2016ལོར། བོད་དུ་ཐུམ་འབུའི་ནད་འགོས་ཁྱབ་བྱུང་ཚུལ་ལ་ལོ་རྒྱུས་ཐོག་གཞི་ཁྱོན་ཆེ་ཤོས་ཀྱི་བརྟག་དཔྱད་ཕྱོགས་ཡོངས་ནས་བྱེད་འགོ་བཙུགས་ཏེ། ཐུམ་འབུའི་ནད་ཚར་གཅོད་བྱེད་པའི་དུང་བརྡ་བཏང་།

1.66%ནས་0.16%བར། ལོ་བརྒྱད་རིང་བོད་དུ་ཐུམ་འབུའི་ནད་འགོས་ཚད་གནམ་ས་འགྱུར་བ་ལྟར་ཉུང་དུ་ཕྱིན་ཡོད། གྲུབ་འབྲས་འདིས་བོད་ཀྱི་ཡུལ་ནད་སྔོན་འགོག་དང་ཚོད་འཛིན་གྱི་ལོ་རྒྱུས་ཀྱི་ངོ་མཚར་བཏོད་པ་མ་ཟད། རྒྱལ་ཡོངས་ཀྱི་ཡུལ་ནད་སྔོན་འགོག་དང་ཚོད་འཛིན་གྱི་ཚད་ཤིང་ཡང་བཏོད་ཡོད།

ལོ་རྒྱུས་ཐོག་སྔར་བྱུང་མྱོང་མེད་པའི་གཞི་ཁྱོན་ཆེ་ཤོས་ཀྱི“ས་མཐོའི་གཟུགས་པོ་བརྟག་དཔྱད”ཅིག

རང་རྒྱལ་གྱི་འབྲོག་ཁུལ་ཆེན་པོ་ལྔའི་གྲས་ཤིག་ཡིན་པའི་བྱང་རྩྭ་ཐང་ནི་སྔོན་ཆད་ཐུམ་འབུའི་ནད་ཀྱི་ནད་རྟགས་མི་མངོན་པའི“གནོད་འཚེ་ཚབས་ཆེན་ཕོག་ཁུལ”ཞིག་རེད།

ཐུམ་འབུའི་ནད་ནི་མི་ཕྱུགས་གཉིས་ཀར་འགོ་བའི་གཞན་བརྟེན་སྲིན་འབུའི་ནད་རིགས་ཤིག་ཡིན་ཞིང་། གལ་ཏེ་མི་ལ་ལྦུ་དབྱིབས་ཀྱི་ཐུམ་འབུའི་ནད་འགོས་རྗེས་དུས་ཐོག་ཏུ་སྨན་བཅོས་མ་བྱས་ན། ལོ་10ཡི་ནང་དུ་ནད་རྐྱེན་སྲོག་ཤོར་ཚད་94%ཟིན་གྱི་ཡོད།

2012ལོར་རྒྱལ་ཡོངས་སུ་ཐུམ་འབུའི་ནད་རིམས་ནད་རིག་པའི་བརྟག་དཔྱད་བྱེད་རིང་། སྐབས་བསྟུན་བརྟག་དཔྱད་བྱས་པར་བོད་དུ་ཐུམ་འབུའི་ནད་འགོས་ཁྱབ་ཅུང་ཚབས་ཆེ་ཙམ་ཡོད་པ་ཤེས་རྟོགས་བྱུང་ཡོད། “བོད་དུ་ཐུམ་འབུའི་ནད་འགོས་ཚུལ་དང་འགོས་ཚད་གསལ་པོར་ཤེས་པར་བྱ་ཆེད། 2016ལོའི་ཟླ་8པ་ནས་ཟླ་10པའི་བར། ང་ཚོས་ནད་འགོས་ཚུལ་ཁ་གསལ་མེད་པའི་རྫོང་དང་ཆུས་70ལ་ཐུམ་འབུའི་ནད་འགོས་ཚུལ་བརྟག་དཔྱད་བྱས་པ་ཡིན”ཞེས་རང་སྐྱོང་ལྗོངས་ནད་ཡམས་སྔོན་འགོག་དང་ཚོད་འཛིན་ལྟེ་གནས་ཀྱི་ཀྲུའུ་རེན་དང་སྐབས་དེ་དུས་ཀྱི་རང་སྐྱོང་ལྗོངས་ཐུམ་འབུའི་ནད་འགོག་བཅོས་བཀོད་འདོམས་པུའུ་གཞུང་ལས་ཁང་ཕྱོགས་བསྡུས་ཚོགས་ཆུང་གི་ཙུང་ཀྲང་གཞོན་པ་ལི་ཅིང་ཀྲུང་གིས་བཤད།

