ས་བབ་སྨི་4200ལྷག་ཙམ་ཟིན་པའི་ཆུ་གསུམ་རྫོང་སྟོད་གཟིགས་ཤང་དུ་དུད་ཚང་120དང་ཡུལ་མི་411ལས་མེད་པའི་གྲོང་ཚོ་ཆུང་ཆུང་ཞིག་ཡོད་པ་དེ་ནི་པ་ནི་གྲོང་ཚོ་རེད། ད་ལོའི་ཟླ་5པར“ཐག་རིང་གི་གྲོང་ཚོ”དེར“སྐབས་བདུན་པའི་རྒྱལ་ཡོངས་ཀྱི་ཤེས་དཔལ་གྲོང་ཚོ་དང་གྲོང་རྡལ”གྱི་གཟི་བརྗིད་མཚན་སྙན་ཐོབ་པ་རེད།

རི་གྲོང་གི་གྲོང་ཚོ་ཆུང་ཆུང་དེར“རྒྱལ་ཡོངས་ཀྱི་ཤེས་དཔལ་གྲོང་ཚོ་དང་གྲོང་རྡལ”གྱི་སྒོ་བྱང་རག་དོན་གང་ཡིན་ཞེ་ན།

པ་ནི་གྲོང་ཚོར་སྐྱོད་སྐབས“ཐ་མག་འཐེན་མཁན་དང་ཆང་རག་འཐུང་མཁན་མེད་པའི་གྲོང་ཚོ”ཞེས་པའི་བྱང་བུ་ཧ་ཅང་མངོན་གསལ་དོད་པོ་ཡོད་ཅིང་། གྲོང་ཚོའི་ཀྲི་པུའུ་ཧྲུའུ་ཅི་ཕུར་བུ་ཚེ་རིང་གིས“ད་ཆ་གྲོང་ཚོ་ཡོངས་སུ་ཐ་མག་འཐེན་མཁན་མེད་ལ། ཆང་རག་ཀྱང་དུས་ཆེན་སྐབས་རང་ཁྱིམ་དུ་བསྙལ་བའི་ནས་ཆང་སླ་པོ་ཁ་གང་དོ་ཙམ་ལས་འཐུང་མཁན་མེད”ཅེས་སྤོབས་པ་ཆེན་པོས་བཤད།

དེ་དག་ཚང་མ་ཡུལ་མི་བློ་བཟང་རྡོ་རྗེའི་བྱས་རྗེས་ཡིན་ཞེས་བརྗོད་ཆོག་སྟེ། ལོ་འཁོར་མོ་ཡུལ་གཞན་ལ་གླ་པ་རྒྱུག་བཞིན་པའི་ཁོང་གིས་ས་མཐོར་ཐ་མག་འཐེན་པ་དང་ཆང་རག་བཏུངས་ཚེ་གཟུགས་པོར་གནོད་པ་ཆེན་པོ་ཡོད་པ་གསལ་པོ་ཤེས་པས། ཕ་ཡུལ་དུ་ལོག་རིམ་བཞིན་ཡུལ་མི་ཚོར་བདེ་ཐང་ལ་དོ་སྣང་བྱེད་དགོས་པའི་ཁ་ཏ་བསླབ་བྱ་ཡང་ཡང་བྱེད་ཀྱི་ཡོད། 2017ལོ་ནས་བཟུང་གྲོང་ཚོ་ཨུ་ལྷན་གྱིས“དམངས་ཁྲོད་ཀྱི་ཐུན་མོང་ངོས་འཛིན”དེར་བསྟུན་ནས་ཨ་ན་ཨུ་ཚུགས་མི་བྱེད་པར་ཅི་འཕྲོས་མོལ་འཕྲོས་དང་གནས་ལུགས་དྲངས་ནས་རིམ་བཞིན་ཁྲིད་སྟོན་བྱས་པ་དང་། རྣམ་པ་དེའི་ཤུགས་རྐྱེན་འོག་དེ་སྔ་ཉིན་གཅིག་ལ་ཐ་མག་སྒམ་ཆུང་གསུམ་ཙམ་འཐེན་མཁན་གྱི་ཟླ་བས་ཀྱང་ཐ་མག་བཅད་པ་རེད།

