ཡུལ་སྐོར་བ་རྣམས་བློ་བདེ་པོའི་སྒོ་ནས་གངས་རིན་པོ་ཆེར་ཡུལ་སྐོར་ཐུབ་པའི་འགན་ལེན་བྱ་ཆེད། འབྲེལ་ཡོད་སྡེ་ཚན་གྱིས་མཛེས་ལྗོངས་ཁུལ་གྱི་རོགས་སྐྱོབ་ཁ་པར་ཨང་གྲངས་དང་འབྲེལ་ཡོད་དོན་ཚན་གྱི་སྤྱི་བསྒྲགས་སྤེལ་འདུག

སྤྱི་བསྒྲགས་ནང་དྲན་སྐུལ་བྱས་དོན། གལ་ཏེ་ལུས་ཟུངས་ཟད་པ་དང་ལ་དུག་ཕོག་པ་སོགས་ཀྱིས་རྐྱེན་པས་ཡུལ་སྐོར་བར་གཟུགས་པོ་མི་བདེ་བ་བྱུང་ཚེ། ཉེ་འགྲམ་གྱི་སྨན་བཅོས་རོགས་སྐྱོབ་ས་ཚིགས་སུ་བསྐྱོད་ནས་སྨན་བཅོས་བྱེད་པའམ་ཡང་ན་ངལ་གསོ་རྒྱག་ཆོག (བར་ག་གྲོང་རྡལ་གྱི་ལམ་རྒྱུད་དུ་སྨན་བཅོས་རོགས་སྐྱོབ་ས་ཚིགས་བཞི་བཀོད་སྒྲིག་བྱས་ཡོད་པ་སྟེ། རྟ་མགྲིན་མགྲོན་ཁང་གི་སྨན་བཅོས་རོགས་སྐྱོབ་ས་ཚིགས་དང་། གངས་སའི་སྨན་བཅོས་རོགས་སྐྱོབ་ས་ཚིགས〈འབྲི་ར་ཕུག་དགོན་གྱི་ཉེ་འགྲམ་དུ་ཡོད〉ཞབས་རྗེས་བྲག་ཐོག་མའི་སྨན་བཅོས་རོགས་སྐྱོབ་ས་ཚིགས། སངས་རྒྱས་སྨན་བླའི་སྨན་བཅོས་རོགས་སྐྱོབ་ས་ཚིགས་བཅས་རེད) གལ་ཏེ་ཡུལ་སྐོར་བར་ལ་དུག་ཚབས་ཆེན་ཕོག་པ་དང་། རྐང་པ་འཆུད་པ། རྨས་སྐྱོན་ཕོག་པ་སོགས་བྱུང་བའམ་ཡང་ན་གློ་བུར་དུ་གནམ་གཤིས་ངན་པ་བསྟན་པ་དང(དཔེར་ན་དྲག་ཆར་རླུང་འཚུབ་དང་འདམ་རྡོའི་ཆུ་རུད་སོགས)འཕྲད་ཚེ། སྔོན་ལ་གང་མགྱོགས་བདེ་འཇགས་ཁུལ་ལ་འགྲོ་དགོས་པ་དང་། དེ་རྗེས་བར་ག་གྲོང་རྡལ་མི་དམངས་སྲིད་གཞུང་གི་རོགས་སྐྱོབ་ཁ་པར(0897-2607026)དང་། དར་ཆེན་གྱི་མེ་གསོད་རོགས་སྐྱོབ་ས་ཚིགས་ཀྱི་རོགས་སྐྱོབ་ཁ་པར(0897-2605399 19389077119)རྒྱག་དགོས། བར་ག་གྲོང་རྡལ་མི་དམངས་སྲིད་གཞུང་གིས་མྱུར་དུ་ཡུལ་སྐོར་བ་རྣམས་ལ་རོགས་རམ་བྱ་རྒྱུ་རེད་འདུག  

མཛེས་ལྗོངས་ཁུལ་དུ་སྐྱོད་སྐབས་ཡུལ་སྐོར་བ་རྣམས་འགྲོ་རོགས་བསྒྲིགས་ནས་མཉམ་དུ་འགྲོ་དགོས་པ་ལས་ཁེར་རྐྱང་དུ་འགྲོ་མི་རུང་བ་དང་། མཛེས་ལྗོངས་ཁུལ་གྱི་སྒྲིག་སྲོལ་ལམ་ལུགས་དང་བདེ་འཇགས་དྲན་སྐུལ་ཁག་ལ་བརྩི་སྲུང་ནན་པོ་ཞུ་དགོས་པ་ལས། གཏན་འཁེལ་བྱས་པའི་ལམ་ཐིག་ནས་རང་དགར་ཁ་བྲལ་མི་ཆོག་པ་དང་། ཉེན་ཁའི་ས་ཁོངས་སུ་བསྐྱོད་མི་རུང་། མཛེས་ལྗོངས་ཁུལ་གྱི་ས་ཁོངས་ཁག་གཅིག་ལ་ཁ་པར་གྱི་བརྡ་རྟགས་ཡག་པོ་མེད་པས། གལ་ཏེ་གནས་ཚུལ་དེའི་རིགས་འཕྲད་ཚེ། ཡུལ་སྐོར་བ་ཚོས་ས་བབ་ཅུང་མཐོ་བའམ་ཡང་ན་ས་ཆ་གུ་ཡངས་པོ་ཞིག་བཙལ་ནས་ཁ་པར་རྒྱག་ཐུབ་མིན་ལྟ་དགོས། གལ་སྲིད་ཁ་པར་རྒྱག་མི་ཐུབ་ཚེ་མཛེས་ལྗོངས་ཁུལ་དུ་ཡོད་པའི་ཛ་དྲག་རོགས་སྐྱོབ་རེ་ཞུའི་མཚོན་རྟགས་དང་སྒྲིག་ཆས་ལ་སྣང་འཇོག་བྱས་ཏེ། མཛུབ་སྟོན་ལྟར་རོགས་རམ་རེ་ཞུ་བྱེད་དགོས།