དུས་དེ་ནས་བཟུང་བོད་ཞི་བས་བཅིངས་འགྲོལ་བཏང་ཚུན་གཞི་ཁྱོན་ཆེ་ཤོས་ཀྱི་ཐུམ་འབུའི་ནད་རིམས་ནད་རིག་པའི་བརྟག་དཔྱད་བྱེད་འགོ་ཚུགས།

རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱི་སྤྱི་འདོམས་མཐུན་སྦྱོར་འོག ཁ་གཏད་བོད་སྐྱོར་ཞིང་ཆེན་དང་གྲོང་ཁྱེར་17ནས་རིགས་གཅིག་མཁས་ཅན་276བོད་དུ་འདེམས་གཏོང་བྱས་ཏེ། ས་གནས་དེ་གའི་ཆེད་ལས་མི་སྣ་དང་དཔུང་པ་མཉམ་གཤིབ་ཀྱིས་རིམས་འགོག་ལས་ལ་གཞོལ།

ལི་ཅིང་ཀྲུང་གིས“ཟླ་བ་གསུམ་རིང་ལྗོངས་ཡོངས་ཀྱི་ས་ཁུལ་དང་གྲོང་ཁྱེར་ཁག་ནས་གྲོང་ཚོ་364ཡི་མི་77049ལ་གྲལ་བཤེར་བྱས་པར་ཐུམ་འབུའི་ནད་ཕོག་མཁན་1371ཞིབ་བཤེར་ཐུབ་ནས། བོད་ཀྱི་ཐུམ་འབུའི་ནད་འགོས་ཁྱབ་ཀྱི་གཞི་གྲངས་ཐོག་མར་ཕྱོགས་ཡོངས་ནས་ཁོང་དུ་ཆུད་ཅིང་། ནད་ཕོག་ཚད་1.66%གི་གྲངས་གཞི་དེ་ནས་བྱུང་བ་རེད”ཅེས་གསར་འགོད་པར་བཤད་བྱུང་།

དམངས་ཡོངས་ཀྱི་ཐུམ་འབུའི་ནད་ཀྱི་ལོ་གསུམ་འགག་སྒྲོལ་གྱི“ཚར་གཅོད་དམག་འཐབ”ལ་རྒྱལ་ཁ་ཐོབ་པ།

2017ལོའི་ཟླ་3པར《བོད་རང་སྐྱོང་ལྗོངས་ཀྱི་ཐུམ་འབུའི་ནད་ཕྱོགས་བསྡུས་འགོག་བཅོས་ལས་དོན་ཇུས་གཞི(2017ལོ་ནས་2020ལོ་བར)》དངོས་སུ་བཀྲམ་སྟེ། མི་ཚོགས་ཡོངས་ལ་ཐུམ་འབུའི་ནད་གྲལ་བཤེར་བྱེད་པ་དང་ཕྱོགས་བསྡུས་འགོག་བཅོས་བྱེད་ཐབས་ཁག་ཕྱོགས་ཡོངས་ནས་དོན་འཁྱོལ་བྱེད་དགོས་པའི་བླང་བྱ་བཏོན་པ་དང་། དེར“ཐུམ་འབུའི་ནད་ཕྱོགས་བསྡུས་འགོག་བཅོས་ཀྱི་ལོ་གསུམ་འགག་སྒྲོལ་བྱ་སྤྱོད”ཅེས་བརྗོད་ཀྱི་ཡོད།

ཕྱོགས་བསྡུས་འགོག་བཅོས་བྱེད་སྐབས་གཞི་གྲངས་གཙོ་བོར་འཛིན་ཞིང་།《བོད་ལྗོངས་ཉིན་རེའི་ཚགས་པར》ཐོག་གནས་ཚུལ་སྤེལ་བར་གཞིགས་ན། རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་དང་ཁ་གཏད་བོད་སྐྱོར་ཞིང་ཆེན་དང་གྲོང་ཁྱེར་གྱི་རྒྱབ་སྐྱོར་འོག རང་ལྗོངས་ཀྱིས་སྔ་རྗེས་སུ་ལྗོངས་ཕྱིའི་རིགས་གཅིག་མཁས་ཅན་500ཙམ་སྒྲིག་འཛུགས་བྱས་ཏེ་བོད་དུ་ཡོང་ནས་ལྗོངས་ནང་ཁུལ་གྱི་སྨན་དོན་པ་3000ལྷག་ཙམ་ལས་གྲུབ་པའི་གྲལ་བཤེར་ཚོགས་ཆུང་800ལྷག་ཙམ་དང་མཉམ་དུ་ལྗོངས་ཡོངས་ཀྱི་ཤང་དང་གྲོང་རྡལ་ཁག་དང་། གྲོང་ཚོ་དང་གྲོང་ལྷན་ཁག་ཏུ་གྲལ་བཤེར་ལས་དོན་སྤེལ་བ་རེད།

