འདི་ནི་ཕྲུ་གུ་ཚོས་རྐང་རྩེད་སྤོ་ལོའི་ཐང་དུ་བརྒྱབ་པའི་མཉམ་པར་ཡིན་པ།

ས་བབ་སྨི་4700ཙམ་ཟིན་པའི་ནག་ཆུ་གྲོང་ཁྱེར་ལྷ་རི་རྫོང་རྫ་འབི་ཤང་གི་རྩྭ་ཐང་དུ་གཟའ་འཁོར་རེར་ས་མཐོའི“འཛམ་གླིང་བུམ་པའི”རྐང་རྩེད་སྤོ་ལོའི་འགྲན་བསྡུར་ཐེངས་རེ་བྱེད་ཀྱི་ཡོད།

ལོ་21ལ་སླེབས་པའི་ན་གཞོན་འབྲོག་པ་བསོད་ནམས་འཇིགས་མེད་ཀྱིས་རང་ཁྱིམ་གྱི་ལྷས་ར་དེ་རྐང་རྩེད་སྤོ་ལོ་ཐང་དུ་སྒྱུར་བཀོད་བྱས།

དེ་གར་ཉིན་མོ་ནི་ཕྲུ་གུ་བཅུ་གྲངས་ཁ་ཤས་ཀྱི་སྤོ་ལོ་ཐང་ཡིན་པ་དང་མཚན་མོ་འབྲི་གཡག་གི་ལྷས་ར་རེད།

ཁོང་གིས་སྤོ་ལོ་ཐང་དེ་སྒྱུར་བཀོད་བྱེད་པའི་བསམ་ཚུལ་ནི་མིག་མདུན་གྱི་ཕྲུ་གུ་དག་ལས་བྱུང་བ་ཞིག་ཡིན་ལ་རང་ཉིད་ཀྱི་བྱིས་དུས་ཀྱི་ཕུགས་འདུན་ལས་བྱུང་བ་ཞིག་ཀྱང་ཡིན། “ཕྲུ་གུ་ཚོ་དགའ་སྤྲོའི་ངང་ཁོད་སྙོམས་པོ་མེད་པའི་རི་ལྡེབས་སུ་རྐང་རྩེད་སྤོ་ལོར་རོལ་བ་དང་རྐང་པ་འཁོན་ནས་ཡང་སེ་འགྱེལ་གྱི་འདུག ཡིན་ནའང་ཁོང་ཚོས་མྱུར་དུ་ཡར་ལངས་ཏེ་མུ་མཐུད་དགའ་སྤྲོའི་ངང་སྤོ་ལོ་རྒྱག་པ་མཐོང་སྐབས་སེམས་ནང་སྐྱོ་སྣང་སྐྱེ་གི་འདུག ང་ཆུང་དུས་ནས་རྐང་རྩེད་སྤོ་ལོར་དགའ་པོ་ཡོད། ཡིན་ནའང་རྐང་རྩེད་སྤོ་ལོ་ཐང་མེད་པས་ལན་ཆིའུ་སྤོ་ལོ་ཐང་དུ་མ་རྒྱག་ཀ་མེད་རེད། དམའ་འབྲིང་སྐབས་གཞི་ནས་རྐང་རྩེད་སྤོ་ལོ་ཐང་དུ་སྤོ་ལོ་རྒྱག་རྒྱུ་བྱུང”ཞེས་བསོད་ནམས་འཇིགས་མེད་ཀྱིས་བཤད།

ཁོང་གིས་ལག་པ་འགུལ་ནས་ལྷས་ར་ཁོད་སྙོམས་པོ་བཟོས་པ་དང་ས་མཁྲེགས་སུ་བཏང་སྟེ་ཕྲུ་གུ་14ཤོང་ཐུབ་པའི་རྐང་རྩེད་སྤོ་ལོ་ཐང་ཞིག་བཟོས་པ་རེད།

