འདི་ནི་གཞིས་རྩེ་གྲོང་ཁྱེར་དིང་རི་རྫོང་གྲམ་མཚོ་ཤང་མགུ་རིང་གྲོང་ཚོའི་གེགས་རྗེས་བསྐྱར་སྐྲུན་གྱི་ཁང་པ་གསར་པའི་ཟུར་ཞིག་ཡིན་པ།

དགུན་སྟོད་དུ་གཞིས་རྩེ་གྲོང་ཁྱེར་དིང་རི་རྫོང་གྲམ་མཚོ་ཤང་མགུ་རིང་གྲོང་ཚོར་ཉི་འོད་རབ་ཏུ་འཕྲོས་པ་དང་ཡངས་པའི་སྣུམ་ནག་ལམ་བཏིང་པ། ལམ་སྒྲོན་གྲལ་སྟར་འགྲིག་པ། ཡོམ་འགོག་སྡོད་ཁང་གསར་པ་སྤེལ་མར་བསྐྲུན་པ། དུད་ཁྱིམ་ཚང་མའི་སྒོ་ར་ལས་ནས་ཀྱི་དྲི་ཞིམ་འཐུལ་བ་ལ་སོགས་མདོར་ན་དེ་གར་དིང་རིའི་ས་ཡོམ་རིམ་པ་6.8ཀྱི་ཡོམ་ལྟེ་གནས་ཡུལ་ཡིན་པ་བློ་ངོར་འཆར་དཀའ།

ཟླ་ཤས་སོང་རྗེས་སླར་ཡང་མགུ་རིང་གྲོང་ཚོར་བཅར་འདྲི་བྱེད་སྐབས་འདྲེན་བྱེད་མདུན་གྱི་གསོན་ཉམས་དོད་པའི་རྣམ་པ་དེས་གེགས་བར་རྗེས་ཤུལ་སྔ་ས་ནས་མཐོང་རྒྱུ་མེད་པར་གྱུར་བ་དང་ཁོར་ཡུག་གསར་པ་དེ་ལྟ་བུ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“མི་དམངས་གོང་དུ་བཀུར་བ་དང་ཚེ་སྲོག་གོང་དུ་བཀུར་བའི”བློ་བརྟན་འགྱུར་མེད་ཀྱི་མཛུབ་ཁྲིད་གནང་བ་དང་། རང་སྐྱོང་ལྗོངས་ཏང་ཨུད་ཀྱིས“ཚད་གཞི་མཐོ་བ་དང་། ལས་ཕྱོད་ཆེ་བ། སྤུས་ཚད་མཐོ་བ”བཅས་ཀྱི་སྒོ་ནས་བསྐྱར་སྐྲུན་ལས་དོན་ལ་སྐུལ་འདེད་གཏོང་བའི་དངོས་སྒྲུབ་བྱ་སྤྱོད་སྤེལ་བ། ཏང་ཡོན་དང་ལས་བྱེད་པ་དང་མང་ཚོགས་དུ་མས་དཔུང་པ་མཉམ་གཤིབ་ཀྱིས་འབད་འཐབ་དང་སྙིང་རུས་ཆེན་པོས་འབད་འབུངས་བྱས་པ་བཅས་ལས་བྱུང་བའི་གསོན་ཉམས་དོད་པའི་མཚོན་ཚུལ་ཞིག་རེད།

ས་ཡོམ་བརྒྱབ་མ་ཐག་པའི་སྐབས་སུ་གྲོང་མི་ཚོ་གནས་སྐབས་བཀོད་སྒྲིག་གི་སྦྲ་གུར་ནང་འཚོ་བ་སྐྱེལ་སྐབས་སྟབས་བདེ་དེ་ཙམ་མེད། དེས་ན་ད་ཆ་སྨི་ངོས་གྲུ་100ལྷག་ཙམ་ཡོད་པའི་ཁང་པ་གསར་པ་དེ་ནི་ཇུས་འགོད་དཔུང་ཁག་གིས་ཡོམ་འགོག་གི་ཚད་གཞི་ལྟར་བསྐྲུན་པའི་ལྕགས་རྩིབས་སྒྲོམ་གཞིའི་ཁང་པ་ཡིན་སྟབས་ཁང་པ་ཧ་ཅང་བརྟན་པོ་ཡོད་པས་མང་ཚོགས་བློ་བདེ་བག་ཕེབས་བྱུང་ཡོད།

མགུ་རིང་གྲོང་ཚོར་སྐྱོད་སྐབས་ཁྱིམ་ཚང་ཕལ་ཆེ་བས་ཉི་འོད་དྲོད་ཁང་རྒྱག་པའི་བྲེལ་བརྩོན་ཆེ་བའི་གཟུགས་བརྙན་མཐོང་རྒྱུ་ཡོད་ལ་དེ་ཡང་ཁང་པ་གསར་པར་སྤོས་རྗེས་ཡུལ་མི་ཚོས་རང་འགུལ་ངང་བརྒྱབ་པ་ཞིག་རེད།

