ཟླ་11ཚེས་25ཉིན། 2025ལོའི་རང་སྐྱོང་ལྗོངས་སྨན་རྫས་བདེ་འཇགས་དང་སྨན་རྫས་ཐོན་ལས་སྤུས་ཚད་མཐོ་བའི་འཕེལ་རྒྱས་ཀྱི་གསར་འགྱུར་ཡོངས་བསྒྲགས་ཚོགས་འདུ་ནས་གསར་འགོད་པར་ཤེས་རྟོགས་བྱུང་བར། རང་སྐྱོང་ལྗོངས་སྨན་རྫས་ལྟ་སྐུལ་དོ་དམ་ཅུས་ཀྱིས“མཛེས་སྡུག་ལྡན་པའི་དཔལ་འབྱོར། འཕྱོར་སྒེག་ལྡན་པའི་བོད་ལྗོངས”ཀྱི་འཆར་གཞི་ལག་ལེན་གཏིང་ཟབ་བསྟར་ཏེ་ཆེད་དོན་བཅོས་སྒྲིག་དང་། དཔེ་འཐེན་ཞིབ་བཤེར། ཉེན་ཁ་སྔོན་འགོག་དང་ཚོད་འཛིན་བཅས་དམ་འཛིན་བྱ་གཞིར་བྱས་ནས་བྱུག་རྫས་ཁྲོམ་རར་བཏོན་རྗེས་ཀྱི་ལྟ་འདོམས་ལས་དོན་ལ་ཤུགས་སྣོན་བརྒྱབ་ཡོད།

རང་སྐྱོང་ལྗོངས་སྨན་རྫས་ལྟ་སྐུལ་དོ་དམ་ཅུས་ཀྱི་ཅུས་ཀྲང་གཞོན་པ་ཚེ་རིང་ནོར་བུས་ངོ་སྤྲོད་བྱས་པར་གཞིགས་ན། རང་སྐྱོང་ལྗོངས་སྨན་རྫས་ལྟ་སྐུལ་དོ་དམ་ཅུས་ཀྱི་ལྟ་འདོམས་ལས་དོན་སྤེལ་སྐབས་མང་ཚོགས་ཀྱི་དོ་ཁུར་དང་ཉེན་ཁའམ་མངོན་མེད་རྐྱེན་ངན་ལ་དམིགས་ནས་རྒྱལ་ཁབ་ཀྱི་སྨན་རྫས་བདེ་འཇགས་སྲ་བརྟན་དང་མཐོར་གཏོང་གི་བྱ་སྤྱོད་དང་། སྨན་རྫས་ཁྱབ་ཁོངས་ཀྱི་རུལ་སུངས་གནད་དོན་གཅིག་སྡུད་བཅོས་སྐྱོང་། མང་ཚོགས་ཉེ་འགྲམ་གྱི་ཚུལ་མིན་སྤྱོད་ཚུལ་དང་རུལ་སུངས་ཀྱི་གནད་དོན་གཅིག་སྡུད་བཅོས་སྐྱོང་སོགས་ཀྱི་ལས་དོན་དང་ཟུང་འབྲེལ་བྱས་ཏེ། བྱུག་རྫས་གཅིག་སྡུད་ཉོ་ཚོང་ཁྲོམ་རའི་ཆེད་དོན་བཅོས་སྒྲིག་དང་སྲ་བརྟན་མཐོར་འདེགས་དང་། ངོ་གདོང་དང་སྐྲ་མཛེས་བཟོ། གསོལ་མགྲོན་ཁང(མགྲོན་ཁང)གི་བྱུག་རྫས་གཉེར་སྐྱོང་བཅས་ཀྱི་ཆེད་དོན་བྱ་སྤྱོད་དང་། “མཉམ་བཅོས་དང་དྲ་བ་གཙང་བཟོའི”བྱུག་རྫས་དྲ་རྒྱའི་ཚོང་གཉེར་གྱི་ཆེད་དོན་བྱ་སྤྱོད་སྤེལ་ཡོད། མིག་སྔའི་བར། བྱུག་རྫས་ཚོང་གཉེར་བེད་སྤྱོད་ཚན་པ་3200ལྷག་ཙམ་ཞིབ་བཤེར་ཐུབ་པ་དང་། རིམ་རྩིས་བརྒྱབ་ན། འཐེན་བཤེར་ཞིབ་དཔྱད་ཁག་ཐེངས་750བྱས་པར་ཚད་ལོན་ཚད་98.67%ཟིན་པ་དང་། གྱོད་གཞི་26རྩད་ཆོད་ཡོད།