ཟླ་8ཚེས་19ཉིན། རྫ་ཡུལ་རྫོང་སློབ་འབྲིང་གི་ལོ་རིམ་དགུ་པའི་འཛིན་གྲྭ་གསུམ་པའི་སློབ་མ་དང་གུང་གཞོན་སྡེ་ཚོགས་ཀྱི་ཚོགས་མི་ཀྲུའུ་ཧའོ་རྒྱལ་ཡོངས་ཀྱི“དུས་རབས་གསར་པའི་ལོ་ཆུང་བཟང་པོའི”མཚན་སྙན་ཐོབ་པའི་གཏམ་བཟང་ཀྲེ་ཅང་ཉིང་པོའོ་ནས་འབྱོར། ལོ་མང་རིང་། གངས་རིས་བསྐོར་བའི་རྫ་ཡུལ་རྫོང་སློབ་འབྲིང་དུ་ཀྲུའུ་ཧའོ་ཡིས་བརྩོན་འགྲུས་དང་། རང་སྟོབས་རང་སྤེལ། ལེགས་སྐྱེས་འབུལ་བ་བཅས་ལ་བརྟེན་ནས་ལང་ཚོའི་ལེའུ་གསར་པ་ཞིག་བརྩམས་ཡོད། བོད་རིགས་ཀྱི་གཞིས་ལུས་བྱིས་པ་དེ་སྤྲོ་སྣང་དང་བདེ་ཐང་ངང་འཚར་ལོངས་བྱུང་ནས་དགེ་སློབ་ཚོའི་སེམས་གཏིང་གི་སྤོབས་པ་སྐྱེ་འོས་པའི་སློབ་མ་དང་སློབ་གྲོགས་ཞིག་ཏུ་གྱུར།

འབད་པ་ལྷོད་མེད་བྱེད་མཁན་གྱི་སློབ་མ་རྩེ་གྲ

ཞོགས་པའི་ཆུ་ཚོད་7པར་རྫ་ཡུལ་རྫོང་སློབ་འབྲིང་དུ་སློབ་ཁྲིད་ཐོག་ཁང་གི་གློག་སྤར་མ་ཐག་ཀྲུའུ་ཧའོ་ཉིན་ལྟར་སློབ་ཁང་ནང་འབྱོར་མཁན་དང་པོ་དེ་རེད། སློབ་གྲྭ་འགྲིམ་པ་ནས་བཟུང་། ཀྲུའུ་ཧའོ་ཡིས་འབད་པ་ལྷུར་ལེན་གྱིས་སློབ་ཁྲིད་སྐབས་བློ་རྩེ་གཅིག་སྒྲིམ་ངང་སློབ་ཚན་ཉན་པ་དང་། སློབ་ཚན་གྲོལ་རྗེས་དཔེ་མཛོད་ཁང་དུ་སྐྱོད་པའམ་ཡང་ན་སློབ་ཁང་ནང་རྩིས་རྒྱག་སྦྱངས་ནས་སྡོད་ཀྱི་ཡོད།

སྙིང་རུས་ཆེན་པོ་དེ་ལས་ཁོང་གི་སྦྱངས་འབྲས་རྒྱུན་དུ་འཛིན་གྲྭའི་ཨང་དང་པོར་སླེབས་ནས་འགྲན་བསྡུར་སྣ་ཚོགས་ཁྲོད་ཕུལ་བྱུང་གྲུབ་འབྲས་ཐོབ་ཡོད། 2024ལོར་ཁོང་ལ་རྫ་ཡུལ་རྫོང་གི་བརྩོན་སྐྱེད་ཀྱི་སྦྱངས་ཐོན་གཟིགས་བཟོས་ཀྱི“བཟང་པོ་ལྔ་ལྡན་གྱི་སློབ་མའི”བྱ་དགའ་རིམ་པ་དང་པོ་ཐོབ་པ་དང་། སློབ་འབྲིང་ལོ་གསུམ་རིང་ཁོང་ལ་རྟག་ཏུ་དངོས་ལུགས་དང་། དབྱིན་ཡིག རྩིས་རིག་སོགས“རིག་ཚན་གྱི་རྩེར་སོན་སློབ་མའི”མིང་ཐོབ་ཡོད། ཁོང་སློབ་སྦྱོང་ཧུར་ཐག་བྱས་ཏེ་ཕྱིས་སུ་ཕ་ཡུལ་ལ་ལེགས་སྐྱེས་འབུལ་ཐུབ་རེ་བྱེད་ཀྱི་ཡོད། ཤུར་ལྕོག་ནང་བླུགས་པའི་ལག་ཁྱེར་སྣ་ཚོགས་ནི་ཀྲུའུ་ཧའོ་ཡིས་ཉིན་མཚན་དབྱེར་མེད་སློབ་སྦྱོང་བྱས་པའི་སྦྱངས་འབྲས་ཡག་ཤོས་ཡིན་པ་མཚོན་གྱི་ཡོད།

