འདི་ནི་ངམ་རིང་རྫོང་བསྟར་བརྒྱུད་ཤང་འབྲུག་གྲོང་ཚོའི་གནས་སྤོས་མང་ཚོགས་ཀྱིས་མཉམ་ཞུགས་དྲན་རྟེན་པར་རྒྱག་བཞིན་པ།

འདི་ནི་ས་སྐྱ་རྫོང་གཞོང་སྨད་ཤང་རྩྭ་སྐོར་གྲོང་ཚོའི་མང་ཚོགས་ཀྱིས་སྡོད་ཁང་གསར་པའི་སྒེའུ་ཁུང་གི་ཤེལ་སྒོར་ཕྱི་བདར་རྒྱག་བཞིན་པ།

འདི་ནི་དིང་རི་རྫོང་གྲམ་མཚོ་ཤང་ཟིང་དཀར་གྲོང་ཚོའི་ཡུལ་མིས་ཁྱིམ་གྱི་སྒོ་འགྲམ་ནས་ཆུ་ཀ་ལར་ལག་པ་འཁྲུད་བཞིན་པ།

འདི་ནི་གཏིང་སྐྱེས་རྫོང་ཀོ་ལྕག་ཤང་གནས་གྲོང་ཚོའི་མང་ཚོགས་ཀྱིས་ཁང་གསོལ་གཏོང་བཞིན་པ།

འདི་ནི་ལྷ་རྩེ་རྫོང་གཞིས་ཆེན་ཤང་ཤར་ལ་སུག་གྲོང་ཚོའི་མང་ཚོགས་ཀྱིས་སྡོད་ཁང་གསར་པའི་ནང་ཞིམ་མངར་མཆོད་ཆང་གི་བྲོ་བ་མྱོང་བཞིན་པ།

འདི་ནི་ས་སྐྱ་རྫོང་གཞོང་སྨད་ཤང་རྩྭ་སྐོར་གྲོང་ཚོའི་མང་ཚོགས་སྐལ་བཟང་བུ་ཁྲིད་ནང་མི་དང་མཉམ་དུ་སྡོད་ཁང་གསར་པའི་ནང་བདེ་སྐྱིད་འཚོ་བར་རོལ་བཞིན་པ།

འདི་ནི་དིང་རི་རྫོང་གྲམ་མཚོ་ཤང་ཟིང་དཀར་གྲོང་ཚོའི་གྲལ་སྟར་འགྲིག་པའི་བོད་བཟོའི་སྡོད་ཁང་གསར་པ་ཡིན་པ།

ད་ལོའི་ཟླ་1ཚེས་7ཉིན་བོད་ལྗོངས་གཞིས་རྩེ་གྲོང་ཁྱེར་དིང་རི་རྫོང་དུ་ས་ཡོམ་རིམ་པ་6.8བརྒྱབ་ཅིང་། གྲམ་མཚོ་ཤང་ཟིང་དཀར་གྲོང་ཚོ་ནི་གནོད་འཚེ་ཕོག་ཚབས་ཆེ་ཁུལ་གྱི་གྲས་ཤིག་ཡིན་པ་དང་། གྲོང་ཚོ་ཡོངས་ཀྱི་ཁང་པ་125ཚང་མ་ལོག་པ་དང་མང་ཚོགས་600ལྷག་ཙམ་སྐྱོ་བའི་མིག་ཆུ་གཏོང་བཞིན་མི་རབས་ནས་མི་རབས་བར་སྡོད་སའི་ཁྱིམ་གཞིས་ལས་རེ་ཞིག་བྲལ་དགོས་བྱུང་ཡོད། ལོ་ཕྱེད་སོང་རྗེས་ཀྱི་ཟླ་བ་བརྒྱད་པར། ཟིང་དཀར་གྲོང་ཚོ་གསར་རྐྱང་ཞིག་བསྐྲུན་པ་དང་། དྲོད་འཇམ་ཉི་འོད་འོག་གྲལ་སྟར་འགྲིག་པའི་སྡོད་ཁང་གསར་པ་དག་མཐོང་སྐབས་མི་རྣམས་ལ་དྲོ་སྐྱིད་ལྡན་པའི་ཚོར་བ་ཞིག་ངང་གིས་སྟེར།

