2013ལོའི་ཟླ་10ཚེས་31ཉིན་ཏེ། མེ་ཏོག་ཏུ་གཞུང་ལམ་ཤར་གཏོང་ཐུབ་པའི་ཉིན་དེར། རྫོང་ཡོངས་མི་དམངས་ཀྱི་དགའ་བའི་འབོད་སྒྲ་རི་ཀླུང་གང་སར་གྲགས། རང་བྱུང་འོབས་ཆེན་བརྒལ་བ་དང་ས་བབ་ཧེ་བག་སྨི་4000ཙམ་ཡོད་པའི་གཞུང་ལམ་བསྐྲུན་པས“རྒྱལ་ཡོངས་སུ་གཞུང་ལམ་ཤར་གཏོང་ཐུབ་མེད་པའི་རྫོང་གཅིག་པུ”ཞེས་པའི་མིང་དེ་དུས་དེ་ནས་བཟུང་ལོ་རྒྱུས་ཀྱི་ཡིག་ཚགས་ནང་དུ་བཀོད་ཡོད།

དུས་རབས་ཕྱེད་ཀ་ཙམ་རིང་མཁའ་ལམ་བསྐྲུན།

མེ་ཏོག་གཞུང་ལམ་གྱི་ལོ་རྒྱུས་སྙན་ངག

ཧི་མ་ལ་ཡའི་ལྷོ་འདབས་སུ་གནས་པའི་མེ་ཏོག་རྫོང་ཏེ་སྦས་ལུང་པད་མ་བཀོད་དུ་འབོད་པ་དེ་དེ་སྔ་ས་ཁམས་ཆགས་ཚུལ་དང་འགྲིམ་འགྲུལ་ཤར་གཏོང་ཐུབ་མེད་པའི་དབང་གིས་ཕྱི་ཕྱོགས་དང་འབྲེལ་བ་བྱེད་ཐབས་བྲལ། དུས་རབས་20པའི་ལོ་རབས་60པའི་དུས་འགོར། ལམ་བཟོ་བ་མི་རབས་དང་མི་རབས་མང་པོས་དཀའ་སྤྱད་འཚོལ་ཞིབ་བྱས་ཏེ་ས་གཤིས་ཀྱི་གནོད་འཚེ་ཡང་ཡང་ཐོན་ཡུལ“ས་མཐོའི་ཁེར་ཆགས་གླིང་ཕྲན”དེར་གཞུང་ལམ་བསྐྲུན་ཐབས་བྱས་ནས་མིའི་རིགས་ཀྱི་གཞུང་ལམ་འཛུགས་སྐྲུན་གྱི་ལོ་རྒྱུས་ཐོག་ངོ་མཚར་ཆེ་བའི་ལེའུ་བརྩམས་ཡོད།

ལོ་རྒྱུས་ཐོག་འཁོད་པར་གཞིགས་ན། 1961ལོར་བོད་དམག་ཁུལ་ཁང་གཞུང་ལམ་པུའུ་ཡིས་སྨན་གླིང་རྫོང་ཕད་ཆུས(ད་ཆའི་སྨན་གླིང་གྲོང་ཁྱེར་ཕད་གྲོང་རྡལ)ནས་རྡོ་གཞོང་ལ་དང་ཀོང་ལ། ད་དུང་མེ་ཏོག་བར་གྱི་ལམ་ཐིག་ལ་རྩད་ཞིབ་བྱས་པ་དང་། ཡིད་འོང་འབྲས་ཀྱི་རི་རྩེའི་རྒྱུད་དུ་སླེབས་སྐབས་རི་ལམ་མེད་པས་ཕྱིར་ལོག་བྱེད་དགོས་བྱུང་ཡོད།

1965ལོར་མེ་ཏོག་གཞུང་ལམ་ཉམས་བཟོ་བཀོད་འདོམས་པུའུ་ལྷ་སར་བཙུགས་ཤིང་། ལས་མི་700ལྷག་ཙམ་གྱིས་འཇོར་དང་སྦྱར་མ་སོགས་སྟབས་བདེའི་ལག་ཆ་ཁྱེར་ནས་གངས་འཁྱགས་ཀྱི་གྲོག་རོང་ཕྱོགས་སུ་བསྐྱོད། ཁོང་ཚོས་སྐབས་རེ་རི་ཉིལ་བའི་གཡང་གཟར་རྒྱུད་དུ་རྡོ་བརྐོས་ནས་ལམ་བཟོས། འོན་ཀྱང་འདམ་རྡོའི་ཆུ་རུད་ཀྱི་གནོད་འཚེ་ཡང་ཡང་ཐོན་པར་བརྟེན་ལམ་དུམ་སྤྱི་ལེ་བཞི་ཙམ་ལས་བཟོ་མ་ཐུབ་པར་ལས་མཚམས་བཞག་དགོས་བྱུང་བ་རེད།