2017ལོའི་ཟླ་བ་བཞི་པར། ནག་ཆུ་གྲོང་ཁྱེར་མི་དམངས་སྨན་ཁང་གི་སྨན་པ་རྡོ་རྗེ་བསམ་འཕེལ་ཨ་མདོ་རྫོང་རྩ་རིང་གྲོང་རྡལ་དུ་ཐུམ་འབུའི་ནད་གྲལ་བཤེར་གྱི་འགོ་ཚུགས་མཛད་སྒོ་དང་གསོ་སྦྱོང་ནང་ཞུགས་པ་དང་། ནག་ཆུའི་གྲལ་བཤེར་ལས་དོན་དུས་དེ་ནས་སྤེལ་འགོ་ཚུགས་པ་རེད། དེ་ནས་བོད་སྐྱོར་རིགས་གཅིག་མཁས་ཅན་དང་ས་གནས་འདི་གའི་སྨན་པ་ཚང་མ་གྲལ་བཤེར་ལས་དོན་ནང་ཞུགས་ཡོད་ཅེས་ཁོང་གིས་གནས་ཚུལ་དེ་ཚོ་ད་ལྟའང་གསལ་པོར་ཤོད་རྒྱུ་ཡོད།

2017ལོའི་ཟླ་11པའི་ཟླ་མཇུག་བར། བོད་སྐྱོར་རིགས་གཅིག་མཁས་ཅན་དང་ལྗོངས་ནང་ཁུལ་གྱི་སྨན་བཅོས་ལག་རྩལ་པས་ལྗོངས་ཡོངས་ཀྱི་ལོ་2ཡན་གྱི་མི་ཁྲི་290ལྷག་ཙམ་ལ་Bབརྙན་པར་དང་ཁྲག་བརྟག་དཔྱད་བྱས་པར་ནད་དཔེ་26846ཞིབ་བཤེར་ཐུབ་ནས“རྫོང་དུ་ཤང་གཅིག་ཀྱང་མི་ལུས་པ་དང་། ཤང་དུ་གྲོང་ཚོ་གཅིག་ཀྱང་མི་ལུས་པ། གྲོང་ཚོར་དུད་ཚང་གཅིག་ཀྱང་མི་ལུས་པ། དུད་ཚང་དུ་མི་གཅིག་ཀྱང་མི་ལུས་པ”བཅས་ཀྱི་ལས་ཀའི་དམིགས་ཚད་མངོན་འགྱུར་བྱུང་སྟེ། རང་ལྗོངས་ཀྱི་ཐུམ་འབུའི་ནད“འགོས་ཁྱབ་གྲངས་གཞིའི་ས་བཀྲ”ཕྱོགས་ཡོངས་དང་ཡང་དག་པའི་སྒོ་ནས་ཐོག་མར་བཀོད་ཐུབ་ཡོད།

སྔོན་འགོག་དང་ཚོད་འཛིན་བྱེད་པའི་འགག་རྩ་ནི་སྔ་ཙམ་ཤེས་རྟོགས་དང་། སྔ་ཙམ་གོང་ཞུ། སྔ་ཙམ་སྨན་བཅོས་བཅས་བྱེད་པར་ཐུག་ཡོད། “སྲིད་གཞུང་གིས་སྨན་ཁང་13ཐུམ་འབུའི་ནད་ཀྱི་ཕྱི་ནད་ཚན་ཁག་གི་གཤགས་བཅོས་དང་སྨན་བཅོས་བྱེད་པའི་དམིགས་འཛུགས་སྨན་ཁང་དུ་གཏན་འཁེལ་བྱས་ཏེ། མ་དངུལ་སྤྱི་འདོམས་ཀྱིས་གཤགས་བཅོས་ཀྱི་ཆ་རྐྱེན་འཛོམས་པའི་ཐུམ་འབུའི་ནད་ཕོག་པའི་ནད་པར་རིན་པ་མི་དགོས་པར་གཤགས་བཅོས་བྱེད་པའི་ཐོགས་མེད་བགྲོད་ལམ་ཤར་གཏོང་བྱས་པ་དང་། སྨན་རྫས་གསོ་བཅོས་ཀྱི་ཚད་གཞི་དང་མཐུན་པའི་ནད་པར་དུས་ཐོག་ཏུ་ཡིག་ཚགས་དང་གཱ་བཟོས་པ་དང་རིན་མེད་ངང་སྨན་རྫས་སྤྲད་པ་རེད”ཅེས་ལི་ཅིང་ཀྲུང་གིས་བརྗོད།

