བོད་ལ་ཡོང་ནས་ཅི་ཞིག་མཐོང་བྱུང་ངམ་ཞེ་ན། སྔོ་ཞིང་གཡའ་དག་པའི་ནམ་མཁའ་དང་། དྲི་མེད་དཀར་གཙང་གི་སྤྲིན་པ། མུ་ལ་མུ་འབྲེལ་གྱི་རི་བོ་སོགས་ཕུད། བརྗེད་པར་དཀའ་བ་ནི་མི་རྣམས་ཀྱི་གདོང་ནས་འཕྱུར་བའི་དགའ་སྤྲོའི་འཛུམ་མདངས་དེ་རེད། འཛུམ་མདངས་འདི་ལས་རྒྱུན་འཛིན་གྱི་སྟོབས་ཤུགས་དང་འཕེལ་རྒྱས་ཀྱི་རེ་བ་མངོན་བཞིན་མཆིས།

སྟོབས་ཤུགས་དང་རེ་བ་གང་ནས་ཡོང་བ་ཡིན་ནམ། བོད་སྐྱོར་ལས་བྱེད་པའི་གཏམ་རྒྱུད་ནང་ལན་ཁ་གསལ་ཞིག་ཡོད་སྲིད།

གཏམ་རྒྱུད་ལས་ལག་རྩལ་ས་མཐོར་རྒྱུན་འཛིན་བྱེད་ལུགས་མངོན་ཡོད། ནག་ཆུ་གྲོང་ཁྱེར་མི་དམངས་སྨན་ཁང་ནི་རང་རྒྱལ་གྱི་ས་བབ་མཐོ་ཤོས་ཀྱི་ཀ་པ་རིམ་པ་གསུམ་པའི་སྨན་ཁང་ཞིག་ཡིན་ཞིང་། གཅིན་ཟགས་ཕྱི་ནད་ཚན་ཁག་གི་ཀྲུའུ་རེན་ཝང་ཡན་ལུང་གི་བོད་སྐྱོར་ལས་འགན་མཇུག་འགྲིལ་མ་ཐག་ཡིན་རུང་། བློ་མི་བདེ་བ་བྱུང་ནས་མུ་མཐུད་བོད་སྐྱོར་ཁག་ཐེངས་རྗེས་མར་ཞུགས། སྔོན་ཆད་ཡུལ་དེ་གའི་སྨན་བཅོས་ཆ་རྐྱེན་ཧ་ཅང་ཞན་པོ་ཡོད་ཅིང་། བོད་སྐྱོར་སྨན་པས་སྨན་བཅོས་ལག་རྩལ་དམར་ཁྲིད་བྱས་པས་ནག་ཆུའི་ནད་པ་ད་ཆ་གོང་རིམ་སྨན་ཁང་དུ་སྨན་བཅོས་བྱེད་པར་འགྲོ་དགོས་ཀྱི་མེད། ཆབ་མདོ་གྲོང་ཁྱེར་ལྷོ་རོང་རྫོང་དུ་དེ་སྔོན་ནད་པར་མིག་ཕྱིར་རྨས་སྐྱོན་ཕོག་སྐབས་སྨན་བཅོས་བྱེད་ཐབས་མེད་སྙམ་གྱི་ཡོད། ད་ཆ་བོད་སྐྱོར་སྨན་པས་ལག་རྩལ་བརྒྱུད་ཁྲིད་བྱས་པས་དུས་ཐོག་ཏུ་སྨན་བཅོས་བྱེད་ཐུབ་ཀྱི་ཡོད། ས་གནས་དེ་གའི་སྨན་པ་བློ་བཟང་ཚེ་སྒྲོན་གྱི་སྨན་བཅོས་ལག་རྩལ་ཡག་པོ་སྦྱོང་བ་དང་མི་སེར་ལ་ཞབས་འདེགས་ཞུ་བའི་ཆོད་སེམས་དེ་བས་བརྟན་དུ་ཕྱིན་ཡོད། “བརྒྱུད་རོགས་ཁྲིད་གསུམ”བྱས་པ་བརྒྱུད། ས་མཐོར“ནམ་ཡང་གནས་ཐུབ་པའི་ལག་རྩལ”བཞག་པས། མང་ཚོགས་ཀྱི་བདེ་ཐང་ལ་སྨན་བཅོས་ཀྱི་འགན་ལེན་བརྟན་པོ་བྱུང་ཡོད་པ་རེད།