ལོ་19ལ་སླེབས་པའི་ཚེ་རིང་བཀྲ་ཤིས་ཀྱིས་གཅུས་གཟེར་རྒྱག་གིན“ཁྱེད་རང་གཟིགས་དང་འདིར་ཉི་འོད་འཕྲོས་མ་ཐག་དྲོ་སོབ་སོབ་ཡོད་པས་ནང་དུ་བསྡད་ཚེ་ཧ་ཅང་སྐྱིད་པོ་ཡོད”ཅེས་ཤོད་བཞིན་རང་ཁྱིམ་གྱི་ཉི་འོད་དྲོད་ཁང་བརྟན་དུ་གཏོང་བཞིན་མཆིས།

ཉི་འོད་དྲོད་ཁང་རྒྱག་སྐབས་གྲོང་མིར་སྐུལ་སློང་གང་ཡང་བྱེད་མི་དགོས་པར་ཚང་མས་རང་འགུལ་ངང་ལས་ཀར་ཡོང་གི་ཡོད། ཚེ་རིང་བཀྲ་ཤིས་ཀྱིས་གེགས་རྗེས་བསྐྱར་སྐྲུན་བྱེད་རིང“འཚོ་རྟེན་ལས་སྤྲོད”ནང་ཞུགས་སྐབས་ལས་ཡུལ་ནས་ཤེས་པའི་ལག་རྩལ་ལ་བརྟེན་ནས་གྲོང་ཚོའི་ལག་རྩལ་མཁས་པར་གྱུར་ཡོད།

ཚེ་རིང་བཀྲ་ཤིས་ཀྱིས་སྒོ་རའི་ཟུར་གྱི་ཁམས་གཙང་བའི་མེ་ཏོག་ལྡུམ་རར་མཛུབ་མོ་འཛུགས་བཞིན་དུ“ངའི་བློ་ལ་བབ་ཤོས་ནི་སྒོ་ར་ཆེན་པོ་དེ་ཡིན། སྔོན་ཆད་ཁང་པ་རྙིང་པའི་ཐོག་ཁར་མི་སྡོད་པ་དང་ཤོད་དུ་ཕྱུགས་ཟོག་འཇོག་དགོས་སྟབས་སྒོ་རའི་གང་སར་ལྕི་བས་ཁེངས་ནས་ཉིན་ལྟར་ནམ་མ་ལངས་གོང་མལ་ལས་ལངས་ཏེ་གད་འཕྱིས་རྒྱག་དགོས་ཀྱི་ཡོད། ད་ཆ་གྲོང་ཚོར་མཉམ་སྡེབ་བ་གསོའི་མཉམ་ལས་ཁང་བཙུགས་པས་ངའི་ཁྱིམ་གྱི་བ་གླང་ལ་སོ་སོས་གཡོག་བྱེད་བྱེད་མི་དགོས་སྟབས་སྒོ་ར་གཙང་དུ་ཕྱིན་པའི་ཁར་ད་དུང་མེ་ཏོག་དང་རྩི་ཤིང་འདེབས་རྒྱུ་འདུག”ཅེས་བཤད།

གྲོང་ཚོའི་ཏང་ཀྲི་པུའི་ཧྲུའུ་ཅི་ཚེ་རིང་ཕུན་ཚོགས་ཀྱིས་ཏང་ཡོན་ལས་བྱེད་པའི་སྣེ་ཁྲིད་དེ་ཉིན་མོར་ཉི་འོད་དྲོད་ཁང་གི་འཛུགས་སྐྲུན་རྒྱུ་ཆ་དབོར་བ་དང་འཕྲུལ་འཁོར་ཐར་ས་མེད་ཚེ་སྒལ་པར་ཁྱེར་ནས་སྟོད་གོས་རྔུལ་ཆུས་བརླན་ཡང་ངལ་གསོ་གི་མེད། མཚན་མོར་གྲོང་ཚོ་ཨུ་ལྷན་དུ་གློག་སྒྲོན་སྤར་ནས་ཁོང་ཚོས་མཉམ་སྡེབ་བ་གསོ་མཉམ་ལས་ཁང་གི་སྒྲིག་སྲོལ་ཞིབ་ཚགས་སུ་གཏོང་ཞོར་དུ་གྲོང་མིའི་རེ་ཞུ་ཟིན་ཐོ་བཀོད་དེ་གྲོང་མིར་ལག་ཆ་སོགས་མ་འདང་ན་འཕྲལ་མ་ཉིད་དུ་མཐུན་སྦྱོར་ཐག་གཅོད་བྱེད་ཀྱི་ཡོད། ཁོང་གིས“ང་ཚོས་མང་ཚོགས་ཀྱི་དཀའ་ངལ་འཕྲལ་དུ་ཐག་གཅོད་བྱས་ཏེ་བསྐྱར་སྐྲུན་ལས་དོན་མྱུར་ལ་སེམས་རྩ་འཁོལ་པོས་བྱེད་ཀྱི་ཡོད”ཅེས་བཤད།