གཟའ་མཇུག་སླེབས་རིམ་བཞིན་དེ་གར་ཧ་ཅང་འཁྲུག་ཆ་དོད་ཅིང་། སྤོ་ལོ་རྒྱག་མཁན་ལས་ལོ་ཆུང་ཤོས་ལོ་ལྔ་ལ་སླེབས་ཙམ་ཡིན་ཡང་སྤོ་ལོ་མཁས་པོ་ཡོད། བསོད་ནམས་འཇིགས་མེད་ཀྱིས་འགྲན་བསྡུར་སྒྲིག་འཛུགས་བྱེད་པ་དང་རྩལ་ཁྲིད་པའི་འགན་ཡང་འཁུར་གྱི་ཡོད། ཁོང་གིས་ལག་ཐོགས་ཁ་པར་སྤྱད་དེ་ཕྲུ་གུ་ཚོར་སྤོ་ལོ་ཁྲིད་སྟངས་དང་། སྤོ་ལོ་བླུགས་རྗེས་དགའ་འབོད་བྱེད་པ། གྲགས་ཅན་སྤོ་ལོ་བར་ལད་མོ་བྱེད་པ་ལ་སོགས་པའི་རྣམ་པ་པར་རྒྱག་གི་ཡོད།

ཉིན་གཉིས་ཀྱི་གོང་རྐང་རྩེད་སྤོ་ལོ་ཐང་འདིར“གསེར་གྱི་སྤོ་ལོའི་བྱ་དགའ”སྤྲོད་པའི་མཛད་སྒོ་གཉེར་ཞིང་། བསོད་ནམས་འཇིགས་མེད་ཀྱིས་སྔ་སྣུར་དུ་དྲ་ཐོག་ནས་འདྲ་བཟོ་བྱས་པའི་གསེར་གྱི་སྤོ་ལོའི་བྱ་དགའ་ཞིག་ཉོས།

གཟའ་པ་སངས་ཉིན་སློབ་གྲྭ་གྲོལ་རྗེས། ཕྲུ་གུ་ཚོ་ལྷས་རར་འབྱོར་ནས་གསེར་གྱི་སྤོ་ལོའི་བྱ་དགའ་དེ་མཐོང་སྐབས“འདི་Cལུའོ་ལ་རག་པའི་གསེར་གྱི་སྤོ་ལོའི་བྱ་དགའ་དེ་མ་རེད་དམ”“གསེར་ངོ་མ་རེད་དམ”“ལྗིད་པོ་ཡོད་དམ”ཞེས་དགའ་སྤྲོའི་ངང་འདྲི་བཞིན་དུ་གཟབ་གཟབ་གསིག་གསིག་ངང་བྱ་དགར་བྱིལ་བྱིལ་བྱེད།

མཇུག་མཐར། བསོད་ནམས་འཇིགས་མེད་ཀྱིས་གཟི་བརྗིད་བྱ་དགའ་དེ་གྲགས་ཅན་སྒོ་ར་བ་པུའུ་ཧྥུང་ལ་ཧ་ཅང་དགའ་བའི་སྒོ་ར་བ་ལྷག་པ་བཀྲ་ཤིས་ལ་སྤྲད་པ་རེད།

ཁོང་གིས་ཕྲུ་གུ་ཚོ་ཡུལ་གཞན་དུ་སྤོ་ལོ་འགྲན་པར་ཁྲིད་འདོད་ཡོད་ཀྱང་། ཁོང་ཚོར་ལམ་རིན་དང་། སྤོ་ལོ་ཐང་གི་གྲོན་དངུལ། ལྷམ་སོགས་ཉོ་བའི་དངུལ་འདང་གི་མེད།

“ད་ཆ་བྱེད་ཐུབ་པ་ནི་ཁོང་ཚོའི་སྤོ་ལོ་རྒྱག་པའི་རྣམ་པ་མུ་མཐུད་པར་བརྒྱབ་ནས་མི་དེ་བས་མང་བས་མཐོང་ཐུབ་པ་བྱ་རྒྱུ་དེ་རེད། ཆ་རྐྱེན་འཛོམས་ཚེ་ངེས་པར་དུ་ཁོང་ཚོ་འགྲན་ར་ཆེན་པོར་རྐང་རྩེད་སྤོ་ལོ་རྒྱག་པར་འཁྲིད་ཀྱི་ཡིན”ཞེས་བསོད་ནམས་འཇིགས་མེད་ཀྱིས་བཤད་ཅིང་། ཁོང་དང་ཕྲུ་གུ་ཚོས་མཉམ་དུ་རྐང་རྩེད་སྤོ་ལོ་ཡག་པོ་སྦྱངས་ནས་ཕྱིས་སུ་འགྲན་ར་ཆེན་པོར་རང་ཉིད་ཀྱི་རྐང་རྩལ་ངོམ་པ་དང་ཕུགས་འདུན་དོན་གཉེར་བྱ་རྒྱུའི་ཁ་ཆད་བྱས་པ་རེད།