གཞིས་རྩེ་གྲོང་ཁྱེར་བསམ་གྲུབ་རྩེ་ཆུས་སྣར་ཤང་གིས་ཞིང་ལས་དུས་ཚིགས་ལ་དམ་འཛིན་ཏན་ཏིག་དང“ལོ་ལེགས་འགན་ལེན་དང་དམངས་འཚོ་བརྟན་གཏོང”དམིགས་ཚད་དུ་བྱས་ཏེ་སྔ་སྣུར་དུ་འཆར་འགོད་དང་བཀོད་སྒྲིག་ཞིབ་ཚགས་བྱས་པ་མ་ཟད། ཏང་འཛུགས་སྐྱོང་ལ་བརྟེན་ནས་རྨང་གཞི་བརྟན་གཏོང་ལ་ཁྲིད་སྟོན་དང་། བདེ་འཇགས་ཐོན་སྐྱེད་ལ་བརྟེན་ནས་བརྟན་གཏོང་འགན་ལེན། དྲིལ་བསྒྲགས་ལ་བརྟེན་ནས་ཁ་ཕྱོགས་གསལ་སྟོན་ལ་ཁྲིད་སྟོན། ཕན་ཚུན་རོགས་རམ་བྱས་ནས་དམངས་སེམས་ལ་དྲོ་སྐྱིད་སྦྱིན་པ་བཅས་ཀྱི་བྱ་ཐབས་བཞིར་བརྟེན་ནས“སྟོན་གསུམ”ལས་དོན་ཁག་ལ་ནུས་ཤུགས་ཡོད་རྒུས་སྐུལ་འདེད་དང་འབྲུ་རིགས་བཀར་འཇུག་བྱས་ཏེ་ཕྱི་ལོའི་ཞིང་ལས་ཐོན་སྐྱེད་ལ་རྨང་གཞི་བརྟན་པོ་བཏིང་བ་རེད།

སྣར་ཤང་གིས་གཞི་རིམ་ཏང་རྩ་འཛུགས་ཀྱི་དམག་འཐབ་མཁར་རྫོང་གི་ནུས་པ་དང་ཏང་ཡོན་གྱི་གདོང་ལེན་དཔེ་བཟང་གི་ནུས་པ་བཏོན་ནས“ཏང་ཨུད་ཀྱིས་སྤྱི་འདོམས་དང་། ཀྲི་པུའུ་ཡིས་དོན་འཁྱོལ། ཏང་ཡོན་གྱིས་སྣེ་ཁྲིད”བཅས་ཀྱི་ལས་ཀའི་མ་ལག་བཙུགས་པ་མ་ཟད། ལག་བསྟར་ཇུས་གཞི་ཞིབ་ཕྲ་བཟོ་བ་དང་། གྲོང་ཚོ་ཁག་གི་ལས་འགན་གྱི་གསལ་ཐོ་དང་དུས་ཚོད་ཁ་གསལ་བཟོ་བ། དུས་བཀག་ལྟར་བཀོད་གཏོང་ཚོགས་འདུ་འཚོགས་པ་བཅས་བྱས་ནས་ཐོན་སྐྱེད་ཀྱི་མྱུར་ཚད་ལ་བརྡར་གཅོད་དང་གནད་དོན་དངོས་ཐག་གཅོད་བྱས་ཡོད། གྲོང་ཚོ་ཁག་གི་ཏང་ཀྲི་པུའུ་ཡིས“ཏང་ཡོན་གྱི་གདོང་ལེན་རུ་ཁག”དང“ཞིང་ལས་ལག་རྩལ་གྱི་ཞབས་ཞུ་རུ་ཁག”བཙུགས་པ་དང་། ཏང་ཡོན་སྒྲིག་འཛུགས་ཀྱིས་ཞིང་ཁ་དང་མུ་ཁར་བསྐྱོད་དེ་ཞིང་ལས་ལག་རྩལ་པ་དང་མཉམ་དུ་ནད་འབུའི་གནོད་འཚེ་འགོག་བཅོས་དང་ཞིང་འཕྲུལ་བཀོད་གཏོང་སོགས་ཀྱི་ལས་དོན་སྤེལ་བ་དང་ཆབས་ཅིག འདེབས་འཛུགས་དུད་ཆེན་དང་དཀའ་ངལ་ཡོད་པའི་ཁྱིམ་ཚང་ལ་དམིགས་ཏེ“གཅིག་གཏད་གཅིག”གི་རོགས་སྐྱོར་བྱེད་ཐབས་བཟོས་ནས་ཐོན་སྐྱེད་འཁོར་རྒྱུག་ཚགས་ཚུད་ཐུབ་པར་བྱས་ཡོད།