1973ལོར་འགྲིམ་འགྲུལ་པུའུ་ཡིས་བོད་ལྗོངས་འགྲིམ་འགྲུལ་ཅུས་ཀྱིས་སྙན་སེང་ཞུས་པའི་མེ་ཏོག་གཞུང་ལམ་འཆར་འགོད་སྙན་ཞུར་ཆོག་མཆན་སྤྲད་པ་དང་། ཁྲབ་རྨོག(ད་ཆའི་སྤོ་བོ་རྫོང་ཁྲབ་རྨོག་གྲོང་རྡལ)ནས་འགོ་བཙུགས་ཏེ་ས་བབ་སྨི་4352ཡོད་པའི་དགའ་ལུང་ལ་བར་གཏན་འཁེལ་བྱས། 1975ལོའི་ཟླ་བདུན་པར་དངོས་སུ་ལས་འགོ་ཚུགས་པ་ནས་1980ལོའི་ཟླ་ལྔ་པར་106Kདུམ་མཚམས་བར་ཤར་གཏོང་ཐུབ་ཡོད། འོན་ཀྱང་འདམ་རྡོའི་ཆུ་རུད་ཀྱི་གནོད་འཚེ་ཚབས་ཆེན་བྱུང་བའི་དབང་གིས་ལས་གྲྭ་ལས་མཚམས་མ་འཇོག་ཀ་མེད་བྱུང་།

1990ལོར་བསྐྱར་དུ་ལས་འགོ་ཚུགས་ཏེ་80Kདུམ་མཚམས་ནས་མེ་ཏོག་རྫོང་བར་གྱི་ལམ་བཟོས་ཤིང་། 1993ལོར་མེ་ཏོག་ཏུ་བསྐྱོད་སའི་ས་རྡོའི་གཞུང་ལམ་བཟོ་ཐུབ་ཙམ་བྱུང་། འོན་ཀྱང་དྲག་ཆར་བསྟུད་མར་བབས་རྐྱེན་རི་ཉིལ་ནས་ལམ་རྦད་དེ་འགག

ཕྱིས་ཀྱི་ལོ་ཁ་ཤས་ནང་། རང་བྱུང་གནོད་འཚེའི་རྐྱེན་གྱིས་མེ་ཏོག་གཞུང་ལམ་བསྐྲུན་མ་ཐུབ་པར་ལུས། 2005ལོར་མེ་ཏོག་གཞུང་ལམ་རྒྱལ་ཁབ་ཀྱི“ལོ་ལྔ་ཚན་བཅུ་གཅིག་པའི”འཆར་འགོད་ནང་བཀོད་རྗེས་རིང་ཚད་སྨི་3310ཡོད་པའི་དགའ་ལུང་ལའི་ཕུག་ལམ་འཆར་འགོད་རིམ་གྱིས་གྲུབ་ཅིང་། 2009ལོའི་ཟླ་བ་བཞི་པར་ཕུག་ལམ་འདྲུ་བའི་འཕྲུལ་འཁོར་གྱི་སྒྲ་འུར་འུར་དུ་གྲགས་པ་དང་གཙང་པོ་སྒྲོལ་བའི་ཟམ་པ་29རིམ་གྱིས་བསྐྲུན་རྗེས་2013ལོའི་ཟླ་10ཚེས་31ཉིན་མེ་ཏོག་གཞུང་ལམ་གཞི་ནས་ཤར་གཏོང་ཐུབ་ཡོད།

ཁྲག་དྲོན་ལ་བརྟེན་ནས་གཞུང་ལམ་བསྐྲུན།

ལམ་བཟོ་བའི་དཀའ་ཚེགས་ཀྱི་བཞུད་ལམ།

མེ་ཏོག་གཞུང་ལམ་ལ་འཛམ་གླིང་ཐོག་སྐྲུན་དཀའ་ཤོས་ཀྱི་གཞུང་ལམ་ཞེས་འབོད་ཅིང་། སྐབས་དེ་དུས་མེ་ཏོག་གཞུང་ལམ་གྱི་ཇུས་འགོད་འཐུས་མི་ཚོགས་ཆུང་གི་ཙུའུ་ཀྲང་ཐུའུ་ཡུན་ལེང་གིས“ལམ་བཟོ་བ་200ལྷག་ཙམ་སྔ་རྗེས་སུ་དེ་གར་སྐུ་གཤེགས་ཡོད”ཅེས་བརྗོད་པ་ལས་ལམ་བཟོ་བ་གྲངས་མེད་ཀྱིས་རང་སྲོག་བློས་གཏོང་བྱས་པ་མཚོན་ཡོད།

དགའ་ལུང་ལའི་ཕུག་ལམ་མེ་ཏོག་གཞུང་ལམ་གྱི་དཀའ་ཚེགས་ཆེ་ཤོས་ཀྱི་ལས་གྲྭ་ཞིག་ཡིན་པ་དང་ཡུལ་མིའི་འབོད་སྲོལ་དུ“དགའ་ལུང་ལར་འཛེགས་ཚེ་དམྱལ་བའི་འཕྲང་ལམ་མཐོང”ཞེས་པ་ལས་དེ་གར་ཉེན་ཁ་ཧ་ཅང་ཆེན་པོ་ཡོད་པ་རྟོགས་ཐུབ།