དོན་དངོས་ཐོག་སྨན་བཅོས་ལག་རྩལ་རྒྱུན་འཛིན་བྱེད་པ་ནི་སློབ་ཁྲིད་དང་སློབ་སྦྱོང་སྟབས་བདེ་བྱེད་པ་ཙམ་མ་ཡིན་པར་འགན་འཁྲི་དང་སེམས་ཁུར་མཉམ་དུ་འདྲེས་པ་ཞིག་རེད། བོད་སྐྱོར་སྨན་པས“དེ་གའི་མི་སེར་རྣམས་ལ་ང་ཚོ་དགོས་མཁོ་ཡོད་པའི”ཚོར་བ་ཟབ་མོ་དང་ས་གནས་དེ་གའི་སྨན་པས“རང་ཚུགས་གཤགས་བཅོས་བྱེད་ཐུབ་པའི”ཡིད་ཆེས་ཡོད་དུས། བོད་ལྗོངས་སྤྱི་ཡོངས་ཀྱི་སྨན་བཅོས་ལག་རྩལ་མཐོ་རུ་གཏོང་བར་སྐུལ་འདེད་དང་རྒྱ་ཆེའི་མང་ཚོགས་ཀྱི་བདེ་ཐང་དང་བདེ་རྩ་ཟབ་ཏུ་གཏོང་བའི་དམིགས་ཚད་དེ་འགན་འཁྲི་ནན་ཏན་སྒྲུབ་པའི་ཁྲོད་རིམ་བཞིན་མངོན་འགྱུར་བྱུང་ཡོད།

གཏམ་རྒྱུད་ལས་ན་གཞོན་མི་རབས་ཀྱི་གསོན་ཉམས་དོད་པའི་ལང་ཚོའི་སྟོབས་ཤུགས་མངོན་ཡོད། ནག་ཆུའི་འོ་མ་དེང་དགེའི་རླུང་གློག་ར་བ་གནས་ཡུལ་གྱི་ཆ་སྙོམས་ས་བབ་སྨི་4650ཟིན་ཞིང་། རླུང་གློག་ར་བ་བསྐྲུན་མ་ཐག་པའི་སྐབས་སུ་འགན་འཁུར་བ་ཧུའུ་ཅན་ཧྲེང་དེ་གར་ཡོང་ནས་རླུང་སྦུད་འཕྲུལ་འཁོར་དང་པོ་དེ་ཁ་བ་བུ་ཡུག་ཁྲོད་སྒྲིག་སྦྱོར་བྱས་པ་དང་། རྣམ་གྲངས་བསྐྲུན་རྗེས་གློག་ཆད་པའི་སྣང་ཚུལ་ཧ་ལམ་ཐོན་མྱོང་མེད། ད་ཆ། ཉིས་སྟོང་ནང་སྐྱེས་ཀྱི་ཁྲེན་དབྱང་སློབ་ཆེན་ཐོན་རྗེས་རླུང་གློག་ར་བར་ཞིབ་བཤེར་བཟོ་བཅོས་དང་བདག་སྐྱོང་གི་འགན་འཁུར་གྱི་ཡོད་ཅིང་། དགུན་ཁ་འཆར་རིམ་བཞིན་ཡུལ་མི་ཚོ་དྲོ་སོབ་སོབ་ཀྱི་ཁང་པའི་ནང་འོ་ཇ་འཐུང་རྒྱུ་བྱུང་བ་ནི་ཁོང་གི“ལས་ཀའི་དོན་སྙིང”རེད། དེ་གའི་རླུང་སྦུད་འཕྲུལ་འཁོར་གྱི་འདབ་ལྷེ་སྐོར་བ་རྒྱག་ཐེངས་རེར་གློག་ཆུ་ཚོད་ཆན་ཝ་6.7གཏོང་གི་ཡོད་པ་དང་། ན་གཞོན་ཚོས་ཀྱང་ལང་ཚོར་བརྟེན་ནས་གློག་གཏོང་ལས་ལ་ཧུར་ཐག་གཞོལ་བཞིན་ཡོད།

