འདི་ནི་སྨད་པ་གྲོང་ཚོའི་མང་ཚོགས་ཀྱིས་སྤྲོ་སེམས་འཁོལ་པོས་གླུ་ལེན་གར་འཁྲབ་བྱེད་པ་དང་ཁྱད་ལྡན་ཞིམ་ཟས་བཤམས་ཏེ། ཐག་རིང་ནས་ཀོང་པོའི་ལོ་གསར་གཏོང་བར་ཡོང་བའི་ཡུལ་སྐོར་བར་དགའ་བསུ་ཞུ་བཞིན་པ།

དགུན་སྟོད་དུ། ཉང་ཆུའི་ངོགས་སུ་གནས་པའི་ཉིང་ཁྲི་གྲོང་ཁྱེར་བྲག་ཡིབ་ཆུས་བུ་ཆུ་ཤང་སྨད་པ་གྲོང་ཚོ་ནས་རོལ་དབྱངས་ཀྱི་སྒྲ་ལྷང་ལྷང་དུ་གྲགས་ཤིང་། ཐབ་ཀྱི་དུ་བ་བར་མེད་དུ་འཕྱུར་བ་དང་། ཟས་མཆོག་གི་དྲི་ཞིམ་གང་སར་འཐུལ་ནས་ལོ་གསར་དགའ་གཏོང་གི་རྣམ་པས་ཁེངས།

ཟླ་11ཚེས་22ཉིན་ནི་ཀོང་པོའི་ལོ་གསར་གྱི་ཚེས་གཉིས་ཡིན་ཞིང་། ཉིན་དེའི་ཞོགས་པར་ཉིང་ཁྲི་གྲོང་ཁྱེར་གྱི“ལོ་གསར་སྔ་ཤོས་ལ་རྟེན་འབྲེལ་ཞུ། དམངས་སྲོལ་བཟང་ཤོས་ཉམས་སུ་མྱོང”ཞེས་པའི་ཀོང་པོའི་ལོ་གསར་གྱི་རིག་གནས་ཡུལ་སྐོར་ཉམས་ལེན་གྱི་རིམ་སྤེལ་བྱེད་སྒོ་སྨད་པ་གྲོང་ཚོའི་བྱེད་སྒོ་སྤེལ་ཡུལ་སྒོ་རར་འཁྲུག་ཆ་དོད་པོས་སྤེལ་འགོ་བཙུགས་ནས། ཕྱོགས་བཞི་མཚམས་བརྒྱད་ནས་ཡོང་བའི་མང་ཚོགས་དང་རྒྱལ་ཡོངས་ས་གནས་ཁག་གི་ཡུལ་སྐོར་བའི་ཡིད་དབང་བཀུག་ཡོད།

སྨད་པ་གྲོང་ཚོའི་ཡུལ་མི་ཟླ་བ་ལྷ་མོས་གཟབ་མཆོར་སྤྲས་ཏེ་ཞོགས་པ་སྔ་པོ་ནས་ས་ཡུལ་དངོས་སུ་ཡོང་སྟེ་བྱེད་སྒོའི་གྲ་སྒྲིག་བྱེད་བཞིན་མཆིས། ཁོང་གིས“ལོ་གསར་གྱི་བྱེད་སྒོ་བསྟུད་མར་ཉིན་གསུམ་སྤེལ་རྒྱུ་ཡིན་པས་མི་མང་པོ་ཡོང་སྲིད། དེ་ནི་ང་ཚོའི་གྲོང་ཚོའི་དོན་ཆེན་ཡིན། ལོ་གསར་པར་རྣམ་པ་གསར་པ་དགོས་པས་ངེས་པར་དུ་ཚང་མར་ང་ཚོའི་གྲོང་ཚོའི་རྣམ་པ་ཡག་ཤོས་དེ་སྟོན་ཐུབ་པ་བྱེད་ཀྱི་ཡིན”ཞེས་བཤད།

ཆུ་ཚོད་11པར་རྒྱལ་ཡོངས་ཀྱི་མི་རིགས་མང་པོའི་ཁྱད་ཆོས་ལྡན་པའི་གྱོན་ཆས་དང་དེ་བཞིན་ལྗོངས་ནང་ཁུལ་གྱི་གྲོང་ཁྱེར་དང་ས་ཁུལ་ཁག་གི་ཁྱད་ཆོས་ལྡན་པའི་བོད་ཆས“ངོམ་སྟོན”བྱེད་སྒོ་དུས་ཐོག་ཏུ་སྤེལ་འགོ་ཚུགས་པས་ས་ཡུལ་དངོས་སུ་མི་ཚོགས་ཀྱིས་ཁེངས།