གསར་འགོད་པ་ཟིང་དཀར་གྲོང་ཚོར་སླེབས་སྐབས་མིག་མདུན་དུ་གསལ་ལེར་འཆར་བ་ནི་གྲལ་སྟར་འགྲིག་པའི་བོད་བཟོའི་སྡོད་ཁང་དང་། ཁྱིམ་ཚང་ཚང་མའི་ཐོག་ཁའི་རྒྱལ་དར་རླུང་ཕྱོགས་དང་འགྲོགས་ཏེ་ལྷབ་ལྷུབ་ཏུ་གཡོ་བཞིན་མཆིས། དེ་སྔོན་གྱི་འབར་འབུར་ལམ་བུ་ད་ཆ་ཡངས་ཤིང་རྒྱ་ཆེ་བའི་ལམ་བུ་གསར་རྐྱང་དུ་གྱུར་པ་དང་། གྲོང་ཚོའི་ལམ་མདོར་བཀལ་བའི“ཟིང་དཀར་གྱིས་སྐུ་ཉིད་ཕེབས་པར་དགའ་བསུ་ཞུ”ཞེས་པའི་སྦྱར་ཡིག་དེ་མངོན་གསལ་དོད་པོར་སྣང་།

གསར་འགོད་པ་གྲོང་ཚོའི་ཏང་ཀྲི་པུའི་ཧྲུའུ་ཅི་པ་སངས་འཚོལ་བར་འགྲོ་སྐབས། ཁོང་ཟིང་དཀར་གྲོང་ཚོའི་གསར་དུ་བསྐྲུན་པའི་ཐང་ཆེན་དུ་སྒུག་ནས་འདུག གམ་དུ་བཅར་སྐབས་ཁོང་གི་ངོ་གདོང་ལས་དགའ་བའི་འཛུམ་མདངས་འཕྱུར། ལོ་ཕྱེད་གོང་གི་ས་ཡོམ་རྒྱག་དུས་ལུས་ལ་ཐལ་བས་ཁེངས་ཤིང་དངངས་འཚབ་ཆེ་བའི་་རྣམ་པ་དེ་ཁང་པ་གསར་པར་སྤོས་པའི་དགའ་ཚོར་དབང་གིས་ཡེ་ནས་མཐོང་རྒྱུ་མི་འདུག “ཏང་དང་རྒྱལ་ཁབ་ཀྱི་བཀའ་དྲིན་ལ་ཐུགས་རྗེ་ཆེ་ཞུ་བའི་བསམ་པ་མཚོན་པ་དང་། སེམས་གཏིང་ནས་སྤྱི་ཁྱབ་ཧྲུའུ་ཅི་དང་ཏང་ཀྲུང་དབྱང་གི་བཀའ་དྲིན་ཚོར་བར་བྱ་ཆེད། གྲོང་ཚོའི་ཁྱིམ་ཚང་ཚང་མས་གཙོ་འཛིན་གྱི་སྐུ་པར་ཚོམས་ཆེན་གྱི་དཀྱིལ་དབུས་སུ་འགེལ་གྱི་ཡིན”ཞེས་པ་སངས་གིས་བརྗོད་དུས་ཁོང་གི་ངོ་གདོང་ལས་དགའ་སྣང་དང་ཆོད་སེམས་ཤིག་མངོན་ཡོང་།

ཟིང་དཀར་གྲོང་ཚོའི་ཐང་ཆེན་དུ་སྐྱེ་བོ་ཀུན་གྱི་མིག་ལམ་དུ་མངོན་ཆེ་བའི་སྐྲུན་དངོས་ནི་གྲོང་ཚོའི་ལོ་རྒྱུས་ཁང་དེ་རེད། གྲོང་ཚོའི་ལོ་རྒྱུས་ཁང་གི་ཕྱིའི་རྩིག་ངོས་སུ་བཀལ་བའི“བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་བོད་ཀྱི་མི་རིགས་ཁག་གི་མི་དམངས་ལ་བྱམས་བརྩེའི་ཐུགས་ཁུར་གནང་བར་སྙིང་དབུས་ནས་ཐུགས་རྗེ་ཆེ་ཞུ”ཞེས་པའི་སྦྱར་ཡིག་མངོན་གསལ་ཧ་ཅང་དོད། “ཏང་དང་རྒྱལ་ཁབ་ཀྱི་ཐུགས་ཁུར་འོག ང་ཚོའི་ཁྱིམ་གཞིས་མགྱོགས་པོ་འདི་འདྲ་བསྐྱར་སྐྲུན་ཐུབ་པས་སེམས་གཏིང་ནས་ཏང་དང་རྒྱལ་ཁབ་ལ་ཐུགས་རྗེ་ཆེ་ཞུ་གི་ཡིན”ཞེས་པ་སངས་ཀྱིས་ཡུལ་མི་ཡོངས་ཀྱི་སེམས་གཏམ་བརྗོད།

