མལ་གྲོ་གུང་དཀར་རྫོང་གིས་གྲོང་གསེབ་ཏུ་གློག་བརྙན་སྟོན་པའི་བྱེད་སྒོ་ཧུར་ཐག་སྤེལ་ཏེ།
མང་ཚོགས་ཀྱི་སྒོ་རྩར་སྤུས་ལེགས་ཀྱི་རིག་གནས་ཞབས་འདེགས་ཞུས་པ།
ཉེ་ཆར། མལ་གྲོ་གུང་དཀར་རྫོང་གློག་བརྙན་དོ་དམ་ས་ཚིགས་ཀྱིས་གྲོང་གསེབ་ཏུ་གློག་བརྙན་སྟོན་པའི་བྱེད་སྒོ་ཧུར་ཐག་སྤེལ་ཏེ། མང་ཚོགས་ཀྱི་སྒོ་རྩར་སྤུས་ལེགས་ཀྱི་རིག་གནས་ཞབས་འདེགས་ཞུས་པ་དང་། གློག་བརྙན་གྱི་ཤུགས་རྐྱེན་ལ་བརྟེན་ནས་གྲོང་གསེབ་ཏུ་རིག་གནས་ཀྱི་བསམ་པའི་རྒྱགས་ཕྱེ་སྦྱིན་པ་དང་དམངས་སེམས་གཅིག་སྒྲིལ་བྱས་ཏེ་གཞི་རིམ་གྱི་རིག་གནས་འཛུགས་སྐྱོང་ལ་གསོན་ཤུགས་བསྣན་པ་རེད།
ས་སྲོས་དུས་སུ། མལ་གྲོ་གུང་དཀར་རྫོང་རྩ་ཞོལ་ཤང་རྩ་ཞོལ་གྲོང་ཚོར་ལས་དོན་པས་གློག་བརྙན་སྟོན་པའི་གྲ་སྒྲིག་བྱས་ཤིང་། སྒྲིག་ཆས་དབོར་བ་དང་། ཡོལ་རས་འཐེན་པ། སྒྲ་སྐྱེད་ཚོད་ལྟ་སོགས་ཀྱི་གོ་རིམ་ཡོངས་སུ་བསྒྲུབས་ནས་གློག་བརྙན་བདེ་བླག་ངང་སྟོན་ཐུབ་པར་འགན་ལེན་བྱས་པ་རེད། ཡུལ་མི་ཚོ་གཅིག་རྗེས་གཉིས་མཐུད་ངང་གྲོང་ཚོ་ཨུ་ལྷན་གྱི་ཐང་ཆེན་དུ་འཛོམས་ནས་གྲོང་པ་ཁྱིམ་མཚེས་དབར་ཅི་འཕྲོས་མོལ་འཕྲོས་བྱེད་ཀྱིན་གློག་བརྙན་སྟོན་པར་སྒུག་པ་དང་། གྲོང་གསེབ་ཀྱི་མཚན་དགུང་ནས་འཁྲུག་ཆ་དོད་ཅིང་འཆམ་མཐུན་གྱི་རྣམ་པ་ཞིག་རིམ་བཞིན་མངོན།
ཡུལ་མི་བསྟན་འཛིན་ཆོས་གྲགས་ཀྱིས“ད་ཆ། དུད་ཚང་ཚང་མར་བརྙན་འཕྲིན་དང་ལག་ཐོགས་ཁ་པར་ཡོད་པས། གྲོང་ཚོར་མཉམ་དུ་གློག་བརྙན་ལྟ་བའི་གོ་སྐབས་ཧ་ཅང་དཀོན་པོ་རེད། གྲོང་གསེབ་ཏུ་བསྟན་པའི་གློག་བརྙན་ལྟད་མོ་ཆེ་བ་མ་ཟད། གྲོང་ཚོའི་རྒན་གཞོན་ཚང་མ་མཉམ་དུ་འཛོམས་ནས་སྡོད་པའི་འདས་སོང་ཡང་དྲན་གྱི་འདུག གྲོང་པ་ཁྱིམ་མཚེས་མཉམ་དུ་རུབ་རུབ་ཀྱིས་གློག་བརྙན་ལྟ་བའི་ཚ་སོབ་སོབ་ཀྱི་རྣམ་པ་འདི་འདྲ་ཁྱིམ་དུ་འཛུལ་བསྡད་པས་ཚབ་བྱེད་ཐབས་བྲལ”ཞེས་གསར་འགོད་པར་བཤད།
མལ་གྲོ་གུང་དཀར་རྫོང་གློག་བརྙན་དོ་དམ་ས་ཚིགས་ཀྱི་ལས་དོན་པ་བསོད་ནམས་ཀྱིས་ངོ་སྤྲོད་བྱས་པར། གྲོང་གསེབ་ཏུ་གློག་བརྙན་སྟོན་པའི་བྱེད་སྒོར“གནད་སྨིན་ཞབས་ཞུ་དང་མཁོ་དགོས་ཆ་སྒྲིག”གི་རྩ་དོན་གཞིར་བཟུང་མཉམ་དུ་གློག་བརྙན་བལྟས་པ་བརྒྱུད། སྟོན་ལས་རྗེས་ཀྱི་མང་ཚོགས་ལ་རིག་གནས་ཀྱི་བྱེད་སྒོ་སྤེལ་ནས་མང་ཚོགས་དབར་འབྲེལ་བ་ཟབ་ཏུ་གཏོང་གི་ཡོད།
ངོ་སྤྲོད་བྱས་པར་གཞིགས་ན། མལ་གྲོ་གུང་དཀར་རྫོང་གློག་བརྙན་དོ་དམ་ས་ཚིགས་ཀྱིས་རྨམ་པ་ཤང་དང་རུ་ཐོག་ཤང་སོགས་ཤང་གྲོང་དུ་སྔ་རྗེས་སུ་གློག་བརྙན་བསྟན་པ་དང་། གློག་བརྙན་སྟོན་ཐེངས་ཚང་མར་ཡུལ་མི་མང་པོ་སླེབས་ཡོད་པ་རེད།
འབྲེལ་ཡོད་གསར་འགྱུར།