ཞོགས་པའི་ཆུ་ཚོད་དྲུག་དང་ཕྱེད་ཀར་ལྷ་སར་ད་དུང་ནམ་ལངས་མེད་ནའང་སྦྲག་བསྐུར་དབྱེ་འབྱེད་ལྟེ་གནས་སུ་གློག་འོད་རབ་ཏུ་གསལ། སྦྲག་འཁོར་ལྗང་ནག་དག་གྲལ་སྟར་འགྲིག་པོས་བཞག་ཡོད་ཅིང་། ལས་དོན་པ་རྣམས་དེའི་ཁྲོད་ལས་བྲེལ་ཆེན་པོས་ཕར་འགྲོ་ཚུར་འོང་བྱེད་བཞིན་པ་དང་། རང་འགུལ་དབྱེ་འབྱེད་འཕྲུལ་འཁོར་དལ་ལྷོད་རན་པོས་འཁོར་སྐྱོད་བྱེད་བཞིན་པ་དེ་ནི་ས་མཐོའི་གྲོང་ཁྱེར་འདིའི་ཞོགས་པར་ཟོག་འགྲེམས་ཀྱི་རོལ་དབྱངས་དམིགས་བསལ་ཞིག་དཀྲོལ་བ་དང་མཚུངས།

མྱུར་སྐྱེལ་བ་བཀྲ་ཤིས་དོན་གྲུབ་ཀྱིས་སྦྲག་སྲིད་ཀྱི་གྲང་ཕྲེང་རླངས་འཁོར་ལ་ཞིབ་བཤེར་ཚགས་ཚུད་པོ་བྱེད་བཞིན་ཡོད་ཅིང་། དེ་ནི་ཁོང་གི་གྲོགས་པོ་ཡག་ཤོས་དེ་རེད་ཅེས་བརྗོད་ན་མ་ཆོག་པ་མེད། ལོ་45ལ་སླེབས་པའི་བཀྲ་ཤིས་དོན་གྲུབ་ཀྱིས་སྦྲག་སྲིད་ལས་ཁུངས་ལ་ལས་ཀ་བྱས་ནས་ལོ་27འགྲོ་ཡི་ཡོད། སྔར་སོང་གི་སྐོར་གླེང་སྐབས་ཁོང་གིས་དངུལ་ཁུག་ནས་སྲབ་ལ་སྐྱ་སེར་དུ་གྱུར་པའི་པར་རྙིང་པ་ཞིག་དལ་བུར་བཏོན་ཡོང་བ་དང་། པར་དེའི་ནང་གངས་འཁྱགས་ཀྱིས་བཏུམས་པའི་ཁོར་ཡུག་ཁྲོད་སྦྲག་འབོག་ལྗིད་པོ་ཞིག་ཕྲག་ཏུ་འཁུར་ནས་བསྐྱོད་བཞིན་པའི་གཞོན་ནུ་ཞིག་རེད་འདུག

“འདི་ནི་ངའི་པཱ་ལགས་རེད། 1978ལོར་མཚོ་ཆེན་རྫོང་དུ་ཤང་གི་སྦྲག་པ་བྱེད་དུས་པར་དེ་བརྒྱབ་པ་རེད”ཅེས་བཀྲ་ཤིས་དོན་གྲུབ་ཀྱིས་པར་དེར་ག་ལེར་བྱི་དོར་བྱེད་ཀྱིན་དུ“སྔོན་མ་འཕྲིན་ཡིག་དང་ཅ་ལག་སོགས་སྐུར་དགོས་ན་རྐང་ཐང་མར་སྐྱེལ་བར་འགྲོ་དགོས། ས་བབ་སྨི་4500ཡི་སར་གསོ་རླུང་དཀོན་པས་གོམ་པ་ཁ་ཤས་ལས་མ་བརྒྱབ་ནའང་དབུགས་ཧལ་གྱི་ཡོད་པ་དང་། མཐའ་བཞི་གངས་ཀྱིས་བཏུམས་པས་སྦྲག་པ་ཡི་རྐང་རྗེས་དང་རླུང་བུའི་སྒྲ་ལས་གཞན་གང་ཡང་མེད”ཅེས་བཤད།

1995ལོར་བཀྲ་ཤིས་དོན་གྲུབ་ཀྱང་ཨ་ཕ་དང་འདྲ་བར་སྦྲག་པ་ངོ་མ་ཞིག་ཏུ་གྱུར། ལས་ཁུངས་ཀྱིས་ཁོང་ལ་སྔ་མོའི་པེ་ཅིང་ཅི་ཕུ་རྟགས་ཅན་གྱི་རླངས་འཁོར་ཞིག་སྤྲད་ཀྱང་། “རླངས་འཁོར་དེའི་ནང་དྲོད་སྙོམས་ཆས་མེད་པས་དགུན་ཁ་གྲང་ཟུག་ཆེ་ལ་དབྱར་ཁ་ཚ་གདུག་ཆེན་པོ་ཡོད”

