་བསམ་ཟོལ་མེད་ཀྱི་ཞབས་ཞུས་ང་ལ་སེམས་འགུལ་ཆེན་པོ་ཐེབས་བྱུང”ཞེས་བཤད།

འཛད་སྤྱོད་པའི་སེམས་ཁྲལ་བསལ་ཆེད། 2025ལོ་ཚུན། མངའ་རིས་ས་ཁུལ་ཁྲོམ་ར་ལྟ་འདོམས་ཅུས་ཀྱིས“གནས་བབ་བརྗེས་ནས་བསམ་བློ་གཏོང་རྒྱུ”དམ་འཛིན་བྱ་གཞིར་བྱས་ཏེ“ལྷག་བསམ་ཟོལ་མེད་ཀྱི་ཞབས་ཞུར”བརྟེན་ནས་དཀའ་གནད་ཐག་གཅོད་བྱེད་པ་དང་། འཛད་སྤྱོད་བརྒྱུད་རིམ་ཁྲོད་ནས་མང་ཚོགས་ལ་འཕྲད་པའི“དཀའ་གནད”དང“གནད་འགག”ལ་ལན་ཧུར་ཐག་བརྒྱབ་ཡོད། མིག་སྔའི་བར་ཁྱོན་བསྡོམས་ཞུ་གཏུག་ཐེར་འདོན་ཁག་262བདག་སྤྲོད་དང་ཁག་262སྒྲུབ་གཉེར་བྱས་ནས། དཔལ་འབྱོར་གྱོང་གུན་སྒོར་ཁྲི་20.62མི་ཕོག་པར་བྱས་པ་དང་སྒྲུབ་གཉེར་བྱེད་ཚད་100%ཟིན་ཡོད།

མངའ་རིས་ས་ཁུལ་ཁྲོམ་ར་ལྟ་འདོམས་ཅུས་ཀྱི་ཅུས་ཀྲང་གཞོན་པ་ཧོང་ཧྥེ་ཡིས། མང་ཚོགས་ཀྱི་ཁེ་དབང་སྲུང་སྐྱོང་ལ་སྟབས་བདེ་བསྐྲུན་ཆེད། ཁོང་ཚོས་ཁེ་དབང་སྲུང་སྐྱོང་གི་ཐད་འབྲེལ་ཁ་པར་12315རྒྱུན་མཐུད་ཤར་གཏོང་བྱས་པ་དང་། ཆུ་ཚོད་24ཡི་རིང་གི་ཁེ་དབང་སྲུང་སྐྱོང་གི་ཆེད་སྤྱོད་ཁ་པར(18989072315)དུས་མཉམ་དུ་བཙུགས་པ།“མངའ་རིས་ཁྲོམ་ར་ལྟ་འདོམས་ཀྱི་ཞབས་ཞུའི་ཨང་གྲངས”ཀྱི་སྐད་འཕྲིན་སྤྱི་རྟགས་དང་བརྙན་སྟེགས་ཨང་གྲངས་བཙུགས་པ། ཞུ་གཏུག་ཐེར་འདོན་བྱེད་ནུས་མང་དུ་བཏང་བ། “ཧྲུའུ་ཅི་དང་ཅུས་ཀྲང་གིས་བཅར་འདྲི་དང་ལེན་བྱེད་པའི་ཉིན་མོའི”བྱེད་སྒོ་སྤེལ་བ། འཛུལ་སྒོ་མང་བ་དང་སྟབས་བདེ་ཅན་གྱི་ཞུ་གཏུག་ཐེར་འདོན་ཐབས་ལམ་མཁོ་འདོན་བཅས་བྱས་ཏེ། མང་ཚོགས་ཚོས“ཁྲོམ་ར་ལྟ་འདོམས་ཉེ་འགྲམ་དུ་ཡོད་པ”ཏན་ཏིག་ཚོར་བར་བྱས་ཡོད་ཅེས་ངོ་སྤྲོད་བྱས།

