འདི་ནི་ཚེ་རིང་མཚོ་མོའི་ཁྱིམ་གྱི་ཚོམས་ཆེན་ཡིན་པ།

སྟོན་མཇུག་གི་ལྷོ་ཁ་གྲོང་ཁྱེར་རྒྱ་ཚ་རྫོང་གླིང་མདའ་ཤང་སྐམ་པོ་བྱེ་ཐང་གྲོང་ཚོའི་གྱང་ངོས་ཐོག་ཉི་འོད་རབ་ཏུ་འཕྲོ་བ་དང་ལམ་བུ་གཙང་སྦྲ་དོད་ཅིང་། གྲོང་མིས་ཆེད་མངག་བཟོས་པའི་ཕྱུགས་རིགས་ཀྱི་ལམ་བུའི་ཐོག་ནོར་ལུག་དེད་བཞིན་ཡོད། གསར་འགོད་པ་གྲོང་ཚོར་སླེབས་སྐབས་ས་གནས་ས་ཐོག་ནས་ཁོར་ཡུག་འགྱུར་ལྡོག་བྱུང་བ་ལས་བདེ་སྐྱིད་ལྡན་པའི་ཚོར་སྣང་ཞིག་ངང་སྐྱེས།

ཚེ་རིང་མཚོ་མོའི་ཁྱིམ་གྱི་སྒོ་རར་སླེབས་སྐབས་ཁོང་གིས་རང་ཁྱིམ་གྱི་ཤིང་འབྲས་ལྡུམ་ར་ནས་སྨིན་མ་ཐག་པའི་སེ་འབྲུ་འཐུ་བཞིན་ཡོད་པ་དང་ཁང་པའི་མདུན་གྱི་སྒོ་ར་ཆུང་ངུའི་ནང་མེ་ཏོག་སྣ་ཚོགས་བསྒྲིགས་ཡོད། “སྔོན་ཆད་ཁང་པའི་རྒྱབ་མདུན་གང་སར་ཅ་དངོས་གང་བྱུང་དུ་སྤུངས་ཡོད། གྲོང་ཚོས་བཅོས་སྐྱོང་བྱ་སྤྱོད་ལག་ལེན་བསྟར་རྗེས་ས་ཆ་སྟོང་པར་སྔོ་ཚལ་དང་ཤིང་འབྲས་བཏབ་པས་ད་ཆ་ཁྱིམ་ཚང་ཚང་མར་ཤིང་འབྲས་ལྡུམ་ར་ཆུང་ངུ་རེ་ཡོད”ཚེ་རིང་མཚོ་མོས་ངེད་ཚོ་ཚོམས་ཆེན་དུ་ཁྲིད་དེ་གྱང་སྟེང་གི“མཛེས་སྡུག་ལྡན་པའི་སྒོ་རའི”སྐོར་སྐྱོད་དར་དམར་ལ་མཛུབ་མོ་འཛུགས་བཞིན་དུ“དར་ཆ་དེ་ཟླ་གོང་མར་རག་བྱུང་། ད་ཆ་གྲོང་ཚོར་གཙང་སྦྲའི་འགྲན་བསྡུར་ཆེན་པོ་བྱེད་ཀྱི་ཡོད་པས་སུ་ཡང་རྗེས་སུ་ལུས་མི་འདོད”ཅེས་གད་མོ་དགོད་བཞིན་དུ་བཤད།

གསར་འགོད་པ་ཚེ་རིང་མཚོ་མོའི་ཁྱིམ་གྱི་ཚོམས་ཆེན་ནས་འགྲོ་སྐབས་འོད་ཐིང་ཐིང་གི་དཀར་གཅལ་བཏིང་ཞིང་གཙང་སྦྲ་དོད་པའི་གསང་སྤྱོད་མིག་ལམ་དུ་མཐོང་བྱུང་། ཚེ་རིང་མཚོ་མོས“ན་ནིང་གྲོང་ཚོ་ཡོངས་སུ་གཙང་སྦྲ་དོད་པའི་གསང་སྤྱོད་བསྐྲུན་པས་དགུན་དུས་འཁྱགས་པ་མི་ཐེབས་ལ་དབྱར་དུས་དྲི་ངན་མི་འཐུལ་བས་སྔོན་ཆད་ལས་སྟབས་ཧ་ཅང་གིས་བདེ་བ་འདུག”ཅེས་བཤད།