གཞིས་ལུས་བྱིས་པའི་ཁྲོད་ཀྱི་སེམས་རྩ་འཁོལ་བའི་ལོ་ཆུང་།

ཀྲུའུ་ཧའོ་ལ་ཕྲུ་གུ་གཞན་དང་མི་འདྲ་བའི་ཁེར་རྐྱང་ཡུལ་པོའི་སྣང་བ་མང་པོ་ཡོང་སྲིད། གང་ལགས་ཤེ་ན། ཁོང་ཧ་ཉིད་གོ་བ་ནས་བཟུང་ཕ་མ་གཉིས་ཁ་བྲལ། དེ་ནས་ཕ་ཤིན་ཅང་དུ་གླ་པ་རྒྱུག་པར་ཕྱིན་པ་དང་མ་ཡུན་ནན་དུ་མནའ་མར་སོང་བ་མ་ཟད། ཕ་མེས་ཚང་མ་ས་ཆ་ལོགས་བཀར་ལ་བསྡད་ཡོད་པས། ཀྲུའུ་ཧའོ་ཆུང་དུས་ནས“གཞིས་ལུས་བྱིས་པ”ཞིག་ཏུ་གྱུར་ཏེ་གཟའ་ཟླ་བ་ནས་པ་སངས་བར་སློབ་གྲྭར་སྡོད་པ་དང་གཟའ་མཇུག་ཏུ་མ་གཡར་ཁྱིམ་དུ་བསྐྱོད་དེ་གཟའ་ཉི་མར་སློབ་གྲྭར་ལོག་གི་ཡོད།

ཡ་ང་བའི་འཚར་ལོངས་བརྒྱུད་རིམ་དེས་ཀྲུའུ་ཧའོ་ཕྲུ་གུ་གཞན་ལས་རང་རྐྱ་འཕེར་ཆེ་བ་མ་ཟད། ད་དུང་བློ་སྟོབས་ཀྱང་ཆེ་བའི་གཤིས་རྒྱུད་འཇགས། ནད་གཞི་ཕོག་སྐབས་རང་ཉིད་གཅིག་པུ་སྨན་ཁང་དུ་བསྐྱོད་པ་དང་དུས་ཐོག་ཏུ་སྨན་བཟའ་གི་ཡོད། ཁྱིམ་བདག་ཚོགས་འདུར་ཀྲུའུ་ཧའོ་ཡི་ཁྱིམ་བདག་ཡོང་མཁན་མེད་པས་ཁོང་གིས“སློབ་མའི་འཐུས་མི”བྱས་ཏེ་དགེ་རྒན་གྱི་བཀའ་སློབ་རྣམས་ཟིན་ཐོར་འགོད་ཀྱི་ཡོད། ཉལ་ཁང་གཅིག་པའི་སློབ་གྲོགས་ཀྱི་གྱོན་གོས་རལ་ཚེ་ཀྲུའུ་ཧའོ་ཡིས་འཚེམ་རོགས་དང་ཁོང་ཚོར་སྦྱོང་ཚན་མ་ཤེས་པ་རྣམས་ངང་རྒྱུད་རིང་པོས་སློབ་པ་སོགས་བྱེད་ཀྱི་ཡོད།

ནན་ཏན་དང་འགན་འཁུར་གྱི་རྣམ་འགྱུར་ལས་དགེ་སློབ་ཚོས་ཀྲུའུ་ཧའོ་འཛིན་གྲྭའི་སྡེ་ཚོགས་ཀྲི་ཧྲུའུ་ལ་བདམས། འགན་ཁུར་རྗེས་ཁོང་གིས་སློབ་མ་ཚོ་ཁྲིད་དེ་གུང་གཞོན་ཚོགས་པའི་སྒྲིག་ཡིག་སྦྱོང་བ་དང་བྱེད་སྒོའི་ཇུས་གཞི་བཟོ་གི་ཡོད། ལུས་རྩལ་འགྲན་ཚོགས་ཐོག་ཀྲུའུ་ཧའོ་ནི་ལུས་རྩལ་པ་ཞིག་ཡིན་ལ། རྒྱབ་ཕྱོགས་མཁོ་སྒྲུབ་མཁན་ཞིག་ཀྱང་ཡིན་པས་གཞན་ལ་རོགས་པ་བྱ་རྒྱུར་ཧ་ཅང་དགའ་བའི་ལོ་ཆུང་ཞིག་ཏུ་གྱུར།

