གངས་ལྗོངས་ས་ཕྱོགས་གང་སར་དགའ་སྤྲོས་མྱོས། སེམས་ནུས་བསྒྲིལ་ནས་ལེ་ཚན་གསར་པ་བཏོད།

ཟླ་8ཚེས་21ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་བོད་རང་སྐྱོང་ལྗོངས་དབུ་བརྙེས་ནས་ལོ་ངོ་60འཁོར་བའི་རྟེན་འབྲེལ་ཚོགས་ཆེན་ལ་ཞུགས་པ་རེད། རྟེན་འབྲེལ་ཚོགས་ཆེན་ཐོག་ཀྲུང་གུང་ཀྲུང་དབྱང་དང་། རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་། རྒྱལ་སྲིད་སྤྱི་ཁྱབ་ཁང་། རྒྱལ་ཡོངས་སྲིད་གྲོས། ཀྲུང་དབྱང་དམག་ཨུད་བཅས་ཀྱི་རྟེན་འབྲེལ་གློག་འཕྲིན་སྒྲོག་སྦྱངས་བྱས་པ་མ་ཟད། བོད་རང་སྐྱོང་ལྗོངས་ལ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཕྱག་བྲིས་ཕྱག་བསྟར་མ“ཀྲུང་ཧྭ་མི་རིགས་གཅིག་མཐུན་ཚོགས་པ་མཉམ་དུ་བཏོད་ནས་མཛེས་སྡུག་ལྡན་པའི་བོད་ལྗོངས་ཀྱི་ལེ་ཚན་གསར་པ་རྩོམ་དགོས”ཞེས་པའི་རྟེན་འབྲེལ་སྒོ་བན་བསྩལ་བ་རེད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་སྐུ་ངོ་མ་བོད་དུ་ཕེབས་ནས་རྟེན་འབྲེལ་ཚོགས་ཆེན་ལ་ཞུགས་གནང་བ་ལས་བོད་ཀྱི་མི་རིགས་ཁག་དང་ལས་རིགས་ཁག་གི་ལས་བྱེད་པ་དང་མང་ཚོགས་དགའ་སྤྲོ་དཔག་མེད་བྱུང་བ་དང་སྐུལ་ལྕག་ཆེན་པོ་ཐེབས་པ་མ་ཟད། མི་རིགས་ས་ཁུལ་ཁག་གི་ལས་བྱེད་པ་དང་མང་ཚོགས་ཚོས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་མི་རིགས་ས་ཁུལ་གྱི་འཕེལ་རྒྱས་ལ་ཚད་མཐོའི་མཐོང་ཆེན་གནང་ལུགས་གང་ལེགས་ཚོར་ཡོད། ཚང་མས། སེ་འབྲུའི་རྡོག་ལྟར་གོང་བུ་གཅིག་ཏུ་བསྒྲིལ་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་རྒྱུན་ཆད་མེད་པར་བརྟན་པོར་བཙུགས་ཏེ། ཀྲུང་གོའི་ལུགས་ཀྱི་དེང་རབས་ཅན་གྱི་རྒྱང་ལམ་གསར་པར་མཐུན་སྒྲིལ་འབད་འཐབ་བྱེད་ཀྱི་ཡིན་ཞེས་གཅིག་རྗེས་གཉིས་མཐུད་དུ་བརྗོད།

སྤྱི་ཁྱབ་ཧྲུའུ་ཅི་དང་ཏང་གི་བཀའ་དྲིན་དུས་རྟག་ཏུ་བློ་ལ་བརྟན་པོར་ངེས་པ།

རྟེན་འབྲེལ་ཚོགས་ཆེན་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་མཇལ་སྐབས་བོད་ལྗོངས་མེ་ཏོག་རྫོང་ནས་ཡོང་བའི་པད་མ་ཆོས་སྒྲོན་སེམས་འགུལ་ཚད་མེད་ཐེབས།

2013ལོའི་རྒྱལ་ཡོངས་ཚོགས་འདུ་གཉིས་རིང་བོད་ཀྱི་འཐུས་མི་ཚོགས་པའི་འཐུས་མི་དང་སྤེལ་རེས་གནང་སྐབས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་འཐུས་མི་པད་མ་ཆོས་སྒྲོན་ལ་མེ་ཏོག་གི་གཞུང་ལམ་འཛུགས་སྐྲུན་སྐོར་བཀའ་འདྲི་གནང་།

