རྒྱལ་ཁབ་ནུས་རྒྱུ་ཅུས་ཀྱིས་ཉེ་ཆར་ཁྱབ་བསྒྲགས་བྱས་པའི་གྲངས་གཞི་ལས་མངོན་པར། ཟླ་བ་བརྒྱད་པར། སྤྱི་ཚོགས་ཡོངས་ཀྱི་གློག་སྤྱོད་ཚད་ཆུ་ཚོད་ཆན་ཝ་དུང་ཕྱུར་10154ཟིན་པ་དེ་དུས་མཚུངས་ལས་5.0%འཕར་ཡོད། ཐོན་ལས་དང་པོའི་གློག་སྤྱོད་ཚད་ཆུ་ཚོད་ཆན་ཝ་དུང་ཕྱུར་164ཟིན་པ་དེ་དུས་མཚུངས་ལས་9.7%འཕར་བ་དང་། ཐོན་ལས་གཉིས་པའི་གློག་སྤྱོད་ཚད་ཆུ་ཚོད་ཆན་ཝ་དུང་ཕྱུར་5981ཟིན་པ་དེ་དུས་མཚུངས་ལས་5.0%འཕར་བ། ཐོན་ལས་གསུམ་པའི་གློག་སྤྱོད་ཚད་ཆུ་ཚོད་ཆན་ཝ་དུང་ཕྱུར་2046ཟིན་པ་དེ་དུས་མཚུངས་ལས་7.2%འཕར་བ། གྲོང་ཁྱེར་དང་གྲོང་གསེབ་ཀྱི་གྲོང་མིའི་འཚོ་བའི་གློག་སྤྱོད་ཚད་ཆུ་ཚོད་ཆན་ཝ་དུང་ཕྱུར་1963ཟིན་པ་དེ་དུས་མཚུངས་ལས་2.4%འཕར་ཡོད། ཟླ་བ་དང་པོ་ནས་བརྒྱད་པའི་བར། སྤྱི་ཚོགས་ཡོངས་ཀྱི་གློག་སྤྱོད་ཚད་རིམ་རྩིས་བརྒྱབ་ན་ཆུ་ཚོད་ཆན་ཝ་དུང་ཕྱུར་68788ཟིན་ནས་དུས་མཚུངས་ལས་4.6%འཕར་ཡོད།

ཟླ་བ་བརྒྱད་པར། རྒྱལ་ཡོངས་ཀྱི་བཟོ་སྐྲུན་ལས་རིགས་ཀྱི་གློག་སྤྱོད་ཚད་དུས་མཚུངས་ལས་5.5%འཕར་བ་དེ་ད་ལོའི་ཟླ་བ་གཅིག་གི་འཕར་ཚད་མཐོ་ཤོས་ཡིན་པ་དང་། དེའི་ནང་ངར་ལྕགས་དང་། ཨར་ལས་རྒྱུ་ཆས། མདོག་ཅན། རྫས་འགྱུར་བཟོ་ལས་སོགས་མ་བཅོས་རྒྱུ་ཆའི་ལས་རིགས་ཀྱི་གློག་སྤྱོད་ཚད་སླར་གསོའི་རྣམ་པ་མངོན་གསལ་དོད་པོ་ཡོད་ཅིང་། ཁྱོན་བསྡོམས་གློག་སྤྱོད་ཚད་ལོ་གོང་མའི་དུས་མཚུངས་ལས་4.2%འཕར་བ་དང་། ཟླ་བ་བདུན་པ་ལས་བརྒྱ་ཆའི་གྲངས་3.7གྱིས་མཐོ་རུ་ཕྱིན་ཡོད། ལག་རྩལ་མཐོ་བ་དང་དེ་བཞིན་སྒྲིག་ཆས་བཟོ་སྐྲུན་ལས་རིགས་ཀྱི་གློག་སྤྱོད་ཚད་ལས་འཕེལ་རྒྱས་ཀྱི་མཉེན་གཤིས་ཧ་ཅང་ཆེན་པོ་མངོན་ཞིང་། ཡན་ལག་ལས་རིགས་ཚང་མའི་གློག་སྤྱོད་ཚད་འཕར་བ་དང་། ཁྱོན་བསྡོམས་གློག་སྤྱོད་ཚད་དུས་མཚུངས་ལས་9.1%འཕར་ནས། འཕར་ཚད་དུས་མཉམ་བཟོ་སྐྲུན་ལས་རིགས་ཀྱི་ཆ་སྙོམས་འཕར་ཚད་ལས་བརྒྱ་ཆའི་གྲངས་4.6ཙམ་གྱིས་མཐོ་བ་ཡོད་པས། ནུས་རྒྱུ་གསར་པའི་རླངས་འཁོར་ཧྲིལ་པོ་བཟོ་སྐྲུན་དང་འོད་ཤུགས་ཐོན་ལས་བཟོ་སྐྲུན་གྱི་གློག་སྤྱོད་ཚད་འཕར་མགྱོགས་པའི་རྣམ་པ་རྒྱུན་འཁྱོངས་ཐུབ་ཡོད། “ཐོན་སྐྱེད་ནུས་ཤུགས་གསར་མ་དབྱར་མཚོ་རྒྱས་པ་ལྟར་འཕེལ་རྒྱས་ཕྱིན་ནས་དཔལ་འབྱོར་གྱི་འཕར་གཞི་གསར་པ་ཞིག་ཆགས་བཞིན་ཡོད་པ་དང་། གློག་སྤྱོད་ཚད་མཐོ་རུ་འགྲོ་བར་སྐུལ་འདེད་ཐེབས་བཞིན་ཡོད”ཅེས་ཀྲུང་གོ་གློག་ཤུགས་ཁེ་ལས་མཉམ་འབྲེལ་ལྷན་ཚོགས་ཀྱི་བསྡོམས་རྩིས་དང་གྲངས་རིག་པུའི་ཀྲུའུ་རེན་གཞོན་པ་ཅང་ཏེ་པིན་གྱིས་བརྗོད།