ཉེ་ཆར། རྒྱལ་ཁབ་བསྡོམས་རྩིས་ཅུས་ཀྱིས་གྲངས་གཞི་ཁྱབ་བསྒྲགས་བྱས་པར། 2025ལོར་རྒྱལ་ཡོངས་སུ་སྔ་སྨིན་འབྲས་ཀྱི་འདེབས་ཁྱོན་བརྟན་འཁྱོངས་རྨང་གཞིའི་ཐོག་ཅུང་ཟད་ཆག་པ་དང་མུའུ་རེའི་ཐོན་ཚད་འཕར་ནས་སྔ་སྨིན་འབྲས་ཀྱི་ཐོན་ཚད་རྒྱ་མ་དུང་ཕྱུར་570.3ཟིན་པ་དེ་2024ལོ་ལས་རྒྱ་མ་དུང་ཕྱུར་6.8འཕར་ནས་1.2%མང་དུ་སོང་ཡོད་པ་རེད།

2025ལོར་རྒྱལ་ཡོངས་ཀྱི་སྔ་སྨིན་འབྲས་ཀྱི་འདེབས་ཁྱོན་མུའུ་ཁྲི་7114.3ཟིན་པ་དེ་ལོ་གོང་མ་ལས་མུའུ་ཁྲི་17.9ཆག་ནས་0.3%ཆག་སྟེ་སྤྱི་ཡོངས་ནས་བརྟན་འཁྱོངས་ཐུབ་ཡོད། ད་ལོ་རྒྱལ་ཁབ་ཀྱིས་འབྲུ་རིགས་ཐོན་སྐྱེད་ལ་རྒྱབ་སྐྱོར་བྱེད་ཤུགས་སྔར་བས་ཆེ་རུ་བཏང་ནས་སྔ་སྨིན་ཞན་ཏའོ་འབྲས་ཀྱི་ཉོ་སྒྲུབ་རིན་གོང་དམའ་ཤོས་མུ་མཐུད་སྤར་བ་དང་། ཞིང་པའི་འབྲུ་འདེབས་སྔོན་དཔག་བརྟན་དུ་གཏོང་བ། ཞིང་པའི་འདེབས་འཛུགས་ཀྱི་ཧུར་སེམས་སྐོང་འཐེན་བཅས་བྱས་ཡོད། ས་གནས་ཁག་གིས་འབྲུ་རིགས་ཐོན་སྐྱེད་ཀྱི་འགན་འཁྲི་རིམ་བཞིན་ནན་དུ་བཏང་ནས་འབྲེལ་ཡོད་ཀྱི་སྲིད་ཇུས་བྱེད་ཐབས་ལེ་ལག་ཚང་པོས་བཏོན་པ་དང་། འབྲུ་རིགས་ཐོན་སྐྱེད་རྫོང་ཆེན་ལ་བྱ་དགའ་སྤྲོད་པ་སོགས་ཀྱི་རྣམ་གྲངས་ཀྱི་མ་དངུལ་སྤྱི་འདོམས་བྱས་ནས་སྔ་སྨིན་འབྲས་ཐོན་སྐྱེད་ལ་རྒྱབ་སྐྱོར་དང་འགན་ལེན་བྱས་ཡོད། ས་ཁུལ་ཁག་གཅིག་ལ་དཔྱིད་འདེབས་རིང་ཐན་སྐྱོན་ཕོག་ཚད་ཅུང་ཆེ་བས་སྔ་སྨིན་འབྲས་དུས་བསྟུན་སྤོ་འཛུགས་ལ་ཤུགས་རྐྱེན་ཐེབས་པ་དང་། ཞིང་དུད་ཀྱིས་ལོ་ཏོག་གཞན་དག་འདེབས་པ། སྔ་སྨིན་འབྲས་ཀྱི་འདེབས་ཁྱོན་ཅུང་ཆག་པ་བཅས་བྱུང་ཡོད་ནའང་། སྲིད་ཇུས་རབ་དང་རིམ་པའི་རྒྱབ་སྐྱོར་འོག་རྒྱལ་ཡོངས་ཀྱི་སྔ་སྨིན་འབྲས་ཀྱི་འདེབས་ཁྱོན་ལོ་6རིང་སྔར་བཞིན་མུའུ་ཁྲི་7100ཙམ་བརྟན་པོ་བྱུང་ཡོད།