པད་མ་ཆོས་སྒྲོན་གྱིས“སྤྱི་ཁྱབ་ཧྲུའུ་ཅི་སླར་ཡང་མཇལ་སྐབས། གུས་མོས་མེ་ཏོག་གི་གཞུང་ལམ་ཐོག་རླངས་འཁོར་ཤར་གཏོང་ཐུབ་སྟེ། ལོ་འདི་དག་རིང་གཞུང་ལམ་ནི་ཚང་མའི་ཕྱུག་འགྱུར་ལམ་བུར་གྱུར་ཡོད་ཅེས་སྙན་སེང་ཞུ་འདོད་བྱུང”ཞེས་བརྗོད།

“མེ་ཏོག་ཙམ་མ་ཟད། ལོ་ངོ་60ཡི་རིང་། བོད་ཀྱི་གང་སར་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་ཡོད། ཀྲུང་གོ་གུང་ཁྲན་ཏང་མེད་ན་ཀྲུང་གོ་གསར་པ་མེད་ལ། བོད་ལྗོངས་གསར་པ་དེ་བས་ཀྱང་མེད་པ་ང་ཚོས་གསལ་པོར་ཤེས་ཀྱི་ཡོད”ཅེས་པད་མ་ཆོས་སྒྲོན་གྱིས་བརྗོད།

ཞལ་ཁ་ལྷུག་པོར་གྲོལ་བའི་སྐལ་བཟང་མེ་ཏོག་ནི་ས་མཐོའི་འཛུམ་མདངས་ལྟ་བུ་ཡིན་པ་དང་། ཏང་གིས་མི་དམངས་ཀྱི་སྣེ་ཁྲིད་དེ་མཐུན་སྒྲིལ་འབད་འཐབ་བྱས་པ་ནི་བདེ་སྐྱིད་ཀྱི་འབྱུང་རྩ་རེད།

“སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཁས་མཛངས་ལྡན་པའི་འགོ་ཁྲིད་འོག བོད་ལ་འགྱུར་ལྡོག་དེ་བས་ཆེ་བ་བྱུང་ཡོད” “ང་ཚོའི་འཚོ་བ་ཇི་ཙམ་བསྐྱལ་བ་དེ་ཙམ་གྱིས་ལེགས་སུ་ཕྱིན་པ་དང་ཇི་ཙམ་བསྐྱལ་བ་དེ་ཙམ་གྱིས་སྐྱིད་དུ་སོང” རྟེན་འབྲེལ་ཚོགས་ཆེན་ཐོག ལྷ་ས་གྲོང་ཁྱེར་ཁྲེང་ཀོན་ཆུས་ནས་ཡིན་པའི་སྒྲོལ་མ་རིག་འཛིན་གྱིས་མང་ཚོགས་ཀྱི་ཚབ་བྱས་ཏེ་གཏམ་བཤད་སྤེལ་ཞིང་། ཁོང་གིས་རང་གི་མྱོང་བ་དངོས་དང་ཟུང་འབྲེལ་བྱས་ཏེ། བོད་ལྗོངས་མི་དམངས་ཀྱི་ལོ་ངོ་60ཡི་རིང་དང་། ལྷག་པར་དུ་དུས་རབས་གསར་པར་སླེབས་ཚུན། ཀྲུང་གོ་གུང་ཁྲན་ཏང་གི་རྗེས་སུ་འབྲངས་ནས་འབད་འཐབ་ལྷོད་མེད་ཀྱིས་བདེ་སྐྱིད་ལྡན་པའི་འཚོ་བ་དོན་གཉེར་བྱེད་པའི་བརྗེད་པར་དཀའ་བའི་ལོ་ཟླར་ཕྱིར་དྲན་བྱས།

“ད་ཆའི་བདེ་སྐྱིད་ལྡན་པའི་འཚོ་བ་ནི་ཏང་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ང་ཚོར་གནང་བ་ཞིག་ཡིན་པ་ང་ཚོས་གསལ་པོར་ཤེས་ཀྱི་ཡོད། ཏང་གི་བཀའ་དྲིན་ཚོར་བ་དང་ཏང་གི་རྗེས་སུ་འབྲང་བ་ནི་ང་ཚོ་བོད་ཀྱི་མི་སེར་ཚོའི་ཐུན་མོང་གི་སེམས་གཏམ་ཡིན”ཞེས་རྟེན་འབྲེལ་ཚོགས་ཆེན་མཇུག་འགྲིལ་རྗེས། སྒྲོལ་མ་རིག་འཛིན་གྱིས་སྔར་བཞིན་སེམས་འགུལ་ཚད་མེད་ཐེབས་བཞིན་བརྗོད།

“ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་སྐུ་ངོ་མས་བོད་ཀྱི་ལས་དོན་ལ་ཁ་སྒྱུར་ཕྱོཌ་སྟོན་དང་འཐབ་འགོད་ཇུས་འདོན་གནང་བས། བོད་འདི་ཉིད་འཕེལ་རྒྱས་ཡག་ཤོས་དང་། འགྱུར་ལྡོག་ཆེ་ཤོས། མི་རིགས་ཁག་གི་མང་ཚོགས་ལ་ཕན་པ་དངོས་ཐོབ་མང་ཤོས་བཅས་ཀྱི་ལོ་རྒྱུས་ཀྱི་དུས་སྐབས་སུ་སླེབས་པ་དེ་ནི་ཏང་ཀྲུང་དབྱང་གིས་བློ་བརྟན་འགྱུར་མེད་ཀྱིས་འགོ་ཁྲིད་གནང་བའི་འབྲས་བུ་རེད”ཅེས་ཀྲུང་དབྱང་མི་རིགས་སློབ་ཆེན་བོད་རིག་པ་ཞིབ་འཇུག་གླིང་གི་ཡོན་ཀྲང་འབྲུག་ལྷས་བརྗོད་པ་དང་། ཁོང་གིས་དུས་རབས་གསར་པའི་ཏང་གི་བོད་སྐྱོང་མཛད་ཇུས་མུ་མཐུད་མཐའ་འཁྱོངས་ཡག་པོ་བྱེད་པ་དང་སྤྱི་ཁྱབ་ཧྲུའུ་ཅིའི་བོད་ཀྱིས“དོན་ཆེན་བཞིར”དམ་འཛིན་ཡག་པོ་བྱེད་དགོས་པའི་མངགས་བཅོལ་ཟབ་མོ་མུ་མཐུད་ཡག་པོ་བསྒྲུབས་ཚེ་བོད་ཀྱི་འབྱུང་འགྱུར་དེ་བས་མཛེས་སྡུག་ལྡན་པ་ཡོང་ངེས་རེད་ཅེས་བརྗོད།

གངས་ལྗོངས་ས་མཐོའི་དོན་ཆེན་དེ་ཐད་གཏོང་བརྒྱུད་ཀྲུང་གོའི་ས་གཞི་ཆེན་པོར་ཁྱབ་ཡོད་ལ། མི་རིགས་ཁག་དང་ལས་རིགས་ཁག་གི་མང་ཚོགས་ལ་སེམས་འགུལ་ཆེན་པོ་ཐེབས་ཡོད།

“དུས་རབས་གསར་པ་ཤར་ཚུན་བོད་ལྗོངས་ཙམ་མ་ཟད། མི་རིགས་ས་ཁུལ་ཁག་ཚང་མར་བདེ་སྐྱིད་དང་རེ་བས་ཁེངས་ཡོད”ཅེས་ཤིན་ཅང་ཡུ་གུར་རང་སྐྱོང་ལྗོངས་དབུ་བརྙེས་ནས་ལོ་ངོ་70འཁོར་བར་རྟེན་འབྲེལ་ཞུ་བའི་མི་སེར་གྱི་སྐོར་སྐྱོད་སྒྲོག་འགྲེལ་ཚོགས་པའི་ཁོངས་མི་ཐེན་ཅི་ཧྥང་གིས་མྱོང་ཚོར་ཟབ་མོས་བརྗོད།

“མི་རིགས་ས་ཁུལ་དར་རྒྱས་དང་གོང་འཕེལ་གཏོང་དགོས་ན། ཏང་གི་འགོ་ཁྲིད་མཐའ་འཁྱོངས་བྱ་རྒྱུ་ནི་འགག་རྩ་ཡིན་པ་ང་ཚོས་དོན་དངོས་མང་པོ་ལས་སྔར་བས་གསལ་པོར་ཤེས་བྱུང”ཞེས་ཐེན་ཅི་ཧྥང་གིས་བརྗོད་པ་དང་། ཁོང་གིས་སྒྲོག་འགྲེལ་པ་ཞིག་ཡིན་པའི་ངོས་ནས་ཏང་གི་གསུང་སྒྲ་མུ་མཐུད་ཁྱིམ་ཚང་ཁྲི་སྟོང་མང་པོར་ཁྱབ་པར་བྱས་ནས། ཚང་མས་བློ་བརྟན་འགྱུར་མེད་ངང་ཏང་དང་བློ་ཁ་གཅིག་མཐུན་དང་བསམ་སྦྱོར་གཅིག་མཐུན་ཡོང་བར་ཁྲིད་སྟོན་བྱེད་ཀྱི་ཡིན་ཞེས་བརྗོད།