དང་བླངས་ཞབས་ཞུའི་ཁྲོད་ཀྱི་སེམས་རྩ་འཁོལ་བའི་ཕོ་ཉ།

ད་ལོའི་དགུན་གསེང་སྐབས་ཀྲུའུ་ཧའོ་ཀན་སུའུ་ཕིང་ལེང་དུ་སྤོ་བོ་དང་རྨོ་བོར་ལྟ་བར་བསྐྱོད། ཕིང་ལེང་རླངས་འཁོར་འབབ་ཚུགས་སུ་བྲེལ་འཚུབ་ཆེན་པོས་སྐྱོད་བཞིན་པའི་ཡུལ་སྐོར་བ་མཐོང་སྐབས་ཁོང་གིས་ཕྱིར་གླ་པ་རྒྱུག་པའི་ཕ་མ་གཉིས་ཡིད་ལ་འཁོར། དེ་མུར་ཁོང་གིས་ཕིང་ལེང་གྲོང་ཁྱེར་གྱི་2025ལོའི་གཞོན་ནུ་དང་བླངས་པའི་ཞབས་ཞུའི་དཔྱིད་གསར་སྐྱེལ་འདྲེན་གྱི“དགུན་དུས་དྲོ་སྐྱིད་སྦྱིན་པའི་བྱ་སྤྱོད”ནང་ཞུགས་རྒྱུའི་རེ་ཞུ་ཕུལ་བ་རེད།

ཉིན་བཅུ་ལྷག་ཙམ་གྱི་རིང་། ཀྲུའུ་ཧའོ་ཡིས་སྟོད་གོས་དམར་པོ་གྱོན་ནས་རྒན་རྒོན་ལ་རྡོག་ཁྲེས་དབོར་རོགས་དང་། འགྲུལ་པར་སྡོད་ས་འཚོལ་རོགས། གྲང་རླུང་ཁྲོད་སྤ་སེ་བཤེར་རོགས། ཚ་དམ་ཁྱེར་ནས་ཚང་མར་ཆུ་ཚ་པོ་བླུགས་རོགས་སོགས་བྱེད་ཀྱི་ཡོད།

ཕིང་ལེང་རླངས་འཁོར་འབབ་ཚུགས་ཀྱི་དཔྱིད་གསར་སྐྱེལ་འདྲེན་གྱི་མི་ཚོགས་ཁྲོད་རྒན་རྒོན་མི་ཉུང་བ་ཞིག་གིས་ཁྲ་ཆིལ་ཆིལ་གྱི་བརྙན་ཤེལ་མདུན་དུ་ཅི་བྱ་གཏོལ་མེད་ངང་སྤ་སེ་ལག་ཏུ་བཟུང་ནས་ཞིབ་བཤེར་བྱ་ཡུལ་དུ་ཕར་འགྲོ་ཚུར་འོང་བྱེད་ཀྱི་ཡོད། ཡི་གེ་གསལ་པོ་མི་ཤེས་པ་དང་ཁ་ཕྱོགས་ཀྱང་ཧ་མི་གོ་བས་དངངས་སྐྲག་ཆེན་པོ་ལངས་ཤས་ཆེ་བར་སྙམ་ནས། ཀྲུའུ་ཧའོ་ཡིས་སྨྱུག་ཤོག་ཁྱེར་ཏེ་དམར་རྟགས་ཆེན་པོ་ཞིག་བརྒྱབ་ནས་ཞིབ་བཤེར་བྱ་ཡུལ་དང་། ལྗང་རྟགས་ཀྱིས་འགྲོ་ལམ། སྔོན་རྟགས་ཀྱིས་གསང་སྤྱོད་མཚོན་པར་བྱས་པ་མ་ཟད། ཨང་ཀི་ཆེན་པོ་ཞིག་བྲིས་ཐོག“འཛུལ་སྒོ”དང“ཐོན་སྒོ”སོགས་ཀྱི་རྒྱ་ཡིག་གསལ་པོ་བཀོད་པས་འཕྲལ་དུ་ཤེས་སླའི“ལམ་སྟོན་གཱ”ཞིག་གྲུབ།