བསྡོམས་རྩིས་བརྒྱབ་པ་ལྟར་ན། 2019ལོའི་ལོ་མཇུག་བར། ལྗོངས་ཡོངས་སུ་ཐུམ་འབུའི་ནད་ཕོག་པའི་ནད་པ་5000ལྷག་ཙམ་ལ་གཤགས་བཅོས་བྱས་པ་དང་། ནད་པ་15400ལྷག་ཙམ་སྨན་བཟས་ནས་དྲག་སྐྱེད་ཡོང་ཐབས་བྱས་ཤིང་། མི་ཐེངས་28490ལ་ནད་གཞིའི་སྐོར་འདྲི་རྩད་བྱས་པར། ཐོ་འགོད་དོ་དམ་བྱེད་ཚད་100%ཟིན་ཡོད།

ས་མཐོའི་མ་དཔེ་ནས་རྒྱལ་ཡོངས་ཀྱི་ཚད་ཤིང་བར་གྱི་ངོ་མཚར་བཏོད་པ།

2016ལོར“འགོས་ཁྱབ་ཚབས་ཆེན་བྱུང་བ”ནས་ད་ཆའི“ཚོད་འཛིན་ནུས་ལྡན་ཐུབ་པའི”བར། བོད་ཀྱིས་ལོ་བཅུ་ལ་ཉེ་བའི་དུས་ཚོད་ནང་མིའི་རིགས་ཀྱིས་ས་བབ་མཐོ་བའི་ས་ཁུལ་དུ་གཞན་བརྟེན་སྲིན་འབུའི་ནད་རིགས་ཚབས་ཆེན་ཚོད་འཛིན་བྱེད་པའི་ངོ་མཚར་བཏོད་པ་མ་ཟད། རྒྱལ་ཡོངས་ཀྱི་ས་གནས་ཀྱི་ནད་རིགས་འགོག་བཅོས་ལ་དཔྱད་གཞིར་འཛིན་ཐུབ་པ་དང་། འདྲ་བཟོ་ཐུབ་པ། ཁྱབ་གདལ་ཐུབ་པ་བཅས་ཀྱི“བོད་ཀྱི་ཇུས་གཞི”ཡང་ལེགས་སྐྱེས་ཕུལ་ཡོད།

གོང་ནས་འོག་བར་གྱི་ལས་ཀའི་ལམ་སྲོལ། ལི་ཅིང་ཀྲུང་གིས་རང་སྐྱོང་ལྗོངས་ཀྱིས་ཐུམ་འབུའི་ནད་འགོག་བཅོས་བྱེད་པ་དེ་དབུལ་སྒྲོལ་འགག་སྒྲོལ་དང་བདེ་ཐང་བོད་ལྗོངས་འཛུགས་སྐྲུན་ནང་བཅུག་སྟེ། ཐུམ་འབུའི་ནད་ཕྱོགས་བསྡུས་འགོག་བཅོས་ལས་དོན་བཀོད་འདོམས་པུའུ་བཙུགས་ཤིང་། འཕྲོད་བསྟེན་བདེ་ཐང་དང་། ཞིང་ལས་གྲོང་གསེབ། སྤྱི་བདེ་སོགས་སྡེ་ཚན་17ལ་མཐུན་སྦྱོར་བྱས་ཏེ་འགན་འཁྲི་དང་ལས་འགན་ཁ་གསལ་དུ་བཏང་བ་དང་། གཞི་རིམ་ལས་བྱེད་པ་དང་། སྨན་དོན་པ། འབྲོག་པ་མང་ཚོགས་བཅས་སྒྲིག་འཛུགས་བྱས་ནས་དེའི་ནང་རྒྱ་ཁྱབ་ཞུགས་ཏེ་ལས་ཀའི་ལམ་སྲོལ་རབ་དང་རིམ་པ་གཅིག་རྗེས་གཉིས་མཐུད་ངང་བཙུགས་པ་དེས། ཐུམ་འབུའི་ནད་ཕྱོགས་བསྡུས་འགོག་བཅོས་ལས་དོན་བདེ་བླག་ངང་ལག་བསྟར་དང་སྐུལ་འདེད་གཏོང་བར་རྩ་འཛུགས་ཀྱི་འགན་སྲུང་བརྟན་པོ་ཐུབ་ཡོད།

