འདི་ནི་རྒྱལ་ཁབ་གཉིས་པོའི་དཔེ་སྐྲུན་ཚོང་པས་དཔེ་དེབ་འགྲེམས་སྟོན་བྱེད་རིང་སྤེལ་རེས་བྱེད་བཞིན་པ།

ཉིན་ཤས་གོང“དཔེ་དེབ་འགྲེམས་སྟོན་གྱིས་མཛའ་མཐུན་འབྲེལ་བ་ཟབ་ཏུ་བཏང་། རྩོམ་རིག་སྤེལ་རེས་ཀྱིས་ཀྲུང་ཧྥེའི་སེམས་པ་གཅིག་ཏུ་འབྲེལ”ཞེས་པ་བརྗོད་དོན་གཙོ་བོར་བྱས་པའི་ལྷོ་ཨ་ཧྥེ་རི་ཁའི་ཀྲུང་གོའི་བརྗོད་དོན་གཙོ་བོའི་དཔེ་དེབ་འགྲེམས་སྟོན་ལྷོ་ཨ་ཧྥེ་རི་ཁའི་ཁྲིམས་འཛུགས་རྒྱལ་ས་ཁའེ་ཕུའུ་ཏུན་དུ་བྱས་པ་རེད། སྐབས་འདིའི་དཔེ་དེབ་འགྲེམས་སྟོན་ནི་ཀྲུང་གོ་རྒྱལ་སྤྱིའི་དཔེ་དེབ་ཚོང་དོན་ཚོགས་པ་ཀུང་སི་དང་། ལྷོ་ཨ་ཧྥེ་རི་ཁའི་རང་ཚུགས་སྨྱན་སྦྱོར་ཚོགས་པ། ལྷོ་ཨ་ཧྥེ་རི་ཁའི་དྲ་ཐོག་ཚོང་དོན་ལས་སྟེགས་Lootཀུང་སི། ལྷོ་ཨ་ཧྥེ་རི་ཁའི་ནུབ་ཁའེ་ཕུའུ་ཏུན་སློབ་ཆེན་རྒྱལ་སྤྱིའི་ཁྲུའུ་བཅས་ཀྱིས་མཉམ་འབྲེལ་ཐོག་གཉེར་བ་ཞིག་རེད།

སྐབས་འདིའི་དཔེ་དེབ་འགྲེམས་སྟོན་ཐོག་ཀྲུང་གོ་རྒྱལ་སྤྱིའི་དཔེ་དེབ་ཚོང་དོན་ཚོགས་པ་ཀུང་སིས་མཐོ་རིམ་སློབ་གསོ་དཔེ་སྐྲུན་ཁང་དང་། ཀྲུང་གོ་དངུལ་རྩ་དཔེ་སྐྲུན་ཁང་། ཀྲུང་གོ་ཁྲལ་དོན་དུས་དེབ་ཁང་། ཅང་སུའུ་ཧྥུང་ཧོང་དཔེ་སྐྲུན་སྨྱན་སྦྱོར་ཚོགས་པ་སོགས་དཔེ་སྐྲུན་ཚན་པས་མཉམ་དུ་ཀྲུང་གོའི་སྲོལ་རྒྱུན་རིག་གནས་དང་། རྒྱ་ཡིག་སློབ་ཁྲིད། ཀྲུང་ལུགས་གསོ་རིག་བདེ་ཐང་། དམངས་ཁྲོད་སྒྱུ་རྩལ། བྱིས་པའི་ཀློག་དེབ་སོགས་ཁྱབ་ཁོངས་ཀྱི་དཔེ་སྐྲུན་དངོས་པོ་འགྲེམས་སྟོན་བྱས་ཏེ། ལྷོ་ཨ་ཧྥེ་རི་ཁའི་དམངས་ཚོགས་ལ་ཕྱོགས་ཡོངས་དང་ཟུར་ཚད་མང་པོ་ནས་ཀྲུང་གོ་ངོ་སྤྲོད་བྱས་པ་རེད། དཔེ་དེབ་འགྲེམས་སྟོན་བྱེད་རིང་ཀྲུང་གོའི་དཔེ་སྐྲུན་འཐུས་མི་ཚོགས་པས་ལྷོ་ཨ་ཧྥེ་རི་ཁའི་རྒྱལ་ཁབ་དཔེ་མཛོད་ཁང་ལ་དཔེ་དེབ་ཞལ་འདེབས་བརྒྱབ་པ་རེད།