“ལོ་ལྔ་ཚན་བཅུ་བཞི་པའི”ཚུན་དུ། མི་སྤྱི་པུའུ་དང་ཞིང་ཆེན(གྲོང་ཁྱེར)ཁག་གིས་ཐོག་མཐའ་བར་གསུམ་དུ་ལས་ཞུགས་བོད་སྐྱོར་དེ་མི་རིགས་དབར་གྱི་བརྩེ་དུང་ཟབ་ཏུ་གཏོང་བ་དང་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཟབ་ཏུ་གཏོང་བའི་དམ་འཛིན་བྱ་གཞི་གལ་ཆེན་ཞིག་ཏུ་བརྩིས་ཤིང་། རིམ་རྩིས་བརྒྱབ་ན་བོད་ཀྱི་མཐོ་སློབ་སློབ་ཐོན་སློབ་མར་ལས་གནས་ཁྲི་8མཁོ་འདོན་བྱས་པ་མ་ཟད། ད་དུང“གཅིག་འཐུས་རྣམ་པའི”ལས་ཞུགས་ཞབས་ཞུའི་མ་ལག་གསར་གཏོད་བྱས་ནས་མི་ཁྲི་1.3ལྷག་ཙམ་ལས་ཞུགས་ཐུབ་པར་རམ་འདེགས་ཀྱང་བྱས་ཡོད།

“གཞིས་རྩེ་ནས་ཧྲན་ཏུང་དུ་ཡོང་། དེར་ལས་ཀ་རག་པ་མ་ཟད། ལས་ཁུངས་ཀྱིས་ད་དུང་ང་ལ་སྡོད་ཁང་ཡང་སྤྲད་བྱུང་། དེ་ནི་ངའི་ཁྱིམ་གཉིས་པ་ཡིན”ཞེས་པའི་ཅི་ནན་གྲོང་ཁྱེར་ཞིང་ལས་ལག་རྩལ་ཁྱབ་གདལ་ས་ཚིགས་སུ་ལས་ཀ་བྱེད་མཁན་གཡང་སྒྲོན་གྱི་སྐད་ཆའི་ཁྲོད་ནས་ཧྲན་ཏུང་དུ་ལས་ཞུགས་ཐུབ་པའི་སྐྱིད་སྣང་ཚོར་ཐུབ། བདེ་སྐྱིད་དེ་ནི་ཞིང་ཆེན(གྲོང་ཁྱེར)ཁག་གིས་ཐེམ་ཁུངས་བོད་ནས་ཡིན་པའི་མཐོ་སློབ་སློབ་ཐོན་སློབ་མའི་ལས་ཞུགས་ཀྱི་དགོས་མཁོར་གཞི་ཚུགས་ཏེ། ལས་གནས་མཁོ་འདོན་དང་སྲིད་ཇུས་འགན་སྲུང་གི་བྱ་ཐབས་ལ་བརྟེན་ནས། ཕྱོགས་ཡོངས་ཀྱི་ལས་ཞུགས་རོགས་རམ་མ་ལག་བརྟན་དུ་བཏང་བའི་མཚོན་ཚུལ་ཞིག་རེད།

ལས་གནས་གསར་སྤེལ་ཐད། 2015ལོ་ནས་བཟུང་། ཅང་སུའུ་ཡིས་ཐེམ་ཁུངས་བོད་ནས་ཡིན་པའི་མཐོ་སློབ་སློབ་ཐོན་སློབ་མ་ཅང་སུའུ་རུ་ལས་ཞུགས་བྱེད་མཁན་དང་ལེན་བྱ་རྒྱུ་དེ། སྲིད་ཇུས་རང་བཞིན་གྱི་བཀོད་སྒྲིག་ཁྱབ་ཁོངས་ནང་ཐོག་མར་བཅུག་ནས། ལོ་ལྟར་བྱ་གཞག་ཚན་པའི་ལས་གནས་36དང་། གཞུང་ཁོངས་ཁེ་ལས་ཀྱི་ལས་གནས་40 སྤྱི་དབང་མིན་པའི་ཁེ་ལས་ཀྱི་ལས་གནས་2000ལྷག་ཙམ་བཅས་མཁོ་འདོན་བྱས་ཡོད། 2021ལོ་ནས་2024ལོ་བར་ཁྱོན་མི་གྲངས་294བྱ་གཞག་ཚན་པ་དང་གཞུང་ཁོངས་ཁེ་ལས་སུ་བསྡུས་ཤིང་། ལས་བསྡུའི་གྲངས་འབོར་དང་། ལས་གནས་ཀྱི་སྤུས་ཚད། ལས་གནས་སྤྱོད་ཚད་བཅས་ཚང་མ་རྒྱལ་ཡོངས་ཀྱི་བོད་སྐྱོར་ཞིང་ཆེན(གྲོང་ཁྱེར)གྱི་མདུན་གྲལ་དུ་སླེབས་པ་དང་། ཧྲན་ཏུང་གིས་ལོ་ལྟར་བྱ་གཞག་ཚན་པའི་སྒྲིག་ཁུངས་སྤྱི་འདོམས་བྱས་ནས་ཆེད་དོན་ལས་བསྡུའི་ལས་དོན་སྤེལ་ཡོད། “ལོ་ལྔ་ཚན་བཅུ་བཞི་པ”ཚུན་དུ་རིམ་རྩིས་བརྒྱབ་ན་ལས་གནས་650མཁོ་འདོན་བྱས་པ་དང་ཆབས་ཅིག ལས་གནས་འཚམ་སྒྲིག་དང་ལག་རྩལ་གོ་མིང་ཞིབ་དཔྱད་སོགས་རྗེས་མཐུད་ཞབས་འདེགས་ཞུས་ཏེ། སློབ་ཐོན་སློབ་མ་གདན་ཞུ་ཐུབ་པ་དང་། གཞིས་ཆགས་ཐུབ་པ། འཕེལ་རྒྱས་ཡག་པོ་ཡོང་བ་བཅས་ཀྱི་འགན་ལེན་བྱས་ཡོད།