གྲོང་ཚོའི་གཞུང་ལམ་ཐོག་བསྐྱོད་སྐབས་གྲོང་ཚོའི་ཏང་སྤྱི་ཁྱབ་ཀྲི་པུའི་ཧྲུའུ་ཅི་ཀརྨ་ཤེས་རབ་ཀྱིས་གཙང་སྦྲ་བའི་སྣེ་ཁྲིད་དེ་ཁོར་ཡུག་ལ་གཙང་སྦྲ་བྱེད་བཞིན་འདུག “ང་ཚོས་ཏང་འཛུགས་སྐྱོང་གིས་ཁྲིད་སྟོན་བྱ་རྒྱུ་མཐའ་འཁྱོངས་བྱས་ཏེ་བཅོས་སྐྱོང་འགན་འཁྲི་མི་ཚང་མར་དཀྲིས་ཡོད”ཀརྨ་ཤེས་རབ་ཀྱིས་ལག་ནང་གི་ལས་དེབ་སྔོག་པ་དང་དེའི་ནང་བཅོས་སྐྱོང་ཚོགས་འདུ་ཐེངས་8དང་ལྟ་སྐུལ་མཛུབ་ཁྲིད་ཐེངས་30ལྷག་ཙམ་གྱི་གནས་ཚུལ་ཞིབ་ཕྲ་བཀོད་ཡོད་ཅིང་། “ན་ནིང་གྲོང་ཚོའི་མཉམ་སྡེབ་ཀྱི་དཔལ་འབྱོར་ཁྲོད་ནས་སྒོར་ཁྲི་45བཏོན་སྟེ་གྲོང་ཚོའི་ལམ་བུ་རྒྱ་ཆེ་རུ་བཏང་བ་མ་ཟད་གྲོང་ཚོའི་ལམ་གྱི་གཞོགས་གཉིས་སུ་ལྗོན་ཤིང་བཏབ་ཡོད”ཅེས་བཤད།

གྲོང་ཚོའི་སྐར་གསོག་དངུལ་བརྗེས་སྒོ་རྩིས་ཚོང་ཁང་དུ་སླེབས་སྐབས་གྲོང་མི་ཡེ་ཤེས་སྒྲོལ་མས་སྐར་མ་20བསགས་པ་ལས་འདག་ཕྱེ་ཞིག་བརྗེས། “ཁོར་ཡུག་བཅོས་སྐྱོང་ནང་ཞུགས་ཚེ་སྐར་མ་གསོག་ཐུབ་པ་སྟེ། དཔེར་ན་སྒོ་ར་གཙང་མ་བཟོས་ཚེ་སྐར་མ་2ཐོབ་པ་དང་འོས་འགན་ཤིང་འཛུགས་ནང་ཞུགས་ཚེ་སྐར་མ་5ཐོབ་ཀྱི་ཡོད”ཅེས་སྒོ་རྩིས་ཚོང་ཁང་གི་དོ་དམ་པས་ངོ་སྤྲོད་བྱས་པ་དང་གྲོང་ཚོས་དམར་ནག་མིང་གྲལ་དང་སྐོར་སྐྱོད་དར་དམར། སྐར་གསོག་དངུལ་བརྗེས་སོགས་ཀྱི་ལམ་ལུགས་བརྒྱུད་མང་ཚོགས་ལ“ངར་བཅོས་སྐྱོང་བྱེད་དགོས་པ”ནས“ངས་བཅོས་སྐྱོང་བྱེད་ཀྱི་ཡིན”ཞེས་པའི་བར་འགྱུར་ལྡོག་བྱུང་ཡོད། ཡེ་ཤེས་སྒྲོལ་མས་འཛུམ་དམུལ་དམུལ་ངང“ད་ཆ་ཁྱིམ་དུ་གཙང་སྦྲ་དོད་པོ་ཡོད་པ་མ་ཟད་ལམ་འགྲམ་གྱི་གད་སྙིགས་ཀྱང་སྒྲུག་མཁན་ཡོད། ཚང་མས་མཉམ་དུ་གྲོང་ཚོ་དེ་མཛེས་པོ་ཡོང་ཐབས་བྱེད་ཀྱི་ཡོད”ཅེས་བཤད།

ད་ཆ་སྐམ་པོ་བྱེ་ཐང་གྲོང་ཚོའི་དུད་ཚང་ཚང་མ་ཚད་ལྡན་ཅན་གྱི་བོད་བཟོའི་ཐོག་ཁང་ནང་སྡོད་པ་དང་ཁང་པའི་རྒྱབ་མདུན་ཚང་མར་ཤིང་འབྲས་ལྡུམ་ར་ཆུང་ངུ་རེ་ཡོད་པས་ཁོར་ཡུག་ལེགས་སུ་སོང་བ་མ་ཟད་ཤེས་དཔལ་སྲོལ་གསར་ལ་བརྟེན་ནས་གྲོང་ཚོའི་རྣམ་པ་ཡང་ཡག་ཏུ་སོང་ཐོག་གནས་འཕྲོད་ལམ་འཚམ་གྱི་གྲོང་གསེབ་དར་རྒྱས་ཀྱི་འཆར་གཞི་ཞིག་བཏིང་བཞིན་ཡོད་པ་རེད།