ད་ལྟའི་འཚོ་བའི་ཕྱོགས་གང་སར་ཉམས་དགའ་བའི་འགྱུར་ལྡོག་མངོན་ཞིང་། སྔོན་ཆད་འབར་འབུར་གྱི་ས་ལམ་ནི་ཁོད་སྙོམས་པའི་སྣུམ་ནག་ལམ་དུ་གྱུར་པ་དང་། སྔོན་ཆད་སྲང་ལམ་ནག་ཁུང་དེ་དག་ལ་ལམ་སྒྲོན་རེ་རེ་བཞིན་ཁྲ་ཆིལ་ལེར་སྤར་བས་རྒན་རྒོན་དང་ཕྲུ་གུ་འགྲུལ་སྐྱོད་ལ་སྟབས་བདེ་བསྐྲུན་ཡོད། གྲོང་ཚོའི་ལམ་མདོར་ཡང་འཁྲུག་ཆ་དོད་ཅིང་། དངུལ་ཁང་དང་། སྒོ་རྩིས་ཚོང་ཁང་། ཇ་ཁང་བཅས་སྔ་རྗེས་སུ་བཙུགས་པས་ལོ་69ལ་སླེབས་པའི་མཐུ་སྟོབས་ཀྱིས་ཉིན་ལྟར་གྲོང་ཚོར་འཆམ་འཆམ་དུ་སོང་རྗེས་ད་དུང་ཇ་ཁང་དུ་ཕྱིན་ནས་ཇ་མངར་མོ་ཡང་འཐུང་གི་ཡོད། “སྔོན་ཆད་ཚྭ་ཉོ་བར་ཡང་སྤྱི་ལེ་འགའི་སར་བསྐྱོད་དགོས་ཀྱི་ཡོད། ད་ཆ་གྲོང་ཁྱེར་ལྟར་སྟབས་བདེ་པོ་འདུག”ཅེས་ཁོང་གིས་བཤད།

ཕྲུ་གུ་ཚོའི་དགོད་སྒྲ་ལས་གྲོང་ཚོ་གསར་པར་སྐྱེ་སྟོབས་དང་གསོན་ཤུགས་སྦྱིན། ལོ་5ལ་སླེབས་པའི་ཕུར་བུ་སྐྱིད་འཛོམས་ཀྱིས་ཐོག་སོ་གཉིས་པའི་ཉི་གཡབ་ཀྱི་ལན་ཀན་ལ་བསྙེས་ནས་སྡོད་རྒྱུར་ཧ་ཅང་དགའ་པོ་ཡོད་པ་དང་། གྲོང་ཚོ་གསར་པའི་བཀོད་པ་དང་ཕར་འགྲོ་ཚུར་འོང་གི་མི་ཚོགས་ལ་ལྟ་བཞིན“ཨ་མ་ལགས་ཀྱིས་རྗེས་སུ་གྲོང་ཚོར་བུ་བཅོལ་ཁང་ཡང་བརྒྱབ་ཀྱི་རེད་ཅེས་གསུངས་ཀྱི་འདུག་པས། ང་ཁྱིམ་གྱི་སྒོ་རྩར་སློབ་གྲྭར་འགྲོ་ཐུབ”ཅེས་བཤད།

མགུ་རིང་གྲོང་ཚོའི་སྣུམ་ནག་ལམ་དུ་ལངས་ཚེ་ས་སྲོས་ཀྱི་གྲོང་ཚོ་གསར་པ་ནས་དུ་བ་སྔོ་ལོང་ལོང་དུ་འཕྱུར་བ་དང་། གྲོང་མི་ཚོའི་སྐྱིད་པའི་དགོད་སྒྲ་དང་ཕྲུ་གུ་རྣམས་རྩེད་འཇོར་རོལ་བའི་གཟུགས་བརྙན་དག་ལས་བསྐྱར་སྐྲུན་རྗེས་ཀྱི་མགུ་རིང་ནི་སྔར་བས་བདེ་སྐྱིད་ལྡན་པའི་འཚོ་བའི་ཕྱོགས་སུ་གོམ་སྟབས་བརྟན་པོས་སྐྱོད་བཞིན་པ་མཐོང་ཐུབ།