མི་ཚོགས་ཡོངས་ལ་ཁྱབ་པའི་གྲལ་བཤེར་བྱས་ཤིང་། ལི་ཅིང་ཀྲུང་གིས“མི་ཚོགས་ཡོངས་ལ་ཐུམ་འབུའི་ནད་འགོས་མིན་གྲལ་བཤེར་བྱེད་པ་ནི་བོད་དང་ཐ་ན་རྒྱལ་ཡོངས་སུ་སྔར་བྱུང་མྱོང་མེད་པ་ཞིག་ཡིན་ཞིང་། ལོ་གསུམ་རིང་གི་གྲལ་བཤེར་ལས་འགན་ལོ་གཅིག་ནང་ལེགས་གྲུབ་བྱུང་བས། བོད་ཀྱི་ཡུལ་ནད་དང་འགོས་ནད་སྔོན་འགོག་དང་ཚོད་འཛིན་གྱི་ལོ་རྒྱུས་ཐོག་གི་ངོ་མཚར་བཏོད་ཡོད”ཅེས་བཤད།

2019ལོར་རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱི་ཐུམ་འབུའི་ནད་འགོག་བཅོས་ཞིབ་འཇུག་གཙོ་གནད་ཚོད་ལྟ་ཁང་བོད་རང་སྐྱོང་ལྗོངས་རིམས་འགོག་ལྟེ་གནས་སུ་བཙུགས་པ་དང་། 2024ལོར་ཞིང་ཆེན་དང་པུའུ་ཡིས་མཉམ་དུ་ཨེ་ཤེ་ཡ་དབུས་མའི་ཁྱབ་ཆེའི་ནད་ཀྱི་འབྱུང་རྐྱེན་དང་འགོག་བཅོས་ཀྱི་རྒྱལ་ཁབ་གཙོ་གནད་ཚོད་ལྟ་ཁང་བོད་ལྗོངས་ལས་དོན་ས་ཚིགས་ཀྱི་སྒོ་བྱང་བཀལ་བ་རེད། ཚན་ཞིབ་ལས་སྟེགས་གཉིས་བསྐྲུན་པ་དེས་ཐུམ་འབུའི་ནད་ཕྱོགས་བསྡུས་འགོག་བཅོས་ལས་དོན་ལ་ལྟེ་བའི་སྒུལ་ཤུགས་བསྣན་ཡོད།

ལོ་ངོ་60ཡི་རིང་། བོད་ཀྱིས་ཐོག་མཐའ་བར་གསུམ་དུ་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་བྱས་ཏེ། “ན་དུས་སྨན་བཅོས་ཐུབ་པའི”ཐད་རྒྱུན་མཐུད་ནུས་ཤུགས་བཏོན་ཞིང་། འཕྲོད་བསྟེན་བདེ་ཐང་ཞབས་ཞུའི་མ་ལག་སྔར་བས་འཐུས་སྒོ་ཚང་དུ་དང་སྤྱི་པའི་འཕྲོད་བསྟེན་བདེ་འཇཌ་ཀྱི་སྲུང་བཅད་སྔར་བས་བརྟན་དུ་བཏང་བས། མི་དམངས་ཀྱི་བདེ་ཐང་འཚོ་བའི་ཆུ་ཚད་མངོན་གསལ་དོད་པོས་མཐོ་རུ་ཕྱིན་ཡོད།

2024ལོའི་ལོ་མཇུག་བར། ལྗོངས་ཡོངས་ཀྱི་སྨན་བཅོས་འཕྲོད་བསྟེན་ལས་ཁུངས་7231བར་དང་། འཕྲོད་བསྟེན་ལག་རྩལ་པ་32056བར། ནད་་ཁྲི་21448བར་བཅས་མང་དུ་ཕྱིན་ནས། “ནད་ཆེན”400ལྷག་ཙམ་རང་སྐྱོང་ལྗོངས་ནས་བཅོས་ཐུབ་པ་དང་། “ནད་འབྲིང”2000ལྷག་ཙམ་གྲོང་ཁྱེར་ནས་བཅོས་ཐུབ་པ། “ནད་ཆུང”མང་ཆེ་བ་རྫོང་ནས་སྨན་བཅོས་ནུས་ལྡན་ཐུབ་སྟེ། མང་ཚོགས་རང་ས་རང་ཡུལ་ནས་ནད་བརྟག་དཔྱད་གསལ་པོ་ཐུབ་པ་དང་སྨན་བཅོས་ཡག་པོ་ཐུབ་ཡོད།