སྲིད་ཇུས་ཀྱི་ཐ་སྐྱོང་བྱེད་ཤུགས་སྔར་བས་ཆེ་རུ་བཏང་ཞིང་། ཧྲང་ཧའེ་ཡིས་ལས་ཞུགས་བོད་སྐྱོར་གྱི་ཆེད་དོན་ཁ་གསབ་སྲིད་ཇུས་བཏོན་ཏེ། ཐེམ་ཁུངས་བོད་ནས་ཡིན་པའི་མཐོ་སློབ་སློབ་ཐོན་སློབ་མ་བསྡུ་ལེན་བྱས་པ་དང་འབྲེལ། ལོ་གཅིག་ཡན་གྱི་ངལ་རྩོལ་གན་རྒྱ་འཇོག་མཁན་གྱི་མི་སྤྱོད་ཚན་པར་མི་རེར་ལོ་རེར་ཁ་གསབ་སྒོར་ཁྲི་1.3སྤྲད་ནས་ཁེ་ལས་དེའི་ནང་ཞུགས་པའི་ཧུར་བརྩོན་རང་བཞིན་ཆེ་རུ་བཏང་བ་དང་། ཧྲའན་ཤིས་ཀྱིས“ཚོགས་སྒྲིག་ཆུང་ཆུང”གི་ལས་ཞུགས་ཞབས་ཞུའི་རྟེན་གཞི་བཙུགས་ནས་མངག་བཀོད་ཅན་གྱི་ལས་གནས་སྦྲེལ་མཐུད་དང་བརྒྱུད་རིམ་ཧྲིལ་པོའི་ཞབས་ཞུ་འགན་ལེན་ལ་བརྟེན་ནས། མངའ་རིས་ས་ཁུལ་གྱི་མཐོ་སློབ་སློབ་ཐོན་སློབ་མ་ལྗོངས་ཕྱིར་ལས་ཞུགས་ཐུབ་ཚད་13%ཡན་བར་མཐོ་རུ་གཏོང་རྒྱུར་སྐུལ་འདེད་བཏང་ཡོད།

ལས་ཞུགས་ཞབས་ཞུ་དེ་བས་ལེགས་པ་ཡོང་ཆེད། ཧུའུ་ནན་གྱིས་དྲ་ཐོག་དང་དྲ་ཕྱི་ཟུང་འབྲེལ་གྱི་མཉམ་འགུལ་བྱ་ཐབས་སྤྱད་དེ་དྲ་ཐོག་ནས་སྤྲིན་རུམ་གདན་ཞུ་དང་། རྒྱང་རིང་དཔྱད་ཞིབ། དྲ་ཐོག་གན་འཇོག་བཅས་ཀྱི་བརྒྱུད་རིམ་ཧྲིལ་པོའི་ཞབས་ཞུ་བསྒྲུབས་ནས། སློབ་ཐོན་སློབ་མ་བོད་ནས་འགྲོ་མི་དགོས་པར་ལས་གནས་འབྲེལ་མཐུད་ཐུབ་པར་བྱས་པ་དང་། དྲ་ཕྱི་ནས་ཚོགས་སྒྲིག་དང་ལས་ཞུགས་ཟུང་འབྲེལ་གྱི་བྱེད་ཐབས་གསར་པ་སྤྱད་དེ“ཚོགས་སྒྲིག་རྣམ་པའི”ལས་ཞུགས(ལྟ་སྦྱོང)རྟེན་གཞི་8བཙུགས་པ་དང་། “ལྟ་སྦྱོང་ཉམས་ལེན་དང་། རྩལ་ནུས་གསོ་སྦྱོང་། ངེས་གནས་ལས་ཞུགས”བཅས་ཀྱི་གསོ་སྐྱོང་འཁོར་འབྲེལ་གཅིག་ཆགས་པར་བྱས་པ། རིམ་རྩིས་བརྒྱབ་ན་མཐོ་སློབ་སློབ་ཐོན་སློབ་མ་150ལྷག་ཙམ་ལ“ཚོགས་སྒྲིག་རྣམ་པའི”ཧུའུ་ནན་གྱི་ཁེ་ལས་སུ་ལས་ཞུགས་བྱེད་པའི་སྒྲིག་འཛུགས་བྱས་པ་བརྒྱུད། ཐེམ་ཁོངས་ལྷོ་ཁ་ནས་ཡིན་པའི་མཐོ་སློབ་སློབ་ཐོན་སློབ་མ་ཧུའུ་ནན་དུ་ལས་ཞུགས་བརྟན་པོ་བྱུང་ཚད་88.2%ཟིན་ཡོད།