གར་སྟེགས་ཐོག་གི་མོ་ཐྲོལ་གྱིས་མཛེས་པའི་རྒྱན་གོས་ལ་བརྟེན་ནས་ཀྲུང་ཧྭ་མི་རིགས་ཁྱིམ་ཚང་ཆེན་པོའི་“མི་རིགས་ཀྱི་ཉམས་འགྱུར”ངོམ་སྟོན་བྱས་པ་དང་། གར་སྟེགས་འོག་གི་སྒོ་ར་ཆེན་པོའི་ནང་དུའང་འཁྲུག་ཆ་ཧ་ཅང་དོད་པའི་ཁྱད་ལྡན་ཚོང་འདུས་ཤིག་གཉེར་བཞིན་ཡོད།

མེ་ཕུང་གི་མདུན་དུ་སྨད་པ་གྲོང་ཚོའི་མང་ཚོགས་ཀྱིས་རོལ་དབྱངས་དང་བསྟུན་ནས་སྤྲོ་སྣང་ལྡན་པའི་ཀོང་པོའི་སྒོར་གཞས་འཁྲབ། གུར་ནང་དུ་ཐག་རིང་ནས་ཡོང་བའི་ཡུལ་སྐོར་བས་ཀྱང་ཀོང་ཆས་གྱོན་ནས་པར་རྒྱག་པ་དང་ཅི་འཕྲོས་མོལ་འཕྲོས་བྱེད་ཀྱིན་ཞིམ་མངར་ནས་ཆང་གི་བྲོ་བ་མྱངས། མངོན་མིན་རིག་གནས་ཤུལ་བཞག་ཉམས་ལེན་ཁུལ་དུ་ཡིག་གཟུགས་མཁས་ཅན་ཚོས་རྒྱ་བོད་སྐད་གཉིས་ཀྱི་ཡིག་གཟུགས་བརྩམས་ཆོས་བྲིས་ནས་འདིར་ཡོད་པའི་མང་ཚོགས་ལ་གཅིག་རྗེས་གཉིས་མཐུད་ངང་ཕུལ། ཞིམ་ཟས་ཁྲོམ་གཞུང་གི་ཁྲོམ་སྟེགས་རེ་རེའི་མདུན་དུ་སྤྲོ་སྣང་ཆེན་པོས་ཞིམ་ཟས་ལ་རོལ་མཁན་གྱིས་ཁེངས།

“ང་ཚོའི་བོད་ཕག་བསྲེགས་མའི་ཕྱི་ལྤགས་སོབ་ལ་ནང་གི་ཤ་མཉེན་པོ་ཡོད། བྲོ་བ་གཅིག་གཟིགས་དང” “རྡོ་ཁོག་བྱ་ཤ་མཆོད་པར་ཕེབས། སྔོན་ལ་དེའི་ཁུ་བ་མཆོད། དེ་ནས་བྱ་ཤ་མཆོད་ན་མཉེས་པོ་ཡོད” “ཇ་བསྲུབས་མའི་བྲོ་བ་གཟིགས་དང་། རིན་པ་མི་དགོས”ལ་སོགས། ཀོང་པོའི་ལོ་གསར་གྱི་སྤྲོ་སྣང་གི་རྣམ་པ་དགའ་འབོད་རེ་རེ་དང་། འཁྲུག་ཆ་དོད་པའི་བྱེད་སྒོ། བློ་ཡིད་ཚིམས་པའི་འཛུམ་མདངས་བཅས་ལས་མངོན།

ཉིན་གུང་ཉི་འོད་ས་གཞི་ཆེན་པོར་ཉེ་རིང་མེད་པར་འཕྲོད་ཅིང་སྨད་པ་གྲོང་ཚོའི་སྤྲོ་སྣང་ཆེ་བའི་རྣམ་པ་སྔར་བཞིན་འཁྲུག་ཆ་དོད། སྙན་འཇེབས་ལྡན་པའི་རོལ་དབྱངས། ཟས་མཆོག་གི་དྲི་ཞིམ། མི་རྣམས་ཀྱི་འཛུམ་མདངས་བཅས་ལས་སྐྱིད་སྣང་དོད་པའི་ཀོང་པོའི་ལོ་གསར་གྱི་རྣམ་པ་ཡོངས་སུ་མངོན།