“རྗེས་སུ་ཐ་མག་འཐེན་མཁན་ང་གཅིག་པུ་ལས་མེད་པས་དངོས་གནས་ངོ་ཚ་པོ་འདུག”ཅེས་ཟླ་བས་འཚེར་སྣང་ཆེན་པོས་བཤད། 2022ལོ་ནས་བཟུང་། པ་ནི་གྲོང་ཚོར“ཐ་མག་འཐེན་མཁན་གཅིག་ཀྱང་མེད་པ”དང་། ཆང་རག་མི་འཐུང་བ་དེ་ཡང་གྲོང་ཚོ་ཡོངས་ཀྱི་མ་གྲོས་གཅིག་མཐུན་གྱི་གོམས་སྲོལ་ཞིག་ཏུ་གྱུར་ཡོད།

པ་ནི་གྲོང་ཚོར“ཐབས་ཤེས་གང་ཡོད་བཏོན་ནས་ཕྲུ་གུ་སློབ་གྲྭར་གཏོང་དགོས”ཞེས་པ་ནི་འབོད་ཚིག་མིན་པར་ཡུལ་མིའི་སེམས་གཏིང་གི་རྒྱུན་ཤེས་རེད། ལོ་73ལ་སླེབས་པའི་རྒན་མོ་བཀྲ་ཤིས་མཚོ་མོས་བུ་ཕྲུག་8གསོ་སྐྱོང་བྱས་པ་དང་དེའི་ཁྲོད་ནས་7ཏང་ཡོན་ལས་བྱེད་པ་རེད། ད་ལོ་གྲོང་ཚོའི་ནང་གི་མཐོ་རྒྱུགས་གཏོང་མཁན་སློབ་མ་3ཚང་མ་དངོས་གཞིའི་ཚན་ཁག་ཏུ་རྒྱུགས་འཕྲོད་པ། དམའ་རིམ་སློབ་འབྲིང་གི་སློབ་མ་3ཚང་མ་གཙོ་གནད་མཐོ་འབྲིང་དུ་ཚུད་ཡོད།

“དུ་ཁུང”གིས་ཐ་མག་བཅད་པ་ནས་གྲོང་ཚོ་ཡོངས་ལ“ཐ་མག་འཐེན་མཁན་མེད་པ་དང་ཆང་རག་འཐུང་མཁན་མེད་པའི”བར་དང་། དུད་ཚང་ཚང་མས་ཕྲུ་གུ་སློབ་གྲྭར་གཏོང་བ་ནས་ཁྱིམ་མཚེས་དབར་ཕན་ཚུན་རོགས་རེས་བྱེད་པའི་བར་སོགས་ཀྱི་བྱ་བ་ཆེ་ཆུང་སྣ་ཚོགས་ནས་པ་ནི་གྲོང་ཚོའི་ཤེས་དཔལ་མངོན་གྱི་ཡོད། ད་ཆ“རྒྱལ་ཡོངས་ཀྱི་ཤེས་དཔལ་གྲོང་ཚོ་དང་གྲོང་རྡལ”གྱི་སྒོ་བྱང་གྲོང་ཚོ་ཨུ་ལྷན་གྱི་སྒོ་འགྲམ་དུ་བཀལ་ཡོད་པ་དང་། གྲོང་མི་ཚོས་དེ་ནི་མཇུག་འགྲིལ་བ་ཞིག་མིན་པར་འགོ་འཛུཌ་ས་གསར་པ་ཞིག་རེད་ཅེས་ཤོད་ཀྱི་ཡོད། རི་གྲོང་གི་གྲོང་ཚོ་ཆུང་ཆུང་དེས་བྱ་བ་ཙག་ཙིག་མང་པོའི་ཐོག་ནས་རྔམ་བརྗིད་ལྡན་པའི་ཤེས་དཔལ་གྱི་སྲོལ་གསར་མངོན་བཞིན་ཡོད།