ས་མཐོར་ནམ་ཡིན་ཡང་གཞོན་ནུ་ཕུགས་བསམ་ཅན་གྱི་ལང་ཚོའི་དཔལ་འབར་བཞིན་ཡོད། ཇོ་མོ་གླང་མའི་བཀག་སྡོམ་ཁུལ་དུ། ཐུབ་བསྟན་ཆོས་ཐར་དང་ལས་རྟོགས་ཚོས་རང་རྟོགས་ངང“གནམ་གཤིས་ཀྱི་སོ་དམག”བྱས་ཏེ། གྲངས་གཞི་གནད་ལ་འཁེལ་པོར་བརྟེན་ནས་རི་འཛེག་མཁན་དང་ཚན་རིག་རྟོག་ཞིབ་རུ་ཁག་ལ་བདེ་འཇགས་དྲ་བ་བརྟན་དུ་གཏོང་རོགས་བྱས་པ་དང་། ལྷ་ཉིང་ལྕགས་ལམ་གྱི་ལམ་ཐིག་ཏུ་ན་གཞོན་བཟོ་སྐྲུན་པས་ཞིབ་ཐོན་འཇལ་ཆས་སྤྱད་དེ་གཅུས་གཟེར་དང་གློག་ལམ་ལ་སྐྱོན་ཡོད་མེད་ལྟ་ཞིབ་བྱས་པ། རང་ཉིད་ཀྱི་ཕ་ཡུལ་དུ་དགུ་བཅུ་ནང་སྐྱེས་ཀྱི་བོད་རིགས་བུ་མོ་མཚོ་མོ་ཕ་ཡུལ་དུ་ལོག་སྟེ་ལས་གཏོད་བྱས་ནས་ཡུལ་མི་ཚོ་ཕྱུག་པོའི་ལམ་དུ་ཁྲིད་དེ“ས་ཆ་རྙིང་པར་རེ་བ་གསར་པའི་འབྲས་བཟང་སྨིན་དུ་བཅུག་པ”སོགས། ཆེད་ལས་དང་། བརྟན་སྲུང་། དགའ་ཞེན་བཅས་ལ་བརྟེན་ནས་གངས་ལྗོངས་ས་མཐོར་རྣམ་པ་གསར་པ་མངོན་པར་བྱེད་པ་ནི་ན་གཞོན་མང་པོ་ཞིག་གི་ཕུགས་འདུན་རེད། ལས་རིགས་ཁག་ཏུ་རང་ཉིད་ཀྱི་ནུས་ཤུགས་བཏོན་ཏེ་འཕེལ་རྒྱས་ཀྱི་རྨང་གཞི་བརྟན་དུ་གཏོང་མཁན་གྱི་ན་གཞོན་དེ་དག་ས་མཐོའི་འཕེལ་རྒྱས་ཡར་ཐོན་ལ་སྐུལ་འདེད་གཏོང་བའི་གསར་སྐྱེས་སྟོབས་ཤུགས་ངོ་མ་རེད།

(རྩོམ་པ་པོ་ནི་འདི་ག་ཚགས་པར་གྱི་སྨྱན་སྦྱོར་གསར་པའི་ལྟེ་གནས་ཀྱི་གསར་འགོད་པ་ཡིན)