ཁང་པ་གསར་པ་བགོ་བཤའ་རྒྱག་པ་དྲང་གཞག་ཡོང་ཆེད། ཟིང་དཀར་གྲོང་ཚོས་ཕྱོགས་མང་པོའི་ལྟ་སྐུལ་ལམ་སྲོལ་སྤྱད་ཅིང་། ཤང་སྲིད་གཞུང་དང་། གྲོང་ཚོ“ཨུ་ལྷན་གཉིས” གྲོང་སྡོད་ལས་དོན་རུ་ཁག གྲོང་དོན་ལྟ་སྐུལ་ཨུ་ཡོན། མང་ཚོགས་ཀྱི་འཐུས་མི་བཅས་ཚང་མ་ཁང་པ་བགོ་བཤའ་རྒྱག་པའི་བརྒྱུད་རིམ་ཧྲིལ་པོར་ཞུགས་ཏེ་མི་ཚང་མ་བློ་ཡིད་ཚིམ་པོ་ཡོང་བ་བྱས་ནས་མང་ཚོགས་ཀྱི་ཐོབ་སྣང་དང་སྐྱིད་སྣང་ཆེ་རུ་བཏང་ཡོད། ཐང་ཆེན་གྱི་གཞོགས་གཅིག་ནི་ཡུལ་མི་བསྟན་འཛིན་བུ་ཁྲིད་ཀྱི་ཁང་པ་གསར་པ་ཡིན་པ་དང་། རྒྱ་ཆེ་ལ་དཀར་ཆ་དོད་པའི་ཁང་པ་མཐོང་དུས་ཧང་སངས་དགོས་པ་ཞིག་འདུག ཚོམས་ཆེན་དང་། གཟིམ་ཆུང་། ཐབ་ཚང་། གསང་སྤྱོད་བཅས་བར་ཁང་པའི་བཀོད་པ་ལེགས་ལ་བརྙན་འཕྲིན་དང་འཁྱགས་སྒམ་སོགས་ཀྱི་ཁྱིམ་སྤྱོད་གློག་ཆས་གང་དགོས་ཚང་མ་འདུག ཁང་པ་གསར་པ་དེ་དག་དུད་ཚང་རེའི་མི་འབོར་གཞིར་བཟུང་ཁང་པ་ཆེ་ཆུང་མི་འདྲ་བ་བཟོས་ནས་མང་ཚོགས་ཀྱི་སྣ་མང་ཅན་གྱི་དགོས་མཁོ་གང་ལེགས་བསྐངས་ཡོད་པ་རེད། “དེ་སྔོན་ཕྱིར་ཡོང་འབབ་གསོག་པར་འགྲོ་སྐབས་རྟག་ཏུ་ཁྱིམ་ལ་སེམས་ཁྲལ་འདུག ད་ཆ་ཡོང་འབབ་གསོག་ཐུབ་ལ་རང་ངོ་མ་ཕ་ཡུལ་འཛུགས་སྐྲུན་ནང་ཞུགས་ཐུབ་པས་སེམས་ལྷོད་ཤིག་ཤིག་འདུག”ཅེས་བསྟན་འཛིན་བུ་ཁྲིད་ཀྱིས་གསར་འགོད་པར་བརྗོད་བྱུང་།

