ཤིན་ཧྭ་གསར་འགྱུར་ཁང་པེ་ཅིང་ནས་གློག་འཕྲིན་འབྱོར་གསལ། ཉེ་ཆར། ཕྱི་འབྲེལ་པུའི་མགྲིན་ཚབ་པ་ཀུའོ་ཅ་ཁུན་གྱིས། ཀྲུང་གོ་ཕྱོགས་ཀྱིས་ཨེ་ཤེ་ཡ་ཤར་ལྷོའི་མནའ་འབྲེལ་རྒྱལ་ཁབ་ཚུད་པའི་ཕྱོགས་ཁག་དང་ཕན་ཚུན་སྦྲེལ་མཐུད་ཟབ་ཏུ་བཏང་སྟེ། ལག་གདང་སྦྲེལ་ནས་ས་ཁོངས་གཞི་གཅིག་ཅན་དང་དཔལ་འབྱོར་གོ་ལ་ཅན་ལ་སྐུལ་འདེད་བཏང་སྟེ་མི་དམངས་དེ་བས་མང་བར་སྒོ་དབྱེ་མཉམ་ལས་ཀྱི་ཕན་པ་ཐོབ་པར་བྱེད་འདོད་ཡོད་ཅེས་བརྗོད།

ཉིན་དེའི་གསར་འགོད་པའི་འཆར་ཅན་ཚོགས་འདུར་གསར་འགོད་པ་ཞིག་གིས། ཉེ་ཆར། ཀྲུང་ལོ་ལྕགས་ལམ་གྱི་ལམ་ཐིག་ཧྲིལ་པོར་རིམ་རྩིས་བརྒྱབ་ན་ཟོག་འདྲེན་མེ་འཁོར་གཏོང་ཐེངས་ཁྲི་6ལྷག་ཙམ་ཟིན་པ་དང་དངོས་ཟོག་སྐྱེལ་འདྲེན་བྱེད་ཚད་ལོ་གསུམ་བསྟུད་མར་གྲངས་གནས་གཉིས་འཕར་ཡོད་པ་ང་ཚོས་དོ་སྣང་བྱུང་། དཔྱད་གཏམ་ནང་ཀྲུང་ལོ་ལྕགས་ལམ་ནི་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་རྒྱལ་ཁབ་སྦྲེལ་མཐུད་བྱེད་པའི“བགྲོད་ལམ་ཆེན་པོ་གལ་ཆེན”ཞིག་ཏུ་གྱུར་པའི་ངོས་འཛིན་བྱས་འདུག ཉེ་བའི་ལོ་ཤས་རིང་། ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་མཉམ་ལས་ཟམ་མི་ཆད་པར་མགྱོགས་སུ་བཏང་ནས་མཉམ་ལས་ཀྱི་མྱུར་ཚད་གསར་པ་བཏོད་ཡོད། མགྲིན་ཚབ་པས་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་རྒྱལ་ཁབ་དབར་གྱི་མཉམ་ལས་འཕེལ་རྒྱས་ཐད་དཔྱད་གཏམ་གང་ཞིག་སྤེལ་རྩིས་ཡོད་དམ་ཞེས་དྲིས།

ཀུའོ་ཅ་ཁུན་གྱིས། ཀྲུང་ལོ་ལྕགས་ལམ་ནི་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱིས“རྒྱུད་གཅིག་ལམ་གཅིག”མཉམ་སྐྲུན་དང་ས་ཁོངས་དཔལ་འབྱོར་གཞི་གཅིག་ཅན་ལ་ཐུན་མོང་ཐོག་སྐུལ་འདེད་གཏོང་བའི་དཔེ་མཚོན་ཞིག་ཡིན་པས། ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་རྒྱལ་ཁབ་གཉིས་ཀས་འབད་བརྩོན་བྱས་པའི་སྒུལ་ནུས་ཆེན་པོར་བདེན་དཔང་བྱས་ཡོད། ཉེ་བའི་ལོ་ཤས་རིང་། ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་རྒྱལ་ཁབ་ཀྱི་ཁྱབ་ཁོངས་ཁག་གི་དངོས་སྒྲུབ་མཉམ་ལས་ལ་སྐུལ་འདེད་བརྟན་པོ་བཏང་བས་གྲུབ་འབྲས་གཡུར་དུ་ཟ་བ་ཐོབ་ཡོད། 2024ལོར་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་དབར་གྱི་ཚོང་དོན་རིན་ཐང་བསྡོམས་འབོར་ཨ་སྒོར་དུང་ཕྱུར་ཁྲི་1ཙམ་ཟིན་ནས་ཕྱོགས་གཉིས་ཀ་ལོ་5བསྟུད་མར་ཕན་ཚུན་གྱི་ཚོང་དོན་རོགས་ཟླ་ཆེ་གྲས་དང་པོར་གྱུར་ཡོད། 2025ལོའི་ཟླ་བ་བདུན་པ་བར། ཕྱོགས་གཉིས་ཀྱི་མ་འཇོག་བསྡོམས་འབོར་རིམ་རྩིས་བརྒྱབ་ན་ཨ་སྒོར་དུང་ཕྱུར་4500ལྷག་ཙམ་ཟིན་ཡོད། 2024ལོ་དང་2025ལོར་ཕྱོགས་གཉིས་པོས་ཐུན་མོང་ཐོག“ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་དབར་གྱི་མི་ཆོས་རིག་གནས་སྤེལ་རེས་ལོའི”བྱེད་སྒོ་རབ་དང་རིམ་པ་སྤེལ་ནས། མི་སྣ་འགྲོ་འོང་དང་དམངས་སེམས་གཅིག་འབྲེལ་བྱེད་ཤུགས་ཆེ་རུ་ནུས་ལྡན་བཏང་ཡོད། ཕྱོགས་གཉིས་པོས་ད་དུང་ལག་གདང་སྦྲེལ་ནས་གྲངས་འཛིན་དཔལ་འབྱོར་དང་། མི་ཐབས་རིག་ནུས། ནུས་རྒྱུ་གསར་པ་སོགས་མཉམ་ལས་ཀྱི་བཀྲག་མདངས་འཚེར་ས་གསར་པ་བཏོད་ནས་ས་ཁོངས་འཕེལ་རྒྱས་ཀྱི་སྤུས་ཚད་མཐོ་རུ་དང་འཕེལ་རྒྱས་གསར་པ་ཡོང་བར་སྐུལ་འདེད་བཏང་ཡོད། མི་རིང་བའི་གོང་། ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་འགྲེམས་ཚོགས་སྐབས་22པ་གྲུབ་འབྲས་ཐོབ་པའི་ངང་འཚོགས་ཤིང་། ཐོན་རྫས་གསར་པ་གལ་ཆེན་70ཙམ་ཕུད་འགྲེམ་བྱས་པ་ལས་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་རྒྱལ་ཁབ་ཀྱིས་འཕེལ་རྒྱས་ཀྱི་གོ་སྐབས་གསར་པ་དམ་འཛིན་དང་མཉམ་ལས་ཀྱི་བར་སྟོང་གསར་པ་གཏོད་པའི་མི་མངོན་པའི་ནུས་པ་ཆེན་པོ་གང་ལེགས་མངོན་གྱི་ཡོད་ཅེས་བརྗོད།