དེ་སྔ་མེ་ཏོག་གཞུང་ལམ་འཛུགས་སྐྲུན་ནང་ཞུགས་མྱོང་བའི་ཁྲེང་ཁྲུན་མིང་གིས་དྲན་གསོ་བྱེད་བཞིན་དུ་ལོ་ལྟར་ཟླ་བ་བདུན་རིང་འཁྱགས་པ་ཐེབས་དུས་རི་རྩེར་གངས་གསོག་སྨི་ལྔ་ནས་དྲུག་བར་ཐེབས་པ་དང་རི་བཀག་རྗེས་ཕག་ཀྲིན་དང་ཚལ་སྐམ་པོར་བརྟེན་ནས་འཚོ་བ་སྐྱེལ་དགོས་ཀྱི་ཡོད། དེ་བས་འཇིགས་སུ་རུང་བ་ཞིག་ནི་གནོད་འཚེ་ཡང་ཡང་ཐོན་པའི་ལོ་གཉིས་དང་ལོ་ཕྱེད་ནང་རི་ཐེངས་325ཉིལ་བ་དང་། འདམ་རྡོའི་ཆུ་རུད་ཐེངས་84ཐོན་པ། གངས་ཐེངས་23རྡིབ་པ། རྡོ་ཟགས་ནས་མི་68རྨས་པ་བཅས་ཀྱི་གནས་ཚུལ་བརྗོད།

དེ་ལྟར་ཡིན་རུང་ཕྱིར་བཤོལ་བྱེད་མཁན་གཅིག་ཀྱང་མེད། 2010ལོའི་ཟླ་12ཚེས་15ཉིན་རྫས་མེའི་སྒྲ་མཇུག་ཤོས་དེ་གྲགས་པ་དང་བསྟུན་ནས་རིང་ཚད་སྨི་3310ཟིན་པའི་ཕུག་ལམ་ཏལ་འབིགས་ཐུབ་པས་ལམ་སྐྲུན་བཟོ་པ་ཚོའི་རྨ་ཤུལ་གྱིས་ཁེངས་པའི་ངོ་གདོང་ལས་དགའ་བའི་འཛུམ་མདངས་རབ་ཏུ་འཕྱུར།

གཞུང་ལམ་ཤར་གཏོང་ཐུབ་པས་གནམ་ས་ཡངས།

སྨན་ཁང་དང་སློབ་གྲྭར་འགྲོ་བར་སྟབས་བདེ་བསྐྲུན།

མེ་ཏོག་རྫོང་སློབ་འབྲིང་དུ་དགེ་རྒན་བྱས་ནས་ལོ་21སོང་བའི་གུ་གུ་སྒྲོལ་མས་མཛུབ་མོ་གློག་རྡུལ་དཀར་པང་ལ་རེག་ཞིང་སྒེའུ་ཁུང་ཕྱི་རོལ་གྱི་ལུས་རྩལ་ཐང་ཆེན་ལ་ལྟ་བཞིན་དུ་ད་ཆའི་རྣམ་པ་དེ་དག་སྔོན་ཆད་ཁོང་ན་གཞོན་སྐབས་རྨི་ལམ་དུའང་འཁོར་མྱོང་མེད་པ་ཞིག་རེད་སྙམ།

2004ལོར་གུ་གུ་སྒྲོལ་མ་དགེ་རྒན་བྱེད་སྐབས་སློབ་གྲྭར་སློབ་ཁྲིད་ཐོག་ཁང་ལེགས་པ་གཅིག་ཀྱང་མེད་པ་དང་། སློབ་ཁང་ནང་ཤིང་གི་སྒྲོག་རྩེ་ནར་མོ་ཁ་ཤས་ལས་མེད་པ་དེར་ཕྲུ་གུ་10ལྷག་ཙམ་སྡོད་དགོས་ཀྱི་ཡོད། གུ་གུ་སྒྲོལ་མས་སློབ་དེབ་ཀྱང་མི་དང་ཁལ་མར་བརྟེན་དགོས་པས་ལོ་ལྟར་གུང་གསེང་མ་བཞག་གོང་དགེ་རྒན་ཁ་ཤས་ཀྱིས་ལོ་རིམ་མཐོ་བའི་སློབ་མ་ཁྲིད་དེ་དཔེ་དེབ་དབོར་བར་འགྲོ་དགོས་ཀྱི་ཡོད་ཅེས་ཕྱིར་དྲན་བྱེད་བཞིན་བཤད།