མི་རིགས་མཐུན་སྒྲིལ་གྱི་རྨང་རྡོ་བརྟན་པོ་མཉམ་དུ་འདིང་བ།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གནང་བའི་ཕྱག་བྲིས་ཕྱག་བསྟར་མའི་རྟེན་འབྲེལ་སྒོ་བན་ཐོག་གི“ཀྲུང་ཧྭ་མི་རིགས་གཅིག་མཐུན་ཚོགས་པ་མཉམ་དུ་བཏོད་ནས་མཛེས་སྡུག་ལྡན་པའི་བོད་ལྗོངས་ཀྱི་ལེ་ཚན་གསར་པ་རྩོམ་དགོས”ཞེས་པའི་གསེར་འོད་འཕྲོ་བའི་ཡིག་འབྲུ་ཆེན་པོ་དག་ལས། སྤྱི་ཁྱབ་ཧྲུའུ་ཅིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་རྒྱུན་ཆད་མེད་པར་བརྟན་པོར་འཛུགས་པ་དང་མི་རིགས་མཐུན་སྒྲིལ་ཟབ་ཏུ་གཏོང་བར་ཐུགས་རེ་ཟབ་མོ་བཅོལ་གནང་ལུགས་མཚོན་ཡོད།

མཐུན་སྒྲིལ་གྱི་མེ་ཏོག་གང་སར་བཞད་ནས་མི་རིགས་ཀྱི“སེམས་མཐུན་སྒོར་མོ”མཉམ་དུ་བྲིས།

མོན་པ་རིགས་ཀྱི་བུ་མོ་ཚོས་སྲོལ་རྒྱུན་གྱི་རྒྱན་གོས་གྱོན་ནས་གཟབ་འཁོར་ཐོག་གླུ་ལེན་གར་འཁྲབ་བྱེད་པ་དང་། མངའ་རིས་ས་ཁུལ་ནས་ཡིན་པའི་བོད་རིགས་བུ་མོ་ཚོས་ལོ་རྒྱུས་ཡུན་རིང་ལྡན་པའི་ཤོན་འཁྲབ་པ་སོགས། རྟེན་འབྲེལ་ཚོགས་ཆེན་ཐོག་བོད་ཀྱི་མི་རིགས་ཁག་གི་མང་ཚོགས་རྣམས་ཁྱིམ་ཚང་གཅིག་ལྟར་བརྩེ་བའི་རྣམ་པ་ལས་ཉིང་ཞ་དབྱིན་ཁྲོན་གྲོང་ཁྱེར་ཅིན་ཧྥེང་ཆུས་ལྕགས་རི་རིང་པོ་ལྡུམ་རའི་སྡེ་ཁུལ་ཏང་ཨུད་ཀྱི་ཧྲུའུ་ཅི་ཀྲའོ་ནའེ་ཤང་ལ་བག་ཆགས་ཟབ་མོ་བྱུང་ཡོད།

“ང་ཚོའི་སྡེ་ཁུལ་ནི་མི་རིགས་མང་པོ་འདུས་སྡོད་ཀྱི་སྡེ་ཁུལ་ཞིག་ཡིན་པས། མི་རིགས་མི་འདྲ་བའི་གྲོང་མིའི་དབར་སྤེལ་རེས་དང་། འགྲོ་འོང་། མཉམ་འདྲེས་བཅས་ལ་སྐུལ་འདེད་གཏོང་རྒྱུ་ནི་ང་ཚོ་གཞི་རིམ་ལས་དོན་པའི་འགན་འཁྲི་ཡིན། ཏང་འཛུགས་སྐྱོང་གི་ཁྲིད་སྟོན་མུ་མཐུད་མཐའ་འཁྱོངས་བྱས་ཏེ་སྒར་རེས་རྣམ་པའི་སྤྱི་ཚོགས་ཀྱི་བཀོད་པ་དང་སྡེ་ཁུལ་གྱི་ཁོར་ཡུག་ཧུར་ཐག་སྐྲུན་པ་དང་། ‘མི་རིགས་མང་བའི་སྡེ་ཁུལ་གྱི་གྲོང་མིའི་དབར་ཁྱིམ་ཚང་གཅིག་ལྟར་བརྩེ་བའི’དཔེ་མཚོན་བཏོད་ནས་མི་རིགས་མཐུན་སྒྲིལ་ཡར་ཐོན་གྱི་རྣམ་པ་གསར་པ་གཏོད་པར་གཡས་གཞོགས་གཡོན་འདེགས་བྱེད་ཀྱི་ཡིན”ཞེས་ཀྲའོ་ནའེ་ཤང་གིས་བརྗོད།