ཟིང་དཀར་གྲོང་ཚོར་ད་དུང་བསྟན་འཛིན་བུ་ཁྲིད་དང་འདྲ་བའི་མང་ཚོགས་མང་པོ་ཡོད། ཁོ་ཚོས་གེགས་རྗེས་བསྐྱར་སྐྲུན་གྱི་ལས་ཀའི་ནང་ཧུར་ཐག་ཞུགས་ཏེ། ཕ་ཡུལ་འཛུགས་སྐྲུན་བྱེད་ཞོར་དུ་ཡོང་འབབ་ཀྱང་བསགས་ཡོད་པ་རེད། གེགས་རྗེས་བསྐྱར་སྐྲུན་ཁྲོད། དིང་རི་རྫོང་གིས“འཚོ་རྟེན་ལས་སྤྲོད་ཀྱིས་དྲོ་སྐྱིད་ལྡན་པའི་ཁྱིམ་གཞིས་སྐྲུན”ཞེས་པའི་སྲིད་ཇུས་ལག་ལེན་ཤུགས་ཆེན་བསྟར་བ་དང་། མ་དངུལ་སྒོར་ཁྲི་291བཏང་སྟེ་མང་ཚོགས་2350སྒྲིག་འཛུགས་བྱས་ནས་ཕྱུགས་ར་བསྐྱར་སྐྲུན་བྱས་ཡོད། དིང་རི་རྫོང་མི་སྤྱི་ཅུས་ཀྱིས་དུས་ཐེངས་27གྱི་རྩལ་ནུས་གསོ་སྦྱོང་འཛིན་གྲྭ་གཉེར་ཞིང་། ཁྱོན་བསྡོམས་གནོད་འཚེ་ཕོག་པའི་མང་ཚོགས་838དེར་ཞུགས་ནས་ལག་རྩལ་སྣ་གཅིག་མཁས་པར་སྦྱངས་ཡོད།

ད་ཆ། ཁྱིམ་ཚང་ཚང་མ་རྒྱ་ཆེ་ལ་དཀར་ཆ་དོད་པའི་སྡོད་ཁང་གསར་པའི་ནང་སྤོས་པ་དང་། མི་ཚང་མའི་ངོ་གདོང་ལས་དགའ་བའི་འཛུམ་མདངས་འཕྱུར། “གེགས་རྗེས་བསྐྱར་སྐྲུན་གྱི་ལས་དོན་ཁྲོད། རྒྱལ་ཁབ་ཀྱིས་ང་ཚོར་སྡོད་ཁང་གསར་པ་ཁག126བརྒྱབ་ཡོད། མང་ཚོགས་སྡོད་ཁང་གསར་པའི་ནང་སྤོས་པ་མཐོང་དུས། སེམས་ནང་གི་རྡོག་ཁྲེས་ཀྱང་མེད་པར་གྱུར་སོང་བས་གཉིད་སྐྱིད་པོ་ཞིག་ཉལ་རྒྱུ་བྱུང”ཞེས་ཟིང་དཀར་གྲོང་ཚོའི་ཏང་ཀྲི་པུའི་ཧྲུའུ་ཅི་པ་སངས་ཀྱིས་གྲལ་སྟར་འགྲིག་པའི་སྡོད་ཁང་གསར་པར་མཛུབ་མོ་འཛུགས་ཀྱིན་བརྗོད་པ་དང་། འཛུམ་མདངས་རབ་ཏུ་འཕྱུར་བའི་ངོ་གདོང་ལས་ཚང་མས་ཁོང་གི་སེམས་གཏིང་གི་སྤྲོ་བ་ངང་གིས་ཚོར།

ད་ལོའི་རྒྱལ་ཡོངས་ཀྱི་ཚོགས་འདུ་གཉིས་ཀྱི་ཐོག བོད་ཀྱི་འཐུས་མི་ཚོགས་པས་རྒྱལ་ཡོངས་མི་དམངས་ལ“ཟླ་བ་བཅུ་པའི་ཟླ་མཇུག་གོང་། མི་སེར་ཚང་མ་བདེ་འཇགས་དང་དྲོ་སྐྱིད་ལྡན་པའི་སྡོད་ཁང་གསར་པའི་ནང་སྤོ་ཐུབ་པ་བྱེད་ཀྱི་ཡིན”ཞེས་རྔམ་བརྗིད་ལྡན་པའི་ཁས་ལེན་དམ་འཇོག་བྱས། ལོ་ཕྱེད་ཙམ་སོང་རྗེས། སྐབས་དེ་དུས་ཀྱི་ཞལ་བཞེས་དེ་རིམ་གྱིས་དོན་དངོས་སུ་འགྱུར་བཞིན་ཡོད།