དགེ་རྒན་ཀྱང་དེ་བས་དཀོན་ཞིང་། དེ་སྔ་གུ་གུ་སྒྲོལ་མས་དུས་གཅིག་ཏུ་ལོ་རིམ་མི་འདྲ་བ་གསུམ་གྱི་སློབ་ཚན་ཁྲིད་དགོས་པ་མ་ཟད། ད་དུང་འཛིན་གྲྭའི་ཀྲུའུ་རེན་གྱི་འགན་གཅིག་ལྕོགས་འཁུར་གྱི་ཡོད། སྐབས་དེ་དུས་ཆ་རྐྱེན་ཧ་ཅང་ཞན་པས་དེ་གར་དགེ་རྒན་བྱེད་འདོད་མཁན་མེད། 2010ལོར་སློར་གྲྭར་དགེ་རྒན་བརྒྱད་དགུ་ཙམ་ལས་མེད་པ་དང་། རང་ཉིད་ནི་དབྱིན་ཡིག་ཆེད་ལས་ཡིན་མོད། དགེ་རྒན་མ་འདང་སྟབས་རྒྱ་ཡིག་དང་། ཨང་རྩིས། ལོ་རྒྱུས་བཅས་ཁྲིད་དགོས་ཀྱི་ཡོད་ཅེས་བཤད།

2013ལོར་མེ་ཏོག་གཞུང་ལམ་བསྐྲུན་ནས་རླངས་འཁོར་ཤར་གཏོང་ཐུབ་རྗེས། དེ་གར་འགྱུར་ལྡོག་འགྲོ་འགོ་ཚུགས། ཚད་ལྡན་ཅན་གྱི་སློབ་ཁྲིད་ཐོག་ཁང་བསྐྲུན་པ་དང་། འཛིན་གྲྭའང་4ནས་12བར་མང་དུ་ཕྱིན་པ། དགེ་རྒན་64ཡིས་རང་སོ་སོའི་ཆེད་ལས་དང་འཚམ་པའི་སློབ་ཁྲིད་བྱེད་པ་ལས་སློབ་ཚན་གཞན་དག་ཁྲིད་དགོས་ཀྱི་མེད། སློབ་གྲྭར་ད་དུང་བརྒྱུད་ལམ་སྣ་མང་གི་སློབ་ཁང་དང་། ཁང་པའི་ནང་གི་ལན་ཆིའུ་སྤོ་ལོའི་ཐང་། དཔེ་མཛོད་ཁང་བཅས་ཡོད་པས་སློབ་མ་རྣམས་ཀྱང་དགའ་ཕྱོགས་དེ་བས་མང་བ་སྐྱེད་སྲིང་བྱེད་ཐུབ།

“མེ་ཏོག་རྫོང་མང་ཚོགས་ཀྱི་དཀའ་ངལ་ཆེ་ཤོས་ནི་སློབ་གྲྭར་སྐྱོད་དཀའ་བ་ཕུད། ད་དུང་ནད་གཞི་ལྟ་བར་ཡང་དཀའ་ངལ་ཡོད་པ་དེ་ཡིན”མེ་ཏོག་རྫོང་མི་དམངས་སྨན་ཁང་གི་ཡོན་ཀྲང་ལས་རོགས་ནོར་བུ་དགྲ་འདུལ་གྱིས། དུས་རབས་གོང་མའི་ལོ་རབས་90པའི་མེ་ཏོག་ཏུ་ལམ་ཤར་གཏོང་མ་ཐུབ་པའི་དབང་གིས་སྨན་བཅོས་ཆ་རྐྱེན་ཧ་ཅང་ཞན་པ་དང་། ནད་གཞི་ཆུང་ཙག་ཀྱང་ཡུན་རིང་བཅོས་མ་ཐུབ་པའི་དབང་གིས་ཚབས་ཆེར་འགྲོ་ཡི་ཡོད་ཅེས་བཤད།

2013ལོར་མེ་ཏོག་གཞུང་ལམ་ཏལ་འབིགས་ཐུབ་པ་དང་ཆབས་ཅིག་དེ་གའི་སྨན་བཅོས་བྱ་གཞག་འཕེལ་རྒྱས་ལའང་རེ་བ་གསར་པ་སྦྱིན།