མི་རིགས་མཐུན་སྒྲིལ་ནི་འཕེལ་རྒྱས་དང་ཡར་ཐོན་གྱི་རྨང་རྡོ་ལྟ་བུ་ཡིན།

ཡུན་ནན་ཤིས་ཧྲོང་པན་ན་ཏའེ་རིགས་རང་སྐྱོང་ཀྲོའུ་མོང་ལ་རྫོང་དུ་རྒྱ་རིགས་དང་། ཏའེ་རིགས། ཧ་ཉི་རིགས་སོགས་མི་རིགས་མང་པོ་འདུས་སྡོད་བྱས་ཡོད།

“མི་རིགས་མཐུན་སྒྲིལ་ལས་དོན་ལེགས་པར་སྒྲུབ་དགོས་པའི་གནས་ལུགས་མང་པོ་ཡོད་ཀྱང་མཐར་གཏུགས་ནས་བཤད་ན་དེ་ནི་མི་རིགས་ཁག་གི་མང་ཚོགས་གཉེན་ཉེར་བརྩིས་ནས་ཁོང་ཚོར་བྱ་བ་བཟང་པོ་བསྒྲུབ་རྒྱུ་དེ་རེད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཁྲིད་སྟོན་གནང་བའི་ཁ་ཕྱོགས་ཇི་བཞིན་མི་སེར་ལ་ཞབས་འདེགས་ཞུ་བའི་ལས་དོན་ཁག་གཏིང་ཟབ་དང་། ཞིབ་ཕྲ། གནད་ལ་འཁེལ་བ་བཅས་བསྒྲུབས་ཏེ། མི་རིགས་ཁག་གི་མང་ཚོགས‘གཅིག་ལ་གཅིག་འབྲེལ་དང་ཕན་ཚུན་མཉམ་འདྲེས’ཀྱི་ཁྱིམ་ཚང་གཅིག་ལྟར་བརྩེ་བའི་རྣམ་པ་རྒྱུན་ཆད་མེད་པར་སྲ་བརྟན་དུ་གཏོང་གི་ཡིན”ཞེས་མོང་ལ་རྫོང་ཨུད་ཀྱི་ཧྲུའུ་ཅི་ཀྲང་ཧྲི་དབྱིང་གིས་བརྗོད།

མཚོ་སྔོན་ཟི་ལིང་དུ་ལོ་ངོ་སྟོང་གི་ལོ་རྒྱུས་ལྡན་པའི་གནའ་བོའི་ཙོང་ཁ་དགོན་གྱིས་མི་རིགས་མཐུན་སྒྲིལ་ཡར་ཐོན་གྱི་ལོ་རྒྱུས་ལ་བདེན་དཔང་བྱས་ཡོད།

“ན་ནིང་སྤྱི་ཁྱབ་ཧྲུའུ་ཅི་ཞི་ཅིན་ཕིང་དགོན་སྡེར་བརྟག་ཞིབ་གནང་བར་ཕེབས་སྐབས‘ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་བཙུགས་ནས་མི་རིགས་མཐུན་སྒྲིལ་ཡར་ཐོན་ལ་སྐུལ་འདེད་གཏོང་ཆེད་ལེགས་སྐྱེས་གསར་པ་འབུལ་དགོས་པའི’བླང་བྱ་བཏོན་གནང་ཡོད། སྤྱི་ཁྱབ་ཧྲུའུ་ཅིའི་བཀའ་མངགས་ནི་ང་ཚོས་འབད་བརྩོན་བྱེད་པའི་ཁ་ཕྱོགས་ཡིན། སྤྱི་ཁྱབ་ཧྲུའུ་ཅི་ད་ཐེངས་བོད་དུ་ཕེབས་ནས་མཛུབ་སྟོན་གལ་ཆེན་གནང་བའི་དགོངས་དོན་ལ་གོ་བ་སྔར་བས་གཏིང་ཟབ་བླངས་ནས། རྒྱལ་གཅེས་ཆོས་གཅེས་ཀྱི་སྲོལ་རྒྱུན་བཟང་པོ་མུ་མཐུད་དར་སྤེལ་གཏོང་བ་དང་བོད་བརྒྱུད་ནང་བསྟན་ཀྲུང་གོ་ཅན་གྱི་མིག་དཔེའི་དགོན་སྡེ་ཞིག་བསྐྲུན་རྒྱུ་དམིགས་ཡུལ་དུ་བྱས་ཏེ། ཆབ་སྲིད་བརྟན་བརླིང་དང་། སྤྱི་ཚོགས་བརྟན་ལྷིང་། མི་རིགས་མཐུན་སྒྲིལ། ཆོས་ལུགས་ཞི་དུལ་བཅས་ལ་སྐུལ་འདེད་གཏོང་ཆེད་དགེ་མཚན་ལྡན་པའི་ནུས་པ་འདོན་གྱི་ཡིན”ཞེས་ཙོང་ཁ་དགོན་དམངས་གཙོ་དོ་དམ་ཨུ་ལྷན་གྱི་འགན་འཁུར་བ་སྒར་བ་ངག་དབང་བཟང་པོས་བརྗོད།