ཉི་ཤར།

སྒོར་དྲུག་གིས་ཐུམ་འབུའི་ནད་བཅོས་ཐུབ་སོང་།

“སྒོར་6སྤྲད་ནས་ཨང་ཀི་བཀག་པ་ཡིན”ཞེས་2025ལོའི་ཟླ་7པར་ནག་ཆུ་གྲོང་ཁྱེར་གསེར་རྙེད་ཆུས་ཤང་མོང་ཤང་སྒང་དེའུ་གཞུང་གྲོང་ཚོའི་ཡུལ་མི་ཉི་ཤར་གྱིས་བརྗོད་ཅིང་། ལོ་6གི་གོང་། ཉི་ཤར་གྱིས་བུལ་ཐུག་ཕོར་པ་གང་གི་དངུལ་ལས་མ་སྤྲད་པར་ཐུམ་འབུའི་ནད་བཅོས་ཐུབ་པ་དང་། ཁོང་གིས་ད་ལྟའང་གཤགས་བཅོས་བྱས་པའི་རིན་པ་ཡང་སྙིང་ག་ཚོད་ཡིན་མིན་གསལ་པོ་ཤེས་ཀྱི་མེད།

2017ལོར་དམངས་ཡོངས་ལ་ཐུམ་འབུའི་ནད་འགོས་མིན་གྲལ་བཤེར་བྱེད་སྐབས་ཉི་ཤར་གྱིས་རང་ཉིད་ལ་ཐུམ་འབུའི་ནད་ཕོག་པ་ཤེས།

“བརྟག་དཔྱད་བྱས་ནས་ཉིན་འགའ་སོང་རྗེས་གྲོང་ཚོའི་སྨན་པས་ང་ལ་ཐུམ་འབུའི་ནད་འགོས་འདུག ལམ་སེང་གཤགས་བཅོས་བྱེད་དགོས། གལ་སྲིད་དུས་ཐོག་ཏུ་སྨན་བཅོས་མ་བྱས་ན་མཇུག་ཏུ་ནད་གཞི་དེ་བས་ཚབས་ཆེ་རུ་འགྲོ་སྲིད་ཅེས་བརྗོད་བྱུང་། དེ་ནི་གཞན་བརྟེན་སྲིན་འབུའི་ནད་ཚབས་ཆེན་ཞིག་ཡིན་པ་ཤེས་བྱུང་བས་ཞེད་སྣང་ཆེན་པོ་སྐྱེས་བྱུང”ཞེས་ཉི་ཤར་གྱིས་གསར་འགོད་པར་བརྗོད།

ནད་གཞི་གཏན་འཁེལ་བྱུང་རྗེས་གཤགས་བཅོས་ལ་སྐྲག་པའི་ཉི་ཤར་གྱིས་སྨན་རྫས་ལ་བརྟེན་ནས་སྨན་བཅོས་བྱེད་རྒྱུའི་གདམ་ག་བྱས་ཤིང་། ཁོང་གིས་ལོ་གཅིག་ལྷག་ཙམ་རིང་སྨན་བཟས་ཀྱང་བསྐྱར་བཤེར་བྱེད་སྐབས་ཐུམ་འབུའི་ནད་དྲག་སྐྱེད་བྱུང་མེད་པ་མ་ཟད། ནད་འབུ་ད་དུང་ཆེ་རུ་ཕྱིན་ཡོད་པ་ཤེས། སྨན་པས་སླར་ཡང་ཁོང་ལ་གཤགས་བཅོས་བྱེད་དགོས་པའི་གྲོས་འགོ་བཏོན།