འགྲིམ་འགྲུལ་ཆ་རྐྱེན་ལེགས་སུ་ཕྱིན་པ་དང་བསྟུན་ནས་དངོས་རྫས་མང་པོ་བར་མཚམས་མི་ཆད་པར་དབོར་ནས་མེ་ཏོག་རྫོང་མི་དམངས་སྨན་ཁང་གི་སྨན་བཅོས་ཆ་རྐྱེན་ཀྱང་དེ་བས་ལེགས་སུ་ཕྱིན་པ་སྟེ་CTདང་། གསུས་ཤེལ། ཚོན་ལྡན་སྒྲ་རླབས་སོགས་སྒྲིག་ཆས་གཅིག་རྗེས་གཉིས་མཐུད་ངང་སྒྲིག་སྦྱོར་བྱས་ཤིང་། རིམ་གསུམ་སྨན་ཁང་ཁ་ཤས་ཀྱི་ཁ་གཏད་རོགས་སྐྱོར་འོག་རྫོང་སྨན་ཁང་གིས་ཀ་པ་རིམ་པ་གཉིས་པའི་ཕྱོགས་བསྡུས་སྨན་ཁང་ལེགས་གྲུབ་ལྡན་པའི་སྒོ་ནས་གསར་འཛུགས་བྱས་ཡོད། མིག་སྔར་མགོ་བོའི་གཤགས་བཅོས་སོགས་གཤགས་བཅོས་སྣ་ཁ་100ལྷག་ཙམ་བྱེད་ཐུབ་པ་དང་ལོ་རེར་ཆ་སྙོམས་སྒོ་བསྟེན་སྨན་བཅོས་བྱེད་ཚད་མི་ཐེངས་ཁྲི་5ལྷག་ཙམ་ཟིན་གྱི་ཡོད།

ཕ་ཡུལ་དུ་ལོག་ནས་ཕྱུག་འགྱུར་ལམ་བུ་བཏོད།

སྟོབས་ཤུགས་གཅིག་ཏུ་སྒྲིལ་བས་ཐོན་ལས་དར།

བདེ་ཞིང་ཤང་གི་ནོར་བུ་ཚེ་རིང་ཆུང་དུས་ཕ་ཡུལ་རི་ཁུལ་དེ་ནས་བྲལ་འདོད་ཆེ། འོན་ཀྱང་ལོ་མང་སོང་རྗེས་ཁོང་ཕ་ཡུལ་དུ་ལོག་ནས་ལས་གཏོད་བྱེད་པ་དེ་བསམ་ཡུལ་ལས་འདས་པའི་བྱ་བར་གྱུར།

ནོར་བུ་ཚེ་རིང་མཐོ་འབྲིང་འགྲིམ་དུས་མེ་ཏོག་ཏུ་ལམ་བཟོས་ནས་རླངས་འཁོར་ཤར་གཏོང་ཐུབ་ཅིང་། “དུས་དེ་ནས་བཟུང་མེ་ཏོག་འདི་ཉིད་འཁྲུག་ཆ་དོད་དུ་སོང་བ་མ་ཟད། ད་དུང་ཡུལ་སྐོར་བའང་ལོ་རེ་བཞིན་མང་དུ་སོང་ཡོད”ནོར་བུ་ཚེ་རིང་གིས་གསར་འགོད་པར“ཁྱིམ་གྱི་ཤིང་ཏོག་བྲིན་ཁ་རྒྱུག་པོ་འདུག 2018ལོར་སློབ་ཆེན་ཐོན་རྗེས་ང་ཕ་ཡུལ་དུ་ལོག་ནས་ཤིང་ཏོག་འདྲ་མིན་སྣ་ཚོགས་འདེབས་རྒྱུའི་བློ་ཐག་བཅད་པ་ཡིན”ཞེས་བཤད།

སྐབས་དེ་དུས་རྫོང་གིས་སློབ་ཆེན་སློབ་མའི་ལས་གཏོད་རོགས་སྐྱོར་སྲིད་ཇུས་བཏོན་པ་དང་། ནོར་བུ་ཚེ་རིང་གིས་རོགས་སྐྱོར་མ་དངུལ་སྒོར་ཁྲི་5སྤྱད་དེ་ས་ཞིང་བོག་མར་བླངས་པ་དང་སོན་ཉོས་ཏེ་སོ་ནམ་པ་གསར་པ་ཞིག་བྱས། ད་ཆ་མུའུ་35ཡི་འབྲས་ཤིང་ལྡུམ་རའི་ནང་མུའུ་17ལ་ཤིང་ཏོག་ཧོ་ལུང་གོ་བཏབ་ཡོད།

“ན་ནིང་ས་ཞིང་མུའུ་གཅིག་ནས་ཁེ་གཙང་སྒོར་8000ལྷག་ཙམ་བྱུང་། སྔོན་ཆད་གཞོན་ནུ་རྣམས་ཕྱིར་འགྲོ་འདོད་བྱེད་ཀྱི་ཡོད། ད་ཆ་ལམ་ཡག་ཏུ་ཕྱིན་པས་ཁྱིམ་གྱི་སྒོ་རྩ་ནས་ཀྱང་རང་ཉིད་ཀྱི་མི་ཚེའི་ལམ་བུ་གསར་པ་གཏོད་ཐུབ་ཀྱི་འདུག”ཅེས་ནོར་བུ་ཚེ་རིང་གིས་དགའ་ཚོར་ཆེན་པོས་བཤད།

