ཞོགས་པའི་ཉི་ཟེར་ལྷ་སའི་ལྷ་ཀླུ་འདམ་རའི་དྭངས་གསལ་མེ་ལོང་ལྟ་བུའི་ཆུ་ངོས་སུ་འཕྲོས། སྐོར་སྲུང་བ་བྱམས་པས་འཆམ་འཆམ་དུ་སྐྱོད་སའི་རྐང་ལམ་གྱི་ལག་སྐྱོར་ཞིབ་ཚགས་པོས་འཕྱིས་ཞོར། འདམ་རྩྭའི་གསེབ་ཏུ་བག་ཕེབས་ངང་རྒྱུ་བའི་ཁྲུང་ཁྲུང་མགོ་ཁྲ་དང་ཆུ་ངོས་སུ་ཅི་དགར་རོལ་བའི་ཐིང་རིལ་ལ་ལྟ་བཞིན་དུ་གསར་འགོད་པར། “ཆུ་མོ་དྭངས་ལ་སྔོ་རྩྭ་སྣུམ་པ་དང་། འདབ་ཆགས་མང་ལ་མཁའ་རླུང་ཧ་ཅང་གཙང་མ་འདུག”ཅེས་བྱམས་པས་བཤད།

ད་ལོའི་ཟླ་7པར། ཙམ་པབ་ཝེ་རུ་འཚོཌ་པའི《འདམ་རའི་སྤྱི་ཆིངས》ཀྱི་ཆིངས་ཡིག་འཇོག་མཁན་ཕྱོགས་ཀྱི་ཚོགས་ཆེན་སྐབས་བཅོ་ལྔ་པའི(ＣＯＰ15)ཐོག་ལྷ་ས་གྲོང་ཁྱེར་ལ“རྒྱལ་སྤྱིའི་འདམ་རའི་གྲོང་ཁྱེར”གྱི་བྱང་བུ་དངོས་སུ་སྤྲད་པས། བོད་ཀྱི“རྒྱལ་སྤྱིའི་འདམ་རའི་གྲོང་ཁྱེར”དང་པོར་གྱུར་ཡོད།

ལྷ་ཀླུ་འདམ་རའི་སྤྱིའི་རྒྱ་ཁྱོན་ལ་སྤྱི་ལེ་ངོས་གྲུ་12ལྷག་ཙམ་ཡོད་པ་དེས་ལྷ་ས་གྲོང་ཁྱེར་གྱི་སྐྱེ་ཁམས་དོ་མཉམ་རྒྱུན་འཁྱོངས་དང་། གནམ་གཤིས་སྙོམ་སྒྲིག སྐྱེ་དངོས་སྣ་མང་རང་བཞིན་སྲུང་སྐྱོང་། གསོ་རླུང་གསབ་པ། ཆུ་རྩ་གསོ་འཁྱོངས་སོགས་ལ་ཚབ་བྱེད་ཐབས་བྲལ་བའི་ནུས་པ་འདོན་བཞིན་ཡོད།

ལོ་འདི་དག་ནང་བྱམས་པ་དགའ་ཚོར་ཆེ་ཤོས་ནི་ལྷ་ཀླུ་འདམ་རའི་སྐྱེ་དངོས་སྣ་མང་རང་བཞིན་མངོན་གསལ་དོད་པོས་མང་དུ་ཕྱིན་པ་དེ་ཡིན་ཞིང་། བྱམས་པས“ལོ་འགའ་ཤས་སྔོན་ལ་ང་ཚོ་སྐོར་གཡེང་ལ་སྐྱོད་སྐབས་ཁྲུང་ཁྲུང་སྐེ་ནག་གསུམ་མཐོང་བྱུང་། སྐབས་དེ་དུས་སེམས་ལ་བརྗོད་དཀའ་བའི་དགའ་ཚོར་བྱུང་བ་ད་ལྟའང་བརྗེད་ཀྱི་མི་འདུག ད་ཆ་ཁྲུང་ཁྲུང་སྐེ་ནག་ལྟ་བུ་ནི་ལྷ་ཀླུ་འདམ་རར་རྒྱུན་མཐོང་རེད”ཅེས་བཤད། བསྡོམས་རྩིས་བརྒྱབ་པར་གཞིགས་ན། ལྷ་ཀླུ་འདམ་རར་ད་ཆ་སྦུག་ལྡན་རྩི་ཤིང་རིགས་435དང་། སྒལ་ཚིགས་ཅན་གྱི་སྲོག་ཆགས་རིགས་200 འབུ་སྲིན་རིགས་80ཡོད་པ་རེད།

ལྷ་ཀླུ་འདམ་རར་འགྱུར་ལྡོག་འདི་ལྟ་བུ་བྱུང་དོན་ནི། རྒྱུན་སྲིང་ལྷོད་མེད་ཀྱིས་ཁྲིམས་སྐྱོང་གི་འགན་སྲུང་དང་ཚན་རིག་དང་མཐུན་པའི་ཉམས་གསོ་བྱས་པས་རེད། 1999ལོར་བོད་རང་སྐྱོང་ལྗོངས་རིམ་པའི་རང་བྱུང་སྲུང་སྐྱོང་ཁུལ་བཙུགས་པ་ནས་2005ལོར་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་དུ་རིམ་པ་སྤར་བའི་བར་དང་། དེ་ནས་2010ལོར 《ལྷ་ས་གྲོང་ཁྱེར་ལྷ་ཀླུ་འདམ་ར་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་གྱི་དོ་དམ་སྲོལ་ཡིག》བཏོན་པའི་བར་དུ་སྐྱེ་ཁམས་སྲུང་སྐྱོང་བྱེད་ཐབས་རབ་དང་རིམ་པ་རྒྱུན་ཆད་མེད་པར་འཐུས་སྒོ་ཚང་དུ་ཕྱིན་ཡོད།