ཉི་ཤར་གྱིས། སྐབས་དེ་དུས་སྨན་དོན་མི་སྣ་གྲོང་གསེབ་ཏུ་ཡོང་ནས་སྒྲོག་འགྲེལ་ཐེངས་མང་བྱས་པས་ངས་ཐུམ་འབུའི་ནད་འགོག་བཅོས་སྐོར་གྱི་ཤེས་བྱ་མང་པོ་ཤེས་བྱུང་ལ་། གཤགས་བཅོས་ཀྱི་ཕན་འབྲས་དང་དེ་བཞིན་སྨན་རིན་མི་དགོས་པའི་སྨན་བཅོས་སྲིད་ཇུས་ཀྱང་གསལ་པོར་ཤེས་བྱུང་བས། གཤགས་བཅོས་བྱེད་པར་རིམ་བཞིན་གདེང་ཚོད་སླེབས་བྱུང་ཞེས་བརྗོད།

2019ལོའི་ཟླ་4པར། ཉི་ཤར་གྱིས་ནག་ཆུ་གྲོང་ཁྱེར་མི་དམངས་སྨན་ཁང་དུ་གཤགས་བཅོས་བྱས་ཤིང་། སྨན་བཅོས་ཀྱི་བརྒྱུད་རིམ་ཧྲིལ་པོར་ཉི་ཤར་གྱིས་ཨང་ཀི་བཀག་པའི་རིན་པ་སྒོར་6ལས་སྤྲོད་དགོས་མ་བྱུང་བར་དེ་བྱིངས་ཀྱི་སྨན་རིན་ཚང་མ་སྲིད་གཞུང་གིས་སྤྲད་པ་རེད།

“སྨན་རིན་མི་དགོས་པའི་སྨན་བཅོས་སྲིད་ཇུས་ལས་ང་རང་ཡང་བསྐྱར་བདེ་ཐང་གི་འཚོ་བ་སྐྱེལ་རྒྱུ་བྱུང་བས་དངོས་གནས་སྲིད་གཞུང་ལ་ཐུགས་རྗེ་ཆེ་ཞུ་གི་ཡིན། གལ་ཏེ་སྲིད་ཇུས་འདི་མེད་ན་ང་རང་ད་དུང་ནད་ཀྱིས་མནར་སྲིད། ངའི་ནད་གཞིས་རྐྱེན་པས་ཁྱིམ་ཚང་ལ་དཀའ་ངལ་ཆེན་པོ་ཡང་བཟོ་སྲིད”ཅེས་ཉི་ཤར་གྱིས་མྱོང་བ་ཟབ་མོ་བྱུང་བའི་སྒོ་ནས་བརྗོད།

ཝང་ཙེ་ཅང་།

རོགས་སྐྱོར་ནི་མཉམ་དུ་གནད་དོན་ཐག་གཅོད་བྱ་ཐབས་འཚོལ་བ་ཞིག་རེད།

“བོད་དུ་ལོ་རྒྱུས་ཐོག་གཞི་ཁྱོན་ཆེ་ཤོས་ཀྱི་ཐུམ་འབུའི་ནད་རིམས་དཔྱད་བྱེད་དགོས་པས་སྨན་པ་དཀོན་པོ་འདུག” ལེའོ་ཉིང་ཞིང་ཆེན་རིམས་ནད་སྔོན་འགོག་དང་ཚོད་འཛིན་ལྟེ་གནས་འདུས་འདྲིལ་གཅོང་ནད་སྔོན་འགོག་དང་ཚོད་འཛིན་སུའོ་ཡི་སུའོ་ཀྲང་ཝང་ཙེ་ཅང་གིས་དེ་སྔའི་གནས་ཚུལ་ཕྱིར་དྲན་བྱེད་བཞིན“ངས་ཐེ་ཚོམ་སྤུ་ཙམ་ཡང་མེད་པར་མིང་ཐོ་བཀོད་པ་ཡིན”ཞེས་བརྗོད།

2016ལོའི་ཟླ་8པར། ཝང་ཙེ་ཅང་གིས་ལེའོ་ཉིང་ཞིང་ཆེན་བོད་སྐྱོར་ལས་དོན་རུ་ཁག་གི་རིགས་གཅིག་མཁས་ཅན་18ཀྱི་སྣེ་ཁྲིད་དེ་བོད་དུ་ཡོང་ཞིང་། ལེའོ་ཉིང་ནས་མ་ཐོན་གོང་ཁོང་ཚོས་གྲ་སྒྲིག་ཨང་བསར་བྱས་ཀྱང་ནག་ཆུར་དངོས་སུ་འབྱོར་སྐབས་ས་བབ་མཐོ་ཁུལ་གྱི་རང་བྱུང་ཁོར་ཡུག་ཞན་པས་སྒྲིག་ཆས་ཀྱི་བྱེད་ནུས་ཡག་པོ་འདོན་མི་ཐུབ་པ་དང་། རྫོང་དུ་ཆེད་ལས་སྨན་པ་ཧ་ཅང་དཀོན་པ། ནད་པ་མང་ཆེ་བས་ཐུམ་འབུའི་ནད་ལ་རྒྱུས་མངའ་མེད་པ་སོགས་ཀྱི་གནས་ཚུལ་གཞི་ནས་ཤེས་རྟོགས་བྱུང་བ་རེད།