ནོར་བུ་ཚེ་རིང་དང་འདྲ་བར་ལུང་ཁུག་དེ་ནས་ཕྱིར་ཐོན་པའི་མེ་ཏོག་བ་མང་པོ་ཞིག་སླར་ཡང་ཕ་ཡུལ་དུ་ལོག་ཅིང་། ད་དུང་ལུང་པ་གཞན་དག་གི་མི་ཁག་གཅིག་ཀྱང་མེ་ཏོག་ཏུ་གཞིས་ཚུགས་ནས་ལས་གཏོད་བྱེད་བཞིན་ཡོད། སི་ཁྲོན་མེ་ཧྲན་ནས་ཡིན་པའི་ཀྲང་སེན་ཡང་ཁོང་ཚོའི་ཁྲོད་ཀྱི་གྲས་ཤིག་ཡིན། 1986ལོར་སྐྱེས་པའི་ཁོང་མེ་ཏོག་ཏུ་གཞིས་ཚུགས་ནས་ལོ་བཅུ་ལྷག་ཙམ་སོང་ཡོད།

2006ལོར་ཀྲང་སེན་མེ་ཏོག་དུ་ཡོང་ཐེངས་དང་པོ་ཡིན་པ་དང་། སྐབས་དེ་དུས་དགའ་ལུང་ལ་རྒྱག་དགོས་ཀྱི་ཡོད། 2013ལོར་དགའ་ལུང་ལའི་ཕུག་ལམ་ལ་རླངས་འཁོར་ཤར་གཏོང་ཐུབ་རྗེས་ཀྲང་སེན་གྱི་མི་ཚེར་འགྱུར་ལྡོག་བྱུང་ཞིང་། ལོ་དེའི་ཟླ་11པར་ཁོང་གིས་མ་རྩ་བཏང་ནས་ཞོགས་ཟས་ཟ་ཁང་ཞིག་བཙུགས་པས་ཟ་ཁང་དེ་ཡང་གཞུང་ལམ་ཤར་གཏོང་ཐུབ་རྗེས་མེ་ཏོག་ཏུ་ལུང་པ་གཞན་དག་གི་མིས་བཙུགས་པའི་ཟ་ཁང་དང་པོའི་གྲས་སུ་གྱུར་ཡོད།

འགྲིམ་འགྲུལ་མི་བདེ་བ་ནས་ཡར་ངོའི་ཟླ་ལྟར་འཕེལ་བའི་བར། མེ་ཏོག་གཞུང་ལམ་གྱིས་མཐོ་སྒང་གི་གནས་འདིར་འགྱུར་ལྡོག་གཏོང་བཞིན་མཆིས།

གསང་སྔགས་ཆོས་རྒྱལ།

ཕྲུ་གུ་ཚོ་སློབ་གྲྭར་ཡག་པོ་འགྲོ་ཐུབ་སོང་།

“ཕྲུ་གུ་ཚོ་སློབ་གྲྭར་ཡག་པོ་འགྲོ་ཐུབ་པ་མཐོང་དུས་ང་རང་བློ་ཡིད་ཚིམས་སོང”ཞེས་མེ་ཏོག་རྫོང་གི་སློབ་གསོའི་བྱ་གཞག་འཕེལ་རྒྱས་དང་འགྱུར་ལྡོག་སྐོར་གླེང་སྐབས་མེ་ཏོག་རྫོང་གི་རྒན་ཡོལ་ཞུས་པའི་ལས་བྱེད་པ་རྒན་གྲས་གསང་སྔགས་ཆོས་རྒྱལ་གྱི་གདོང་ལས་དགའ་བའི་འཛུམ་མདངས་འཕྱུར།

1960ལོར་སྐྱེས་པའི་གསང་སྔགས་ཆོས་རྒྱལ་ཆུང་དུས་ནས་ཨ་མ་དང་མཉམ་དུ་ཞིང་ལས་བྱེད་པར་འགྲོ་ཡི་ཡོད། སྐབས་དེ་དུས་ཁོང་གིས་རང་ཉིད་སློབ་གྲྭ་འགྲིམ་རྒྱུ་ཡོང་གི་རེད་སྙམ་པ་བསམ་པའི་ཡུལ་ལའང་མེད། ལོ་9ལ་སླེབས་སྐབས་ཉེ་འགྲམ་གྱི་བཅིངས་འགྲོལ་དམག་མིས་གྲོང་ཚོ་ཁག་གི་ཕྲུ་གུ་རྣམས་རུབ་རུབ་བཟོས་ཏེ་ཚང་མར་ཡི་གེ་དང་ཨང་རྩིས་བསླབས།

1973ལོར། མེ་ཏོག་ལ་གཞུང་བཙུགས་སློབ་ཆུང་དང་པོ་དེ་བཙུགས། མ་གཞི་ལོ་རིམ་དང་པོ་དང་གཉིས་པ་ལས་མེད་ཀྱང་སློབ་ཚན་ནང་དོན་དེ་སྔ་དང་བསྡུར་ན་མང་དུ་ཕྱིན་ཡོད། 1977ལོའི་དབྱར་ཁར་ཁོང་དང་ཡུལ་དེའི་སློབ་མ་30ལྷག་ཙམ་ལྷ་ས་གྲོང་ཁྱེར་དགེ་འོས་སློབ་གྲྭར་བསྡུས་པ་དང་རྐང་ཐང་མར་ཉིན་4སོང་རྗེས་གཞི་ནས་ཕད་ཆུས་ལ་སླེབས།

