ཚེས་13ཉིན་གྱི་སྔ་དྲོར། བོད་རང་སྐྱོང་ལྗོངས་ཡན་ཨན་སྙིང་སྟོབས་ཞིབ་འཇུག་ཁང་གིས་ཡན་ཨན་གསར་བརྗེའི་དྲན་གསོ་ཁང་དང་མཉམ་དུ་གཙོ་གཉེར་བྱས་པའི《འཛམ་གླིང་ལ་འགྱུར་ལྡོག་བཏང་བའི་དམག་འཁྲུག—འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་གི་མཐོང་རྒྱའི་ཀྲུང་གོའི་རི་འགོག་དམག་འཁྲུག》ཅེས་པའི་ཆེད་དོན་པར་རིས་འགྲེམས་སྟོན་བོད་རང་སྐྱོང་ལྗོངས་ཏང་ཨུད་ཏང་གི་སློབ་གྲྭར་གཉེར་བ་རེད།

ད་ལོ་ནི་ཀྲུང་གོ་མི་དམངས་ཀྱི་རི་འགོག་དམག་འཁྲུག་དང་འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་ཐོབ་ནས་ལོ་ངོ་80འཁོར་བའི་ལོ་ཞིག་རེད། ད་རེས་ཀྱི་འགྲེམས་སྟོན་གྱི་དམིགས་ཡུལ་ནི་རི་འགོག་དམག་འཁྲུག་གི་སྔོན་གཤེགས་དཔའ་བོའི་བྱས་རྗེས་རླབས་པོ་ཆེར་རྗེས་དྲན་ཟབ་མོ་ཞུས་ནས་རི་འགོག་དམག་འཁྲུག་གི་སྙིང་སྟོབས་རླབས་པོ་ཆེ་དར་སྤེལ་ཤུགས་ཆེན་གཏོང་རྒྱུ་དེ་རེད།

འགྲེམས་སྟོན་དེ་ཁྱོན་སྡེ་ཚན་བཞི་ལ་དབྱེ་ནས་རྩ་ཆེའི་ལོ་རྒྱུས་པར་རིས་ཁག་600ལྷག་ཙམ་འགྲེམས་སྟོན་བྱས་པ་དང་། མའོ་ཙེ་ཏུང་གིས《རྒྱུན་སྲིང་དམག་འཁྲུག་གླེང་བ》ཞེས་པའི་དབྱིན་ཡིག་གི་སྒྱུར་དེབ་ཁྲོད་བརྗོད་པའི“རླབས་ཆེན་གྱི་ཀྲུང་གོའི་རི་འགོག་དམག་འཁྲུག་ནི་ཀྲུང་གོ་དང་ཤར་ཕྱོགས་ཙམ་མིན་པར། འཛམ་གླིང་གི་དོན་ཆེན་ཡིན”ཞེས་པ་ལྟེ་བའི་མཐོང་ཚོར་དུ་བྱས་པ་དང་འཛམ་གླིང་དམག་ཆེན་གཉིས་པའི་ལོ་རྒྱུས་ཀྱི་ལྟ་བ་ཡང་དག་ལ་བརྟེན་ནས་ལོ་རྒྱུས་ཀྱི་གནས་ཚུལ་ངོ་མ་བསྟན་ཏེ། འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་ཁྲོད་ཀྲུང་གོ་མི་དམངས་ཀྱི་རི་འགོག་དམག་འཁྲུག་གི་གནས་བབ་གལ་ཆེན་ཕྱོགས་ཡོངས་ནས་མངོན་པར་བྱས་ཡོད། ཞིབ་ཚགས་པའི་ལོ་རྒྱུས་ཀྱི་དཔྱད་གཞི་དང་གསོན་ཉམས་དོད་པའི་གནས་ཚུལ་ཞིབ་མོར་བརྗོད་པ་བརྒྱུད། མང་ཚོགས་ཀྱིས་རི་འགོག་དམག་འཁྲུག་གི་ལོ་རྒྱུས་ཀྱི་དོན་སྙིང་ལ་ངོས་འཛིན་གཏིང་ཟབ་བྱེད་པར་ཁྲིད་སྟོན་བྱས་ཡོད།