ཞོགས་པའི་ཉི་འོད་གཞིས་རྩེ་གྲོང་ཁྱེར་བསམ་གྲུབ་རྩེ་ཆུས་གྲོང་ཤར་ཁྲོམ་གཞུང་ལྕང་ལོ་ཁང་གསར་སྡེ་ཁུལ་དུ་འཕྲོས་ཤིང་། གནའ་ཉམས་དོད་པའི་བོད་ཁང་སྟེང་སྐར་ལྔའི་དར་དམར་རླུང་ཕྱོགས་དང་བསྟུན་ནས་གཡོ་བཞིན་མཆིས།

བོད་ཆས་གྱོན་པའི་ཨ་མ་རྒན་མོ་རྡོ་གཅལ་སྟེང་འཆམ་འཆམ་ལ་སྐྱོད་པ་དང་། ཧུད་རིགས་ཕོ་གཞོན་གྱིས་ཚོང་ཁང་གི་སྒྲིལ་སྒོ་ཕྱེ་ནས་ཉིན་གཅིག་གི་ཚོང་རྒྱག་འགོ་ཚུགས་པ། མི་རིགས་མི་འདྲ་བའི་བྱིས་པ་འགའ་ཞིག་གིས་དཔེ་ཁུག་རྒྱབ་ཏུ་ཁུར་ནས་དགའ་དགའ་སྤྲོ་སྤྲོའི་ངང་སློབ་གྲྭར་སྐྱོད་པ་ལ་སོགས། མི་རིགས་13ལས་གྲུབ་པའི་སྡེ་ཁུལ་དེས་རང་རང་སོ་སོའི་དམིགས་བསལ་གྱི་བྱེད་སྟངས་ལ་བརྟེན་ནས་ཉིན་གཅིག་གི་ལས་དོན་སྒྲུབ་འགོ་ཚུགས་ཡོད།

སྡེ་ཁུལ་གྱི་བྱེད་སྒོ་ལྟེ་གནས་ཀྱི“སེ་འབྲུ་དམར་པོའི་ཁྱིམ་གཞིས”སུ་སྐྱོད་སྐབས་སྤྲོ་སྣང་ལྡན་པའི་དགའ་འབོད་ཀྱི་སྒྲ་གང་སར་གྲགས་བཞིན་མཆིས། བོད་རིགས་ཨ་མས་ཧུད་རིགས་བུ་མོར་ཇ་བཟོ་སྟངས་སློབ་བཞིན་ཡོད་པ་དང་རྒྱ་རིགས་ཕོ་གཞོན་དང་མོན་པ་རིགས་ཀྱི་གཞོན་ནུས་ཅའོ་ཙེ་བཟོ་སྟངས་སྐོར་གྲོས་བསྡུར་བྱེད་བཞིན་ཡོད། གྱང་སྟེང་དུ“མི་རིགས་མཐུན་སྒྲིལ་ལ་ཤུགས་སྣོན་བརྒྱབ་ནས་མཛེས་སྡུག་ལྡན་པའི་བོད་ལྗོངས་འཛུགས་སྐྲུན་བྱེད་དགོས”དང“མི་རིགས་ཁག་སེ་འབྲུའི་རྡོག་ལྟར་གོང་བུ་གཅིག་ཏུ་སྒྲིལ་དགོས”ཞེས་པའི་སྦྱར་ཡིག་ཧ་ཅང་མངོན་གསལ་དོད་པོ་ཡོད། (པར་ངོས་གཉིས་པར་གཟིགས)(པར་ངོས་དང་པོར་མཐུད) འདི་གར་གཟའ་འཁོར་རེར་རྣམ་པ་མི་འདྲ་བའི་བྱེད་སྒོ་གཉེར་གྱི་ཡོད་པ་སྟེ། སྐབས་རེ་བོད་རིགས་ཀྱི་གླུ་གར་སློབ་ཁྲིད་བྱེད་པ་དང་སྐབས་རེ་མི་རིགས་ཁག་གི་ཞིམ་ཟས་མཉམ་སྤྱོད་བྱེད་ཀྱི་ཡོད། སྡེ་ཁུལ་གྱི་གྲོང་མི་བཀྲ་ཤིས་ལྷ་འཛོམས་ཀྱིས་དེ་རིང་གི་ཇ་སྟོན་ཚོགས་འདུར་ཇ་བསྲུབས་མ་དང་ཁ་ཟས་སོགས་གྲ་སྒྲིག་བྱེད་བཞིན་ཡོད། “ང་བོད་རིགས་ཡིན་ཡང་ངའི་ཁྱོ་ག་ཧུད་རིགས་རེད། ང་ཚོའི་ཁྱིམ་ཚང་ནི་མི་རིགས་མཐུན་སྒྲིལ་གྱི་ཁྱིམ་ཚང་ཆུང་ཆུང་ཞིག་ཡིན”ཞེས་ཁོ་མོས་འཛུམ་དམུལ་དམུལ་ངང་བརྗོད།