1980ལོར་སློབ་གྲྭ་ཐོན་རྗེས། གསང་སྔགས་ཆོས་རྒྱལ་མེ་ཏོག་ཏུ་ལོག་ཅིང་། སྔ་རྗེས་སུ་འབྲས་སྤུངས་ཤང་སློབ་ཆུང་དང་རྫོང་གཞུང་བཙུགས་སློབ་ཆུང་གི་འཚོ་བའི་དགེ་རྒན་བྱས། “སྐབས་དེ་དུས་འགྲིམ་འགྲུལ་སྟབས་བདེ་མེད་པས། རྫོང་དུ་རྟག་པར་འབྲུ་རིགས་དང་དངོས་ཟོག་ཁ་ཐང་པོ་ཡོད”ཅེས་གསང་སྔགས་ཆོས་རྒྱལ་གྱིས་བཤད་པ་དང་། ཁོང་གིས་ཕྲུ་གུ་ཚོ་སྡུག་པོ་མྱོང་མི་དགོས་པ་བྱ་ཆེད། 1984ལོར་རྫོང་ནས་གཞུང་བཙུགས་སློབ་ཆུང་དེ་སྨན་གླིང་རྫོང་ཕད་ཆུས་ལ་སྤོས་པ་དང་། 1991ལོར་སྐབས་དེ་དུས་ཀྱི་ཉིང་ཁྲི་ས་ཁུལ་སློབ་ཆུང་གཉིས་པར་སྤོས་ནས་དེ་གར་མེ་ཏོག་འཛིན་གྲྭ་གཉེར་ཡོད་ཅེས་བཤད།

2013ལོར་མེ་ཏོག་གཞུང་ལམ་དུ་རླངས་འཁོར་ཤར་གཏོང་ཐུབ་རྗེས། མེ་ཏོག་རྫོང་གི་སློབ་གསོར་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་སྟེ་ཕྲུ་གུ་སྔར་ལས་མང་བ་རི་ཁུག་ནས་སློབ་ཆེན་དུ་བསྐྱོད་ཐུབ་ཡོད།

“སྐབས་དེ་དུས་ང་ཚོས་ལམ་བཞུད་ཉིན་4བྱས་ན་གཞི་ནས་མེ་ཏོག་རྫོང་ནས་ཐོན་ཐུབ་ཙམ་ཡོད། ད་ཆ་ཕྲུ་གུ་ཚོ་རླངས་འཁོར་ལ་བསྡད་ན་ལམ་སེང་ས་ཆ་གཞན་ལ་འབྱོར་ཐུབ་པ་མ་ཟད། ད་དུང་ཐག་རིང་ས་ཆར་ཡང་སླེབས་ནས་དེ་བས་མཛེས་སྡུག་ལྡན་པའི་འབྱུང་འགྱུར་ཕྱོགས་སུ་བསྐྱོད་ཐུབ་ཀྱི་ཡོད”ཅེས་གསང་སྔགས་ཆོས་རྒྱལ་གྱིས་སྒེའུ་ཁུང་ཕྱིའི་གཞུང་ལམ་ལ་ལྟ་བཞིན་དེ་ལྟར་བརྗོད།

ཚེ་རིང་དབང་འདུས།

ཀུ་ལེ་ཞིག་ནས་ཕྱུག་འགྱུར་ལམ་སྟོན་པར་གྱུར།

མེ་ཏོག་རྫོང་མེ་ཏོག་གྲོང་རྡལ་ཡ་གདུང་གྲོང་ཚོའི་ཏང་ཀྲི་པུའི་ཧྲུའུ་ཅི་ཚེ་རིང་དབང་འདུས་ནི་མེ་ཏོག་གཞུང་ལམ་ཤར་གཏོང་མ་ཐུབ་གོང་རྡོ་གཞོང་ཀུ་ལེ་ཞིག་ཡིན་པ་དང་ཁོང་གིས་མེ་ཏོག་རྫོང“ས་མཐོའི་ཁེར་ཆགས་གླིང་ཕྲན”ནས་མཛེས་སྡུག་ལྡན་པའི་མཐའ་མཚམས་རྫོང་གྲོང་ལ་འགྱུར་བའི་འཕེལ་རྒྱས་ཀྱི་འགྱུར་ལྡོག་ལ་དཔང་པོ་བྱས།

“ཆུང་དུས་འཚོ་བ་སྐྱོ་བས་དངོས་ཟོག་ཁ་ཐང་བ་དང་ཟས་གོས་སྡོད་གསུམ་ཚང་མ་ཁལ་མར་དབོར་དགོས་ཀྱི་ཡོད”ཅེས་ཚེ་རིང་དབང་འདུས་ཀྱི་དྲན་གསོ་བྱེད་བཞིན་དུ་བཤད།