ཉེ་བའི་ལོ་ཤས་རིང་། མངའ་རིས་ས་ཁུལ་གྱི་རིག་གནས་ཡུལ་སྐོར་ཐོན་ལས་ཉིན་རེ་བཞིན་དར་རྒྱས་ཕྱིན་པ་དང་། ཡུལ་སྐོར་བ་དེ་བས་མང་པོས་མངའ་རིས་ས་ཁུལ་དུ་སྤྲོ་གསེང་དང་འཛད་སྤྱོད་བྱེད་པར་ཡོང་གི་ཡོད་པས། ཡུལ་སྐོར་འཛད་སྤྱོད་ཀྱི་ཞུ་གཏུག་བྱེད་ཚད་མང་དུ་འགྲོ་བཞིན་ཡོད།

གནས་ཚུལ་དེར་དམིགས་ནས། མངའ་རིས་ས་ཁུལ་ཁྲོམ་ར་ལྟ་འདོམས་ཅུས་ཀྱིས“ཞུ་གཏུག་ཡོད་ན་ངེས་པར་དུ་དང་ལེན་དང་། དང་ལེན་བྱས་ཚེ་ངེས་པར་དུ་སྒྲུབ་པའི”ལས་ཀའི་རྩ་དོན་མཐའ་འཁྱོངས་བྱས་ནས། འཛད་སྤྱོད་པའི་ཞུ་གཏུག་ཐེར་འདོན་ལ་ཆུ་ཚོད་24ཡི་རིང“བསྒྲུབ་སྤྲོད་དང་། སྒྲུབ་སྐུལ། ཐག་གཅོད”བཅས་ཀྱི་གདུབ་ཟུམ་དོ་དམ་ལག་ལེན་བསྟར་ཏེ་ཞུ་གཏུག་ཐེར་འདོན་ཚང་མ་འཕྲལ་དུ་དང་ལེན་དང་ཐག་གཅོད་ཐུབ་པའི་འགན་ལེན་བྱས་ཡོད། ལྷག་པར་དུ་ཡུལ་སྐོར་འཛད་སྤྱོད་ཀྱི་ཞུ་གཏུག་ལ་དམིགས་ཏེ་མགྱོགས་མྱུར་ཐག་གཅོད་ལམ་སྲོལ་ལ་ཤུགས་སྣོན་བརྒྱབ་ནས། སྒྲིག་འགལ་གཉེར་སྐྱོང་བྱེད་སྤྱོད་སྣ་ཚོགས་ཞིབ་བཤེར་ཐག་གཅོད་ནན་པོ་བྱས་ཏེ་ཡུལ་སྐོར་འཛད་སྤྱོད་ཀྱི་ཁེ་དབང་སྲུང་སྐྱོང་གི་སྲུང་བཅད་དེ་བས་བརྟན་དུ་བཏང་ཡོད་པ་རེད།

ཅུས་དེའི་ལས་དོན་མི་སྣས། མང་ཚོགས་ཀྱི་བསྔགས་བརྗོད་ཐོབ་པ་བྱ་རྒྱུ་ནི་གལ་ཆེ་ཤོས་ཡིན་ཞིང་། ང་ཚོས“ཧྥེང་ཆའོ་ཡི་ཉམས་མྱོང”སློབ་སྦྱོང་དང་དཔྱད་གཞིར་འཛིན་ཏེ། ལས་ཀའི་སྤྱོད་ཚུལ་ཁྲིམས་འཛིན་ལྟ་འདོམས་གཙོ་བོར་འཛིན་པ་ནས་སྤྲོ་སེམས་འཁོལ་པོས་ཞབས་འདེགས་ཞུ་བར་བསྒྱུར་རྒྱུར་སྐུལ་འདེད་གཏོང་བ་དང་། ཁེ་དབང་སྲུང་སྐྱོང་ཐད་བཅའ་ཁྲིམས་དང་གནས་ལུགས་གསལ་འགྲེལ་བྱ་རྒྱུ་མཐའ་འཁྱོངས་ཀྱིས་མང་ཚོགས་ཀྱི་རེ་སྒུག་ལ་རང་འགུལ་ངང་ལན་ཧུར་ཐག་བཏབ་པས་རྒྱ་ཆེའི་མང་ཚོགས་ཀྱི་ཁས་ལེན་དང་ཡིད་ཆེས་ཐོབ་ཡོད་ཅེས་ངོ་སྤྲོད་བྱས།