དེ་བས་བདེ་སྐྱིད་དང་མཛེས་སྡུག་ལྡན་པའི་འཚོ་བ་གསར་པ་གཏོད་པ།

རྟེན་འབྲེལ་ཚོགས་ཆེན་མཇུག་འགྲིལ་ཉེར་ཡོད་པའི་མཚམས་སུ“མ་འོངས་པར་མདུན་སྐྱོད་བྱེད”ཅེས་པའི་གཟབ་འཁོར་དལ་བུར་བསྐྱོད་ཡོང་ནས་ས་གནས་ས་ཐོག་གི་རྣམ་པ་སླར་ཡང་འཁྲུག་ཆ་དོད་དུ་ཕྱིན་ཡོད།

ད་ཆའི་བོད་ལ་དབྱར་མཚོ་རྒྱས་པ་ཇི་བཞིན་སྐྱེ་སྟོབས་ཀྱི་དཔལ་འབར་ཞིང་། བོད་ཀྱི་མི་དམངས་ཚོས་རྒྱལ་ཡོངས་ཀྱི་མི་དམངས་དུང་ཕྱུར་མང་པོ་དང་མཉམ་དུ་ཕུགས་འདུན་རླབས་པོ་ཆེ་མངོན་འགྱུར་བྱེད་པའི་ལམ་ཆེན་ཡངས་པོའི་ཐོག་ལག་གདང་སྦྲེལ་ནས་འབད་བརྩོན་བྱེད་བཞིན་ཡོད།

རྒྱ་ཆེ་ཞིང་དཀར་ཆ་དོད་པའི་སྡོད་ཁང་གསར་པའི་ནང་རྟེན་འབྲེལ་ཚོགས་ཆེན་གྱི་ཐད་གཏོང་ལ་ལྟ་སྐབས། བོད་ལྗོངས་གཞིས་རྩེ་གྲོང་ཁྱེར་དིང་རི་རྫོང་ཟིང་དཀར་གྲོང་ཚོའི་ཡུལ་མི་ཟླ་བ་ཚེ་རིང་ལ་མྱོང་ཚོར་ཟབ་མོ་བྱུང་ཡོད། འདི་ལོའི་ཟླ་དང་པོར་དིང་རི་རྫོང་དུ་ས་ཡོམ་རིམ་པ་6.8བརྒྱབ་ནས་ཟླ་བ་ཚེ་རིང་ཁྱིམ་གྱི་ཁང་པར་ཡང་གས་སྐྱོན་བྱུང་ཡོད། “རྒྱལ་ཡོངས་ས་གནས་ཁག་གི་སྤུན་ཟླ་ཚོས་ནུས་ཤུགས་ཡོད་རྒུས་རྒྱབ་སྐྱོར་བྱས་པར་བརྟེན་ང་ཚོ་གཞི་ནས་སྡོད་ཁང་གསར་པའི་ནང་མགྱོགས་པོ་སྤོ་ཐུབ་བྱུང”ཞེས་ཟླ་བ་ཚེ་རིང་གིས་བཤད།

