ཤིན་ཧྭ་གསར་འགྱུར་ཁང་པེ་ཅིང་ནས་ཟླ་8ཚེས་24ཉིན་གློག་འཕྲིན་འབྱོར་གསལ། གསར་འགོད་པར་ཀྲུང་གོ་མི་དམངས་ཀྱི་རི་འགོག་དམག་འཁྲུག་དང་འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་ཐོབ་ནས་ལོ་ངོ་80འཁོར་བར་དྲན་གསོ་ཞུ་བའི་བྱེད་སྒོའི་གསར་འགྱུར་ལྟེ་གནས་ནས་ཤེས་རྟོགས་བྱུང་བར། ཟླ་8ཚེས་23ཉིན་གྱི་ཆུ་ཚོད་17པ་ནས་ཟླ་8ཚེས་24ཉིན་གྱི་ཆུ་ཚོད་5པའི་བར། པེ་ཅིང་གནམ་བདེ་སྒོ་མོ་ཆེའི་ཁུལ་དུ་ཀྲུང་གོ་མི་དམངས་ཀྱི་རི་འགོག་དམག་འཁྲུག་དང་འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་ཐོབ་ནས་ལོ་ངོ་80འཁོར་བར་དྲན་གསོ་ཞུ་བའི་ཚོགས་ཆེན་གྱི་ནང་སྦྱོང་ཐེངས་གསུམ་པ་བྱས་ཤིང་། ངོ་སྤྲོད་བྱས་པར་གཞིགས་ན། འདི་ནི་བརྒྱུད་རིམ་ཧྲིལ་པོ་དང་གཙོ་རྒྱུ་ཀུན་འདུས་ཀྱི་གྲ་སྒྲིག་ནང་སྦྱོང་ཞིག་ཡིན་ལ། དྲན་གསོའི་ཚོགས་ཆེན་གྱི་ཕྱོགས་བསྡུས་ནང་སྦྱོང་མཐའ་མ་ཡང་ཡིན་པ་དང་། དེའི་ནང་དྲན་གསོའི་ཚོགས་ཆེན་གྱི་མཛད་སྒོ(དམག་གཟིགས་ཚུད་པ)དང་། གནས་སྤོ། ལྟད་མོ་བ་སྒྲིག་འཛུགས། དེ་བཞིན་འཕྲལ་སྡོམ་ཐག་གཅོད་སོགས་ཀྱི་ནང་དོན་ཁག་ཚུད་ཡོད་པ་དང་། བརྒྱུད་རིམ་ཁག་དང་ལྷུ་ཚིག་ཁག་གི་འབྲེལ་མཐུད་གཞོགས་འདེགས་ལ་གཙོ་གནད་ཐོག་ཞིབ་དཔྱད་བྱས་ནས། བྱེད་སྒོ་དངོས་གྲུབ་འབྲས་ཐོབ་པའི་ངང་གཉེར་བར་རྨང་གཞི་བརྟན་པོ་བཏིང་ཡོད་པ་རེད།

མཚན་མོའི་གནམ་བདེ་སྒོ་མོ་ཆེའི་ཐང་ཆེན་དུ་གློག་འོད་ཆེམ་ཆེམ་འཕྲོ་བ་དང་། དམག་མིའི་རོལ་དབྱངས་ཁྲོད་ཀྱི་གཟིགས་སྦྲེང་དམག་དཔུང་རྔམ་བརྗིད་ལྡན་པ་ཞིག་ཡོད། ནང་སྦྱོང་བྱ་ཡུལ་གྱི་ལྷུ་ཚིགས་ཁག་སྒྲིག་འཛུགས་གོ་རིམ་ལྡན་པ་དང་། སྤོ་སྒྱུར་དམ་ཚགས། འཁོར་སྐྱོད་བདེ་བླག་བཅས་བྱུང་ནས་སྔོན་དཔག་གི་དམིགས་ཚད་གྲུབ་ཡོད། པེ་ཅིང་གྲོང་ཁྱེར་གྱི་འབྲེལ་ཡོད་ཕྱོགས་ཀྱིས་རྒྱ་ཆེའི་གྲོང་མི་དང་ཡུལ་སྐོར་བས་རྒྱབ་སྐྱོར་བྱས་པར་སྙིང་དབུས་ནས་ཐུགས་རྗེ་ཆེ་ཞུས་པ་རེད།