ཝང་ཙེ་ཅང་དང་རུ་མི་ཚོས་ཉིན་ལྟར་ཆུ་ཚོད་ཁ་ཤས་རླངས་འཁོར་ལ་བསྡད་ནས་འབྲོག་ཁུལ་དུ་བསྐྱོད་ཅིང་། ཟླ་བ་གཅིག་ཙམ་འབད་བརྩོན་བྱས་པ་བརྒྱུད། ལེའོ་ཉིང་ཞིང་ཆེན་བོད་སྐྱོར་ལས་དོན་རུ་ཁག་གི་རུ་མི་18ཀྱིས་རིམས་དཔྱད་ལས་འགན་ཚད་བརྒལ་ངང་ལེགས་སྒྲུབ་བྱས་པ་རེད། “བརྟག་དཔྱད་བྱས་པ་བརྒྱུད་ཤེས་རྟོགས་བྱུང་བའི་ནད་པ་130ལྷག་ཙམ་ཚང་མར་ཚད་ལྡན་སྨན་བཅོས་ཐུབ་པ་དང་། ནད་གཞི་ལྕི་བའི་ནད་པ་ཁ་ཤས་དུས་ཐོག་ཏུ་སྨན་ཁང་ཆེ་སར་བསྒྱུར་པས། ཁྱིམ་ཚང་དེ་བས་མང་བ་ནད་གཞིས་རྐྱེན་པས་དབུལ་ལོག་མི་ཐེབས་པ་དང་དབུལ་ཕོངས་སུ་མི་འགྱུར་བ་བྱུང་ཡོད”ཅེས་ཝང་ཙེ་ཅང་གིས་བོད་སྐྱོར་ལས་དོན་གྱི་དོན་སྙིང་ལ་མྱོར་ཚོར་ཟབ་མོ་བྱུང་བཞིན་བརྗོད།

ས་གནས་དེ་གའི་སྨན་དོན་མི་སྣ་དང་མཉམ་དུ་འབད་འཐབ་བྱེད་རིང་། ཁོང་ཚོའི་དབར་འཐབ་གྲོགས་ལྟ་བུའི་བརྩེ་བ་ཟབ་མོ་ཆགས་ཤིང་། ཝང་ཙེ་ཅང་གིས། མི་སྐོང་ཁག་པོ་འདུག ས་གནས་དེ་གའི་སྨན་དོན་མི་སྣས་རྟ་རྒྱུག་དུས་ཆེན་སོགས་ཀྱི་བྱེད་སྒོ་བརྒྱུད་འབྲོག་པ་མང་ཚོགས་བརྟག་དཔྱད་བྱེད་པར་ཡོང་རྒྱུའི་སྐུལ་སློང་བྱས་པས་ལས་ཕྱོད་ཧ་ཅང་ཆེ་རུ་ཕྱིན་སོང་། བོད་སྐྱོར་རིགས་གཅིག་མཁས་ཅན་གྱིས་ཀྱང་ས་གནས་དེ་གར་གློག་རྡུལ་གྲངས་གཞིའི་མཛོད་དང་གྲལ་བཤེར་ཡིག་ཚགས་བཟོ་རོགས་བྱས་ཏེ། ཁོང་ཚོར་གྲངས་གཞིར་བརྟེན་ནས་ནད་ཕོག་ཚད་ཀྱི་འགྱུར་ལྡོག་ལ་ལྟ་སྟངས་བསླབས་ཡོད་ཅེས་བརྗོད།

“རོགས་སྐྱོར་ནི‘ཕྱོགས་གཅིག་རང་གི་རོགས་སྐྱོར’ཞིག་མིན་པར་ལས་ཀ་བྱེད་རིང་མཉམ་དུ་གནད་དོན་ཐག་གཅོད་བྱ་ཐབས་འཚོལ་བ་ཞིག་རེད”ཅེས་ཝང་ཙེ་ཅང་གིས་མྱོང་ཚོར་ཟབ་མོས་བརྗོད།