“བདེ་སྐྱིད་དགོས་ན་འབད་འཐབ་བྱེད་དགོས། མི་མང་པོ་འདི་འདྲ་ཡིས་ང་ཚོར་སེམས་ཁུར་བྱེད་ཀྱི་ཡོད་པས། ང་ཚོས་ཕུ་ཐུང་བརྫེས་ནས་ངར་ཤུགས་བསྒྲིམས་ཏེ་ཕ་ཡུལ་དེ་བས་མཛེས་སྡུག་ལྡན་པར་འཛུགས་སྐྲུན་བྱེད་དགོས”ཞེས་ཟླ་བ་ཚེ་རིང་གིས་བརྗོད་ཅིང་། ཁོང་གིས་སྤྱི་ཁྱབ་ཧྲུའུ་ཅིའི“མཛེས་སྡུག་ལྡན་པའི་བོད་ལྗོངས་ཀྱི་ལེ་ཚན་གསར་པ་རྩོམ་དགོས”ཞེས་པའི་བླང་བྱ་བློ་ལ་བརྟན་པོར་ངེས་ནས། ཚང་མ་དང་མཉམ་དུ་མུ་མཐུད་འབད་བརྩོན་ཆེན་པོས་འཚོ་བ་དེ་བས་ཡག་ཐོག་ཡག་བརྩེགས་ཡོང་བར་བྱེད་ཀྱི་ཡིན་ཞེས་བཤད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བཀའ་མངགས་ལས་འགྲིམ་འགྲུལ་སྐྱེལ་འདྲེན་པུའུ་ནས་ཡོང་བའི་བོད་སྐྱོར་ལས་བྱེད་པ་ཐང་ཅི་ལུན་ལ་གོམ་སྟབས་རྗེས་མའི་ལས་ཀའི་ཁ་ཕྱོགས་གསལ་པོ་བྱུང་བ་སྟེ། ཁོང་གིས“མཛེས་སྡུག་ལྡན་པའི་བོད་ལྗོངས་ཀྱི་ལེ་ཚན་གསར་པ་རྩོམ་དགོས་ན‘ཚང་དགོས་པ་གསུམ་དང་ཕན་འདོགས་པ་གཅིག’གི་སྤྱིའི་བླང་བྱ་མུ་མཐུད་མཐའ་འཁྱོངས་བྱས་ཏེ། གསོ་རླུང་དཀོན་ཡང་སྙིང་སྟོབས་མི་ཉམས་པའི་འབད་འཐབ་ཀྱི་རྣམ་འགྱུར་ཐོག་ནས‘ལོ་ལྔ་ཚན་བཅོ་ལྔ་པའི’རིང་བོད་ཀྱི་འགྲིམ་འགྲུལ་བྱ་བ་མུ་མཐུད་ཡག་པོ་བསྒྲུབས་ཏེ། དམངས་སེམས་ལམ་བུ་དང་བདེ་སྐྱིད་ལམ་བུ་དེ་བས་མང་བ་བསྐྲུན་དགོས”ཞེས་བཤད།

ཞ་མོན་སློབ་ཆེན་གྱི་ཞོར་གཏོགས་སྨན་ཁང་དང་པོའི་བོད་སྐྱོར་སྨན་བཅོས་རུ་ཁག་གིས་ཉེ་བའི་ལོ་ཤས་རིང་བོད་ལྗོངས་མཛོ་སྒང་རྫོང་མི་དམངས་སྨན་ཁང་ལ་ཁ་གཏད་རོགས་སྐྱོར་བྱས་པ་རེད། “སྤྱི་ཁྱབ་ཧྲུའུ་ཅིའི་བཀའ་མངགས་དོན་འཁྱོལ་བྱས་ཏེ་ས་མཐོའི་མི་སེར་གྱི་བདེ་ཐང་སྲུང་བ་ནི་སྒྲུབ་འོས་པའི་ལས་འགན་ཡིན”ཞེས་ཞ་མོན་སློབ་ཆེན་གྱི་ཞོར་གཏོགས་སྨན་ཁང་དང་པོའི་ཡོན་ཀྲང་ཀྲང་ཧྥུའུ་ཤིང་གིས་བརྗོད་ཅིང་། ཁོང་གིས། སྨན་ཁང་གིས་རང་ངོས་ཀྱི་ལེགས་ཆར་གཞི་ཚུགས་པ་དང་དོན་དངོས་ཀྱི་དགོས་མཁོ་གཞིར་བཟུང་སྨན་བཅོས་རྐང་འཛིན་པ་མུ་མཐུད་འདེམས་གཏོང་བྱེད་པ་དང་། སྨན་བཅོས་ཀྱི་ཐོན་ཁུངས་སྤུས་ལེགས་མཉམ་སྤྱོད་ལ་རྒྱུན་ཆད་མེད་པར་སྐུལ་འདེད་བཏང་སྟེ་བོད་ཀྱི་མི་དམངས་ཀྱི་སྨན་བཅོས་འཕྲོད་བསྟེན་གྱི་ཆ་རྐྱེན་ལེགས་སུ་གཏོང་རྒྱུ་ཡིན་ཞེས་བཤད།