མེ་འཁོར་འབབ་ཚུགས་ཀྱི་ལས་དོན་པས་ལམ་སྟོན་གཱ་དེ་པར་བརྒྱ་གྲངས་བརྒྱབ་སྟེ་རླངས་འཁོར་སྒུག་མཁན་གྱི་རྒན་རྒོན་དང་དང་བླངས་པར་སྤྲད་པ་མ་ཟད། ལམ་སྟོན་གཱ་དེ་མེ་འཁོར་འབབ་ཚུགས་ཀྱི་མངོན་གསལ་ཆེ་སར་ཡང་སྦྱར་བ་རེད།

ལྷག་བསམ་རྣམ་དག་གིས་མི་རིགས་ཀྱི་བརྩེ་སེམས་ཟབ་ཏུ་བཏང་།

རྫ་ཡུལ་རྫོང་སློབ་འབྲིང་གི་སློབ་ཁང་ནང་བོད་རིགས་དང་། རྒྱ་རིགས། ལྷོ་པ་རིགས། ཧུད་རིགས་སོགས་མི་རིགས་ཀྱི་སློབ་མ་ཡོངས་ཧ་ཅང་འཆམ་པོ་ཡོད། སློབ་མ་ཀྲུའུ་ཧའོ་ཡིས“མི་རིགས་ཁག་སེ་འབྲུའི་རྡོག་ལྟར་གོང་བུ་གཅིག་ཏུ་སྒྲིལ་དགོས”ཞེས་པའི་རྒན་ལགས་ཀྱི་བཀའ་སློབ་སེམས་ནང་རྟག་ཏུ་བརྟན་པོར་ངེས་ནས་ཡོད། འཛིན་གྲྭའི་ལྷོ་པ་རིགས་གྱི་སློབ་མ་གཅིག་སློབ་གྲྭར་སླེབས་སྐབས་སྐད་བརྡ་མི་འཕྲོད་པའི་རྐྱེན་གྱིས་རོགས་པ་མེད་པར་ལུས་པ་དང་སློབ་སྦྱོང་རྗེས་ཟིན་གྱི་མེད། སློབ་མ་ཀྲུའུ་ཧའོ་ཡིས་རང་འགུལ་ངང་ཁོང་དང་གྲལ་མཚེས་བྱས་ཏེ་ཉིན་གུང་གི་ངལ་གསོའི་དུས་ཁོང་ལ་རྒྱ་ཡིག་དང་ཨང་རྩིས་སློབ་པ་དང་། སློབ་གསེང་གི་སྐབས་སུ་ཁོང་ཁྲིད་ནས་བོད་རིགས་ཀྱི་སྲོལ་རྒྱུན་རྩེད་མོ་རྩེ་བ་དང་གཟའ་མཇུག་ཏུ་ཁྱིམ་དུ་ཁྲིད་དེ་གངས་ལྗོངས་ས་མཐོའི་གཏམ་རྒྱུད་ཤོད་ཀྱི་ཡོད།

དེ་ལྟར་བྱས་པས་ལྷོ་པ་རིགས་ཀྱི་སློབ་མ་དེའི་སེམས་ཁམས་གུ་ཡངས་པོར་གྱུར་བ་མ་ཟད། རྒྱ་སྐད་ཀྱང་ཡག་པོ་རྒྱག་ཐུབ་པ་དང་ཨང་རྩིས་ཀྱི་སྦྱངས་འབྲས་ཀྱང་འཛིན་གྲྭའི་ཨང་20པར་སླེབས་ལ། ཁོང་གཉིས་ཀྱང་གྲོགས་པོ་བློས་ཐུབ་ཅིག་ཏུ་གྱུར།

“ཀྲུའུ་ཧའོ་ནི་ང་ཚོའི་སྤོབས་པ་ཞིག་རེད”ཅེས་འཛིན་གྲྭའི་ཀྲུའུ་རེན་ཆོས་སྒྲོན་གྱིས་སློབ་མ་དེའི་སྐོར་གླེང་སྐབས་སྤོབས་སེམས་ཀྱིས་ཁེངས་བཞིན་དུ་བཤད། རྫ་ཡུལ་རྫོང་སློབ་འབྲིང་གི་གཟི་བརྗིད་པར་སྒྲོམ་ཐོག་ཀྲུའུ་ཧའོ་ཡི་པར་སྦྱར་འདུག་ལ། “བཟང་པོ་ལྔ་ལྡན་གྱི་སློབ་མ”ནས་དང་བླངས་ཞབས་ཞུའི་དཔེ་དམག་བར་གྱི་གཟི་བརྗིད་མཚན་སྙན་རེ་རེ་ལས་ཁོང་གི་འབད་བརྩོན་ལ་བདེན་དཔང་བྱེད་བཞིན་ཡོད།