བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། གཞོན་ནུ་ལོ་ཆུང་གི་བཅའ་ཁྲིམས་འདུ་ཤེས་དང་རང་ངོས་སྲུང་སྐྱོང་ནུས་པ་ཆེ་རུ་གཏོང་ཆེད། ཉིན་ཤས་གོང་། བོད་རང་སྐྱོང་ལྗོངས་གོང་དཀར་རྫོང་སྐྱིད་གཤོངས་གྲོང་རྡལ་ཁྲིམས་འཛིན་སུའོ་དང་དུས་བདེ་གཞུང་ལས་ཁང་གིས“ལང་ཚོར་ཁྲིད་སྟོན། འཚར་ལོངས་ལ་བཅའ་ཁྲིམས་ཀྱིས་སྲུང་སྐྱོབ་བྱེད”ཅེས་པ་བརྗོད་དོན་གཙོ་བོར་བྱས་ཏེ་ཁྲིམས་སྐྱོང་གི་སློབ་སྤྱི་གཞོན་པ་དང་ཁྲིམས་སྐྱོང་གི་རོགས་ཁྲིད་པ་གདན་དྲངས་ནས་སྐྱིད་གཤོངས་གྲོང་རྡལ་ལྟེ་བའི་སློབ་ཆུང་དུ་བཅའ་ཁྲིམས་ཁྱབ་གདལ་གྱི་སྒྲོག་འགྲེལ་བྱེད་སྒོ་སྤེལ་ཏེ་སློབ་མ་ཚོར་སྟོན་དུས་སློབ་འགོ་ཚུགས་པའི“ཁྲིམས་སྐྱོང་གི་སློབ་ཚན་དང་པོ”དེ་འཚོགས་པ་རེད།

བྱེད་སྒོ་སྤེལ་ཡུལ་དུ་ལས་དོན་པས་སློབ་གྲྭར་འགྲོ་མུས་ཀྱི་སློབ་མའི་ལོ་ཚད་ཀྱི་ཁྱད་ཆོས་དང་ཤེས་ཚོར་གྱི་ཆོས་ཉིད་དང་ཟུང་འབྲེལ་གྱིས་གོ་བདེ་ཤེས་སླའི་སྐད་ཆ་དང་གསོན་ཉམས་དོད་པའི་དཔེ་མཚོན་དྲངས་ཏེ《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ན་སོ་དར་ལ་མ་བབས་པའི་མི་སྣའི་སྲུང་སྐྱོང་བཅའ་ཁྲིམས》དང་། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ན་སོ་དར་ལ་མ་བབས་པའི་མི་སྣའི་ཉེས་གསོག་སྔོན་འགོག་བཅའ་ཁྲིམས》《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དམངས་དོན་ཁྲིམས་གཞུང》སོགས་གཞོན་ནུ་ལོ་ཆུང་གི་འཚོ་བ་དང་འབྲེལ་བ་དམ་ཟབ་ཡོད་པའི་ཁྲིམས་ལུགས་ཤེས་བྱ་གཙོ་གནད་ཐོག་སྒྲོག་འགྲེལ་བྱས་ཡོད།

ཁྲིམས་སྐྱོང་སློབ་སྤྱི་གཞོན་པ་གཉིས་ཀྱིས་སློབ་གྲྭའི་ལས་ཀའི་ཉམས་མྱོང་ཕུན་སུམ་ཚོགས་པོར་བརྟེན་ནས་སློབ་གྲྭའི་བརྙས་བཅོས་ལ་ཁ་གཏད་གཅོག་ཐབས་དང་གཞོན་ནུ་ལོ་ཆུང་གི་ཁྲིམས་འགལ་ཉེས་གསོག་སྔོན་འགོག་བྱ་ཐབས་ལ་གཙོ་གནད་ཐོག་དམིགས་ཏེ་ཉེ་འགྲམ་དུ་ལྷག་པའི་གྱོད་དཔེ་བརྒྱུད། སློབ་མས་སློབ་གྲྭའི་བརྙས་བཅོས་སོགས་ཁྲིམས་འགལ་བྱེད་སྤྱོད་ཀྱི་གནོད་འཚེ་ཤེས་རྟོགས་གཏིང་ཟབ་ཐུབ་པ་དང་འབྲེལ་གོ་ཆོད་པའི་ཁ་གཏད་འཇལ་ཐབས་ཁོང་དུ་ཆུད་པར་བྱས་ཡོད། སློབ་མས་སྒམ་ནན་དང་སྤྲོ་སྣང་ལྡན་པའི་རྣམ་པའི་ཁྲོད་ནས་བཅའ་ཁྲིམས་ཀྱི་དམ་ནན་རང་བཞིན་དང་གལ་ཆེའི་རང་བཞིན་ཤེས་རྟོགས་གཏིང་ཟབ་ཐུབ་ཡོད།

དེ་དང་ཆབས་ཅིག་སྒྲོག་འགྲེལ་རིང་མི་ལུས་བདེ་འཇགས་འགོག་སྲུང་དང་། འགྲིམ་འགྲུལ་སྒྲིག་སྲོལ་ལ་བརྩི་སྲུང་། དུག་རྫས་ཀྱི་གནོད་འཚེ་སྤོང་བ་སོགས་ལ་དམིགས་ནས་གསལ་འགྲེལ་ཞིབ་ཕྲ་བྱས་པ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི་གཙོ་རྐང་དེར་དམ་པོར་དམིགས་ཏེ་ཏང་ལ་དགའ་ཞེན་དང་། རྒྱལ་ཁབ་ལ་དགའ་ཞེན། སྤྱི་ཚོགས་རིང་ལུགས་ལ་དགའ་ཞེན་བཅས་ཀྱི་བརྩེ་བ་ཟབ་མོ་ཆགས་རྒྱུར་ཁྲིད་སྟོན་བྱས་པ་རེད། མཉམ་འགུལ་ལན་འདེབས་ཀྱི་ལྷུ་ཚིགས་བཀོད་སྒྲིག་བྱས་པར་སློབ་མ་ཚོས་བྱེད་སྒོ་སྤེལ་ཡུལ་གྱི་མི་སྣར་སློབ་སྦྱོང་དང་འཚོ་བའི་ཁྲོད་ཀྱི་དོགས་གཞི་དང་དཀའ་ངལ་སྐོར་ནས་དྲི་བ་ཡང་ཡང་བཏོན་ཡོད། བྱེད་སྒོ་སྤེལ་རིང་དྲིལ་བསྒྲགས་ལག་དེབ་150ལྷག་ཙམ་སྤྲད་ཡོད།