ཉེ་ཆར། ཤིས་ཨན་ཕྱི་དོན་སློབ་གླིང་གི་སློབ་མ་ཀྲང་ཅ་ཉིང་སློབ་ཆེན་སློབ་མའི་དང་བླངས་ཞབས་ཞུའི་ནུབ་རྒྱུད་འཆར་གཞི་བརྒྱུད་བོད་དུ་ཡོང་བ་རེད། “མཛེས་སྡུག་ལྡན་པའི་བོད་ལྗོངས་འཛུགས་སྐྲུན་བྱེད་པར་མི་རབས་རེ་རེས་རྒྱུན་མཐུད་ནས་མདུན་སྐྱོད་བྱེད་དགོས་པ་དང་། མེས་རྒྱལ་ལ་དྲིན་ལན་འཇལ་བ་ནི་དུས་རབས་གསར་པའི་ན་གཞོན་ལ་ལྡན་དགོས་པའི་ངང་ཚུལ་རེད། ངས་ལང་ཚོ་ནུབ་རྒྱུད་དུ་ཕུལ་ནས་ས་མཐོར་ལང་ཚོའི་རྔུལ་ཆུ་གཏོར་བ་དང་ལང་ཚོའི་ལེའུ་རྩོམ་རྒྱུ་ཡིན”ཞེས་ཁོང་གིས་བཤད།

“ང་ཚོའི་གཅེས་པར་འོས་པའི་མེས་རྒྱལ་ལ་བསྟོད་གླུ་འབུལ། ད་ནས་དར་རྒྱས་སྟོབས་འབྱོར་གྱི་ཕྱོགས་སུ་སྐྱོད”ཅེས《མེས་རྒྱལ་ལ་བསྟོད་གླུ་འབུལ》ཞེས་པའི་སྒྲ་དབྱངས་ལྷ་ས་ནས་ལྷང་ལྷང་གྲགས་ཏེ། རིམ་པར་ཕྱོགས་བཞི་མཚམས་བརྒྱད་དུ་ཁྱབ།

བརྙན་འཕྲིན་ནས་རྣ་ལ་འཇགས་པའི་འགྱུར་ཁུག་ལ་ཉན་བཞིན་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ལས་རིགས་ཁག་གི་མང་ཚོགས་ལ་ཕྱག་གཡུག་གཡུག་གནང་ནས་གུས་ལན་གནང་བ་མཐོང་སྐབས། ཀོང་ཤིས་ཀྲོང་རིགས་རང་སྐྱོང་ལྗོངས་པེ་ཧའེ་གྲོང་ཁྱེར་ཐེ་ཧྲན་ཀང་ཆུས་ཨུད་ཀྱི་ཧྲུའུ་ཅི་མོ་ཧྭ་ཧྥུའུ་ཡིས་སེམས་འགུལ་ཆེན་པོའི་ངང“མི་རིགས་མཐའ་མཚམས་ས་ཁུལ་གྱི་སྤུས་ཚད་མཐོ་བའི་འཕེལ་རྒྱས་ནི་སྤྱི་ཁྱབ་ཧྲུའུ་ཅིའི་ཐུགས་སུ་འཆང་བའི་བྱ་བ་ཆེན་པོ་ཞིག་རེད། ང་ཚོས་རྒྱལ་ཁབ་འཕེལ་རྒྱས་ཀྱི་སྤྱི་ཡོངས་ནང་མཉམ་འདྲེས་ཧུར་ཐག་བྱས་ཏེ་བློ་བརྟན་འགྱུར་མེད་ངང‘མཚོ་ཕྱོགས་དར་རྒྱས་ཡོང་བར་བརྩོན་པའི’འགྲོ་ལམ་དུ་ཡག་པོ་སྐྱོད་པ་དང་། སྤུས་ཚད་མཐོ་བའི་འཕེལ་རྒྱས་ལ་བརྟེན་ནས་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་ཆེད་འབད་བརྩོན་ལྷོད་མེད་བྱེད་ཀྱི་ཡིན”ཞེས་བཤད།