2025ལོར། རྒྱལ་ཡོངས་ཀྱི་སྔ་སྨིན་འབྲས་ཀྱི་མུའུ་རེའི་ཐོན་ཚད་སྤྱི་རྒྱ་400.8ལྷག་ཙམ་ཟིན་པ་དེ་ལོ་གོང་མ་ལས་མུའུ་རེར་སྤྱི་རྒྱ་5.8འཕར་ནས་འཕར་ཚད་1.5%ཟིན་པ་དང་མུའུ་རེའི་ཐོན་ཚད་ཐེངས་དང་པོར་སྤྱི་རྒྱ་400ལྷག་ཙམ་ཟིན་ཡོད། ས་ཁུལ་དབྱེ་ནས་བལྟས་ན། སྔ་སྨིན་འབྲས་ཐོན་སྐྱེད་ཞིང་ཆེན(རང་སྐྱོང་ལྗོངས)10ཡི་ཁྲོད་ཧའེ་ནན་ལ་རྒྱ་མཚོའི་རླུང་འཚུབ་དྲག་པོའི་ཤུགས་རྐྱེན་ཕོག་ནས་མུའུ་རེའི་ཐོན་ཚད་ཅུང་ཟད་ཙམ་ཆག་པ་ཕུད། ཞིང་ཆེན(རང་སྐྱོང་ལྗོངས)གཞན་དག་9ཡི་མུའུ་རེའི་ཐོན་ཚད་ཚད་གཞི་མི་འདྲ་བའི་སྒོ་ནས་འཕར་ཡོད། ད་ལོ་སྔ་སྨིན་འབྲས་བཏབ་ཚུན། འབྲི་ཆུའི་ལྷོ་རྒྱུད་དང་ཧྭ་ནན་གྱི་ཐོན་ཁུལ་གཙོ་བོའི་ཉི་འོད་དང་། དྲོད་ཚད། བཞའ་ཚན་བཅས་སྙོམས་སྒྲིག་ཡག་པོ་བྱུང་ནས་ཁྱབ་ཁོངས་ཆེ་བའི“དཔྱིད་གྲང”དང“ཆུ་ལོག”སོགས་ཀྱི་རང་བྱུང་གནོད་འཚེ་སྤྱིར་ན་ཕོག་མེད་པ་དང་། ནད་འབུའི་གནོད་སྐྱོན་ཐོན་ཚད་ཅུང་ཆུང་བས་སྔ་སྨིན་འབྲས་སྐྱེ་འཚར་དང་ཐོན་ཚད་ལ་ཕན་ཐོགས་ཡོད་པ་རེད། ལོ་ཏོག་སྨིན་ནས་རྔ་བསྡུའི་དུས་སུ་སླེབས་རྗེས་སྔ་སྨིན་འབྲས་ཀྱི་ཐོན་ཁུལ་གཙོ་བོར་གནམ་དྭངས་ནས་སྔ་སྨིན་འབྲས་སྨིན་པ་དང་བསྡུ་བར་ཕན་ཐོགས་ཡོད་པ་མ་ཟད། སྤུས་ཚད་ཀྱང་མཐོ་རུ་འགྲོ་བར་ཕན་ཐོགས་ཡོད། ས་གནས་ཁག་གིས་ཆུ་འབྲས་ཀྱི་གཞི་ཁྱོན་ཆེ་བའི་མུའུ་རེའི་ཐོན་ཚད་མཐོར་གཏོང་གི་བྱ་སྤྱོད་ལ་སྐུལ་འདེད་ཧུར་ཐག་གཏོང་བ་དང་། གཅིག་སྡུད་ལྗང་གསོའི་བསྡུར་ཚད་མཐོ་རུ་གཏོང་བ། འཕྲུལ་འཁོར་གྱིས་ལྗང་པ་འདེབས་པ་དང་སོན་གཏོར་བ་སོགས་ཀྱི་འགག་རྩའི་ལག་རྩལ་བྱེད་ཐབས་དོན་འཁྱོལ་བཅས་བྱས་ནས་སྔ་སྨིན་འབྲས་ཀྱི་མུའུ་རེའི་ཐོན་ཚད་མཐོ་རུ་འགྲོ་རྒྱུར་སྐུལ་འདེད་བཏང་ཡོད།