“ང་ཚོས་སྐྱེ་ཁམས་རིག་པ་དང་། ས་གཤིས་རིག་པ། གནམ་གཤིས་རིག་པ་སོགས་ཁྱབ་ཁོངས་ཚུད་པའི་རིག་ཚན་བརྒལ་བའི་ཚན་རིག་རྟོག་ཞིབ་རུ་ཁག་མང་པོ་བཙུགས་ཏེ། འདམ་རར་ཕྱོགས་ཡོངས་ནས་བརྟག་དཔྱད་བྱས་པ་དང་། སྐྱེ་ཁམས་ཀྱི་གཞི་རྩའི་དཔྱད་གྲངས་དང་མི་ཆོས་རིག་གནས་ས་ཁམས་སོགས་ཀྱི་དཔྱད་གཞི་བརྒྱུད་རིམ་ལྡན་པའི་སྒོ་ནས་བསྡུ་རུབ་བྱས་ཏེ། རྗེས་མཐུད་ཀྱི་སྲུང་སྐྱོང་ལས་དོན་ལ་གྲངས་གཞི་དང་རིགས་པའི་གཞུང་ལུགས་ཀྱི་རྨང་གཞི་བཏིང་ཡོད”ཅེས་ལྷ་ཀླུ་འདམ་ར་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་དོ་དམ་ཅུས་ཀྱི་ཅུས་ཀྲང་ལྷ་མོ་ཚེ་རིང་གིས་བཤད་པ་དང་། ཁོང་གིས། བོད་ཀྱིས་སྔ་རྗེས་སུ་སྒོར་དུང་ཕྱུར་8.5ཙམ་བཏང་ནས་ལྷ་ཀླུ་འདམ་རའི་དུས་ཐེངས་དང་པོ་ནས་བཞི་པ་བར་གྱི་སྲུང་སྐྱོང་ལས་གྲྭ་ལག་བསྟར་བྱས་ཏེ། འདམ་རར་ཆུ་གསོག་དང་། རྩྭ་རྩི་ཤིང་ཉམས་གསོ། འདམ་ར་དང་མཐའ་འཁོར་གྱི་སྐྱེ་ཁམས་ཁོར་ཡུག་བཅོས་སྐྱོང་མཐོར་གཏོང་སོགས་ཀྱི་ལས་གྲྭ་གཉེར་ཡོད་ཅེས་བཤད།

འདམ་རའི་སྐོར་སྲུང་བ་ཞིག་ཡིན་པའི་ཆ་ནས་བྱམས་པ་དེ་གར་ལས་ཀ་བྱས་ནས་ལོ་20ལྷག་ཙམ་འགྲོ་ཡི་ཡོད་ཅིང་། ཁོང་གིས་ལས་རོགས་50ལྷག་ཙམ་དང་མཉམ་དུ་འདམ་ར་འདི་བསྲུངས་དང་སྲུང་མུས་རེད། “ང་ཚོས་དུས་བཀག་ལྟར་ཕྱི་སྐོར་གྱི་ཆུ་རྒྱུད་གཙང་གསིང་བྱེད་པ་མ་ཟད། ཉིན་ལྟར་སྐོར་གཡེང་བྱེད་པར་ཡོང་གི་ཡོད”ཅེས་བྱམས་པས་བཤད།

གྲངས་གཞི་ལས་མངོན་པར། ལྷ་ཀླུ་འདམ་རའི་མཐའ་འཁོར་དུ་དབྱར་ཁ་གསོ་རླུང་འདུས་ཚད་80%ཡས་མས་ཟིན་པ་དང་། དགུན་ཁར་ཡང་གྲོང་ཁུལ་གྱི་དུས་མཚུངས་ཆུ་ཚད་ལས་10%ཙམ་གྱིས་མཐོ་བ་ཡོད་པ་རེད། ས་སྲོད་ཀྱི་མཚམས་སུ་གྲོང་མི་འཛོམས་པ་ནང་མི་དང་མཉམ་དུ་འདམ་རའི་མཐའ་འཁོར་དུ་འཆམ་འཆམ་བྱེད་པར་གོམས་ཡོད། “མཁའ་རླུང་གཙང་བའི་ཁར་ཡུལ་ལྗོངས་མཛེས་པས་འདི་གར་གྲོང་མི་རྣམས་འཆམ་འཆམ་དུ་འགྲོ་ས་ཡག་པོ་ཞིག་འདུག”ཅེས་འཛོམས་པས་བཤད། ད་ཆ་ལྷ་ཀླུ་འདམ་ར་ནི་རི་སྐྱེས་སྲོག་ཆགས་དང་རྩི་ཤིང་གི་དགའ་ཚལ་ཞིག་ཡིན་ལ། གྲོང་མི་དང་ཡུལ་སྐོར་བ་རྣམས་རང་བྱུང་ཁམས་དང་བར་ཐག་ཉེ་པོས་འཚོ་བར་དགའ་བས་རོལ་བའི་སྐྱེ་ཁམས་ཀྱི་བར་མཐོངས་ཤིག་དེ་བས་རེད།