སྡེ་ཁུལ་གྱི་ཀྲུའུ་རེན་གཞོན་པ་ཉི་མ་ཚེ་རིང་ལ་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་མི་སྒེར་གྱི་མཚན་སྙན་ཐོབ་མྱོང་ཡོད། ཁོང་ནི་དྭ་ཕྲུག་ཅིག་ཡིན་པ་དང་། སྡེ་ཁུལ་གྱི་ཁྱིམ་མཚེས་ཚོའི་རོགས་རམ་འོག་འཚར་ལོངས་བྱུང་བ་ཞིག་ཡིན་པས། མི་རིགས་མཐུན་སྒྲིལ་གྱི་དྲོ་སྐྱིད་དང་རིན་ཐང་མི་གཞན་སུ་ཞིག་ལས་ཀྱང་གསལ་བ་ཤེས་ཀྱི་ཡོད། ཁོང་གིས་རྟག་ཏུ“གྲོང་མི་ཚོས་ང་གསོ་སྐྱོང་བྱས་པས། ངས་བརྩེ་དུང་དེ་རྒྱུན་མཐུད་བྱེད་ཀྱི་ཡིན”ཞེས་ཤོད་ཀྱི་ཡོད།

ལོ་བཅུ་ལྷག་ཙམ་རིང་། དྲིལ་བསྒྲགས་པ་ཞིག་ཡིན་པའི་ཉི་མ་ཚེ་རིང་གིས་ལྗོངས་ཡོངས་ཀྱི་ས་གནས་ཁག་ཏུ་བསྐྱོད་དེ་མང་ཚོགས་ཀྱིས་ལྟ་འདོད་ཅིང་ཉན་སྤྲོ་བའི་བྱ་ཐབས་ལ་བརྟེན་ནས་ཏང་གི་དམངས་བདེ་དམངས་ཕན་གྱི་སྲིད་ཇུས་ཕ་ཡུལ་གྱི་གཏམ་རྒྱུད་དང་སྦྲགས་ནས་དྲིལ་བསྒྲགས་དང་སྒྲོག་འགྲེལ་སྣ་ཚོགས་ཐེངས་3100ལྷག་ཙམ་བྱས་པར་མང་ཚོགས་མི་ཐེངས་ཁྲི་50ལྷག་ཙམ་ལ་སློབ་གསོ་ཐེབས་པ་དང་། དང་བླངས་པ་500ལྷག་ཙམ་ལ་སྐུལ་ཁྲིད་བྱས་ཡོད།

ཉེ་བའི་ལོ་ཤས་རིང་། བསམ་གྲུབ་རྩེ་ཆུས་ཀྱིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྲ་བརྟན་དུ་གཏོང་རྒྱུ་གཙོ་རྐང་དུ་བྱས་ནས། “འདུ་འགོད་ཆེན་པོ་བཞི”དང“བྱ་སྤྱོད་ཁག་དྲུག”ལ་སྐུལ་འདེད་ནུས་ལྡན་བཏང་བ་དང་། “དགུ་སྤེལ”བྱེད་སྒོ་གཏིང་ཟབ་སྤེལ་བ། “སྐྱོད་པ་གཅིག་དང་སྤུས་རྟགས་གཅིག”མངོན་འགྱུར་བྱེད་པ། “སྒར་རེས་རྣམ་པའི”སྡེ་ཁུལ་ཧུར་ཐག་སྐྲུན་པ་བཅས་བྱས་ཏེ། ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཀྱི་སྟོབས་ཤུགས་ཆེན་པོ་རྒྱུན་ཆད་མེད་པར་གསོག་འཇོག་བྱས་ཡོད།