“སྟོན་གསུམ”ཐོན་སྐྱེད་བདེ་འཇགས་ཀྱི་ཉེན་ཁ་འགོག་ཟོན་བྱ་ཆེད། སྣར་ཤང་གིས་གཙོ་གནད་ལྷུ་ཚིགས་ལ་དམིགས་ཏེ་ཞིང་འཕྲུལ་བདེ་འཇགས་ལ་ཆེད་དོན་ཞིབ་བཤེར་དང་ཞིང་ལས་ལག་རྩལ་མི་སྣ་སྒྲིག་འཛུགས་བྱས་ཏེ་བརྔ་བསྡུའི་འཕྲུལ་འཁོར་10ལྷག་ཙམ་ལ་ཞིབ་བཤེར་ཉམས་བཟོ་བྱས་པ་དང་། 《ཞིང་འཕྲུལ་ལས་ཀའི་བདེ་འཇགས་ལག་དེབ》200ལྷག་ཙམ་སྤྲད་དེ། ཨང་རྟགས་དང་ལག་ཁྱེར་མེད་པ་དང་སྐྱོན་ཤོར་བའི་ཞིང་འཕྲུལ་སྤྱོད་པའི་གནད་དོན་གཏན་འགོག་བྱས་ཡོད། གཞན་ཡང་། ཞིང་ནང་གི་མེ་ཟོན་དང་གློག་སྤྱོད་བདེ་འཇགས་དྲིལ་བསྒྲགས་ལ་ཤུགས་སྣོན་རྒྱག་པ་དང་། ཞིང་ནང་དུ་ཉེན་བརྡའི་མཚོན་རྟགས་འཇོག་པ། གྲོང་ཚོ་རིམ་པའི་འཕྲལ་སྡོམ་སྐོར་གཡེང་རུ་ཁག་འཛུགས་པ། ཉིན་ལྟར་མེ་ཟོན་སྔོན་འགོག་སྐོར་ཞིབ་བཅས་བྱས་ཏེ། ཐོན་སྐྱེད་ལས་འཛོལ་མི་ཐོན་པར་བྱས་ཡོད།

མང་ཚོགས་ཀྱི་ཐོན་སྐྱེད་ལས་ཕྱོད་ཆེ་རུ་དང་བདེ་འཇགས་ཀྱི་འདུ་ཤེས་ཟབ་ཏུ་གཏོང་ཆེད། སྣར་ཤང་གིས་ཐབས་ལམ་སྣ་མང་སྤྱད་ནས“སྟོན་གསུམ”དྲིལ་བསྒྲགས་ཁྲིད་སྟོན་གྱི་ལས་དོན་སྤེལ་ཞིང་། གྲོང་ཚོའི་རླུང་འཕྲིན་དང་། སྐད་འཕྲིན་ཚོགས་པ། དྲིལ་བསྒྲཌ་སྒྲོམ་སོགས་ལ་བརྟེན་ནས། ཉིན་ལྟར་གནམ་གཤིས་སྔོན་བརྡ་དང་། ཞིང་འཕྲུལ་བདེ་འཇགས་ངང་ཡག་པོ་སྤྱོད་སྟངས། སྟོན་འདེབས་ལོ་ཏོག་གི་སོན་འདེམས་སྟངས་སོགས་ཀྱི་ཆ་འཕྲིན་བཏང་བར། རིམ་རྩིས་བརྒྱབ་ན། ཆ་འཕྲིན་ཁྱོན་200ལྷག་ཙམ་བཏང་ཡོད། ད་དུང་ཞིང་ལས་ལག་རྩལ་མི་སྣ་སྒྲིག་འཛུགས་བྱས་ནས་གྲོང་ཚོ་དང་དུད་ཚང་དུ་བསྐྱོད་དེ། ནས་དང་གྲོ་སོགས་ལོ་ཏོག་བརྔ་བསྡུ་བྱེད་ཚུལ་ལ་ལྟ་སྐུལ་ཡང་བྱས་པ་རེད།