ད་ཆ་བཀྲ་ཤིས་དོན་གྲུབ་ཀྱིས་ནུས་རྒྱུ་གསར་པའི་གྲང་ཕྲེང་རླངས་འཁོར་གསར་རྐྱང་ཞིག་གཏོང་གི་ཡོད་པ་དང་དེའི་ནང་སྔོན་ཐོན་གྱི་དྲོད་སྙོམས་ཆས་བསྒར་ཡོད་པ་རེད། “ཁྱེད་རང་འཁོར་སྒྲོམ་འདིར་གཟིགས་དང་། མཐུག་ཚད་ལི་སྨི་10ཟིན་པའི་དྲོད་སྲུང་བར་འཚང་ཡོད་པ་དང་ཕྱི་ངོས་ནི་མཁའ་འགྲུལ་གྱི་རྒྱུ་ཆ་སྤྱད་པའི་ལྕགས་ལེབ་རེད”ཅེས་ཁོང་གིས་སྤོབས་པ་ཆེན་པོས་འཁོར་སྒྲོམ་ལ་རེག་བཞིན་དུ་དེ་ལྟར་བཤད་པ་དང་། ཡང་ཁོང་གིས“དབྱར་ཁ་ཤིང་ཏོག་དབོར་དུས་དྲོད་ཚད་0℃ནས་4℃བར་ཚོད་འཛིན་བྱེད་ཐུབ་པ་དང་། དགུན་ཁ་སྨན་རྫས་དབོར་སྐབས་དྲོད་ཚད་15℃ནས་18℃བར་བརྟན་པོར་གནས་ཐུབ། ཐུམ་སྒྲིལ་ཚང་མར་དེ་མཚུངས་ཀྱི་དྲོད་ཚད་ཚོད་འཛིན་གྱི་མཆན་རྟགས་བསྒར་ཡོད་པས་བརྒྱུད་རིམ་ཧྲིལ་པོ་ཁུངས་འདེད་བྱེད་ཆོག”ཅེས་བཤད།

སྐབས་དེར་མྱུར་སྐྱེལ་བསྐུར་མ་བསྐུར་བར་ཡོང་མཁན་ཨ་ཅག་སྒྲོལ་མས“ད་ཆ་ཅ་ལག་བསྐུར་སྐབས་དངོས་གནས་སྟབས་བདེ་པོ་འདུག གཟའ་འཁོར་གོང་མར་ངའི་བུ་མོས་ཁྲེང་ཏུའུ་ནས་བསྐུར་བའི་ཅ་ལག་ཉིན་གཉིས་ནང་སླེབས་སོང་། དེ་སྔོན་ཡིན་ན་ཉུང་མཐར་ཡང་ཟླ་ཕྱེད་ཙམ་འགོར་གྱི་རེད”ཅེས་བཤད་པ་དང་། མྱུར་སྐྱེལ་བསྐུར་མ་ཞིག་ཁྱེར་ནས“གྱོན་གོས་མཐུག་པོ་དེ་ནག་ཆུར་ལས་ཀར་ཡོད་པའི་བུ་ལ་བསྐུར་རྩིས་ཡོད། སང་གནངས་ལ་འབྱོར་གྱི་རེད”ཅེས་བཤད།

བཀྲ་ཤིས་དོན་གྲུབ་ཀྱིས་མིག་མཐོང་ལག་ཟིན་བྱུང་བའི་སྦྲག་སྲིད་ཀྱི་འཕོ་འགྱུར་ནི་བོད་ཀྱི་ཟོག་འགྲེམས་ལས་རིགས་འཕེལ་རྒྱས་ཀྱི་བསྡུས་རིས་ཤིག་རེད། ཉེ་བའི་ལོ་ཤས་རིང་། བོད་ཀྱི་སྦྲག་སྲིད་ཁོངས་གཏོགས་ཀྱིས་གསར་གཏོད་རྒྱུན་ཆད་མེད་པར་བྱས་པས་རབ་མྱུར་མགྱོགས་སྐྱེལ་ལས་སྒོའང་དུས་ཐོག་ཏུ་ཐོན་ཡོད། ད་ཆ། མྱུར་སྐྱེལ་ཞབས་ཞུ་རྫོང་གྲོང་ནས་གྲོང་ཚོ་བར་ཁྱབ་ཅིང་། ལྗོངས་ཡོངས་སུ་གྲོང་ཚོ་རིམ་པའི་ཕྱོགས་བསྡུས་དམངས་ཕན་ཞབས་ཞུའི་ས་ཚིགས་754བསྐྲུན་ཟིན་ནས། ཐག་རིང་ལུང་ཁུག་གི་མི་རྣམས་ཀྱིས་ཀྱང་ནུས་ཆེ་སྟབས་བདེའི་མྱུར་སྐྱེལ་ཞབས་ཞུ་ལོངས་སྤྱོད་ཐུབ་ཀྱི་ཡོད།

ལྗང་ནག་མདོག་གི་ཡིག་སྒམ་གྱིས་གནའ་དེང་སྦྲེལ་བ་དང་། བསྐུར་མ་ཆུང་ཆུང་ཞིག་ལས་དུས་རབས་ཀྱི་འཕེལ་རྒྱས་མངོན། ནུས་ཆེ་ཤར་གཏོང་ཐུབ་པའི་ཟོག་འགྲེམས་དྲ་བ་དང་། ལེགས་སུ་རྒྱུན་ཆད་མེད་པར་འགྲོ་བའི་གཉེར་སྐྱོང་བྱ་ཐབས། གྲངས་རིག་མཉམ་སྤྱོད་ཀྱི་གསར་གཏོད་ཚན་རྩལ་བཅས་ལ་བརྟེན་ནས་བསྐུར་མ་ཆུང་ཆུང་དག་མགྱོགས་ལ་ཆག་སྐྱོན་དང་ཆད་ལུས་མེད་པར་བསྐུར་ཐུབ་པ་མ་ཟད། བོད་ཀྱི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་འདེགས་སྐྱོར་ནུས་ལྡན་ཡང་ཐུབ་ཡོད།