འཚོ་བ་དཀའ་ཚེགས་ཆེ་བས་ཚེ་རིང་དབང་འདུས་ཀྱིས་སྔ་ས་ནས་ལྟོ་གོས་འཚོལ་དགོས་བྱུང་། 1999ལོར་ལོ་16ལ་སླེབས་པའི་ཁོང་གིས་ཕ་མེས་ཚོ་དང་མཉམ་དུ་ཀུ་ལེ་ཐེངས་དང་པོ་རྒྱུག

ཀུ་ལེ་རྒྱུག་པའི་ལོ་ཟླ་ད་ལྟའང་ཚེ་རིང་དབང་འདུས་ཀྱི་དྲན་འཆར་ངོས་སུ་གསལ་ལེར་ངེས་ཡོད། ཁོང་གིས“སྐབས་དེ་དུས་གཙོ་བོ་འབྲུ་རིགས་དང་། སྣུམ། ཚྭ། གྱོན་ཆས་སོགས་འཚོ་བའི་མཁོ་ཆས་དབོར་གྱི་ཡོད། ལོ་ལྟར་དབྱར་ཁའི་ཟླ་གསུམ་རིང་གཞི་ནས་དོ་པོ་དབོར་ཐུབ་ཀྱི་ཡོད་པས། ཟླ་གསུམ་པོ་དེའི་རིང་རྫོང་ཡོངས་ཀྱི་མིའི་ལོ་གཅིག་ལ་མཁོ་བའི་དངོས་ཟོག་དབོར་ཚར་བ་བྱེད་དགོས། དགུན་དུས་གངས་རྒྱ་བསྡམས་པས་རྟ་དྲེལ་འགྲོ་སའི་ལམ་བུ་མེད་ལ་མི་ཡང་འགྲོ་ཐུབ་ཀྱི་མེད་པས་དངོས་ཟོག་དེ་བས་དབོར་ཐུབ་ཀྱི་མེད”ཅེས་བཤད།

ཚེ་རིང་དབང་འདུས་ཀྱིས་གསར་འགོད་པར་སྐབས་དེ་དུས་མེ་ཏོག་གི་ཁྱིམ་ཚང་ཚང་མར་ཀུ་ལེ་རྒྱུག་མཁན་གྱི་ཕོ་མོ་རྒན་གཞོན་ཡོད་པ་དང་། ལོ་འཁོར་མོར་དངོས་ཟོག་རྒྱ་མ་བཅུ་ཕྲག་ནས་བརྒྱ་ཡན་འཁུར་ཏེ་ལ་ཀླུང་བརྒལ་དགོས་ཞེས་བཤད།

“ཐབས་ཤེས་མི་འདུག ལམ་མེད་པས་གལ་ཏེ་དངོས་ཟོག་མ་དབོར་ན་ཟ་འབྲུ་ཡང་འདང་གི་མ་རེད”ཅེས་ཚེ་རིང་དབང་འདུས་ཀྱིས་བཤད།

ཁོང་གིས་2006ལོ་བར་ཀུ་ལེ་རྒྱུག་ཅིང་། ལོ་དེར་སྤོ་བོ་རྫོང་གིས་དགའ་ལུང་ལ་ནས་མེ་ཏོག་རྫོང་བར་ལ་ས་རྡོའི་ལམ་བུ་བཟོས་པས་ཞིང་སྤྱོད་འཁོར་རིགས་སྤྱིར་ན་བསྐྱོད་ཐུབ་ཀྱི་ཡོད།

2013ལོའི་ཟླ་བཅུ་པ་བར་མེ་ཏོག་གཞུང་ལམ་དུ་རླངས་འཁོར་དངོས་སུ་ཤར་གཏོང་ཐུབ་པ་དང་དགའ་ལུང་ལའི་ཕུག་ལམ་དུ་ལོ་འཁོར་མོ་རླངས་འཁོར་ཤར་གཏོང་འགན་ལེན་ཐུབ་པས་མེ་ཏོག་གི་འགྲིམ་འགྲུལ་ལའང་འཕོ་འགྱུར་ཆེན་པོ་བྱུང་ཡོད།

ཚེ་རིང་དབང་འདུས་ཀྱིས་མྱོང་ཚོར་ཟབ་མོས“སྔོན་མ་གངས་རི་འཛེགས་པ་དང་ནགས་ཚལ་སྒྲོལ་ཏེ་ཀུ་ལེ་རྒྱུག་པའི་ལོ་རྒྱུས་མཇུག་འགྲིལ་ཟིན། མེ་ཏོག་གཞུང་ལམ་ནི་མེ་ཏོག་བའི་ཚེ་སྲོག་གི་ལམ་བུ་དང་བདེ་སྐྱིད་ཀྱི་ལམ་བུ་རེད”ཅེས་བཤད།